Yʉ́ ꞌbɛfi i øtꞌ yʉ́ ꞌbäihʉ ra Cristo
4
Pɛ nugä nɛ ra Apolo, nɛ jatho guim bɛ̨mhbʉ ngue yʉ́ ꞌyɛ̨hɛ gäꞌbe ra Cristo, bin ꞌdacꞌbe ra ꞌbɛfi ngue ga xi aꞌbe rám hman Oją him mám fądi. 2 Pɛ damím bɛ̨mhbʉ, nꞌda ra ꞌyɛ̨hɛ̨ thoho ꞌbʉ bin tꞌun ra ꞌbɛfi, i jatsꞌɛdi tho di jąꞌtsꞌa sifi. 3 Pɛ hin dí ʉrpä a ra güɛnda a guím bɛ̨mhbʉ, ximangutho ʉ miꞌda yʉ jąꞌi ɛ̨ngui hin dí jąꞌtsꞌi. Nɛ xínga guecä i sä ga pąsɛ ꞌbʉ dí jąꞌtsꞌi uague hinꞌna. 4 Pɛ nu ma mbʉigä dím bɛ̨ni hin dá soh ma ꞌbɛfi. Pɛ madagueꞌbʉ ngubʉ dím bɛ̨nsɛ, pɛ jatho ga tøꞌmi gueꞌbʉ go da nusɛ Oją ꞌbɛꞌa dá øtꞌä. 5 Pɛ hin go mꞌbɛtꞌo gui ꞌyɛ̨mfʉ hingui ho bi ꞌyøtꞌa nꞌda. Pɛ ꞌbɛ gui tømhbʉ ba ɛ̨h ra Hmu, nɛ gätho di nɛqui bʉya ꞌbɛꞌa mim bɛ̨mhbʉ mbo ma mbʉihʉ nꞌda ngu nꞌdajʉ. Nɛ di un Oją bʉya ꞌbɛꞌa rán säui a bi ꞌyøtꞌa nꞌda ngu nꞌda ra ꞌyɛ̨cꞌyɛi. 6 Nu ram hma dí xi ahʉ, ma zi cu ahʉ, nanguecäꞌbe ra Apolo, pɛ nꞌda ran zofo ngue hin da dontsꞌi ꞌbɛꞌa gui ꞌyøthʉ. Nɛ him man guim bɛ̨mhbʉ i ja rá tsꞌɛdi nꞌda ra xänbate, nɛ xín guim bɛ̨mhbʉ nꞌdatho xʉn ho xinda gueꞌʉ miꞌda. Janangueꞌa hin gui thoqui gan ꞌyɛ̨xhʉ. 7 Pɛ toꞌo bi ja ahʉ ngue xʉn ho ahʉ xinda gueꞌʉ miꞌda. Gätho ꞌbɛꞌa i ja ahʉ bi ꞌda ahʉ Oją. Nɛ nuꞌbʉ guí pąhmbʉ bin ꞌdaꞌadahʉ ꞌbɛꞌa gä i ja ahʉ, pɛ hanja gnán ꞌyɛ̨zɛhɛhʉ, tenguꞌbʉ gá tįnsɛhʉ a ran ho i ja ahʉ. 8 Pɛ guí øthʉ tenguꞌbʉ gám hmusɛhʉ, ngue hin te guidí ꞌbɛhmbʉ, nɛ tenguꞌbʉ ya bin ꞌda a ni tsꞌɛdihʉ ngue guidí mandahʉ gätho miꞌda. Pɛ nuya tenguꞌbʉ ya gá sogahe. Pɛ hyøcta hmaha ꞌbʉ xquí søni ngue xtín ja ni tsꞌɛdihʉ, nguetho nɛcähe nꞌdatꞌa xtín ꞌdac ma tsꞌɛdihʉ ꞌbʉ. 9 Pɛ nugähe ngue ma ꞌbäihe ra Cristo, dím bɛ̨mhbe Oją bi ꞌyørcähe ngue i hnuhäigahe xinda gue gätho miꞌda. Nɛ tenguꞌbʉ dyʉ́ ofädihe i pɛꞌtsꞌi da thoje. Nɛ i pa ma ʉnguigahe ꞌbʉ i thengahe ra ximhäi. Nɛꞌʉ yʉ́m ꞌbɛhni Oją mahɛ̨tsꞌi di hyonya thoho nangue ꞌbɛꞌa dí sähe. 10 Nɛ nuje tꞌɛ̨nje dyʉ́ ꞌyąmbʉihe, nguetho dí tɛnhde ra Cristo. Pɛ nuꞌahʉ ɛ̨mmɛ guí homhbʉ da tꞌɛ̨n ahʉ i ja nin ꞌyomfɛ̨nihʉ nguetho guí ɛ̨na guí tɛnhdʉ ra Cristo. Pɛ nugähe hinꞌyʉ ma tsꞌɛdihe bʉ na hnuje, pɛ nu bʉ na hnu ahʉ tenguꞌbʉ ɛ̨mmɛ i ja ni tsꞌɛdihʉ. Nɛ ɛ̨mmɛ i pa ntꞌɛ̨ꞌtsꞌi ahʉ, pɛ nugähe i pa ntsꞌani gähe. 11 Nɛ gätho yʉ pa xʉ thogui, nɛ gätho yʉ pa i jabʉ ya, ɛ̨mmɛ dí sähe ra thuhu, nɛ ra tuthe, nɛ dyʉ́ ꞌyąhehe, nɛ pa mꞌbɛꞌmigahe, nɛ hin hapʉ pøni i ja ma ngumhbe. 12 Nɛ ɛ̨mmɛ dí yähmbe ngue dadím pɛsɛhe nangue ma ꞌyɛhe. Nɛ ɛ̨mmɛ i tsꞌanje, pɛ manꞌda dí äfe rán jąpi Oją nangue ʉ i sante. Nɛ ɛ̨mmɛ pa ma ʉngui gahe, pɛ mpähä thoho dí häthe ꞌbɛꞌa i tꞌørcahe. 13 Nɛ di cꞌąmanꞌʉje, pɛ manꞌda dín zomanhohe. Nɛ ngutho yʉ pa jabʉ ya, i tꞌørcahe tenguꞌbʉ dyʉ́ ngohäihe ra ximhäi ngue hinꞌyʉ ꞌbɛꞌa dadí muje. 14 Pɛ hin dín nde ahʉ gui pɛꞌtsꞌ ni sähʉ nanguehna dí xi ahʉ. Pɛ dadí ꞌda ahʉ nꞌda ran zofo, nguetho tenguꞌbʉ ma tꞌʉhni ahʉ ɛ̨mmɛ dadí huɛ̨cꞌahʉ. 15 Pɛ madagueꞌbʉ xquín nuhʉ ꞌdɛtꞌa mahuąhi ni ngʉrpihʉ i xänꞌnahʉ nangue ra Cristo, pɛ høntꞌa nꞌdatho ni tahʉ i ꞌbʉi, ngue guecä, nguetho rá mbʉdi thoho dá xi ahʉ nangue ra Cristo, jananjabʉ gá ꞌyɛ̨cꞌyɛihʉ bʉya. 16 Janangueꞌa dí äꞌahʉ ra mate ngue gui ꞌyøthʉ tengu dí øtꞌä. 17 Nɛ gueꞌa dá pɛhndä bʉ ra Timoteo, ngue di zɛ ahʉ. Nɛ nuꞌa tenguꞌbʉ majuąni ma tsꞌʉntꞌʉ ngue ɛ̨mmɛ dadí huɛ̨qui, nɛ di jąꞌtsꞌi xʉn ho, nguetho ɛ̨cꞌyɛi xʉn ho a ra Hmu. Nɛ di bɛ̨nꞌnahʉ ngue ꞌbɛꞌa dí øtꞌä ngue dí tɛnni xʉn ho ra Cristo Jesús. Nɛ ngutho dím mangä bʉ hapʉ gätho i ja yʉ́m pɛti yʉ ꞌyɛ̨cꞌyɛi. 18 Nu bʉ guí ꞌbʉhmbʉ, i ꞌbʉpʉ ꞌda im bɛ̨ni jasɛ yʉ́ tsꞌɛdi, im bɛ̨ni ngue hin ga mba bʉ. 19 Pɛ mi tsꞌʉtho ga mba bʉ gan nuꞌahʉ ꞌbʉ da nde Oją. Nɛ ga pądi toꞌo gätho i ɛ̨na i jasɛ yʉ́ tsꞌɛdi. Nɛ hinga høntꞌʉ yʉ́m hma ga øtsꞌe, pɛ gan nu ꞌbʉ majuąni i ja yʉ́ tsꞌɛdi nangue Oją. 20 Nguetho nuꞌbʉ majuąni di manda Oją bʉ ja rá mbʉi nꞌda, hinga høntho da bądi din yą xʉn ho, pɛ din ja ra tsꞌɛdi njuąntho. 21 Ha guín ndehʉ ga fɛmhyą ahʉ ꞌbʉ dá mbagä bʉ, uague guín nde ga huɛ̨cꞌahʉ ꞌbʉ dá søngä bʉ.