Høntꞌa ram hma ꞌbɛꞌa í du ra Cristo i ja rá tsꞌɛdi
2
Ma zi cu ahʉ, nuꞌbʉ má mbagä bʉ guí ꞌbʉhmbʉ, ngue dá xi ahʉ rám hman Oją majuąni, pɛ hin dá huan thohogä yʉm hma guepʉ da numanhogä ra ximhäi, nɛ hin te dá ma nangue man ꞌyomfɛ̨nisɛ. 2 Nɛ nuꞌbʉ má bɛ̨ni ga mba bʉ guí ꞌbʉhmbʉ, pɛ dá bɛ̨ni høntꞌa ga xi ahʉ ꞌbɛꞌa ín ʉnba ra Jesucristo ꞌbʉ mí du bʉ ja ra pontꞌi. 3 Nɛ nuꞌbʉ mám ꞌbʉhmbʉ bʉ, dá øtꞌä hinꞌyʉ ma tsꞌɛdi, nguetho dá su Oją hin da numanho ꞌbʉ xcá uąspa mam hmansɛ, nɛ dá fɛtꞌi. 4 Nɛ nuꞌbʉ mán yąhʉ bʉ ngue dá xi ahʉ ram hma, hinga gueꞌa mam hmansɛ ngue mahotho bi pät a ni mbʉihʉ, pɛ høntꞌa rá tsꞌɛdi rá Hogandąhi Oją bi zä bi hoc a ni mbʉihʉ. 5 Janangueꞌa hinga gueꞌʉ yʉ́n ꞌyomfɛ̨ni ꞌda yʉn ꞌyohʉ bi ja ahʉ gá ꞌyɛ̨cꞌyɛ̨ihʉ Oją, pɛ høntꞌa rá tsꞌɛdi zɛhɛ Oją bi ja ahʉ gá ꞌyɛ̨cꞌyɛihʉ.Rá Hogandąhi di japi dí fą Oją
6 Pɛ nuꞌa ram hma dím mamhbʉ nangue ra Cristo, go i pą ʉ xʉn ho yʉ́ tꞌɛ̨cꞌyɛ̨i, ngue ran ꞌyomfɛ̨ni majuąni a. Nɛ hinga gueꞌa rán ꞌyomfɛ̨ni ra ximhäi bi bą ʉ xʉn ho yʉ́ tꞌɛ̨cꞌyɛ̨i, xinga gueꞌʉ yʉ́m hmansɛ ʉ yʉ́ ngʉrpi ra ximhäi, nɛ nuꞌʉ mi tsꞌʉtho di ꞌbɛh yʉ́ tsꞌɛdi. 7 Pɛ nu ran ꞌyomfɛ̨ni dím mamhbʉ him mám fądi, pɛgue urcahʉ Oją ya, nangue ra Cristo mi sänni da yąnjʉ ꞌbʉ him mani ꞌyøtꞌ ra ximhäi, nɛ da zixcahʉ bʉ mahɛ̨tsꞌi ní comhbʉ rán ho bʉya. 8 Pɛ xinga nꞌda ʉ i ɛ̨na jasɛ yʉ́ tsꞌɛdi ua ja ra ximhäi ngue i pąrpa rán ꞌyomfɛ̨ni Oją. Nuꞌbʉ xtám bąꞌʉ ꞌda, hin xtí cuarpʉ ja ra pontꞌi a ra Hmu mixte. 9 Pɛ tengu mán tꞌoꞌtꞌi bʉ ja rá tꞌohni Oją:
Hin da zä da bąsɛ nꞌda a ran ho bi zän Oją da ꞌyørpa ʉ toꞌo høntꞌa Oją im bɛ̨ni,
nɛ njąmꞌbʉ da zä da ꞌyøsɛ nꞌda,
nɛ njąmꞌbʉ da zä da nusɛ nꞌda, bi ꞌyɛ̨n rá tꞌohni Oją.
10 Pɛ nujʉ dí pąhmbʉ a, nguetho bi xijʉ rá Hogandąhi Oją. Nɛ nu rá Hogandąhi Oją di ątsꞌi xʉn ho bʉ ja rán ꞌyomfɛ̨ni Oją, nɛ gueꞌa i xijʉ a bʉya. 11 Tengu yʉ jąꞌi hin jon da zä da bąrpa rá mbʉi rá mijąꞌiui, pɛ hinda høntꞌa rá mbʉi zɛhɛ nꞌda i pądi. Nɛ in jabʉ Oją, njon da bąrpi ꞌbɛꞌa mbɛ̨ni, pɛ hinda høntꞌa rá Hogandąhi zɛhɛ i pądi. Nɛ di bɛ̨ngahʉ a. 12 Nguetho bi ꞌdajʉ rá Hogandąhi Oją, nɛ hinga gueꞌa rán ꞌyomfɛ̨ni ra ximhäi, ngue in nde di bɛ̨ngahʉ rán ꞌyomfɛ̨ni Oją, nɛ gätho yʉ́ hogantꞌunni bi ꞌdajʉ nangue rá mate xʉn ndoho. 13 Pɛ nuꞌbʉ dím mamhbʉ rán ꞌyomfɛ̨ni Oją, pɛ hin dí uąspahʉ yʉm hma nangue man ꞌyomfɛ̨ni sɛhʉ, pɛ høntꞌʉ yʉm hma bi xängahʉ rá Hogandąhi Oją, nɛ da zä dí xihmbʉ xʉn ho ʉ toꞌo bin tꞌun rá Hogandąhi Oją. 14 Pɛ nuꞌa hingui ꞌbʉhmi rá Hogandąhi Oją, hingui sä da hyąni ꞌbɛꞌa gätho i xängahʉ rá Hogandąhi Oją, nɛ ɛ̨mbi rám hman a nꞌda ra ꞌyąmbʉi. Nɛ njąmꞌbʉ sä da bądi, hinda høntꞌbʉ dim ꞌbʉhmi rá Hogandąhi Oją. 15 Pɛ nuꞌa ra jąꞌi ngue ꞌbʉhmi rá Hogandąhi Oją da zä da bądi ꞌbɛꞌa nam bønꞌa ꞌbɛꞌa gä i ja, ngue ndaꞌa da numanho nɛ ndaꞌa hin da numanho. Pɛ nuꞌa hing ra ꞌyɛ̨cꞌyɛi hin da zä da bąrpa yʉ́n ꞌyomfɛ̨ni ʉ yʉ ꞌyɛ̨cꞌyɛ̨i. 16 Njon da ꞌyɛ̨nsɛ da bąrpa rán ꞌyomfɛ̨ni Oją ra Hmu, njoꞌo da xifi xʉn ho ꞌbɛꞌa da ꞌyøtꞌ Oją. Pɛ nujʉ dí comhbʉ a rán ꞌyomfɛ̨ni a ra Cristo.