ꞌDahma ꞌdanꞌyo yʉ́ tsꞌɛdi bi un rá Hogandąhi Oją
12
Nɛ nuya ma zi cu ahʉ, dín nde ahʉ gui pąhmbʉ ꞌbɛꞌa nam bøn a ra tsꞌɛdi di ꞌdajʉ rá Hogandąhi Oją nangue ga ørpahʉ rá ꞌbɛfi ꞌdahma ꞌdanꞌyo. 2 Guí pąhmbʉ ꞌbɛꞌa gá ꞌyøthʉ ꞌbʉ him maní ꞌyɛ̨cꞌyɛ̨ihʉ, nɛ gá hyą ꞌdahʉ yʉ hyäte oją, nɛ hingui yą ʉ. 3 Janangueꞌa dín nde ahʉ gui pąhmbʉ a majuąni ya. Nuꞌbʉ guí øhmbʉ ꞌboꞌo i yą nangue rá Hogandąhi Oją, da ꞌyɛ̨mbi rá Hmu a ra Jesús ꞌbʉ i yą. Pɛ nuꞌbʉ i sanꞌa ra Jesús ꞌbʉ i yą, him majuąni in ꞌyoui rá Hogandąhi Oją a. 4 Nɛ ꞌdahma ꞌdanꞌyo yʉ ꞌbɛfi da zä da hyąnꞌa nꞌda ngu nꞌda yʉ ꞌyɛ̨cꞌyɛ̨i, pɛ nꞌdatꞌa rá tsꞌɛdi rá Hogandąhi Oją ngue di unni. 5 Nɛ ꞌdahma ꞌdanꞌyo ꞌbɛpʉ ní ꞌyørpa rá ꞌbɛfi Oją nꞌda ngu nꞌda, pɛ nꞌdatꞌa ra Hmu dí ørpahʉ rá ꞌbɛfi. 6 Nɛ gätho bi tsꞌänbi ꞌbɛꞌa da mbɛfi nꞌda ngu nꞌda yʉ ꞌyɛ̨cꞌyɛ̨i, pɛ nꞌdatꞌa Oją di bɛ̨nbi ꞌbɛꞌa da ꞌyøtꞌe. 7 Nɛ nu Oją bi ꞌdajʉ ra tsꞌɛdi, janangueꞌa gätho dí uhmbʉ ngue dín ꞌyohʉ rá Hogandąhi Oją. Nɛ gueꞌa bi ꞌyørcahʉ Oją a, nꞌdamhma da zä ꞌda dám fäxtahʉ. 8 Nuꞌʉ ꞌda bin tꞌun ra tsꞌɛdi da manꞌa rá hoganꞌyomfɛ̨ni Oją ngue him mám fądi, pɛ nangue rá Hogandąhi Oją di bɛ̨nbi da ma. Nɛ nu miꞌda bin tꞌun ra tsꞌɛdi da ma xʉn ho ꞌbɛꞌa nam bønꞌa rám hman Oją. Nɛ nꞌdatꞌa rá Hogandąhi Oją bi unni gätho yʉ́ ꞌbɛfi ꞌdahma ꞌdanꞌyo. 9 Nɛ nu miꞌda bin tꞌun ra tsꞌɛdi da bądi din tꞌunꞌna i äpꞌa Oją. Nɛ nuꞌʉ ꞌda bin tꞌun ra tsꞌɛdi da xox yʉ hyɛ̨nni, nɛ nꞌdatꞌa rá Hogandąhi Oją di unni. 10 Nɛ nuꞌʉ ꞌda bin tꞌun ra tsꞌɛdi ngue da ꞌyøtꞌ yʉn tꞌøtꞌe mixte ngue hingui sä da ꞌyøtꞌa nꞌda ra jąꞌi. Nɛ nuꞌʉ ꞌda bin tꞌun ra tsꞌɛdi da ma ꞌbɛꞌa din ja. Nɛ nuꞌʉ ꞌda bin tꞌun ra tsꞌɛdi da bądi ndaꞌa ním hma bi bɛ̨nba rá Hogandąhi Oją, nɛ ndaꞌa bi bɛ̨nba ra zįthu. Nɛ nuꞌʉ ꞌda bʉya bin tꞌun ra tsꞌɛdi din yą manꞌda ra nde ngue hingam fądi ꞌbɛꞌa nam bøni. Nɛ nuꞌʉ ꞌda bʉya da ma ꞌbɛꞌa nam bønꞌa bi man a. 11 Pɛ gätho ya i øzɛhɛ rá Hogandąhi Oją, nɛ di darpi nꞌda ngu nꞌda ꞌbɛꞌa da ndesɛ Oją da ꞌyøtꞌe.Gätho nꞌdanjąꞌi tho dí comhbʉ
12 Nɛ tengu nꞌda ra jąꞌi ɛ̨mmɛ xʉn ngu ní hut rá jąꞌi, pɛ nꞌdanjąꞌi tho i cohi. Nɛ in jabʉ ra Cristo nanguejʉ. 13 Nɛ dá gueꞌbʉ dyʉ judíohʉ o dyʉ griegohʉ, o dá gueꞌbʉ dyʉ́ ꞌyɛ̨hɛhʉ o hinꞌna, pɛ nꞌdatꞌa rá Hogandąhi Oją dá hąmhbʉ bʉ ja ma mbʉihʉ, tenguꞌbʉ ꞌdarbʉ í nɛx ra dehe dá sihʉ. Nɛ gueꞌa í ꞌyørcahʉ ngue nꞌdanjąꞌi tho dín jahʉ. 14 Pɛ nu rá jąꞌi nꞌda, hinga nꞌdatho ní huti, pɛ ɛ̨mmɛ xʉn ngu i ja yʉ́ thuhu, ngue i juadi xʉn ho nꞌda ra jąꞌi. 15 Pɛ nuꞌbʉ nꞌda ra gua da ꞌyɛ̨nsɛ ngue hinga gueꞌa ra ꞌyɛ: “Janangueꞌa hin te dí pɛcä ꞌbʉ,” ɛ̨na. Pɛ hingui sä ngubʉ da bɛ̨ni, nguetho rá gua ra jąꞌi a. 16 Nɛ nuꞌbʉ nꞌda ra zagu da bɛ̨ni: “Hin te dí pɛcä,” nguetho im bɛ̨ni hinga gueꞌa ra dä a. Pɛ hingui sä ngubʉ da bɛ̨ni, nguetho rá zagu ra jąꞌi a. Nɛ hingui sä da bɛ̨ni ngue hing rá ngø ra jąꞌi a. 17 Nguetho nuꞌbʉ gätho xtín jąꞌi a rá dä nꞌda, ꞌbɛꞌa dí ꞌyøhnahyą ꞌbʉ. Xiꞌbʉ gä xtín zagu rá jąꞌi nꞌda, nɛ hinꞌyʉ rá xįyu, ꞌbɛꞌa xtán zä xtám bąhą tengu rá xįyu. 18 Pɛ nu Oją bi zänni ꞌbɛꞌa gätho i ja rá jąꞌi nꞌda, nɛ nꞌda ngu nꞌda bi un rá tsꞌɛdi ngue da zä da ꞌyøtꞌe ꞌbɛꞌa gätho in ndepe da ꞌyøtꞌe. 19 Pɛ nuꞌbʉ nꞌdaxɛqui tho, ha dán zä din ja tengu ra jąꞌi. 20 Pɛ in jabʉ nꞌda ra jąꞌi, ɛ̨mmɛ xʉn ngu yʉ xɛqui i ja, guepʉ nan ho a nꞌda ra jąꞌi. 21 Pɛ nu rá dä nꞌda hingui sä da ꞌyɛ̨mp a rá ꞌyɛ, ngue nte ní mbätsꞌi, xinga gueꞌa rá yą hingui sä da ꞌyɛ̨mp ʉ yʉ́ gua nte ní mbätsꞌi. 22 Pɛ hingui sä ngubʉ da ma, nguetho nꞌda ngu nꞌda yʉ xɛqui gätho i ja yʉ́ ꞌbɛfi. Pɛ nu yʉ́ xɛqui ma jąꞌihʉ ngue dí ɛ̨mfʉ nte i pɛfi, pɛ manꞌda ɛ̨mmɛ di muui ʉ. 23 Nɛ nu ꞌda yʉ xɛqui dí ɛ̨mfʉ di ꞌbɛdi, pɛ manꞌda ga hojʉ nꞌdamhma xtán ho. Nɛ nu yʉ xɛqui dí ɛ̨mfʉ hingui sä da hnu, pɛ manꞌda dí jamansuhʉ nꞌdamhma hin da tsꞌani. 24 Pɛ nu ꞌbɛꞌa di nɛcmanho nangue ma jąꞌihʉ, ya hinꞌyʉ ꞌbɛꞌa manꞌda ga jafʉ. Pɛ Oją bi hoqui gätho ma jąꞌihʉ, nɛ bi japi ngue manꞌda bi muui a dí ɛ̨mfʉ hingui ho. Janangueꞌa hin da tꞌɛ̨mp a nꞌda xɛqui nte di muui. 25 Janangueꞌa hin da zä din hec yʉ ꞌyɛ̨cꞌyɛ̨i, tenguꞌbʉ yʉ́ xɛqui ma jąꞌihʉ, pɛ ꞌda xtín jamansu nꞌda ngu nꞌda. 26 Janangueꞌa nuꞌbʉ nꞌdaxɛqui ma jąꞌihʉ xʉn ʉ, ya ꞌda nan ʉ tho gätho ma jąꞌihʉ bʉya. O nuꞌbʉ nꞌda ra xɛqui ngue hin hapʉ i sä, ya di johya gätho ma jąꞌihʉ bʉya. 27 Pɛ guim bɛ̨mhbʉ nangue nim pɛtihʉ, nɛ gueꞌa rá jąꞌi ra Cristo a, nɛ nꞌda ngu nꞌda ahʉ tenguꞌbʉ nꞌda a nꞌdaxɛqui ahʉ rá jąꞌi ra Cristo. 28 Nɛ ngubʉ bi zän Oją nangue ram pɛti dí øthʉ, ngue ꞌbɛꞌa ní ꞌbɛfi dí øthʉ nꞌda ngu nꞌdajʉ. Nɛ nuꞌʉ yʉ́ ꞌbäihʉ ra Cristo manꞌda bi tsꞌänbi da hnumansu ʉ. Nɛ nu yʉ́ pøngahyą Oją, nɛꞌʉ bi tsꞌänbi da hnumansu ʉ, pɛ hinga ꞌdaꞌigu. Nɛ ná hyu bʉya yʉ xänbate nangue rám hman Oją, nɛ bi tsꞌänbi nɛꞌʉ da hnumansu ʉ, pɛ hinga ꞌdaꞌiguhʉ ʉ miꞌda. Nɛꞌʉ miꞌda i øtꞌ yʉn tꞌøtꞌe mixte, nɛꞌʉ miꞌda i øthe yʉ hyɛ̨nni, pɛ nɛꞌʉ miꞌda toꞌo i fäx yʉ́ miꞌyɛ̨cꞌyɛ̨ihʉ nangue ran huɛ̨cate ørpe, nɛꞌʉ miꞌda yʉ ngʉrbi di manda ram pɛti, nɛꞌʉ toꞌo ꞌdahma ꞌdanꞌyo bʉ na yą ngue yʉ nde hingam fądi, gätho bi tsꞌänba yʉ́ ꞌbɛfi nꞌda ngu nꞌda. 29 Pɛ ha gätho ahʉ ni ꞌbäihʉ ra Cristo ꞌbʉ, uague yʉ́ pøngahyą ahʉ Oją ꞌbʉ, uague guí ɛ̨mhbʉ gätho gan xänbatehʉ, uague gätho gui ꞌyøthʉ yʉn tꞌøtꞌe mixte ꞌbʉ. 30 Ha gätho i ja ni tsꞌɛdihʉ ngue gui xoxhʉ yʉ hyɛ̨nni, uague gä ꞌdahma ꞌdanꞌyo yʉ nde guí yąhʉ, ha gätho guí pądi guim mamhbʉ ꞌbɛꞌa nam bønꞌʉ yʉ nde xʉn hɛ̨i. Nɛ majuąni dí xi ahʉ ngue hinꞌna. 31 Pɛ dami hyomhbʉ Oją ngue di ꞌda ahʉ ra tsꞌɛdi ndaꞌa manꞌda dí fäx ni mijąꞌihʉ. Pɛ nuya ga utꞌahʉ manꞌda ra ꞌbɛfi ꞌbɛꞌa ctí fäx ni mijąꞌihʉ pɛ xinda gue miꞌda.