Nu ra Pablo i pɛnba ran zɛngua yʉ́ amigo
16
Nuna man juhʉ ra Febe, mi tsꞌʉtho da mba bʉ guí ꞌbʉhmbʉ ya nɛ di zɛngua ahʉ na. Nuna, rá ꞌbɛfi im fäxte ram pɛti bʉ Cencrea. 2 Nɛ dami simanhohʉ na, nangue rá thuhu ma Hmuhʉ, ngue nujʉ dyʉ ꞌyɛ̨cꞌyɛihʉ gueꞌa man sähʉ ga øthʉ. Nɛ dami fäxhʉ ꞌbɛꞌa gätho ní ꞌbɛfi da ꞌyøtꞌa ra Febe, nguetho guesɛ bi mbäx ʉ xʉn ngu miꞌda, nɛcä bi mbäxqui. 3 Dami zɛnguagui tsꞌʉ bʉ ra Priscila, nɛ ra Aquila rá ndø, ma mimbɛfihe nangue rá ꞌbɛfi ra Cristo Jesús. 4 Nɛ nugä ꞌbʉ mi tꞌɛ̨na xtá thogä, nɛ ʉ mi tꞌɛ̨na xtá tho ʉ ꞌbʉ mí yąngä ꞌbʉ nꞌdandį. Gueꞌa ná undä ra jamadi Oją nangue ʉ. Pɛ hinga høngdä pɛ nɛ ʉ gätho yʉ́m pɛti yʉ ꞌyɛ̨cꞌyɛi ngue hing yʉ judío, ꞌda xna undähe ra jamadi Oją nangue ʉ. 5 Nɛ dami zɛnguagui tsꞌʉ ʉ gätho dim pɛti bʉ rá ngusɛ ra Aquila. Nɛꞌa ma amigogä ra Epeneto dami zɛnguagui tsꞌʉ bʉ a. Nuꞌa ra mbʉdi ꞌyɛ̨cꞌyɛi bʉ ja ra häi Acaya a. 6 Nɛꞌa ra María, dami zɛnguagui tsꞌʉ bʉ. Nuꞌa ɛ̨mmɛ xʉn ngu ra ꞌbɛfi bi ꞌyøtꞌe nangue ahʉ. 7 Nɛ a ra Andrónico nɛ ra Junias ma mijudíohe, nɛ ꞌdarbʉ dá sähe ran ʉnbi. Nuꞌʉ gätho yʉ́ ꞌbäihʉ ra Cristo i numanho ʉ, nɛ mꞌbɛtꞌo bi ꞌyɛ̨cꞌyɛi ra Cristo ʉ xinda guecä. 8 Nɛ a ra Amplias dami zɛnguagui tsꞌʉ bʉ. Dadí huɛ̨cä a nangue rá thuhu ra Hmu. 9 Nɛ dami zɛnguagui tsꞌʉ bʉ ra Urbano, ma mimbɛfiꞌbe nangue ra Cristo, nɛ ra Estaquis ngue dadí huɛ̨qui. 10 Nɛ a ra Apeles dami zɛnguagui tsꞌʉ bʉ. Nuꞌa ɛ̨mmɛ bi tsꞌä rá tꞌɛ̨cꞌyɛi, nɛ bi bømanho. Nɛ ʉ ꞌbʉpʉ ja rá ngu ra Aristóbulo dami zɛnguagui tsꞌʉ bʉ. 11 Nɛ a ra Herodión ma mijudíoꞌbe, nɛ ʉ ꞌbʉpʉ ja rá ngu ra Narciso, gue nu yʉ ꞌyɛ̨cꞌyɛi ꞌbʉpʉ, dami zɛnguagui tsꞌʉ bʉ. 12 Nɛ a ra Trifena nɛ ra Trifosa dim pɛfi nangue ra Hmu, gätho dami zɛnguagui tsꞌʉ bʉ. Nɛ a ra Pérsida mahuɛ̨qui a, nɛ a xʉn ngu ra ꞌbɛfi bi ꞌyøtꞌe nangue ra Hmu. 13 Nɛ dami zɛnguagui tsꞌʉ a ra Rufo, an thahni da ꞌyørpa rá ꞌbɛfi ra Hmu, nɛ a rá mbe tenguꞌbʉ ma mbegä a. 14 Nɛ a ra Asíncrito, nɛ ra Flegonte, nɛ ra Hermas, nɛ ra Patrobas, nɛ ra Hermes, nɛ ʉ yʉn ꞌyohʉ bí ꞌbʉhmbʉ ʉ, dami zɛnguagui tsꞌʉ bʉ. 15 Nɛ a ra Filólogo, nɛ ra Julia, nɛ ra Nereo nɛ a rán ju a, nɛꞌa ra Olimpas, nɛꞌʉ gätho miꞌda yʉ ꞌyɛ̨cꞌyɛi bí ꞌbʉpʉ. 16 Nɛ damín zɛnguahʉ nꞌda ngu nꞌda ahʉ nangue ran huɛ̨cate. Nɛ gätho yʉ́m pɛti yʉ ꞌyɛ̨cꞌyɛi ja ua i pɛnꞌnahʉ ran zɛngua.Nꞌda ran zofo rán zɛgui bi man ra Pablo
17 Pɛ dí xi ahʉ ma zi cu ahʉ, damim fäsɛhʉ nangue ʉ toꞌo in nde di hecꞌahʉ gue di ꞌuecꞌahʉ nangue a ra hogamhma gán xänbahʉ. Pɛ hin gui ꞌyʉrbahʉ ra güɛnda ʉ. 18 Nɛ nuꞌʉ yʉ ꞌyʉꞌtꞌate, hingui ørpa rá ꞌbɛfi ma Hmuhʉ ra Jesucristo ʉ. Nɛ i häte thoho nangue ɛ̨mmɛ xʉn ho ꞌbɛꞌa mma nɛ i sixmanho ahʉ. Pɛ i härpa yʉ́ mbʉi ʉ ꞌda hingui pądi dim fäsɛ. Nɛ gueꞌʉ yʉ́ ꞌbɛfi zɛhɛ i øtꞌʉ. 19 Pɛ nuꞌʉ miꞌda gätho i pądi hin guí fɛstahʉ rám hman Oją. Janangueꞌa i hu ma mbʉigä. Pɛ dadí hɛcꞌa thohohʉ ngueꞌa dín nde ahʉ gui pąhmbʉ gätho ꞌbɛꞌa xʉn ho, pɛ nuꞌa hingui ho hin dín nde ahʉ gui pąhmbʉ a. 20 Nɛ nu Oją ngueꞌa nząi di hoc ra sʉi, nuꞌa di ja ahʉ ꞌdahmantho gui ꞌyɛthʉ bʉ häi ra zįthu nangue ʉ to in nde di hecꞌahʉ. Janangueꞌa gui comhbʉ rá mate ma Hmuhʉ ra Jesucristo. Nɛ høntꞌa gam bɛ̨mhbʉ a ya. 21 Nuna ra Timoteo i pɛnꞌnahʉ ran zɛngua, ma mimbɛfiꞌbe na. Nɛhna ra Licio nɛhna ra Jasón, nɛhna ra Sosípater, ma mijudíohe ya, gätho i pɛnꞌnahʉ ran zɛngua. 22 Nugä dí Terciogä rá ꞌyosøcuągä ra Pablo, dí oꞌtꞌä ra søcuą ja ua, dadí zɛngua ahʉ nangue ma Hmuhʉ. 23 Nɛhna ra Gayo, i pɛnꞌnahʉ ran zɛngua, nuna di säyagui ua rá ngu drá Pablogä, nɛ ʉ gätho yʉ ꞌyɛ̨cꞌyɛi di säyabi ua rá ngu. Nɛhna ra Erasto i ja rá ꞌbɛfi i hąx ra mbɛti ua ja ra hnini, nɛhna man ꞌyohʉhʉ ra Cuarto, gätho i pɛnꞌnahʉ ran zɛngua. 24 Dami comhbʉ rá mate ma Hmuhʉ ra Jesucristo gue gätho ahʉ.
Høntꞌa Oją ga ɛ̨spahʉ gätho yʉ pa maząi
25 Ząi ga ɛ̨spahʉ Oją, nuꞌa i ja rá tsꞌɛdi di zɛtꞌa ni tꞌɛ̨cꞌyɛihʉ ꞌbʉ guím bɛ̨mhbʉ ran ho maꞌdaꞌyo ngue ꞌbɛꞌa bi ꞌyøtꞌ ra Jesucristo, tengu dím mangä. Nguetho nuya i si ahʉ ram hma ngue mayaꞌbʉ thoho him mí fądi. 26 Pɛ nuya i pa mhman ya, nɛ i sifi gätho yʉ jąꞌi hønbʉ go hapʉ i ꞌbʉi gätho ra ximhäi. Nɛ nuꞌa ram hma i hman ya, guetꞌʉ yʉ́m hman ʉ yʉ́ pøngahyą Oją mayaꞌbʉ. Nɛ i hman ya nangue rán tꞌɛ̨di Oją gue i ꞌbʉi maząi, in ndepe gätho yʉ jąꞌi da ꞌyɛ̨cꞌyɛi ra hogamhma. 27 Ɛ̨mmɛ xʉn ho rá ꞌyu Oją bi ꞌdajʉ, janangueꞌa ga ɛ̨spahʉ Oją gätho yʉ pa maząi nangue ga ɛ̨spahʉ ra Jesucristo. Nɛ høntꞌa dí xi ahʉ ya.