Da bɛ̨ni ndaꞌa xʉn ho da ꞌyøtꞌ yʉ́ ꞌbäihʉ ra Cristo
9
Nɛ nugä manꞌda ja man tꞌɛ̨di xcá øtꞌä ꞌbɛꞌa gätho dín numanho ga øtꞌä, nguetho majuąni ma ꞌbäigäꞌbe a ra Cristo, ngue dá nusɛgä a ra Hmu. Nɛ mfądi majuąni bin ꞌdac man tꞌɛ̨di nguetho dá ja ahʉ gá ꞌyɛ̨cꞌyɛihʉ Oją nangue rám fätsꞌi ra Hmu. 2 Nɛ masque i ꞌbʉh miꞌda ɛ̨ngui him ma ꞌbäigäꞌbe ra Cristo, pɛ nuꞌahʉ guí pąhmbʉ, nɛ mfądigui nangue ahʉ. 3 Nɛ gueꞌa ga xicä ʉ toꞌo da ꞌyängui nangue man tꞌɛ̨di. 4 Nɛ i ja man tꞌɛ̨di xcá tąh man zäbi o xtín ꞌdac man tsꞌihmɛ. 5 Nɛ i ja man tꞌɛ̨di xcán thątꞌbe nꞌda ra xisu, ngue ma miꞌyɛ̨cꞌyɛ̨iꞌbe, nɛ xcá sitsꞌi hønbʉ go hapʉ dí ꞌyo, tengu i øtꞌʉ yʉ́n ꞌyohʉ ra Cristo, nɛ ra Pedro, nɛ miꞌda yʉ́ ꞌbäihʉ ra Cristo. 6 Pɛ ha guím bɛ̨mhbʉ hinꞌyʉ man tꞌɛ̨diꞌbe a ra Bernabé ngue xcá ɛꞌtsꞌ ma ꞌbɛfi zɛhɛꞌbe ngueꞌa ná tąh man tsꞌihmɛꞌbe. 7 Nguetho njoꞌo nꞌda ra dofʉi i juzɛhɛ yʉ́ gasto zɛhɛ. Nɛ nꞌda ra jąꞌi ꞌbʉ i øtꞌ ran uąndätꞌä i jantꞌɛ̨di da zi. Nɛ yʉ jąꞌi ꞌbʉ di ꞌyɛ̨h yʉ́ dɛꞌyo, i jantꞌɛ̨di da zip yʉ́ xiꞌba ʉ yʉ́ dɛꞌyo ꞌbʉ in nde. 8 Pɛ hinga høntꞌʉ yʉ jąꞌi im ma tengu na dí xi ahʉ, pɛ nɛꞌa Oją im ma tengu na, nɛ gueꞌa mán tꞌoꞌtꞌi bʉ ja rán tꞌɛ̨di Oją a. 9 Nguetho nuꞌa rán tꞌɛ̨di Oją bi ꞌyoꞌtꞌa ra Moisés: “Pɛ nuꞌbʉ nꞌda ra mbʉndąni i pʉ, hingui sä da thurpa rá nde, nꞌdamhma da zä da za ʉ yʉ xiꞌyømpøhø i jabʉ,” bi ꞌyɛ̨na. Pɛ ha gam bɛ̨mhbʉ høntꞌʉ yʉn dąni in nu Oją. 10 Ha hin dí pąhmbʉ ngue nɛjʉ da tꞌørcahʉ a i hmangua, nguetho nꞌda ran tꞌuti a, man tꞌoꞌtꞌi nanguejʉ. Nɛ tenguꞌbʉ dadím pɛhmbʉ bʉ ja ra häi, ngutho ʉ yʉ dujʉ nɛꞌʉ yʉ mbɛjʉ, nɛ xʉn ho ꞌbʉ da bɛ̨ni da dąh yʉ́n zäbi nangue yʉ́ ꞌbɛfi øtꞌe. 11 Nɛ nugäꞌbe tenguꞌbʉ ya dá tuꞌbe ra hmudä bʉ guí ꞌbʉhmbʉ nangue ra te. Pɛ xiya ha guím bɛ̨mhbʉ hingui ho ꞌbʉ xcá xocꞌbe ngue ga siꞌbe. Nuꞌa nam bønꞌa dí xi ahʉ, tenguꞌbʉ ya xquí jurcaꞌbe. 12 Pɛ nuꞌʉ miꞌda yʉ xänbate i hąni ꞌbɛꞌa guídí unhdʉ, nɛ manꞌda i ja man tꞌɛ̨diꞌbe xcá hąmꞌbe ꞌbʉ xcá ndeꞌbe. Pɛ hinga gueꞌa dí hongäꞌbe ngueꞌa ga tąꞌbe. Xʉn ngu ʉ gätho dadín ꞌyɛptaꞌbe, nguetho dí suꞌahʉ hin xquí hyąmhbʉ a rán ho maꞌdaꞌyo ra Cristo. 13 Pɛ guí pąhmbʉ ꞌbɛꞌa i øtꞌʉ toꞌo dim pɛpʉ ja yʉ́ niją ma mijudíohe, høntꞌa i tįm bʉ ja ra niją i si, nɛ gueꞌa nam pɛp ʉ yʉn tꞌunni din tꞌunꞌna Oją bʉ. 14 Nɛ nguthogähe ya, ngueꞌa dím mamhbe rán ho maꞌdaꞌyo ra Cristo, bi zän ra Hmu ngue gueꞌa dám pɛpähe a rám hma. 15 Pɛ hin dí øtꞌʉ yʉn tꞌɛ̨di gä bin ꞌdaqui. Nɛ hinga gueꞌa nam bønꞌa dá otꞌahʉ a, ngue gui ꞌdajʉ man zäbigä. Pɛ manꞌda xʉn ho ꞌbʉ ga tugä, xínda gueꞌbʉ ꞌboꞌo da ꞌuįngui, nɛ ndetho dí ꞌuega man johya. 16 Pɛ nuꞌbʉ høntꞌa ga øtꞌä ngue ga mangä rám hman ra Cristo, pɛ hin dí guah man johyagä a ꞌbʉ, nguetho gueꞌa ín ꞌdac ma ꞌbɛfi a. Nguetho jatsꞌɛdi tho gam mangä a ram hma. 17 Pɛ nuꞌbʉ mpähä thoho dí øtꞌä rá ꞌbɛfi ma Hmu, nɛ i ja ꞌbɛꞌa dí tąhą. Pɛ nuꞌbʉ dątsꞌɛdi tho ga øtꞌe tsꞌʉtho, pɛ guemhma ꞌyo ma güɛnda ga juadi. 18 Pɛ ꞌbɛꞌa nin jurca ꞌbʉ mpähä thoho dím man rán ho maꞌdaꞌyo ra Cristo. Pɛ manꞌda dí tąh ran johya ꞌbʉ nte dí tącä ra hmɛ. Janangueꞌa manꞌda xʉn ho ꞌbʉ nte ga tąhą, madagueꞌbʉ i ja man tꞌɛ̨di ngue xcá tąhą nangueꞌa ma ꞌbɛfi. 19 Nɛ madagueꞌbʉ hingan tsꞌänni ngue dan ꞌyɛ̨hɛ̨gä, nɛ njoꞌo nꞌda ra jąꞌi ngueꞌa ma hmu, pɛ dí cohi tenguꞌbʉ drá ꞌyɛ̨hɛ̨gä ʉ gätho yʉ jąꞌi, nguepʉ da zä ga zɛdi da dįn ra ꞌyu xʉn ho ʉ miꞌda xʉn ngu. 20 Janangueꞌa nuꞌbʉ dí ꞌbʉhmbe ma mijudíohe, ngue i øtꞌ yʉn tꞌɛ̨di bi xi Oją yʉ judío, nɛcä dí øtꞌä ʉ, madagueꞌbʉ hin di mandagä ʉ. Janangueꞌa da zä ga zɛrpa yʉ́ mbʉi da ꞌyɛ̨cꞌyɛ̨i ra Cristo. 21 Pɛ nuꞌbʉ dí ꞌbʉhmbe ʉ hingui pąh yʉn tꞌɛ̨di bi xi Oją yʉ judío, nɛcä hin dí øtꞌä ʉ. Janangueꞌa da zä bʉ ga zɛdi da ꞌyɛ̨cꞌyɛ̨i ra Cristo. Pɛ hingui nde da ma ngue dí sotho ʉ yʉ́n tꞌɛ̨di Oją, nguetho dí tɛndä a im man ra Cristo. 22 Nɛ nuꞌbʉ dí ꞌbʉhmbe ʉ xʉn güentꞌi thoho yʉ́ tꞌɛ̨cꞌyɛ̨i, pɛ nɛcä dí øtꞌä tenguꞌbʉ xʉn güentꞌi thohogui, janangueꞌa i sä bʉ dí zɛdi da ꞌyɛ̨cꞌyɛ̨i ra Cristo. Nɛ gueꞌa dí øtꞌä, ngue ꞌdaꞌiguje nꞌda ngu nꞌda yʉ jąꞌi, nɛ dí honi xʉn ho ꞌbɛpʉ dí ꞌyɛ̨cꞌyɛ̨i yʉ jąꞌi. 23 Guehna gätho dí øtꞌä na, janangueꞌa da zä ga comhbʉ rán jąpi ra Cristo høntꞌa go toꞌo ní jąꞌi da hyąnꞌa ran ho maꞌdaꞌyo. 24 Pɛ guín nuhʉ yʉn tꞌuti nangueꞌʉ i tihi, madagueꞌbʉ i tihi, pɛ nꞌdatho a i tąh ran tꞌunni. Pɛ dami tihmbʉ ya nguepʉ da zä gui tąhmbʉ. 25 Nɛ tengu thoho yʉn ꞌyɛ̨ni ua ja ra ximhäi, ɛ̨mmɛ din jamansusɛ, nɛ hingui nde da ꞌyøtꞌa di hɛ̨ni. Pɛ høntꞌa dim ꞌbɛdi i tą ʉ. Pɛ nuꞌbʉ in jabʉ ga øthʉ, ga tąhmbʉ a da hyätꞌi maząi. 26 Nɛ nugä tenguꞌbʉ dí øtꞌ ra ꞌdihi, dí hąx ra ꞌyu i uɛ̨ntho bʉ hapʉ i ja ran tąhą. Nɛ tenguꞌbʉ ꞌboꞌo dadín tunꞌbe, pɛ hinga ha sätho dí pʉcpi, pɛ dí pądi hapʉ dí täpi xʉn ho. 27 Pɛ dí sąm zɛhɛ ma ngøcꞌyɛ̨i, dín ndepe da ꞌyøtꞌa dí xifi, nꞌdamhma hin go ga ꞌbɛcä a ꞌbɛꞌa dí xiꞌʉ miꞌda ngue da dąhą.