ꞌDa yʉn tꞌänni nangue yʉ ꞌbøtsꞌe
8
Nɛ nuya dín nde ga xi ahʉ a gá ꞌyängahʉ, ꞌbʉ da zä gui sahʉ a ra ngø xí ꞌbøspa ʉ yʉ hyäte oją, uague hinꞌna. Nɛ majuąni guím mamhbʉ ngue gätho gahʉ dí pąhmbʉ xʉn ho a. Pɛ nuꞌa gní pąhmbʉ, gueꞌa gnín ꞌyɛ̨xtahʉ a. Pɛ manꞌda gueꞌa ran huɛ̨cate nan te rá ꞌbɛfi Oją a. 2 Pɛ nuꞌbʉ guí ɛ̨nsɛhʉ guí pąhmbʉ ran ꞌyomfɛ̨ni, pɛ guepʉ na fąpʉ bʉya ngue hinga ná pąhmbʉ xʉn ho, nguetho guidín ꞌyɛ̨xhʉ. 3 Pɛ nuꞌbʉ majuąni dín numanhohʉ Oją, nɛ dí comhbʉ rán ꞌyomfɛ̨ni Oją ꞌbʉ. 4 Nuya, nuꞌʉ ꞌbɛꞌa gätho bí ꞌbøspa ʉ yʉ hmite, pɛ dí pąhmbʉ hing yʉ oją ʉ ɛ̨mbi nꞌyoui. Nɛ dí pąhmbʉ nꞌdatho Oją ꞌbʉi, nɛ høntꞌa i ja rá tsꞌɛdi a. 5-6 Nɛ madagueꞌbʉ tꞌɛ̨mbi ꞌbʉh yʉ oją ua ja ra häi nɛpʉ mahɛ̨tsꞌi, nɛ tꞌɛ̨mbi xʉn ngu yʉ oją nɛ yʉ hmu, pɛ nujʉ, høntꞌa nꞌdatho a Oją dí ꞌbʉhmbʉ, ngue ra Ta, nɛ bi zänni ꞌbɛꞌa gätho i ja, nɛjʉ bi zängahʉ ga ørpahʉ rá ꞌbɛfi. Nɛ høntꞌa nꞌdatho a ra Hmu dí ꞌbʉhmbʉ, ngue gueꞌa ra Jesucristo a, nɛ gueꞌa í ꞌyøtꞌ Oją ꞌbɛꞌa gätho i ja, nɛ gueꞌa bi ꞌdajʉ ra te xʉn ho ma mbʉihʉ a. 7 Pɛ hinga gätho yʉ cu guí ꞌbʉhmbʉ i pądi xʉn ho nangue ʉ yʉ hyäte oją, nɛ ząi mi thąnde ʉ, janangueꞌa ɛ̨na guextaꞌa im bɛ̨m ꞌbʉ ya bi za a ra ngø xí ꞌbøtsꞌe. Nɛ i ɛ̨nsɛ ngueꞌa ra tsꞌoqui a ꞌbʉ ya bi za, nguetho hinguin zaqui yʉ́ tꞌɛ̨cꞌyɛ̨i. 8 Pɛ hinga gue yʉn tsꞌihmɛ dí sihʉ nan numanhojʉ Oją. Xín gam bɛ̨mhbʉ ngueꞌa nan numanhojʉ a ꞌbʉ dí sihʉ o hin dí sihʉ. 9 Pɛ i jatho gui jamansufʉ yʉ́ mbʉi ni cuhʉ. Nɛ mamí jafʉ da dąng bʉ ja ra tsꞌoqui, nguetho hinga na pądi ꞌbɛꞌa guí øthʉ ꞌbʉ guí øthʉ a guí pąhmbʉ xʉn ho. 10 Pɛ xiꞌbʉ da nu ahʉ ꞌda ni cuhʉ gueꞌa guí sihmɛhʉ bʉ ja yʉ́ niją yʉ hmite. Nɛ guí pąhmbʉ xʉn ho ꞌbɛꞌa guí sihʉ. Pɛ nuꞌʉ ni cuhʉ im bɛ̨nsɛ gueꞌa ra tsꞌoqui a ꞌbʉ da tsꞌi. Nɛ xiꞌbʉ sä da ꞌyɛ̨na da hyutꞌan zambʉi da zi ʉ xí ꞌbøx bʉya. 11 Jananjabʉ nu nin ꞌyomfɛ̨nihʉ gueꞌa nam ꞌbɛh ni cuhʉ a, nguetho hinga na pądi xʉn ho. Pɛ nuꞌʉ ni cuhʉ, gueꞌa í du ra Cristo a ngue da yąnba yʉ́ te. 12 Janangueꞌa nuꞌbʉ ngubʉ guí øthʉ, pɛ guí ørpahʉ ra tsꞌoqui ra Cristo ꞌbʉ, nguetho guí ørpahʉ ra tsꞌoqui ni cuhʉ ngue hinguin zaqui yʉ́ tꞌɛ̨cꞌyɛ̨i, nɛ guidí tsꞌonbahʉ yʉ́ mbʉi. 13 Nɛ nugä drá Pablogä, nuꞌbʉ gueꞌa ra ngø dí sagä nin ʉnba rá mbʉi nꞌda ma cu, pɛ manꞌda xʉn ho ꞌbʉ him man ga sagä ra ngø ꞌbʉ, janangueꞌa hin ga japi da mbeng bʉ ja yʉ tsꞌoqui nꞌda ma cu.