Nangueꞌa ran huɛ̨cate
13
Pɛ nuꞌbʉ gä xcán yąhʉ yʉ́ nde yʉ jąꞌi, o tengu bʉ na yą ʉ yʉ́m ꞌbɛhni Oją mahɛ̨tsꞌi, pɛ nuꞌbʉ hinꞌyʉ man huɛ̨catehʉ, hin te ní mba tho ꞌbɛꞌa dí øthʉ ꞌbʉ, tengu thoho nꞌda ra dambu o gueꞌʉ yʉ xitꞌɛgui zʉntho nɛ ndetho ɛ̨mmɛ xʉn hɛ̨i. 2 Nɛ madagueꞌbʉ i ja ma tsꞌɛdihʉ gam mamhbʉ ram hma ngue dím pøngahyąhʉ nangue Oją, pɛ nuꞌbʉ hin dadí huɛ̨jʉ to dí xihmbʉ ram hma, nte ní mba tho. O nuꞌbʉ xcá pąhmbʉ ꞌbɛꞌa gätho an tꞌągui nangue Oją, o gueꞌbʉ xcá pąhmbʉ ꞌbɛꞌa gätho manꞌda xʉn hɛ̨i, o nuꞌbʉ ga pąhmbʉ da tꞌørcahʉ a dí äfʉ Oją, nɛꞌʉ yʉ tꞌøhø da zä da ꞌuegue, pɛ nuꞌbʉ hinꞌyʉ man huɛ̨catehʉ, hin te dadí muhʉ ꞌbʉ. 3 O nuꞌbʉ xcá unhdʉ yʉ hyoya ꞌbɛꞌa gätho dí pɛshʉ, pɛ nuꞌbʉ hin dá bɛ̨mhbʉ a ran huɛ̨cate, ya nte dá tąhmbʉ bʉ na nu Oją ꞌbʉ. Nɛ ma xinda gueꞌbʉ gätho ma jąꞌihʉ xcá umhbʉ ngue xtín zø, pɛ nuꞌbʉ him bin ja man huɛ̨catehʉ, ya nte dá tąhmbʉ bʉya nangue rán jąpi Oją. 4 Pɛ nuꞌa ran huɛ̨cate nam bøni, ra yembʉi, nɛ hin din xømbʉi, nɛ hin din sɛya, nɛ xín ná yątꞌa ngue ja rá tsꞌɛdi, xíngui honi da tꞌɛ̨spa zɛhɛ. 5 Nɛ nu ran huɛ̨cate nam bøni, pɛspa rá sä rá mijąꞌiui, nɛ hingui honi nangue rán hosɛ pɛ i honba ran ho rá mijąꞌiui. Nɛ hingui sämanꞌʉ, nɛ hingui ørpa ra güɛnda ran tsꞌo bi tꞌørpe ꞌbʉ majuąni ja rán huɛ̨cate. 6 Nɛ nuꞌʉ di huɛ̨c yʉ́ mijąꞌihʉ, hin di johya ꞌbʉ ꞌboꞌo in nu i øtꞌ ra tsꞌoqui, pɛ ɛ̨mmɛ di johya ꞌbʉ ꞌboꞌo in nu i tɛnꞌna ra ꞌyu majuąni. 7 Nɛ nuꞌa i ja rán huɛ̨cate, hingui sumanhɛ̨i di huɛ̨cꞌa nꞌda, madagueꞌbʉ i ørpa ran tsꞌo. Nɛ hinjąmꞌbʉ ɛ̨cꞌyɛ̨i ꞌbʉ tꞌɛ̨mbi øtꞌ ran tsꞌo a to di huɛ̨qui. Pɛ nuꞌbʉ i pądi bi ꞌyøtꞌ ran tsꞌo, i tøꞌmi din ꞌyomfɛ̨ni. Nɛ hinjąmꞌbʉ ɛꞌtsꞌa ní ꞌyøtꞌ ran huɛ̨cate. 8 Pɛ nuꞌʉ ꞌda gä dí øthʉ ya, da zøni da zɛꞌʉ. Nguetho da zøn ra pa ngue njom mam pøngahyą nangue Oją, nɛ njom mam ma nangue miꞌda yʉ nde ꞌdahma ꞌdanꞌyo ngue hingam fądi. Nɛ nuꞌʉ toꞌo i ja yʉ́ tsꞌɛdi da ma ꞌbɛꞌa gätho xʉn hɛ̨i da fądi nangue Oją, pɛ him ma manꞌʉ, ꞌbʉ ya gätho ga pąhmbʉ xʉn ho. 9 Pɛ nuya nu toꞌo bin tꞌunni da manꞌa xʉn hɛ̨i, pɛ hinga gätho i pądi xʉn ho nangue Oją. Nɛꞌʉ to bin tꞌunni dim pøngahyą, pɛ hinga gä im ma. 10 Nɛ nuꞌa dí øthʉ ya ngue dí ꞌbʉhmbʉ yʉ pøngahyą, pɛ ya him ma homhbʉ ꞌbʉ dá pąhmbʉ xʉn ho, nguetho hinga gätho im manꞌʉ. 11 Nɛ tenguꞌbʉ mán tꞌʉhnihʉ, dá yąhʉ tengu bʉ na yą yʉ tꞌʉhni, nɛ ngubʉ dám bɛ̨mhbʉ, tengu bʉ nam bɛ̨n yʉ tꞌʉhni. Nɛ nuꞌbʉ mán dąnꞌyohʉhʉ bʉya, ya dá bɛ̨mhbʉ ngue ga sohmbʉ ꞌbɛꞌa gätho mí øthʉ ꞌbʉ mán tꞌʉhnihʉ. 12 Nɛ gueꞌa dí øthʉ yʉ pa i jabʉ a ya, nɛ hingui sä gan nuhʉ ꞌbɛꞌa di ja Oją. Tengu thoho ꞌbʉ dí hɛ̨thʉ nꞌda ran hyɛ̨dä hingui di nɛqui xʉn ho rá hmi nꞌda ra jąꞌi. Pɛgue da zøni ngue da zä ga pąhmbʉ xʉn ho ꞌbʉ dá nusɛhʉ Oją. Nuya hingui sä ga pąhmbʉ xʉn ho ha in ja, pɛgue da zøni ga pąhmbʉ xʉn ho, tengu thoho Oją i pąjʉ ya. 13 Pɛ hyu i jajʉ ngue hinjąmꞌbʉ ga juahmbʉ. Nuꞌa nꞌda, ngueꞌa ga pąhmbʉ majuąni da ꞌyøtꞌa ran ho bi man Oją, nɛ nuꞌa ná yoho ngueꞌa ga tømhbʉ a i mam bʉya, ná hyu bʉya, ngue a ran huɛ̨cate. Nɛ manꞌda xʉn ngu di muui ran huɛ̨cate xinda gueꞌʉ miꞌda i hmangua.