I comhbʉ Oją rá ꞌbɛfi ʉ yʉ́ mbɛfi
3
Ma zi cu ahʉ, nuꞌbʉ mám ꞌbʉhmbʉ bʉ him bi zä dá xi ahʉ ʉ xʉn hɛ̨i tengu i si ʉ in ꞌyoui xʉn ho rá Hogandąhi Oją. Pɛ dá xi ahʉ tenguꞌbʉ gmí ꞌyothohʉ ua ja ra ximhäi, uague tenguꞌbʉ ja gním ꞌbʉhmbʉ nangue ra Cristo. 2 Pɛ dá xi ahʉ a hingui hɛ̨i tenguꞌbʉ ra xiꞌba thoho dá ꞌda ahʉ, nguetho tenguꞌbʉ hin ní zä gui sihʉ xʉn ho ra hmɛ. Nɛ ngutho ya, guextaꞌa høntꞌa ra xiꞌba da zä gdín sihmɛhʉ. 3 Nguetho hin guín zac ni mbʉihʉ. Nɛ guín nde gam mixte zɛhɛhʉ, jananjabʉ gadín sʉhmbʉ. Pɛ ha hin guí øthʉ tenguꞌbʉ gyʉ jąꞌi thohohʉ ua ja ra ximhäi. 4 Nguetho guím mamhbʉ toꞌo guí tɛnhdʉ, nɛ ꞌdaꞌahʉ guí ɛ̨mhbʉ guí tɛngahʉ, nɛ miꞌda ɛ̨na tɛn ra Apolo. Pɛ gueꞌa gní ꞌyøthʉ tenguꞌbʉ gyʉ́ jąꞌi thohohʉ. 5 ꞌBɛꞌa dadí muꞌbe a ra Apolo. Ha hin guí pąhmbʉ ngue yʉ́ mbɛfi thoho gäꞌbe Oją, ngue dá fäxaꞌbe gá ꞌyɛ̨cꞌyɛihʉ ra Hmu, nangue ra ꞌbɛfi bin ꞌdacꞌbe nꞌda ngu nꞌda gäꞌbe. 6 Nugä dá tuh ra hmudä bʉ, nɛ nuꞌa ra Apolo bi uąpi, pɛ nuꞌa Oją bi japi bin te nɛ bi bøx ʉ yʉ hmudä. 7 Janangueꞌa hinꞌyʉ rá tsꞌɛdi a bi duh ra hmudä, xinga gueꞌa bi uąpi, pɛ høntꞌa Oją i ja rá tsꞌɛdi ngue bi japi bin te yʉ hmudä a. 8 Nɛ nugä dí comhmaꞌbɛfiꞌbe a ra Apolo, nɛ nugä dá tuhu, nɛ nuꞌa ra Apolo bi uąpi. Nɛ di ꞌdacꞌbe Oją ꞌbɛꞌa in nde di ꞌdacꞌbe nangue ra ꞌbɛfi dá øtꞌbe nꞌda ngu nꞌda gäꞌbe. 9 Nɛsɛ Oją dí comhbe rá ꞌbɛfi. Nɛ nuꞌahʉ tenguꞌbʉ yʉ́ huąhi ahʉ Oją ngue bi thuhu.Nɛ nuꞌahʉ tenguꞌbʉ nꞌda ra ngu ngue i hø a Oją. 10 Nɛ nugä tenguꞌbʉ nꞌda drá ngʉrpagądo nangue rá mate zɛhɛ Oją, ngue dá fäꞌmi xʉn ho yʉ́ guangujądo a ra ngu. Nɛ nu manꞌda pɛ di thoqui dim pɛpʉ ja a ra ngu. Pɛ nꞌda ngu nꞌda ra mbɛfi ꞌbʉ dim pɛpʉ ja a ra ngu, pɛ i jatho dim pɛfi xʉn ho. 11 Nɛ njon da zä di pärpa a rá guangujądo ra ngu, nɛ høntꞌa ra Jesucristo ngue rá guangu nꞌda rá ngu Oją. 12 Pɛ nuꞌʉ toꞌo di thocꞌa ra ngu, sä da huahni xʉn ho ꞌbɛꞌa da japi. Xʉn ho ꞌbʉ xøtho yʉ do dí føꞌtꞌa ra ngu, nɛ nu rá ꞌbetꞌe, xøtho yʉ tꞌɛgui ʉ. Pɛ ꞌboꞌo im bɛ̨ni dí føꞌtꞌ yʉ za, o gue yʉ ꞌyoxꞌyo, nɛ ꞌboꞌo im bɛ̨ni dí mbetꞌ yʉ paxi. 13 Nɛ nu yʉ́ ꞌbɛfi nꞌda ngu nꞌda yʉ ꞌyɛ̨cꞌyɛi da hnu hangu nangu di muui ꞌbʉ bi zøn ra pa din ja ran juąnbi. Nguetho da zøn ra pa da tsꞌä nangue ra sibi, nɛ da fąh pʉya gueꞌbʉ xʉn ho bi ꞌyøt rá ꞌbɛfi nꞌda ngu nꞌda yʉ ꞌyɛ̨cꞌyɛ̨i. 14 Nɛ nuꞌbʉ nꞌda ra mbɛfi bi hyätꞌ ra sibi a rá ngu bi hyøe, da dąh rán zäbi bʉya. 15 Pɛ nuꞌbʉ bin zø a ra ngu bi hyøe, nɛ nte da dąh rán zäbi bʉya nangue rá ꞌbɛfi bi ꞌyøtꞌe. Nɛ maguepʉ hin xtám bongui, tengu ʉ ꞌda bi ꞌda ꞌbʉ min zø yʉ́ ngu. 16 Pɛ ha hin guí pąhmbʉ ngue gue ahʉ yʉ́ ngu ahʉ Oją, nɛ nu rá Hogandąhi Oją i ꞌbʉpʉ mbo ni mbʉihʉ. 17 Nɛ nuꞌa toꞌo da ꞌyɛ̨na di tsꞌonba rá ngu Oją, ɛ̨mmɛ xʉn ngu yʉn ʉnbi da ꞌyørpa Oją. Nguetho nu rá ngu Oją xʉn ndʉxqui a, nɛ guesɛ ahʉ rá ngu ahʉ Oją. 18 Nɛ hin da zä gui thoqui gan hyäzɛhɛhʉ ngue guim bɛ̨mhbʉ jasɛ nin ꞌyomfɛ̨nihʉ. Pɛ jatho gam pumbɛ̨nihʉ a guím bɛ̨nsɛhʉ, janangueꞌa da zä gui tįmhbʉ a njuąntho ran ꞌyomfɛ̨ni xʉn ho. 19 Pɛ nu rán ꞌyomfɛ̨ni ra ximhäi nte di muui bʉ na nu Oją. Nɛ gueꞌa mán tꞌoꞌtꞌi bʉ rám hman a, ngue nuꞌa nín ꞌyomfɛ̨nisɛ nꞌda ꞌbʉ i ɛ̨na dim mixte, pɛ di jap Oją dim ꞌbɛsɛ bʉ nꞌda bʉya. 20 Nɛ manꞌda bi man ram hma, ngue nuꞌa toꞌo ɛ̨na jasɛ yʉ́n ꞌyomfɛ̨ni, pɛ go i pą a ra Hmu ngue nte di muui ʉ yʉ́n ꞌyomfɛ̨ni. 21 Janangueꞌa hin guim bɛ̨mhbʉ manꞌda di muui nꞌda ra jąꞌi. Pɛ Oją bi ꞌda ahʉ gätho ni ngʉrpihʉ ngue da mbäx ahʉ. Nɛ gätho ʉ i jaua ja ra ximhäi nɛꞌʉ ꞌbɛꞌa gä i ꞌbʉi, nɛ bi zän Oją di zɛ ahʉ ʉ. 22 Nɛcä ngue drá Pablogä dí fäx ahʉ, nɛ ra Apolo, nɛ ra Pedro. Pɛ nɛꞌa ꞌbɛꞌa gätho dín nuhʉ ua ja ra ximhäi i fäxcahʉ ga pąhmbʉ Oją, nɛ ra te i fäxcahʉ, nɛ ran dąte, nɛ ra pa i jabʉ ya, nɛ ra pa ba ɛ̨hɛ. Nɛ janangueꞌa gätho ni mbɛtihʉ ʉ. 23 Nguetho yʉ́ mbɛti ahʉ ra Cristo nɛ nu ra Cristo rá mbɛti Oją a.