Ma hɛcpi yʉ ꞌyɛ̨cꞌyɛ̨i nangue yʉ hmite
10
Nɛ gueꞌa dín nde ahʉ gui pąhmbʉ a, ma zi cu ahʉ, ngue ꞌbɛꞌa bi ꞌyøtꞌ mam bombøtahe mayaꞌbʉ, gätho mi cot ra güi bʉ ní mba ʉ, nɛ bi zitsꞌi. Nɛ gätho bi ꞌdaxpʉ ꞌdanguadi ra thɛngdeją. 2 Nɛ gätho bin yąm bʉ ja ran ʉnbi ꞌbʉ mi dɛn ra Moisés, tenguꞌbʉ ya yʉ́ yąnte a. Nɛ janangueꞌa i tꞌɛ̨mbi tenguꞌbʉ bin xixyą nangueꞌa ra deją bʉ bi thogui nɛ ra güi. 3 Nɛ gätho ꞌdaꞌan zitho ra maná ngue ra hmɛ bi un Oją hapʉ ní mba. 4 Nɛ gätho bi zi ra dehe bi bøm bʉ ja ra do, tenguꞌbʉ bi zip rán zaqui a ra Cristo, nɛ tenguꞌbʉ ya bin ꞌyohʉ ra Cristo bʉ ní mba ʉ. 5 Nɛ madagueꞌbʉ bi tꞌørpe gätho ʉ, pɛ ɛ̨mmɛ xʉn ngu ʉ him bi numanho Oją a bi ꞌyøtꞌe. Nɛ hønbʉ go hapʉ bin cꞌuaxtꞌ yʉ́ doꞌyo bʉ ja yʉ dąpo bi thogui. 6 Nɛ gueꞌa urcahʉ a, janangueꞌa hin gan ndehʉ ga øthʉ yʉ tsꞌoqui, tengu mi øtꞌʉ ꞌbʉ mi ꞌyo bʉ ja ra dąpo. 7 Janangueꞌa o guí thąndehʉ yʉ hyäte oją, tengu mi øtꞌi ꞌda ʉ, tengu mán tꞌoꞌtꞌi, ngue bin sihmɛ ʉ nɛ bim mihni, bi ndantsꞌi bin nɛ ꞌbʉ mi dąnde ra pøte xí ꞌyøzɛhɛ. 8 Janangueꞌa hin ga øthʉ ran ꞌyomtꞌɛ̨ni tengu mi øtꞌi ꞌda, nɛ nꞌdapa thoho án du ꞌdäte ma hyu mahuąhi njąꞌi. 9 Pɛ hingui sä ga sähʉ ra Hmu nangue ma tsꞌoquihʉ, tengu mi øtꞌi ꞌda, nɛ xʉn ngu bi du, bi za yʉ cꞌɛ̨yą. 10 Janangueꞌa hin ga sämanꞌʉhʉ nangue Oją, tengu bi ꞌyøtꞌʉ ꞌda, nɛ gueꞌa bí mbɛnh Oją nꞌda ram ꞌbɛhni mahɛ̨tsꞌi ngueꞌa bi hyo ʉ. 11 Nɛ gueꞌa bin ja a tenguꞌbʉ ya nꞌda ran tꞌuti ngue i sujʉ dan jahʉ bʉ. Nɛ gueꞌa xmán tꞌoꞌtꞌi ꞌbɛꞌa dám ꞌbʉhmbʉ yʉ pa i jabʉ ya ngue rán zɛgui. 12 Janangueꞌa nuꞌbʉ dím bɛ̨mhbʉ tengu bi ꞌyøtꞌʉ, pɛ hingui sä ga ɛ̨mhbʉ, nangue ra tsꞌɛdi bi ꞌdajʉ Oją hinꞌyʉ ꞌbɛꞌa ga suhʉ. Pɛ i jatho ɛ̨mmɛ dam fäsɛhʉ, ngue hin ga tąnjʉ bʉ ja yʉ tsꞌoqui. 13 Pɛ nuꞌbʉ i tsꞌäc ma mbʉihʉ ga øthʉ yʉ tsꞌoqui, tenguꞌbʉ i tsꞌäp yʉ́ mbʉi gätho miꞌda yʉ jąꞌi. Pɛ dí pąhmbʉ di zɛrca ma mbʉihʉ Oją ga tąfʉ ran tsꞌäte. Pɛ nuꞌbʉ ɛ̨na da sijʉ miꞌda xʉn hɛ̨i ngue hin da zä ga tąfʉ, hin di jajʉ Oją gan nuhʉ ʉ. Nɛ i urcahʉ ꞌbɛpʉ dá tąfʉ ʉ dín nuhʉ. 14 Nɛ nuya, ma zi cu ahʉ, nɛ xingui tsꞌʉ guim bɛ̨mhbʉ gui thąndehʉ yʉ hyäte oją. 15 Nɛ guehna dá xiꞌahʉ na ya, nguetho i ja nin ꞌyomfɛ̨nihʉ, nɛ sä gui pąsɛhʉ ꞌbɛꞌa nam bønꞌa dá xi ahʉ. 16 Nɛ ząi dí äfʉ Oją rán jąpi ꞌbʉ dí sihʉ ran tsꞌihmɛ bi zänꞌna ra Cristo bʉ ja ram pɛti. Nɛ nuꞌbʉ dí sihʉ rán gui ra uva, ha hin dím bɛ̨mhbʉ ngue dí comhbʉ rá ji ra Cristo ngue bi hogahʉ. Nɛꞌbʉ dí xɛmhbʉ ra hmɛ nɛ dí sihʉ a, ha hin dím bɛ̨mhbʉ ngue dí comhbʉ rá jąꞌi ra Cristo ngue bi ʉnba ꞌbʉ mi hogahʉ. 17 Madagueꞌbʉ ɛ̨mmɛ xʉn ngujʉ ngue dá sihʉ ʉ, pɛ nꞌdatꞌa ra hmɛ, nɛ gueꞌa ní ꞌyørcahʉ nꞌdatho ma jąꞌi dí comhbʉ a ra Cristo. 18 Nɛ tengu bi ꞌyøtꞌ ma miꞌisraelhe, gä bi zi yʉn tꞌunni mí pa ntꞌunni Oją, nɛ gueꞌa í gomhma rá te Oją a. 19 Janangueꞌa hin nin sähʉ gui comhbʉ a i si ʉ pa mꞌbøspe yʉ hmite, madagueꞌbʉ hingui ndʉxqui ʉ yʉ ngø i pa mꞌbøspe ʉ, nɛ hinꞌyʉ yʉ́ tsꞌɛdi ʉ yʉ hmite. 20 Pɛgue dí xi ahʉ, nuꞌʉ ꞌda ngue hingui pą Oją, i pøspa yʉ hmite, pɛgue yʉ zįthu i hąni. Janangueꞌa hin dín ndeꞌahʉ gui comꞌma gui sihʉ ʉ yʉ́ ꞌbøtsꞌe, nꞌdamhma hin gui comhbʉ rá ꞌbɛfi yʉ zįthu. 21 Hingui sä ga thɛcpahʉ rá tasa ra Cristo ꞌbʉ dí thɛcpahʉ rá tasa yʉ zįthu. Nɛ hingui sä ga comhbʉ rá ngøcꞌyɛ̨i ra Cristo ꞌbʉ dí comhbʉ yʉ́ ꞌbøtsꞌe yʉ zįthu. 22 Uague guím bɛ̨mhbʉ go gui muthʉ a Oją. Ha manꞌda i ja ni tsꞌɛdihʉ xinda gue Oją.I sä ꞌbɛꞌa da ꞌyøtꞌ yʉ ꞌyɛ̨cꞌyɛ̨i, pɛ da bɛ̨n ran huɛ̨cate
23 Majuąni a ram hma ngue da zä ga øthʉ ꞌbɛꞌa go dín numanhohʉ. Pɛ nuꞌbʉ ga øthʉ ꞌbɛꞌa gä i ja, hinga gä xʉn ho bʉ dán gohi. Majuąni da zä da ꞌyøtꞌe høntꞌa go numanho nꞌda ra jąꞌi, pɛ hinga gätho nan te rá ꞌbɛfi Oją ʉ. 24 Pɛ i jatho ga huanhdʉ ndaꞌa manꞌda xʉn ho, ngue da zä ga fäxhʉ ʉ miꞌda, nɛ hin nangue man hosɛhʉ. 25 Pɛ dami sihʉ ꞌbɛꞌa gätho i ꞌbä bʉ ja ra täi, nɛ hingui jatho gui ꞌyänhdʉ ꞌbɛꞌa di ja a ra ngø ꞌbʉ mꞌbøtsꞌe o hinꞌna. 26 Nguetho gätho rá mbɛti Oją ʉ gätho i ja ua ja ra häi, nɛ ra ngø, nɛꞌa ra ximhäi bʉya. 27 Nɛ nuꞌbʉ ꞌboꞌo da zixꞌahʉ na tsꞌihmɛ bʉ ja yʉ́ ngu ʉ hing yʉ ꞌyɛ̨cꞌyɛ̨i, nɛ nuꞌbʉ guín nde gui mbähä, dami sahʉ ꞌbɛꞌa gätho di ꞌdaꞌahʉ, nɛ hin te gui ꞌyänhdʉ, nɛ o guím bɛ̨mhbʉ ngue di hɛcꞌahʉ Oją ngue gui sihʉ. 28 Pɛ nuꞌbʉ nꞌda ngue da xiꞌahʉ: “Nuna ra ngø bi mba mꞌbøspe yʉ hmite,” da tꞌɛ̨nꞌahʉ, pɛ o guí sihʉ bʉya, janangueꞌa hin gui ʉnbahʉ rá mbʉi a to bi xiꞌahʉ, nguetho im bɛ̨ni hingui nde Oją gui sihʉ a. 29 Nguetho i jatho gui jamansup rá mbʉi ni mijąꞌiui, madagueꞌbʉ guí pądi ngue xʉn ho a ra ngø. Pɛ masque ꞌbʉꞌi ꞌda ahʉ guín nde gui ꞌyängahʉ: “Hanja ngue ga ɛtꞌ man tsꞌihmɛhʉ ꞌbʉ ꞌboꞌo hingui numanho a, pɛ tenguꞌbʉ hinꞌyʉ ma tsꞌɛdihʉ ꞌbʉ. 30 Nɛ nuꞌbʉ dadí unhde ra jamadi Oją nangue man tsꞌihmɛ dí sihe, hanja ngue sä di cꞌąmanꞌʉje ʉ ꞌda,” gueꞌbʉ ꞌboꞌo da ꞌyängui. 31 Pɛ dí xiꞌahʉ, dami jamansuhʉ a guí øthʉ, uague ran tsꞌihmɛ guí sihʉ, o ꞌbɛꞌa gätho guí øthʉ, pɛ høntꞌa dí tꞌɛ̨spa Oją gui ꞌyøthʉ. 32 Nɛ ɛ̨mmɛ ga jamansuhʉ ꞌbɛꞌa dí øthʉ ngue njon ga jafʉ da dąngui, xinga nꞌda ra judío, xínga gueꞌʉ hing yʉ judío, nɛ xínga gueꞌʉ ma miꞌyɛ̨cꞌyɛ̨ihʉ. 33 Nguthogä ya, ɛ̨mmɛ dí honi ngue ga øtꞌä ꞌbɛꞌa gätho da numanho miꞌda yʉ jąꞌi xʉn ngu, nɛ hin dí honi ꞌbɛꞌa dín numanhosɛgä. Pɛgue dí honi nangue miꞌda, nguepʉ da zä da dįn ra temaꞌdaꞌyo ʉ gä miꞌda xʉn ngu.