Da thønꞌa thi nꞌda ra ꞌyɛ̨cꞌyɛi bi ꞌyøtꞌe tenguꞌbʉ ran ꞌyomtꞌɛ̨ni
5
Nɛ dí øcä bin thątui rá hømbe nꞌda ra cu. Pɛ nꞌda ran thąti gá ꞌyøthʉ ɛ̨mmɛ xʉn tsꞌotho, tenguꞌbʉ ran ꞌyomtꞌɛ̨ni. Nɛ njoꞌo toꞌo numanho tengu a, xínga gueꞌʉ yʉ jąꞌi hingui ɛ̨cꞌyɛi Oją. 2 Nɛ sä ɛ̨mmɛ guídín ꞌyɛ̨xhʉ guí ɛ̨mhbʉ nte guídí ꞌbɛhmbʉ. Pɛ xingui tsꞌʉ tu ni mbʉihʉ nangue ꞌbɛꞌa bi ꞌyøtꞌa. Hanja ngue hin guí hømhbʉ thi a. 3 Pɛ madagueꞌbʉ njoꞌogä bʉ guí ꞌbʉhmbʉ, pɛ tenguꞌbʉ ꞌdarpʉ dí ꞌbʉhmbʉ, ngue dá sändä a ran ʉnbi da nu a bi ꞌyøtꞌ ra tsꞌoqui, tengu tho ꞌbʉ ya dí ꞌbʉcä bʉ. 4 Pɛ i jatho gätho gam pɛtihʉ nangue rá thuhu ma Hmuhʉ ra Jesucristo. Nɛ tengu thoho ꞌbʉ nɛcä dí ꞌbʉcä bʉ, janangueꞌa dá ꞌda ahʉ ran tꞌɛ̨di i ja ua. Pɛ gan ꞌyohʉ rán tꞌɛ̨di ma Hmuhʉ ra Jesús. 5 Nɛ nuꞌa ran ꞌyohʉ, dami hyømhbʉ thi da bɛntꞌa ra zįthu, di ʉnba rá ngøcꞌyɛi, nꞌdamhma da ꞌyäp rá punbi Oją nangue rá tsꞌoqui. Nɛ da zä da yąn Oją nangue rá mbʉi ꞌbʉ bi zøn ra pa bá peng ra Hmu bʉya. 6 Pɛ hingui sä gan ꞌyɛ̨xhʉ. Ha hin guí pąhmbʉ nꞌda ram hma, ngue tsꞌʉtho ra íxi pɛ i sinni gätho ra jʉni. 7 Dami hyømhbʉ thi a ra nyoꞌixi ngue ran tsꞌo guí ꞌbʉhmbʉ di tsꞌonꞌna nim pɛtihʉ. Janangueꞌa xtán ho ahʉ, tengu ra thuhmɛ an tꞌøtꞌe nangue ra jʉni maꞌdaꞌyo ngue nte ma íxi da mbɛ, i tsꞌi ꞌbʉ ndąbaxjua. Nɛ i jatho dan hojʉ, gueꞌa bi nde a ra Cristo ꞌbʉ mim ꞌbøtsꞌe zɛhɛ bi hoga ma tsꞌoquihʉ. Nɛ gueꞌa ra hmɛpya mi u ʉ yʉ jąꞌi ꞌbʉ ndąbaxjua mi pøxa nꞌda ra tꞌʉdɛꞌyo. 8 Janangueꞌa thocpa thoho høntꞌa xʉn ho ga øthʉ, nɛ høntꞌa ra ꞌyu majuąni ga tɛnhdʉ. Nɛ gueꞌa ra thuhmɛ a ngue hinꞌyʉ ra íxi. Pɛ hin ga øthʉ tengu ra nyoꞌixi, ngue ꞌbɛꞌa gätho dín numanhosɛ nangue man ꞌyomfɛ̨nisɛhʉ, nɛ ꞌbɛꞌa gätho miꞌda xʉn tsꞌo. 9 Pɛ nu ra søcuą dá pɛnꞌnahʉ mamꞌbɛtꞌo, nɛ hin gá pąhmbʉ ꞌbɛꞌa dín nde xcá xi ahʉ, ngue dá xi ahʉ hin gan ꞌyohʉ nꞌda ra ꞌyomtꞌɛ̨ni. 10 Pɛ hin dí ɛ̨n ahʉ him man zohmbʉ ʉ hinga na pądi, madagueꞌbʉ yʉ ꞌyomtꞌɛ̨ni, nɛ yʉ ziyate, nɛ yʉ bɛ̨, nɛꞌʉ thąnde yʉ hyäte oją. Nguetho nuꞌbʉ gui sothohʉ ʉ, nɛ gui ꞌuehmbʉ ua ja ra ximhäi ꞌbʉ. Pɛ hinga gueꞌa dá xi ahʉ a. 11 Pɛ nuꞌa mi nde xcá xi ahʉ, ngue hin gui ꞌyɛ̨mfʉ ni cuhʉ ʉ ꞌda, nɛ xín gui comhbʉ rá ꞌbɛfi Oją nꞌda ꞌbʉ ɛ̨mbi ra cu ꞌbʉ guextaꞌa ran ꞌyomtꞌɛ̨ni øtꞌe o gueꞌbʉ bin thątui a him mi sä xtín thątui, o ran tsꞌiyate, o i thąnde yʉ hyäte oją, o nɛꞌʉ yʉ ʉcuate, o gue ra įti, o gue ra bɛ̨. Pɛ o guín ꞌyohʉ ʉ tengu ʉ, xínga ꞌdarpʉ gan sihmɛhʉ ʉ. 12-13 Nguetho ni ꞌbɛfihʉ gui juąnbahʉ ni miꞌyɛ̨cꞌyɛihʉ ꞌbʉpʉ ja nim pɛtihʉ. Janangueꞌa gui hyømhbʉ thi a bi ꞌyøtꞌ ra tsꞌoqui bʉ guí ꞌbʉhmbʉ. Pɛ nuꞌʉ hinga ná ɛ̨cꞌyɛi, hingui sä ga juąnbahʉ ʉ, høntꞌa Oją di juąnba ʉ.