Nangueꞌʉ ꞌdahma ꞌdanꞌyo bʉ na yą
14
Pɛ manꞌda ga humbi ga øthʉ ran huɛ̨cate. Nɛ a manꞌda di bɛ̨ngahʉ rá Hogandąhi Oją, dam pøngahyąhʉ ga mamhbʉ rám hman Oją. Nɛ mꞌbɛjua tsꞌʉ da zä ga øthʉ miꞌda yʉ ꞌbɛfi di bɛ̨ngahʉ rá Hogandąhi Oją bʉya. 2 Pɛ nuꞌʉ toꞌo i yą nꞌda ra nde hingam fądi, høntꞌa Oją da zä din yąui, nɛ hinga gueꞌʉ yʉ jąꞌi i yąhʉ. Nguetho njongui øde ꞌbɛꞌa im ma. Nɛ masque rá Hogandąhi Oją di bɛ̨nbi, pɛ ntꞌągui thoho. 3 Pɛ nuꞌʉ toꞌo dim pøngahyą nangue ra nde ngueꞌa mfądi, i xih yʉ́ mijąꞌihʉ, nɛ da zä di japi din te yʉ́ mbʉi, nɛ di zɛrpa yʉ́ mbʉi, nɛ ɛ̨mmɛ di un ran johya yʉ́ mbʉi. 4 Pɛ nuꞌʉ toꞌo i yą nꞌda ra nde ngue hingam fądi, masque di zɛsɛ rá mbʉi, pɛ nuꞌʉ to dim pøngahyą, gä di zɛꞌʉ yʉ́ miꞌyɛ̨cꞌyɛihʉ. 5 Nɛ dín ndehmagä gätho ahʉ gan yąhʉ ꞌdahma ꞌdanꞌyo yʉ nde. Pɛ ɛ̨mmɛ manꞌda dín nde ahʉ gätho gui mamhbʉ rám hma Oją nangue ra nde ngue mfądi. Nguetho manꞌda xʉn ho a, xinda gueꞌbʉ gan yąhʉ miꞌda yʉ nde gue nꞌdanꞌyo hinda hønꞌbʉ da zä gui mamhbʉ ꞌbɛꞌa nam bønꞌa gá mamhbʉ, nɛ gätho din te yʉ́ mbʉi yʉ ꞌyɛ̨cꞌyɛi bʉya. 6 Jannangueꞌa ma zi cuꞌahʉ, xiꞌbʉ høntꞌʉ yʉ nde hingam fądi gam mangä ꞌbʉ dá mbagä bʉ, ꞌbɛꞌa ním fätsꞌi ga øtꞌahʉ ꞌbʉ. Pɛ manꞌda xʉn ho ꞌbʉ ga xänꞌnahʉ rám hman Oją nangue ma ndesɛhʉ, nɛ ga ꞌda ahʉ nꞌda ran ꞌyomfɛ̨ni hin guí pąhmbʉ, nɛ ga xänꞌnahʉ ꞌbɛꞌa bi ꞌyurcä Oją. 7 Nɛ gam bɛ̨mhbʉ ꞌbɛꞌa i øtꞌ yʉm ꞌbixtꞌi nɛ yʉ ꞌbida. Nuꞌʉ hingui ja yʉ́ te pɛ i yą. Pɛ nuꞌbʉ hingui pømanho a im ma, ya hingam fądi ꞌbɛꞌa ní ꞌbɛi a bʉya, nguetho ꞌda nan gɛ̨tho. 8 Nɛ ngutho nꞌda ra thʉxi bʉ ja ra sʉi, da ma xʉn ho a ra ꞌbɛi ngue dín tunh yʉ dofʉi. Pɛ nuꞌbʉ hin da mba mꞌbixtꞌi xʉn ho, njon da bądi ꞌbɛꞌa nam bøni, nɛ njon din sä da mba ra tuhni. 9 Nɛ ngutho ahʉ ꞌbʉ hin guí yąhʉ nꞌda ra nde ntꞌøde xʉn ho, hague dán zä da fądi ꞌbɛꞌa guím mamhbʉ. 10 Nɛ masque ɛ̨mmɛ xʉn ngu yʉ nde i ja ua ja ra ximhäi, nɛ gätho xʉn ho ꞌbʉ ꞌboꞌo i pądi ꞌbɛꞌa nam bøni. 11 Pɛ nugä, nuꞌbʉ hin dí pą a ra nde ní tsꞌoqui, ya xcá øtꞌbe tenguꞌbʉ nꞌda an ꞌdanni ma hniniꞌbe, nɛ hingui sä dam pąꞌbe. 12 Nuꞌa guí ndehʉ ɛ̨mmɛ din ja ni tsꞌɛdihʉ nangue rá Hogandąhi Oją, pɛ dami ꞌyäfʉ ꞌbɛꞌa ní tsꞌɛdi da zä dín te yʉ́ mbʉi gätho yʉ ꞌyɛ̨cꞌyɛi guí ꞌbʉhmbʉ. 13 Nuꞌbʉ nꞌda ra jąꞌi din yą manꞌda ra nde hingam fądi, pɛ da ꞌyäp rá tsꞌɛdi Oją da zä da ma ꞌbɛꞌa nam bøni. 14 Nuꞌbʉ dí yąꞌbe Oją nangue manꞌda ra nde nꞌdanꞌyo, go i yą rá Hogandąhi Oją i o ma mbʉi, pɛ hin dí thocpa ran ꞌyomfɛ̨ni ʉ miꞌda ꞌbʉpʉ, ngue ꞌbɛꞌa nam bønꞌa dí ma. 15 ꞌBɛꞌa xʉn ho ga øtꞌe. Pɛ ndeꞌbʉ dan yąꞌbe Oją nangue rá Hogandąhi, pɛ i jatho ga japi da bą ʉ miꞌda ꞌbʉpʉ ngue ꞌbɛꞌa nam bøni. Nɛ ngutho ꞌbʉ dan tuh yʉ thuhu, ga ɛ̨spa Oją nangue rá Hogandąhi, pɛ guextaꞌa i jatho ga bɛ̨ni ꞌbɛꞌa nam bøni, nɛ ga japi da bɛ̨nꞌʉ miꞌda bʉya. 16 Nguetho nuꞌbʉ guí ɛ̨spahʉ Oją nangue nꞌda ra nde hingam fądi, nɛ madagueꞌbʉ di bɛ̨nꞌnahʉ rá Hogandąhi Oją, pɛ nuꞌʉ ꞌda hin da zä gui comhbʉ a ram hma ꞌbɛꞌa gní ꞌyɛ̨spahʉ Oją, nguetho hingui pądi ꞌbɛꞌa nam bønꞌa guí mamhbʉ. 17 Nɛ madagueꞌbʉ majuąni guídí unhdʉ ra jamadi Oją gueꞌbʉ nꞌdanꞌyo ra nde guí yąhʉ, pɛ hin guídí zɛrpahʉ yʉ́ mbʉi ni mijąꞌihʉ, ngue nɛꞌʉ dí un ra jamadi Oją. 18 Jamadi Oją nguetho manꞌda i sä dan yągä yʉ nde hingam fądi xinda gue ahʉ. 19 Pɛ nu bʉ ja yʉm pɛti, madagueꞌbʉ høntꞌi cʉtꞌa thoho yʉm hma ga ma gueꞌʉ ntꞌøde xʉn ho, pɛ manꞌda xʉn ho, xinda gueꞌbʉ ga ɛ̨na ga mam bʉ ꞌdɛtꞌa mahuąhi yʉm hma gueꞌʉ hingam fądi ꞌbɛꞌa nam bøni. Nguetho dín nde ga xänba yʉ cu. 20 Ma zi cu ahʉ, o guí øthʉ tenguꞌbʉ gyʉ́ tꞌʉhni ahʉ, pɛ damín ꞌyomfɛ̨nihʉ xʉn ho ꞌbɛꞌa manꞌda xʉn ho gui ꞌyøthʉ bʉ ja nim pɛtihʉ. Nguetho gyʉ dąjąꞌihʉ, madagueꞌbʉ i tꞌɛ̨nꞌahʉ gyʉ ꞌuɛrehʉ ngueꞌa hin guí nde gui ꞌyøthʉ yʉ tsꞌoqui. 21 Bi ꞌyɛ̨m bʉ ja rá tꞌohni Oją: “Madagueꞌbʉ dá japi bá ɛ̨h yʉ ꞌdamhnini ngue ꞌdanꞌyo bʉ na yą, ngue da zo ʉ ꞌbʉcua, pɛ ngutho him bi ꞌyʉrpa ra güɛnda a dám mangä ʉ,” biꞌ yɛ̨n Oją. 22 Janangueꞌa ga pąhmbʉ nꞌda ra hmɛpya ꞌbʉ ꞌboꞌo din yą manꞌda ra nde nꞌdanꞌyo, i uh rá tsꞌɛdi Oją, hndepe da ꞌyɛ̨cꞌyɛi ʉ hingui nde da ꞌyɛ̨cꞌyɛi. Nɛ hinga gueꞌʉ yʉ ꞌyɛ̨cꞌyɛi i pa ntꞌørpe yʉ hmɛpya. Pɛ nu ra tsꞌɛdi ngue da man rám hman Oją nangue yʉ́ ndesɛ ʉ, xʉn ho ngueꞌa da xänbi gätho yʉ ꞌyɛ̨cꞌyɛi, nɛ hin nangueꞌʉ ɛ̨mmɛ xʉm mɛ yʉ́ mbʉi, hingui nde da ꞌyɛ̨cꞌyɛi. 23 Pɛ xiꞌbʉ bim pɛti gätho yʉ ꞌyɛ̨cꞌyɛi nɛ gätho ꞌdahma ꞌdanꞌyo yʉ nde i yą, nɛ da zøm bʉ ꞌda ngue hing yʉ ꞌyɛ̨cꞌyɛi, o gueꞌʉ hinga na pądi xʉn ho. Ha hin guím bɛ̨mhbʉ ngue da ꞌyɛ̨nꞌahʉ guí jąthʉ. 24 Pɛ nuꞌbʉ gätho guí mamhbʉ rám hma Oją ngue ra nde mfądi, nɛ da yʉrpʉ ꞌda hing yʉ ꞌyɛ̨cꞌyɛi o gueꞌʉ hinga na pądi xʉn ho. Nɛ da bąsɛ bʉya ngue ja yʉ́ tsꞌoqui, nɛ da bądi ꞌbɛꞌa i ja yʉ́ mbʉi zɛhɛ ꞌbʉ bi ꞌyøꞌa guí mamhbʉ. 25 Nɛ nuꞌa ntꞌągui bʉ mbo yʉ́ mbʉi da japi di nɛqui xʉn ho. Nɛ din dąnyahmu nɛ da ꞌyäp rá punbi Oją bʉya. Nɛ da ꞌyɛ̨na: “Majuąni maha guí ꞌbʉhmbʉ Oją,” da ꞌyɛ̨m bʉya.Da tꞌøtꞌe xʉn ho a ram pɛti
26 Nuya, ma zi cu ahʉ, dín nde ga xi ahʉ ꞌbɛꞌa manꞌda xʉn ho gui ꞌyøthʉ ꞌbʉ guídím pɛtihʉ. Pɛ ndeꞌbʉ ꞌbɛ guim bɛ̨mhbʉ ꞌbɛꞌa dín te yʉ́ mbʉi gätho yʉ ꞌyɛ̨cꞌyɛi, nɛ da zä gan tuhmbʉ nꞌda ra thuhu guín nde gan tuhmbʉ bʉya, o gue nꞌda ram hma guín nde gan xänbatehʉ, o gue nꞌda ram hma bi bɛ̨nꞌnahʉ Oją ngue gui mamhbʉ, o nꞌda ram hma guí nde gui mamhbʉ nꞌda ra nde hingam fądi ꞌbɛꞌa nam bøni, pɛ gueꞌbʉ di ꞌbʉi toꞌo da man a ꞌbɛꞌa nam bøni ngue hingam fądi. 27 Pɛ nuꞌbʉ guí yąhʉ manꞌda ra nde nꞌdanꞌyo, høntꞌʉ yonjąꞌi din yą, nɛ nuꞌbʉ xʉn ngu, hyunjąꞌi. Nɛ hinga nꞌdatꞌa ra ora din yą gätho. Nubʉya i jatho dim ꞌbʉꞌa nꞌda da ma ꞌbɛꞌa nam bøn a bi hma. 28 Pɛ nuꞌbʉ njongui ꞌbʉpʉ nꞌda i pądi da ma ꞌbɛꞌa nam bønꞌa bi hma, manꞌda xʉn ho ꞌbʉ nte da mam bʉ ja nim pɛtihʉ. Da zä din yą, pɛ nꞌdanni din yąsɛui Oją. 29 Ximangutho ʉ i man rám hman Oją nangue ra nde mfądi, din yą yoho o hyu. Nɛ nuꞌʉ toꞌo bin tꞌun ra tsꞌɛdi da bądi ꞌbɛꞌa nam bønꞌa ram hma, da mam ꞌbʉ hingui ho, ua gueꞌbʉ xʉn ho. 30 Nɛ nuꞌbʉ i hupʉ nꞌda bi bɛ̨nba Oją da ma ꞌbɛꞌa im bɛ̨ni da ma, pɛ ꞌbɛ di jua a i yą bʉ, nɛ gui jafʉ din yą a manꞌda bʉya. 31 Janangueꞌa da xøtꞌa gan yąhʉ ꞌdahmi ꞌdatho, nɛ gätho ahʉ toꞌo gätho di bɛ̨nba Oją din yą. Nubʉya tengu ꞌbʉ gán niyąbahʉ yʉ cu nangue yʉ́ mbʉi nɛ gätho da hyą yʉ tsꞌɛdi yʉ́ mbʉi bʉya. 32 Nuꞌʉ to i man rám hman Oją i jatho da ząmzɛhɛ rá mbʉi zɛhɛ, madagueꞌbʉ Oją bi bɛ̨nbi din yą, pɛ jatho da døꞌmi tsꞌʉ, ꞌbɛ din yą a manꞌda. 33 Nguetho nde Oją da tsꞌänni ꞌbɛꞌa gätho din ja bʉ, nɛ hinga ꞌda ni thąs thoho ꞌbɛꞌa gätho i øtꞌ Oją. Nɛ in jabʉ i tꞌøtꞌe hønbʉ go hapʉ i ja yʉ́m pɛti ma miꞌyɛ̨cꞌyɛihʉ. 34 Nɛ nu yʉ xisu hingui sä din yą bʉ ja yʉ dąmpɛti, nguetho hinꞌyʉ yʉ́n tꞌɛ̨di din yą ʉ, nɛ i jatho da ꞌyøꞌa ꞌbɛꞌa da sifi, nɛ hin dim ꞌbɛtꞌo, tengu i mam bʉ ja rá tꞌohni Oją. 35 Nɛ nuꞌbʉ in nde da ꞌyänni ꞌbɛꞌa nam bøn a hmam bʉ, i jatho da ꞌyänꞌna rá ndø bʉ ja rá ngusɛ, nguetho hin di nɛcmanho ꞌbʉ i yą nꞌda ra xisu bʉ ja ram pɛti. 36 Ha guím bɛ̨mhbʉ gá dʉmzɛhɛhʉ rá ꞌbɛfi Oją, ngue guí ɛ̨mhbʉ da zä gui sänzɛhɛhʉ ꞌbɛꞌa gui ꞌyøthʉ. Uague guím bɛ̨mhbʉ hønꞌadahʉ gá hyąmhbʉ a ram hma. 37 Pɛ nuꞌbʉ majuąni bi ꞌda ahʉ rá tsꞌɛdi Oją gui mamhbʉ rám hma, o gueꞌbʉ majuąni bin ꞌda ahʉ nin ꞌyomfɛ̨nihʉ nangue rá Hogandąhi Oją, nuꞌbʉ, jatho gui ꞌyøthʉ a dá otꞌahʉ ꞌbʉ, nguetho rá manda ra Hmu a. 38 Nɛ nuꞌbʉ ꞌboꞌo hingui nde da ꞌyøꞌa dá otꞌahʉ, pɛ hingui sä gui ꞌyʉrpahʉ ra güɛnda a. 39 Janangueꞌa ma zi cu ahʉ, manꞌda ɛ̨mmɛ gui hyumbi gui mamhbʉ rám hman Oją nangue ra nde mfądi. Pɛ hin gui hɛcpahʉ toꞌo in nde din yą manꞌda ra nde. 40 Pɛ gan ꞌyomfɛ̨nihʉ xʉn ho, nɛ ꞌdarpʉ dí mba gui ꞌyøthʉ, nɛ hinga ꞌda dí thąs thoho ꞌbɛꞌa gätho gui ꞌyøthʉ.