Ran zofo nangue ran thąti
7
Pɛ nuya ga xi ahʉ a guí ängahʉ. Nɛ ya dí xi ahʉ ngue xʉn ho ꞌbʉ da zɛtꞌa nꞌda ran ꞌyohʉ, hin da hyon rá xisu. 2 Pɛ ɛ̨mmɛ xʉn ngu ran ꞌyomtꞌɛ̨ni i ja. Janangueꞌa manꞌda xʉn ho ꞌbʉ dim ꞌbʉh rá xisu nꞌda ran ꞌyohʉ, nɛ dim ꞌbʉh rá ndø nꞌda ra xisu. 3 Nu ran ꞌyohʉ i jatho dim ꞌbʉhmi xʉn ho rá xisu. Nɛ ngutho ra xisu, i jatho dim ꞌbʉhmi xʉn ho rá ndø. 4 Nguetho nu nꞌda ra xisu hin di manda zɛhɛ a rá jąꞌi zɛhɛ, pɛgue di manda a rá ndø. Nɛ ngutho nꞌda ran ꞌyohʉ hin di manda zɛhɛ a rá jąꞌizɛhɛ, pɛgue di manda a rá xisu, nguetho nꞌdatꞌa ram ꞌbʉi øtꞌe. 5 Pɛ hin da ꞌueꞌa nꞌda nangue rá xisu, nɛ xín da ꞌueh ra xisu nangue rá ndø. Pɛ hinda høntꞌbʉ gá bɛ̨mhbʉ gan yąhʉ Oją ꞌda yʉ pa da zä gui sɛthʉ. Pɛ i jatho ꞌdaꞌangu guim bɛ̨mhbʉ ni xisuhʉ. Nɛ mꞌbɛjua bʉya da zä gan yąhʉ ni xisuhʉ mahønꞌa. Nguetho nuꞌbʉ nyaꞌa tsꞌʉ yʉ pa hin gui yąhʉ ni xisuhʉ, xømhma thoho da hyä ahʉ ra zįthu ꞌbʉ hingui sä gui sɛthʉ. 6 Nuꞌa dí xi ahʉ, tenguꞌbʉ nꞌda ran tꞌɛ̨di. Pɛ hin dadí hɛcꞌahʉ ꞌbʉ guín nde gan thąthʉ o xin guín nde gam ꞌbʉsɛhʉ. 7 Pɛ dí ɛ̨nsɛgä ngue xʉn ho ꞌbʉ gätho dim ꞌbʉsɛ tengugä. Pɛ hingui sä, nguetho nꞌda ngu nꞌda bin ꞌdajʉ ra tsꞌɛdi nangue Oją, ngue ꞌdahma ꞌdanꞌyo ga øthʉ nꞌda ngu nꞌdajʉ. 8 Pɛ dí xi ahʉ, nuꞌʉ toꞌo hinga na din thąti, nɛꞌʉ xʉn du yʉ́ xisu, nɛꞌʉ xʉn du yʉ́ ndø, manꞌda xʉn ho ꞌbʉ ya hin gan simhbʉ, tengu thohogä. 9 Pɛ nuꞌbʉ hingui sä da zɛthoho nꞌda, manꞌda xʉn ho da hyon rám pɛpiui, ngutho nꞌda ra xisu, nɛ ngutho nꞌda ran ꞌyohʉ. Nguetho ɛ̨mmɛ di xømbʉi ngue njongui ꞌbʉhmi. 10 Nɛ dí xi ʉ toꞌo i ꞌbʉhmi yʉ́ ndø, hingui sä da zogui. 11 Nɛ nuꞌbʉ bi zoh rá ndø nꞌda ra xisu, i jatho dim ꞌbʉsɛ, o gue dim ꞌbʉhmi mahønꞌa a rá ndø. Nɛ ximangutho nꞌda ran ꞌyohʉ, hingui sä din xummi a rá xisu. Nɛ nuna ran tꞌɛ̨di i jaua dí xi ahʉ, him mam hmansɛgä, pɛgue rám hma ma Hmuhʉ ra Jesucristo ꞌbʉ miꞌbʉcua ja ra ximhäi. 12 Nɛ nu manꞌda ram hma dí xi ahʉ him bi manꞌa ma Hmuhʉ ꞌbʉ mi ꞌbʉcua. Nɛ nuꞌa ram hma dí xi ahʉ, nuꞌbʉ nꞌda ra cu, ngue hing ra ꞌyɛ̨cꞌyɛi a rá xisu, pɛ nu ra xisu ꞌbʉ in nde ma zä dim ꞌbʉpʉ, pɛ manꞌda xʉn ho ꞌbʉ di thoqui dim ꞌbʉhmi. 13 Nɛ ngutho nꞌda ra xisu ꞌbʉ ra ꞌyɛ̨cꞌyɛi, nɛ hing ra ꞌyɛ̨cꞌyɛi a rá ndø, pɛ nu rá ndø ꞌbʉ ma zä in nde dim ꞌbʉhmi a rá xisu, pɛ manꞌda xʉn ho ꞌbʉ di thoqui dim ꞌbʉhmi. 14 Nɛ nu Oją di jamansu nꞌda ran ꞌyohʉ ngue hing ra ꞌyɛ̨cꞌyɛi, ngueꞌbʉ ra ꞌyɛ̨cꞌyɛi a rá xisu. Nɛ ngutho nꞌda ra xisu ngue hing ra ꞌyɛ̨cꞌyɛi, pɛ Oją di jamansu ngueꞌbʉ ra ꞌyɛ̨cꞌyɛi a rá ndø. Nuꞌbʉ hin xtan jabʉ, ya hin xtí jąp Oją ni tꞌʉhnihʉ ꞌbʉ. Pɛgue ya mająpi nangue Oją ʉ. 15 Pɛ nuꞌa ran ꞌyohʉ hing ra ꞌyɛ̨cꞌyɛi, o gue nꞌda ra xisu, nɛ nuꞌbʉ in nde da zo a ra ꞌyɛ̨cꞌyɛi mi ꞌbʉhmi, manꞌda xʉn ho ꞌbʉ di thøtho da mba. Nɛ hingui sä da ꞌyørpa ra tsꞌɛdi dim ꞌbʉhmi ꞌbʉ ya hingui nde. Nguetho Oją bi zängahʉ dam ꞌbʉmanhohʉ ngue nte man sʉi din ja. 16 Nɛ nuꞌbʉ guí ꞌbʉhmbʉ ʉ hing yʉ ꞌyɛ̨cꞌyɛi, xømhma thoho da yąn yʉ́ mbʉi ꞌbʉ gui fäxhʉ da dįn ra ꞌyu, nɛꞌahʉ gyʉ́ xisuhʉ, nɛꞌahʉ gyʉn ꞌyohʉhʉ. 17 Pɛ jatho gui ꞌyøthʉ a dí bømanho a rá tsꞌɛdi bi ꞌda ahʉ Oją, nꞌda ngu nꞌda ahʉ, ngue ndaꞌa bi zän Oją gdám ꞌbʉhmbʉ, tengu gmí øthʉ ꞌbʉ hin ní zonꞌnahʉ Oją. Nɛ ngutho dí xicä miꞌda ngue hønbʉ go hapʉ i ja yʉ́m pɛti yʉ ꞌyɛ̨cꞌyɛi. 18 Nɛ nuꞌʉ toꞌo nthɛqui yʉ́ xifani ꞌbʉ mi ꞌyɛ̨cꞌyɛi Oją, pɛ i jatho guextaꞌa rá hmɛpya yʉ́ jąꞌi nguetho yʉ judío. Nɛ nuꞌbʉ nꞌda ngue him mán thɛqui rá xifani, pɛ hin da bɛ̨ni ngue mꞌbɛjua tho da hyɛqui. 19 Nguetho nte ni mba tho ꞌbʉ am hmɛpya uague hinꞌna. Pɛ manꞌda i jatsꞌɛditho ga øthʉ a i xijʉ Oją. 20 Pɛ nꞌda ngu nꞌda da ꞌyøtꞌe ndaꞌa da zä dám ꞌbʉi, tengu mi øt ꞌbʉ hin ní ꞌyɛ̨cꞌyɛi. 21 Nuꞌbʉ gmín ꞌyɛ̨hɛhʉ bʉ ꞌbʉh yʉ jąꞌi ꞌbʉ gmí däp ni mbʉihʉ Oją, pɛ hingui jatho gui päh ni ꞌbɛfihʉ. Pɛ nuꞌbʉ da xi a ni hmuhʉ ngue gui pømhbʉ, pɛ manꞌda xʉn ho ꞌbʉ gui pømhbʉ bʉya. 22 Nɛ nuꞌbʉ nꞌda ra ꞌyɛ̨hɛ, ꞌbʉ mi däp rá mbʉi ra Cristo, bi mba ma thøgue bʉ na nu Oją. Nɛ ximangutho nꞌda ra jąꞌi ngue him bin ꞌyɛ̨hɛ, pɛ bin ꞌyɛ̨hɛ nangue ra Cristo. 23 Ngue nu Oją bi ꞌyøtꞌe yʉ́ tꞌʉhni gahʉ, nɛ tenguꞌbʉ xʉm hmadi bi gutꞌi. Janangueꞌa ꞌyo guí tɛnthohohʉ ꞌbɛꞌa di ꞌbɛp ahʉ gui ꞌyøthʉ yʉ jąꞌi ꞌbʉ i xi ahʉ gui ꞌyøthʉ yʉ tsꞌoqui. 24 Nɛ nꞌda ngu nꞌda ahʉ, ma zi cu ahʉ, gui thoqui gui ꞌyøthohohʉ ni ꞌbɛfihʉ, tengu gmí øthʉ ꞌbʉ hin gní ꞌyɛ̨cꞌyɛihʉ Oją. Pɛ manꞌda gui thoqui gui ꞌyøthʉ xʉn ho guepʉ da numanho Oją. 25 Nɛ nu manꞌda ram hma guí ängahʉ nangueꞌʉ njoꞌo yʉ́ xisu o yʉ́ ndø, pɛ hinꞌyʉ nꞌda ram hma bi mansɛ a ma Hmuhʉ ra Jesucristo ꞌbʉ mim ꞌbʉcua ja ra häi. Pɛ ga xi ahʉ a dím bɛ̨ngä. Nɛ xʉn ho ꞌbʉ gui ꞌyøthʉ a dím mangä, nangue a rá mate ma Hmuhʉ bi ꞌdac ran ꞌyomfɛ̨ni. 26 Nɛ nu mam hmangä dí xi ahʉ ya, nangue njoꞌo yʉ́ xisu o njoꞌo yʉ́ ndø, xʉn ho ꞌbʉ din jatho tengu in ja ya. Nguetho nuꞌʉ yʉ pa jabʉ ya, xʉn hɛ̨itho ꞌbʉ gan nuhʉ yʉn ʉnbi ꞌbʉ dán simhbʉ. 27 Nɛ nuꞌbʉ nꞌda i ꞌbʉh rá xisu, hin da bɛ̨ni ngue da hyɛgui, nɛ nuꞌbʉ nꞌda njoꞌo rá xisu, hin da bɛ̨ni da hyoni. 28 Pɛ nuꞌbʉ guín ndehʉ gan simhbʉ, hin guim bɛ̨mhbʉ ngue ra tsꞌoqui a. Nɛ ngutho ꞌbʉ nꞌda ra hmute da bɛ̨ni din thąti, pɛ hin da ꞌyɛ̨mbi ra tsꞌoqui a. Pɛgue nuꞌbʉ gan simhbʉ, manꞌda xʉn hɛ̨i ram ꞌbʉi gui ꞌyøthʉ, xinda gueꞌbʉ njon xtím ꞌbʉ ahʉ. Nɛ dín nde gan yąn ahʉ nangue ʉ xʉn hɛ̨i. 29 Ma zi cu ahʉ, nuꞌa nam bøn a dí xi ahʉ, him min ngu yʉ pa dam ꞌbʉhmbʉ ua ja ra ximhäi. Janangueꞌa i jatho ga humbahʉ ga juahmbʉ nꞌdihi rá ꞌbɛfi Oją yʉ pa ní mba bʉ. Nɛ nuꞌʉ toꞌo i ꞌbʉh yʉ́ xisu bʉya, nɛ xingui tsꞌʉ da bɛ̨ni da ꞌyɛꞌtsꞌa rá ꞌbɛfi Oją nangue a rá xisu. 30 Nɛ hingui sä nyaꞌa ga ɛshʉ rá ꞌbɛfi Oją ꞌbʉ ya dín nuhʉ ra dumbʉi, nguetho dí xønhdʉ ga juahmbʉ nꞌdihi rá ꞌbɛfi Oją. Nɛ xíngui sä nyaꞌa dan johyahʉ nangue ma amigohʉ, xínga gueꞌʉ dí tämhbʉ nyaꞌa gan numanhohʉ. 31 Nɛ ngutho ʉ toꞌo gätho i øtꞌ yʉ́ ꞌbɛfi zɛhɛ ua ja ra ximhäi, pɛ manꞌda zi tsꞌʉtho da bɛ̨ni. Nguetho mi tsꞌʉtho da guadi ꞌbɛꞌa gätho dín nuhʉ ya. 32 Janangueꞌa dín nde ahʉ ngue manꞌda tsꞌʉtho guim bɛ̨mhbʉ ꞌbɛꞌa di hɛ̨n ahʉ ua ja ra ximhäi. Nɛ nuꞌbʉ nꞌda ran ꞌyohʉ ngue njoꞌo rá xisu, pɛ manꞌda ɛ̨mmɛ da bɛ̨n a rá ꞌbɛfi Oją, nguetho ꞌbʉsɛ, nɛ i honi ꞌbɛꞌa da numanho Oją. 33 Pɛ nuꞌbʉ ya i ꞌbʉh rá xisu, nɛ hinga høntꞌa rá ꞌbɛfi Oją da hyom bʉya, nɛꞌa rá xisu da numanho nɛ da hyonbi ꞌbɛꞌa gätho da hyoni. 34 Nɛ nuꞌa nꞌda ra xisu ngue njoꞌo rá ndø, pɛ manꞌda da zä høntꞌa rá ꞌbɛfi Oją da bɛ̨ni da ꞌyøtꞌe. Pɛ nɛꞌa rá jąꞌi nɛꞌa rá mbʉi høntꞌa rá ꞌbɛfi Oją øtꞌe. Pɛ nuꞌa ra xisu ꞌbʉ ya i ꞌbʉh rá ndø, nɛ da ꞌyøtꞌe dí numanho a rá ndø. 35 Nɛ nuna dí xi ahʉ dín nde ga fäx ahʉ, nɛ hin dín nde ga ʉnꞌnahʉ. Nɛ dín nde ahʉ gui ꞌyøthʉ a xʉn ho, ngue hin di hɛ̨i ni mbʉihʉ ꞌbʉ gui ꞌyøthʉ rá ꞌbɛfi Oją. 36 Pɛ nuꞌbʉ nꞌda ran ꞌyohʉ ngue i ꞌbʉ a nꞌda rá tꞌįxu, nɛ ya bi zøn ra ora din thąti. Nɛ im bɛ̨ni hingui ho ꞌbʉ da ząmmi, nɛ ɛ̨mmɛ in nde rá tꞌįxu din thąti, xʉn ho ꞌbʉ di thąrpa a rá tꞌįxu, nɛ hin da ꞌyɛ̨mbi ra tsꞌoqui a. 37 Pɛ nuꞌbʉ nꞌda ran ꞌyohʉ hin te im bɛ̨n rá mbʉi ngue din thątꞌa rá tꞌįxu, nɛ nuꞌbʉ ja rán tꞌɛ̨di rá ta da zä da xifi, pɛgue manꞌda xʉn ho ꞌbʉ dim ꞌbʉtpʉ. Nɛ nꞌdatꞌa im bɛ̨ni ngue gueꞌa xʉn ho da ꞌyøtꞌa. Nɛ da bądi xʉn ho a bi ꞌyør bʉya. 38 Janangueꞌa nuꞌʉ toꞌo di thąrpa yʉ́ tꞌįxu, xʉn ho i øtꞌe, pɛ nɛꞌʉ to hingui nde di thąrpa yʉ́ tꞌįxu, pɛ manꞌda xʉn ho i øtꞌʉ. 39 Pɛ nuꞌbʉ nꞌda ra xisu bi hyon rá ndø, pɛ i jatho dim ꞌbʉhmi gätho yʉ pa i ꞌbʉ a rá ndø. Nɛ nuꞌbʉ ya bi du a rá ndø, ꞌbʉ in nde din thąt mahønꞌa, xʉn ho ngue din thąti, pɛgue nꞌda rá miꞌyɛ̨cꞌyɛiui din thątui mahønꞌa. 40 Pɛ dí ɛ̨nsɛgä ngue manꞌda din johya ꞌbʉ hin din thąti mahønꞌa. Nɛ dím bɛ̨ni ngutho di bɛ̨ngä rá Hogandąhi Oją.