Sä din hocpa zɛhɛ yʉ ꞌyɛ̨cꞌyɛi
6
Hanja gnín yąp zɛhɛhʉ bʉ ꞌbʉh ra zɛꞌmi, nuꞌa hing ra ꞌyɛ̨cꞌyɛi. Hanja hinga gueꞌʉ ni miꞌyɛ̨cꞌyɛihʉ guí xihmbʉ di hocꞌahʉ. 2 Ha hin guí pąhmbʉ ngue ga juąnbahʉ ra ximhäi ꞌbʉ rán zɛgui yʉ pa, nguetho yʉ́ tꞌʉhni gahʉ Oją. Hague má guetꞌʉ yʉn sʉi dí øthʉ hin ga hojʉ, nguetho manꞌda hingui hɛ̨i dan hocpahʉ. 3 Nɛ asta gueꞌʉ yʉ́m ꞌbɛhni Oją mahɛ̨tsꞌi ga juąnbahʉ. Ha má guetꞌʉ yʉn juntꞌi dí øzɛhɛhʉ yʉ pa i jabʉ ya ngue hin da zä ga hojʉ. 4 Janangueꞌa nuꞌbʉ ja nꞌda ran juntꞌi, pɛ hin ga xihmbʉ nꞌda ra zɛꞌmi, nguetho hin dí comh ma ꞌbɛfihʉ a. 5 Gueꞌa dí xi ahʉ a, janangueꞌa jatho gui pɛꞌtsꞌ ni sähʉ ꞌbɛꞌa guí øthʉ. Ha njoꞌo nꞌda ahʉ i ja tsꞌʉ ran ꞌyomfɛ̨ni ngueꞌa di hocꞌahʉ nangue ran sʉi guí øthʉ. 6 Ha i jatho da zix rá cu bʉ ꞌbʉh ra zɛꞌmi nꞌda ra ꞌyɛ̨cꞌyɛi, nɛ hing ra ꞌyɛ̨cꞌyɛi a ra zɛꞌmi. 7 Nɛ nuꞌa gní ꞌyøthʉ yʉn juntꞌi, nɛ gueꞌa gním ꞌbɛhmbʉ a. Hanja hin gní hyäthʉ a ran tsꞌo i tꞌøt ahʉ, nɛ hin guídí jafʉ da fɛ̨ ahʉ ꞌbɛꞌa guí pɛshʉ. 8 Hin guí häthʉ, nguetho guesɛ ahʉ guí ørpahʉ ran tsꞌo ni cuhʉ, nɛ guí pɛ̨fʉ ꞌbɛꞌa i pɛꞌtsꞌi. 9 Pɛ ha hin guí pąhmbʉ ngue hin da zä da yʉrpʉ di manda Oją nꞌda ra tsꞌomꞌbäi. Nɛ o sä guim bɛ̨mhbʉ da zin Oją ʉ yʉ ꞌyomtꞌɛ̨ni, o gueꞌʉ i thąnde yʉ hyäte oją, o gueꞌʉ in nutonto yʉ́ xisu yʉ́ mim ꞌyohʉhʉ, o gueꞌʉ di ꞌyąsäba yʉ́ mim ꞌyohʉhʉ tenguꞌbʉ ra xisu. 10 Nɛ hin da yʉrpʉ di manda Oją ʉ yʉ bɛ̨, o yʉ ziyate, o yʉ įti, o yʉ ʉcuate, o yʉ nɛxmate. 11 In jabʉ gá ꞌyøthʉ ꞌda ahʉ, pɛ bi mba mꞌbeꞌtꞌe ni tsꞌoquihʉ, nɛ guesɛ Oją bi ꞌyøtꞌe yʉ́ tꞌʉhni ahʉ. Nɛ bi hocꞌahʉ nangue a guí ɛ̨cꞌyɛihʉ ra Hmu Jesús, nɛ nangue a guí ꞌbʉhmbʉ rá Hogandąhi ma Ojąhʉ.Rá mbɛti Oją ma jąꞌihʉ
12 Majuąni a ram hma ngue i ja man tꞌɛ̨dihʉ ga øthʉ ꞌbɛꞌa gätho dín ndehʉ. Pɛ mꞌbatho a da bømanho ga øthʉ. Majuąni ngue i ja man tꞌɛ̨dihʉ ga øthʉ ꞌbɛꞌa gätho dín ndehʉ. Pɛ hin gan nde ga øthʉ a da dącpa ma mbʉihʉ. 13 Nɛ majuąni a ram hma nangue ran tsꞌihmɛ, ngue nuꞌbʉ in ndehmɛ ma fohohʉ, dan sihmɛhʉ. Pɛ hinꞌyʉ ꞌbɛꞌa manꞌda ntsꞌänni nangue ma fohohʉ, nɛ da zøn ra pa ngue da man Oją him man dan sihmɛhʉ. Pɛ nuꞌbʉ in nde ran ꞌyomtꞌɛ̨ni ma jąꞌihʉ, hingui sä ga øthʉ a, nguetho nu ma jąꞌihʉ bi zän Oją dim ꞌbʉpʉ ra Hmu. 14 Nɛ da xox Oją ma jąꞌihʉ nangue rá tsꞌɛdi, tengu thoho a ra Cristo bi xox ꞌbʉ mi du. 15 Ha hin guí pąhmbʉ ngue nu ma jąꞌihʉ, gueꞌa rá jąꞌi ra Cristo a. Ha da zä ga hąjʉ nꞌda xɛqui rá jąꞌi ra Cristo, ngue ga øtꞌ ran ꞌyomtꞌɛ̨ni, tenguꞌbʉ nꞌdanjąꞌi tho ga øtꞌbe nꞌda ra xisu ra ꞌyomtꞌɛ̨ni. Pɛ hingui sä ga øthʉ tengu a. 16 Pɛ gueꞌa i øtꞌ ra ꞌyomtꞌɛ̨ni bʉ na nu Oją, tengu bi mam bʉ ja rá tꞌohni, ngue nuꞌʉ mi yonjąꞌi, pɛgue bi ꞌyøtꞌe tengʉꞌbʉ nꞌdanjąꞌi tho bi gohi. 17 Pɛ nuꞌa ra jąꞌi ꞌbʉ in ꞌyoui ra Cristo, tenguꞌbʉ nꞌdanjąꞌi tho da ꞌyøtꞌui. 18 Janangueꞌa da zä gui ꞌdahmbʉ bʉya nangueꞌa ran ꞌyomtꞌɛ̨ni. Nguetho nu miꞌda yʉ tsꞌoqui di tsꞌonba bʉ maxøtsꞌe rá ngu Oją, pɛ nu ran ꞌyomtꞌɛ̨ni di tsꞌonba bʉ mbo rá ngu Oją. 19 Ha hin guí pąhmbʉ ngue nu ni jąꞌihʉ rá ngusɛ rá Hogandąhi Oją a, nguetho ꞌbʉpʉ mbo ma jąꞌihʉ a, gueꞌa bi ꞌdajʉ Oją a. Nɛ nu ni jąꞌihʉ hin ni mbɛti zɛhɛhʉ a. 20 Nguetho Oją bi ꞌyøtꞌe rá mbɛti ahʉ, nɛ tenguꞌbʉ xʉm hmadi bi gutꞌi. Janangueꞌa ga ørpahʉ rá ꞌbɛfi Oją nangue ma jąꞌihʉ nɛ nangue ma mbʉihʉ.