Bi ndantsꞌ mahønꞌa ra Cristo
15
Nuya ma zi cuꞌahʉ, dín nde ga xi ahʉ mahønꞌa ran ho maꞌdaꞌyo, tengu dá xi ahʉ mam ꞌbɛtꞌo. Nɛ gueꞌa ram hma gá hyąmhbʉ, nɛ gueꞌa gním ꞌbähmbʉ xʉn ho a. 2 Nɛ guetꞌa ram hman a gní yąn ni tehʉ a ꞌbʉ guidí thoqui gui tɛn thohohʉ a dá xi ahʉ. Pɛ nuꞌbʉ hinꞌna, säti tho guí ɛ̨mhbʉ guí øthʉ ꞌbʉ. 3 Nɛ dá ja ahʉ gá pąhmbʉ a ram hma bin ꞌdacä ngue manꞌda jatsꞌɛdi tho ga pąhmbʉ. Ngue dá xänꞌnahʉ bi du ra Cristo, bi hoga ma tsꞌoquihʉ, tengu thoho mán tꞌoꞌtꞌi bʉ ja rá tꞌohni Oją. 4 Bi tꞌägui, nɛ bi xox Oją ꞌbʉ ná hyupa, tengu thoho mí mam bʉ ja rá tꞌohni Oją. 5 Nɛ nuꞌbʉ mi dąmbɛ̨ni ra Cristo, mꞌbɛtꞌo bin ꞌyusɛ bʉ ꞌbʉh ra Pedro, nɛ mꞌbɛjua bʉya bi nu miꞌda yʉ́ xädi. 6 Nɛ mꞌbɛjua bʉya xø ꞌbexque bi nɛqui bʉ ꞌdarpʉ mídím pɛti cʉtꞌa ciɛnto yʉ cu. Nɛ ɛ̨mmɛ xʉn ngu i ꞌbʉtho ʉ ya, madagueꞌbʉ xʉn du ʉ ꞌda. 7 Nɛ mꞌbɛjua bi nu ra Jacobo, nɛ mꞌbɛjua mahønꞌa bi nu gätho ʉ yʉ́ ꞌbäihʉ. 8 Pɛ rán zɛgui thoho nɛcä bi zä dá nugä ra Cristo bʉ ꞌyu. Nɛ ɛ̨mmɛ xʉn hɛ̨i bʉ dá ɛ̨cꞌyɛigä a ram ꞌbʉi maꞌdaꞌyo, tenguꞌbʉ nꞌda ra ꞌuɛre hingui sä dim ꞌbʉi, nɛ ɛ̨mmɛ din ʉnbi. 9 Nɛ him man zäꞌbe ngue xtá tꞌɛ̨ngä ma ꞌbäiꞌbe ra Cristo, nɛ manꞌda tsꞌʉtho dadí muꞌbe xinda gueꞌʉ miꞌda yʉ́ ꞌbäihʉ, nguetho ɛ̨mmɛ dá ʉnbä ʉ yʉ́ ꞌyɛ̨cꞌyɛi Oją. 10 Pɛ nu Oją rá mate zɛhɛ bi jaqui tengu dín jagä ya. Nɛ hinga säti thoho rá mate Oją bi ꞌyørque, nguetho ɛ̨mmɛ dá humbi xinda gue gätho miꞌda yʉ́ ꞌbäihʉ ra Cristo. Pɛ hinga guecä dá øtꞌ ra ꞌbɛfi, nɛ gueꞌa rá mate zɛhɛ Oją bi zɛqui dá øtꞌe. 11 Madagueꞌbʉ guecä o gueꞌʉ miꞌda bi xänꞌnahʉ, pɛ nꞌdatꞌa ram hma dí mamhbe ngue bi du ra Cristo nangue ma tsꞌoquihʉ, nɛ bi xox Oją ꞌbʉ mi du. Nɛ gueꞌa ram hma gá ꞌyɛ̨cꞌyɛihʉ a.Da xox Oją ʉ xʉn du
12 Pɛ xi a ram hma dí mamhbʉ, ngue bi dąmbɛ̨ni ra Cristo ꞌbʉ mí du, pɛ hanja gní ꞌyɛ̨mhbʉ ꞌda ahʉ bʉya, ngue hingui sä da dąmbɛ̨ni ʉ xʉn du. 13 Nuꞌbʉ hin da dąmbɛ̨ni ʉ xʉn du, pɛ xinga gueꞌa ra Cristo xtán dąmbɛ̨ni ꞌbʉ, nɛ guextaꞌa ya xʉn du a ya ꞌbʉ. 14 Nɛ nuꞌbʉ hin xtán dąmbɛ̨ni a ra Cristo, hinꞌyʉ rá tsꞌɛdi a ram hma dí mamhbʉ ꞌbʉ, nɛ ndetho guí ꞌyohʉ bʉ ꞌbʉ. 15 Nɛ nuꞌbʉ ngubʉ guím bɛ̨mhbʉ ngue hingui sä da dąmbɛ̨ni ʉ xʉn du, guí nubɛthąni gahe ꞌbʉ ngue dí mamhbe bi xox Oją a ra Cristo ꞌbʉ mi du. 16 Nuꞌbʉ hingui sä da dąmbɛ̨ni nꞌda ra du, pɛ xínga gue a ra Cristo xtán zä xtán dąmbɛ̨ni ꞌbʉ. 17 Nɛ nuꞌbʉ guextaꞌa ra du a ra Cristo, säti thoho guí ɛ̨cꞌyɛihʉ a ꞌbʉ, nɛ guextaꞌa him mahoqui ni tsꞌoquihʉ ꞌbʉ. 18 Nɛ nuꞌbʉ ngubʉ guím bɛ̨mhbʉ, pɛ nɛꞌʉ yʉ ꞌyɛ̨cꞌyɛi xʉn du bʉ ja rá ꞌyɛ ra Cristo, nɛ má zä dim ꞌbɛpʉ ꞌbʉ Oją ꞌbʉ, gueꞌbʉ ya má zä bim ꞌbɛ a ra Cristo ꞌbʉ mí du. 19 Pɛ nuꞌbʉ høntya dí nuhʉ ran ho nangue ra Cristo, ha hin guím bɛ̨mhbʉ ga nuhʉ manꞌda ran ho ꞌbʉ dá tuhʉ ꞌbʉ. Pɛ huɛ̨higahʉ ꞌbʉ nte ga nuhʉ, xinda gueꞌʉ gä miꞌda yʉ jąꞌi ngue nte mbɛ̨ni da nu. 20 Pɛ majuąni maha bi dąmbɛ̨ni ra Cristo ꞌbʉ mí du. Nɛ tenguꞌbʉ rá mbʉdi nꞌda ra thą bi sopʉ ja nꞌda ra huąhi, nɛ gueꞌa nam bøni ngue da xox Oją ʉ toꞌo gätho i ꞌbʉhmi ra Cristo. 21 Tengu thoho ꞌbʉ mí dʉmpꞌ ran dąte ua ja ra ximhäi nꞌda ran ꞌyohʉ, ngue ra Adán, nɛ ngutho a manꞌda ran ꞌyohʉ ngue ra Cristo, bi dʉꞌmi ngue da ndantsꞌ mahønꞌa yʉ du. 22 Nɛ tengu tho ʉ gätho bi xąnd ra Adán, gätho i tu, pɛ nu gätho di xąnd ra Cristo, gätho da mba nsotsꞌi. 23 Pɛ hinga gätho nꞌdatꞌa ra ora da mba nsotsꞌi, nguetho rá mbʉdi a ra Cristo, nɛ nuꞌbʉ bá ɛ̨h ra Cristo, gätho ʉ xʉ huahni da mba nsotsꞌi mꞌbɛjua. 24 Nɛ nubʉya, ba ɛ̨h rá pa ran zɛgui. Nguetho nuꞌa ra Cristo xí dąpi ꞌbɛꞌa gätho má tsꞌɛdi, ngue yʉ́n sʉihʉ Oją, nɛ gätho toꞌo i hąsɛ yʉ́n tꞌɛ̨di, nɛ toꞌo di manda zɛhɛ, ngueꞌʉ yʉ jąꞌi nɛꞌʉ yʉ zįthu. Nɛ nuꞌbʉ ya bi dąha, di unꞌna Oją rá Ta rá tsꞌɛdi mahønꞌa. 25 Nguetho nu ra Cristo, im Hmutsꞌʉtꞌabi ya, nɛ gueꞌbʉ go bi dąha di ꞌbɛrpa yʉ́ tsꞌɛdi ʉ gätho yʉ́n sʉihʉ. 26 Nɛ nuꞌa ran dąte ran zɛgui thoho da dąpi, nɛ má zä dim ꞌbɛ a bʉya. 27 Tengu bi mam bʉ ja rá tꞌohni Oją, di japi da dąh ra Cristo ꞌbɛꞌa gätho má tsꞌɛdi i ja. Pɛ njon da bɛ̨ni nɛꞌa Oją rá Ta da dąpi, nguetho guesɛ bi un rá tsꞌɛdi ra Cristo a. 28 Nɛ nuꞌbʉ gätho bi dą a ra Cristo ʉ ꞌbɛꞌa gä ní tsꞌɛdi i ja, nɛ nuꞌa ra Cristo bʉya, ngue rá Tsꞌʉntꞌʉ Oją, nɛ din däsɛ bʉ ꞌbʉ Oją rá Ta. Nguetho mꞌbɛtꞌo xí un rá tsꞌɛdi. Nubʉya da hønsɛ Oją din ja rá tsꞌɛdi bʉya. 29 Nɛ manꞌda guí øthʉ guídín xixyąhʉ nangueꞌʉ xʉn du. Pɛ hanja gní ꞌyɛ̨mhbʉ him mam ꞌbʉ ʉ xʉn du bʉya. 30 Nɛ hanja hin dí su man dątehe, gätho ʉ yʉ pa dí ꞌbʉhmbe ua thą, gueꞌbʉ xcá pąhmbe hin ga ndanshe mahønꞌa. 31 Nɛ majuąni thocpa thoho dadím pomꞌbe ran dąte. Nɛ gueꞌa dí xi ahʉ a ngueꞌa dín nde ahʉ gui pąhmbʉ ꞌbɛꞌa dí øtꞌä. Nguetho ɛ̨mmɛ dí numanho ahʉ, ma zi cu ahʉ, ngue nꞌdatꞌa ma Hmuhʉ ra Jesucristo dí ɛ̨cꞌyɛihʉ. 32 Nɛ dá hätꞌi xʉn ngu yʉn ʉnbi, nɛ xi ʉ yʉ zate dán tunhdäꞌbe ua Éfeso, ngubʉ i ɛ̨mb yʉ jąꞌi. Pɛ ꞌbɛꞌa ní mba a dá øtꞌä ꞌbʉ hin da dąmbɛ̨ni ʉ xʉn du. Pɛ nuꞌbʉ hin ga ndanshʉ mahønꞌa, mbähä dan sihmɛhʉ ya nɛ dam minhdʉ, nguetho má zä ga tuhʉ nixudi mani. 33 O guídín hyɛhmbʉ da thä ahʉ gui tɛnhdʉ yʉ́m hman ʉ ꞌda yʉ hyäte, janangueꞌa hin gui ꞌbɛhmbʉ yʉ hogan tꞌøtꞌe. 34 Pɛ damin ꞌyomfɛ̨nihʉ xʉn ho gui pąhmbʉ ndaꞌa ram hma gue majuąni, nɛ gui ꞌyɛshʉ yʉ tsꞌoqui bʉya. Nguetho guí ꞌbʉhmbʉ ꞌda hinga ná pąhmbʉ xʉn ho Oją. Nɛ guehna dí xi ahʉ na, janangueꞌa gui pɛsꞌ ni sähʉ.
Hague din ja ꞌbʉ bi dąmbɛ̨ni ʉ xʉn du
35 Uague guím bɛ̨mhbʉ ꞌda ahʉ gui ꞌyängahʉ: “ꞌBɛꞌa di ja ꞌbʉ bi dąmbɛ̨ni ʉ xʉn du, nɛ ꞌbɛꞌa ní ngøcꞌyɛi din ja mahønꞌa.” 36 Pɛ nꞌda rán tꞌänni yʉ ꞌyąmbʉi a. Ha hin guí nuhʉ ꞌbɛꞌa di ja nꞌda ra hmudä ꞌbʉ pa nthuhu ngue i ꞌya rá xi nɛ ja da bøxꞌa rá mbʉi bʉya. 37 Nɛ høntꞌa go má hmudä guí tuhmbʉ, hinga guextaꞌa rá ndä ꞌbʉ bi bøtsꞌe. Nguetho gueꞌa rá ndä gá tuhmbʉ, nɛ ra paxi bʉ dán go ꞌbʉ bi bøtsꞌe. 38 Nɛ høntꞌa go ndaꞌa má hmudä da thuhu, gätho yʉ́ xisɛ ꞌbʉ bin ja, tengu bi zänba Oją a. 39 Nɛ hinga ꞌdaꞌangu ma ngøcꞌyɛihʉ yʉ fani o gue yʉ doja o yʉ huą. 40 Nɛ in jabʉ ꞌbɛꞌa gätho i ja bʉ mahɛ̨tsꞌi nɛ ꞌbɛꞌa gätho i ja ua ja ra ximhäi, nuꞌʉ bí ja bʉ mahɛ̨tsꞌi, nꞌdanꞌyo thoho nán ho xinda gueꞌʉ ja ua ja ra häi. 41 Nuꞌa rán nɛqui ra hyadi nɛ ra ząna nɛ yʉ sø gätho ꞌdahma ꞌdanꞌyo. Nɛ hinga ꞌdaꞌangu ʉ yʉ sø, ꞌdahma ꞌdanꞌyo bʉ ni nɛqui. 42 Nɛ ngutho nangueꞌbʉ bi dąmbɛ̨ni yʉ du, nɛ nuꞌbʉ bi tꞌä a ra ngøcꞌyɛi, da ꞌya nguetho ntsꞌänbi da ꞌya a. Pɛ nuꞌbʉ bi dąmbɛ̨ni bʉya nɛ hin njąmꞌbʉ da du mahønꞌa. 43 Nuꞌa bi tꞌägui hingui ho, pɛ nuꞌa da bøtsꞌe ɛ̨mmɛ xʉn ho a. Nuꞌbʉ mi tꞌägui hinꞌyʉ rá tsꞌɛdi, pɛ nuꞌbʉ mí bøtsꞌe, manꞌda ɛ̨mmɛ bin ja rá tsꞌɛdi. 44 Nuꞌa ra ngø ꞌbʉ mi tꞌägui, ntsꞌänni høntꞌua ja ra ximhäi dim ꞌbʉi. Pɛ nuꞌbʉ bi bøtsꞌe, ntsꞌänni dim ꞌbʉpʉ mahɛ̨tsꞌi bʉya. Nɛ guí pąhmbʉ i ja ma jąꞌihʉ nangue ra ximhäi, pɛ manꞌda i jatho gui pąhmbʉ ngue nɛꞌa din ja ma jąꞌihʉ nangue rá Hogandąhi Oją. 45 Nɛ gueꞌa in ja a tengu mán tꞌoꞌtꞌi bʉ ja rá tꞌohni Oją, gue ná nꞌda ra Adán bi tsꞌänni bin jąꞌi ua ja ra ximhäi. Pɛ nuꞌa ná yoho gueꞌa di un ra temaząi ngue njąmꞌbʉ da guadi, gueꞌa ra Cristo a. 46 Nɛ mꞌbɛtꞌo dám ꞌbʉhmbʉ nangue ma ngøcꞌyɛihʉ ngue høntꞌua ja ra ximhäi dim ꞌbʉi. Nɛ mꞌbɛjua bʉya dam ꞌbʉhmbʉ nangue ra ngøcꞌyɛi ngue ntsꞌänni dim ꞌbʉpʉ mahɛ̨tsꞌi. 47 Nɛ nu rá mbʉdi ran ꞌyohʉ ntꞌøtꞌe nangue ra häi. Nu a ná yoho gueꞌa bí ꞌyɛ̨h mahɛ̨tsꞌi, ma Hmuhʉ ra Cristo a. 48 Nɛ ngutho ma ngøcꞌyɛihʉ ua ja ra häi, tengu tho a ran ꞌyohʉ ngue bi tꞌøtꞌe nangue ra häi. Pɛ nu ma ngøcꞌyɛihʉ mꞌbɛjua din ja tengu thoho rá ngøcꞌyɛi a ma Hmuhʉ ra Cristo, nuꞌa ran ꞌyohʉ bí ꞌyɛ̨h mahɛ̨tsꞌi a. 49 Nɛ tengu thoho bʉ dá nɛquihʉ nangue ra Adán ntꞌøtꞌe ra häi, nɛ ngutho bʉ dá nɛquihʉ mahønꞌa nangueꞌa ra mɛngu bʉ mahɛ̨tsꞌi. 50 Nɛ dín nde ga xi ahʉ mahønꞌa, ma zi cu ahʉ, ngue nuꞌa man ngøhʉ nɛ ma jihʉ i jajʉ ya, hingui sä da gonhui rá tsꞌɛdi Oją mahɛ̨tsꞌi a. Nguetho nuꞌa hingui hätꞌi, hingui sä ꞌdarpʉ da ꞌbɛsꞌui a da hyätꞌi hønꞌbʉ go njąmꞌbʉ. 51 Pɛ dín nde ahʉ gui pąhmbʉ a him mam fądi, ngue hinga gätho ga tuhʉ ngue dyʉ́ ꞌyɛ̨cꞌyɛihʉ, pɛ gätho da mba ma pärquigahʉ ma ngøcꞌyɛihʉ. 52 Nɛ xøgue nꞌdan cꞌuɛ̨rpadätho da ꞌyørcahʉ ꞌbʉ bin yą ra thʉxi ꞌbʉ rán zɛgui ra pa. Nɛ nuꞌbʉ bin yą ra thʉxi, ꞌbex da ndantsꞌi gätho ʉ yʉ ꞌyɛ̨cꞌyɛi xʉn du, nɛ din ja yʉ́ ngø him man zä din tsꞌoni. Nɛꞌʉ xí du, nɛꞌʉ hin ní du, gätho da mba ma pädi. 53 Nɛ nu ma ngøcꞌyɛihʉ dí hehʉ ya hin da hyätꞌi, janangueꞌa da mba mahoqui ngue da hyätꞌi maząi bʉya. Nɛ i ja rán dąte a ma ngøcꞌyɛihʉ ya, pɛgue din jajʉ a njąmꞌbʉ da du. 54 Nɛ nuꞌbʉ bin ja ma ngøcꞌyɛihʉ ngue njąmꞌbʉ da du, ya bi jąꞌtsꞌa bi man rá tꞌohni Oją bʉya, bi ꞌyɛ̨na: “Pɛ nuꞌbʉ dám ꞌbʉhmbʉ mahønꞌa, gueꞌa dí guah ran dąte a, nguetho ya bi thąpi.” 55 “Hague grán dąte, hapʉ i ja ni tsꞌɛdi ya ngue gui hyoje. ꞌBɛꞌa gá ja ya thą, nɛ ya guí ɛ̨na xquí tąje.” 56 Nɛ nu yʉ́n tꞌɛ̨di Oją nɛ gueꞌʉ nám fądi ja ma tsꞌoquihʉ. Nɛ nuꞌa ma tsꞌoquihʉ bʉya, gueꞌa ní zä di ʉngahʉ ran dąte a. 57 Pɛ jamadi gahʉ Oją, nguetho bi jajʉ dá tąfʉ ran dąte nangueꞌa ma Hmuhʉ ra Jesucristo. 58 Janangueꞌa, ma zi cu ahʉ, damín ząmhbʉ bʉ xʉn ho nɛ hin hapʉ gui ꞌuehmbʉ bʉ. Nɛ gui hyumbi manꞌda manꞌda gam pɛhmbʉ nangue rá ꞌbɛfi ra Hmu, nguetho guí pąhmbʉ hinga säti thoho a, xinda gueꞌbʉ hin ga ndanshʉ mahønꞌa.