11
Pɛ dí xiꞌahʉ gui tɛnhdʉ a dí øtꞌä, nguetho dí øtꞌä a i øtꞌa ra Cristo dí tɛndä.ꞌBɛꞌa da ꞌyøtꞌ yʉ xisu bʉ ja ram pɛti
2 Pɛ xʉn ho guí øthʉ ngueꞌa guím bɛ̨nthohʉ ꞌbɛꞌa gätho dá xiꞌahʉ, ngue bi bɛ̨ngä Oją ga xi ahʉ. 3 Pɛ dín nde ahʉ gui pąhmbʉ, ngue nu ra Cristo, go rá hmu nꞌda ngu nꞌda ran ꞌyohʉ, nɛ nu yʉ xisu, tenguꞌbʉ yʉ́ hmu ʉ yʉ́ ndø. Nɛ dín jahʉ bʉ nangue Oją. Nɛ in jabʉ a ra Cristo, rá Hmu a Oją a. 4 Pɛ nuꞌbʉ nꞌda ran ꞌyohʉ i yąui Oją bʉ i ja ram pɛti, o gue im man ram hma, pɛ hingui sä da hyuꞌtsꞌ rá fʉi, tenguꞌbʉ hinꞌyʉ rá tsꞌɛdi. 5 Pɛ nuꞌbʉ nꞌda ra xisu i yąui Oją bʉ ja ram pɛti, o gue im man ram hma, i jatho da gompꞌ rá yą, ngue hin da mispa a rá ndø, nɛ hin da ꞌyøtꞌe tenguꞌbʉ ntꞌąxi rá yą. 6 Pɛ nuꞌbʉ nꞌda ra xisu hingui nde da gompꞌ rá yą, manꞌda xʉn ho ꞌbʉ da ꞌyąx rá yą ꞌbʉ. Pɛ nuꞌbʉ guím bɛ̨mhbʉ ra ꞌyąsä ꞌbʉ ntꞌąxi nꞌda ra xisu, o gueꞌbʉ tenguꞌbʉ hinꞌyʉ yʉ́ xtą, pɛ manꞌda xʉn ho ꞌbʉ xtán gompꞌ rá yą. 7 Pɛ nu nꞌda ran ꞌyohʉ hingui sä da hyuꞌtsꞌ rá fʉi bʉ ja ram pɛti, nguetho i udi i ja rá tsꞌɛdi xʉn ho, tengu ꞌbʉ guesɛ Oją i ꞌbʉpʉ. Pɛ nu nꞌda ra xisu i udi manꞌda ja rá tsꞌɛdi nꞌda ran ꞌyohʉ. 8 Nguetho mbʉdi bi ꞌyøtꞌ Oją a ran ꞌyohʉ, nɛ mꞌbɛjua bʉya bi thącpa nꞌda rá doꞌyoꞌbøtsꞌe a ran ꞌyohʉ, nɛ gueꞌa í tꞌøtꞌ ra xisu a bʉya. 9 Nu ran ꞌyohʉ hin í tꞌøtꞌe ngue da mbäxꞌa ra xisu, pɛ í tꞌøtꞌa ra xisu ngue da mbäxꞌa ran ꞌyohʉ. 10 Nɛ ɛ gueꞌa dím mangä a, ngue nu yʉ xisu i jatho da gompꞌ yʉ́ yą, janangueꞌa da ꞌyudi ja yʉ́ tsꞌɛdi yʉ́ ndø. Nɛ gueꞌa dín numanho yʉ́m ꞌbɛhni Oją mahɛ̨tsꞌi a bʉya. 11 Pɛ nu bʉ ja rá ꞌbɛfi ra Cristo, hin da bømanho ꞌbʉ høntꞌʉ yʉn ꞌyohʉ dim pɛpʉ, xín da bømanho ꞌbʉ høntꞌʉ yʉ xisu, pɛgue gätho ꞌda dám fäxtahʉ ʉ. 12 Nguetho majuąni nuꞌa ra xisu ntꞌøtꞌe nangue rá doꞌyoꞌbøtsꞌe a ran ꞌyohʉ, pɛ guextaꞌa majuąni ím ꞌbʉ a nꞌda ran ꞌyohʉ nangue rá mbe. Nɛ gätho bi zän Oją din jabʉ. 13 Pɛ dami bɛ̨nsɛhʉ ꞌbɛꞌa manꞌda xʉn ho gui ꞌyøthʉ, nangue nꞌda ra xisu ꞌbʉ in yąui Oją, ꞌbʉ hingan joꞌmi rá yą. Ha guí ɛ̨mhbʉ xʉn ho i øtꞌe uague hinꞌna. 14 Nɛ dí pąhmbʉ ꞌyąsä ꞌbʉ xtá mba rá yą nꞌda ran ꞌyohʉ. 15 Nɛ ngutho nꞌda ra xisu, gueꞌa ní nɛcmanho a rá xtą ꞌbʉ xʉ mba. Nɛ gueꞌa í tsꞌänba nꞌda ra xisu a, ngueꞌa xtá mba yʉ́ xtą, tenguꞌbʉ ya rán joꞌmayą a. 16 Pɛ nuꞌbʉ ꞌboꞌo in nde dán juntꞌa ꞌbɛꞌa dí xi ahʉ, pɛ hingui sä dán junthʉ a. Nɛ i jatho ga xifi ngue ngutho i tꞌørpʉ ja miꞌda yʉ́m pɛti yʉ ꞌyɛ̨cꞌyɛ̨i.
Da hnumansu ran tsꞌihmɛ bi zän ra Hmu
17 Pɛ nuꞌa manꞌda ga xi ahʉ ya, hingui sä ga ɛ̨nꞌahʉ xʉn ho guí øthʉ. Nguetho hingui sä di zɛtꞌa ni mbʉihʉ a guí øthʉ bʉ ja nim pɛtihʉ, pɛ manꞌda di tsꞌonꞌnahʉ. 18 Nguetho i siqui ꞌbɛꞌa guí øthʉ ꞌbʉ guídím pɛtihʉ, guídín junthʉ nꞌda ngu nꞌda ahʉ. Nɛ dí ɛ̨cꞌyɛ̨i ngue majuąni a i siqui. 19 Masque guím bɛ̨mhbʉ jatho gan hejʉ. Pɛ guepʉ bi fądi ndaꞌa majuąni yʉ ꞌyɛ̨cꞌyɛ̨i. 20 Nguetho nu bʉ ja nim pɛtihʉ guí sihmɛhʉ, pɛ him majuąni gueꞌa ran tꞌøtꞌe bi xic ma Hmuhʉ guí øthʉ. 21 Pɛ nuꞌbʉ ra ora guí sihmɛhʉ, ɛ̨mmɛ guídín uɛ̨mhbʉ nin tsꞌihmɛhʉ nꞌda ngu nꞌda ahʉ. Nuꞌʉ ꞌda xínga nꞌdamhmɛ gá unhdʉ, nɛ nuꞌahʉ bʉya gueꞌbʉ go ɛ̨mmɛ gán niyahʉ. 22 Ha hinꞌyʉ ni ngumhbʉ ngue gan sihmɛhʉ bʉ. Nguetho guídí tsꞌonbahʉ rá ꞌbɛfi Oją, nɛ guídí ꞌyąsäbahʉ ʉ ni cuhʉ nte gá unhdʉ. ꞌBɛꞌa guí ɛ̨na ga xi ahʉ. Ha guí ɛ̨na ga ɛ̨nꞌahʉ xʉn ho a guí øthʉ. Pɛ hinꞌna.
Nangue ꞌbɛꞌa nam bøn a ran tsꞌihmɛ bi zän ra Hmu
23 Janangueꞌa dín nde ga xi ahʉ mahønꞌa ya ꞌbɛꞌa nam bøn a ran tsꞌihmɛ bi zän ra Hmu. Nɛ tengu thoho bi xängä ra Hmu, nɛ ngutho dí xi ahʉ. Ngue nꞌdatꞌa ra xui bi mba ma dä ra Hmu Jesús, nɛ bi hyąc ra hmɛ, 24 bi ꞌyäp ra jamadi Oją nɛ bi xɛm bʉya. Nɛ bi ꞌyɛ̨na: “Dami sihʉ na, nuna ma ngøcꞌyɛ̨igä na, ngue din ʉnbi nangue ahʉ. Nɛ gui thoqui gui ꞌyøthʉ na, nꞌdamhma guim bɛ̨njʉ.” 25 Nuꞌbʉ mi jua a bi zi a ra hmɛ, bi dɛc a ra tasa bʉya, ngue mi po ra guiꞌuva, nɛ bi ꞌyɛ̨na: “Nuna nam bøni ngue ya di hocꞌahʉ xʉn ho ra ꞌdaꞌyoꞌyu da ꞌyøtꞌahʉ Oją nangue ma jigä. Nɛ nꞌdandį ngu nꞌdandį gui sihʉ, guim bɛ̨njʉ dá tugä nangue ahʉ,” bi ꞌyɛ̨nꞌa ra Jesús. 26 Janangueꞌa nꞌdandį ngu nꞌdandį ga sihʉ ra hmɛ nɛ ra guiꞌuva, dí uhmbʉ rán dąte ra Hmu gueꞌbʉ go bá pengua mahønꞌa.
ꞌBɛpʉ dá fɛ̨n ran tsꞌihmɛ bi zän ra Hmu
27 Pɛ nuꞌa toꞌo hin din ꞌyomfɛ̨ni, nɛ sä i si a ra hmɛ nɛ ra guiꞌuva, ya i ja rá tsꞌoqui, nguetho hingui numansup rán dąte a ra Hmu bi du. 28 Janangueꞌa i jatho mꞌbɛtꞌo da bąsɛ nꞌda ꞌbɛꞌa i ja mbo rá mbʉi, nɛ nubʉya da zä da zi ra hmɛ nɛꞌa ra guiꞌuva. 29 Nguetho nuꞌbʉ i si a ra hmɛ nɛ i si rán gui ra uva, nɛ hinguim bɛ̨ni ꞌbɛꞌa ín ʉnba ra Hmu ꞌbʉ mi du, nɛ høntꞌa ran ʉnbi da nu a. 30 Nɛ gue a guí øthʉ a, janangueꞌa xʉn ngu xʉn ʉ ahʉ nɛ xʉn güentꞌi ahʉ, nɛ ya xcá tuhʉ ꞌda ahʉ. 31 Pɛ nuꞌbʉ mꞌbɛtꞌo dadí juąnbazɛhɛ ma mbʉihʉ, hin da zɛgbahʉ ra Hmu ꞌbʉ. 32 Pɛ nuꞌbʉ hin dadí juąnbazɛhɛ ma mbʉihʉ, guemhma da ꞌyørcahʉ ram fɛi ꞌbʉ. Pɛ manꞌda xʉn ho ꞌbʉ da mbɛgbahʉ ra Hmu ya, nꞌdamhma hinga ꞌdarpʉ gan nuhʉ ran ʉnbi ra ximhäi. 33 Janangueꞌa ma zi cu ahʉ, nuꞌbʉ guidím pɛtihʉ, ngue gui sihʉ ra hmɛ nɛ ra guiꞌuva, ndeꞌbʉ hin gan uɛ̨nsɛhʉ, pɛ gui tømhbʉ din ꞌda ahʉ nꞌda ngu nꞌda ahʉ. 34 Nɛ nuꞌbʉ ꞌboꞌo i tumanthuhu, hin da bɛ̨ni din sihmɛ bʉ ja ram pɛti, pɛ jatho ꞌbɛ din sihmɛ bʉ ja rá ngu, nꞌdamhma hin da mbɛp ahʉ Oją nangueꞌa nim pɛti guí øthʉ. Nɛ nuꞌa ꞌbɛꞌa gätho manꞌda guí øthʉ, ga hocꞌahʉ ꞌbʉ dá mba bʉ.