Nthąqui yʉ mbɛti da ꞌbäx yʉ cu
16
Nɛ nuya dín nde ga xi ahʉ ꞌbɛꞌa gui ꞌyøthʉ nangue ra mbɛti guídí pɛthʉ, ngue nuꞌa rám fätsꞌi ma miꞌyɛ̨cꞌyɛihʉ. Damí ꞌyøthʉ tengu thoho dá xicä ʉ ꞌbʉpʉ ja yʉm pɛti bʉ Galacia. 2 Ngue gätho ꞌbʉ domingo, nꞌda ngu nꞌda ahʉ gui hyąjʉ tsꞌʉ a hangu xquí tąhmbʉ nhyąto ꞌbʉ nhyąto, gui pɛshʉ. Nɛ nuꞌbʉ dá søngä bʉ, ya di jabʉ, nɛ hinga ja gui pɛthʉ bʉya. 3 Nɛ nuꞌbʉ dá søngä bʉ, ga pɛhndä bʉ Jerusalén ʉ yʉn ꞌyohʉ ngue gá huanhdʉ. Nɛ ga un ra søcuą da gątsꞌi nangue ran zɛngua, nɛ da hyąxꞌa xquí pɛthʉ bʉya. 4 Nɛ ꞌbɛ dán ꞌyomfɛ̨ni ꞌbʉ da zä ꞌnɛqui ga mba, ya ꞌdarpʉ dá mbähmbe bʉya.Bi ma da bøn na ꞌyo ra Pablo
5 Nɛ nuꞌbʉ dá mba na ꞌyo, i jatho ꞌbɛ ba søngä bʉ Macedonia, nɛ ja ga thocä bʉ Corinto bʉya. 6 Nɛ xømhma thoho dam ꞌbʉhmbʉ bʉ ꞌda yʉ pa, uague dam ꞌbʉhmbʉ bʉ gätho dám bøn yʉ pa xʉ sɛ. Nɛ nubʉya xømhma thoho da zä gui zɛjʉ tsꞌʉ ꞌbʉ di nɛqui toꞌo da ꞌyurca ra ꞌyu hapʉ gätho dan ꞌyo mꞌbɛjua. 7 Pɛ hin dín ndegä ngue xø ga thotho bʉ guí ꞌbʉhmbʉ, pɛ dín nde dam ꞌbʉpʉ ꞌda yʉ pa, ꞌbʉ gueꞌa da nde ma Hmuhʉ a. 8 ꞌBɛ dam ꞌbʉcä ua ja ra hnini Éfeso man yozna, ja ga mba bʉ. 9 Nguetho ɛ̨mmɛ hndeque ga man rám hman Oją ua, madagueꞌbʉ xʉn ngu man sʉiꞌbe ꞌbʉcua. Pɛ ɛ̨mmɛ i te rá ꞌbɛfi Oją ua, jannangueꞌa him ꞌbexque sä ga mba nꞌdihi. 10 Nɛ nuꞌbʉ da zøm bʉ a ra Timoteo, dami simanhohʉ, janangueꞌa nte da bɛ̨ni. Nguetho dim pɛfi nangue rá ꞌbɛfi ma Hmuhʉ a, tengu thohogä. 11 Pɛ jatho gätho ahʉ gui numansuhʉ a ra Timoteo. Nɛ nuꞌbʉ bá ɛ̨cua, dami fäxhʉ ngue da zømanho ua. Nguetho dí tønꞌua a, nɛ ɛ̨mmɛ dín nde ga nu mahønꞌa, nɛꞌʉ gätho miꞌda. 12 Nɛ ɛ̨mmɛ dá xicä ma cuhʉ ra Apolo xtá mbähä ꞌda yʉ cu ꞌbʉcua, ngue da nu ahʉ. Pɛ him bi nde bi mba ya. Pɛ xømhma thoho mꞌbɛjua da mba bʉ ꞌbʉ bi zä da mba.
Yʉ́n zɛgui ran zɛngua
13 Nɛ jantꞌa thoho gui ꞌyøthʉ tenguꞌbʉ gan äthąhʉ, ngue gan ząmhbʉ bʉ ja ni tꞌɛ̨cꞌyɛihʉ. Dami hyuthʉ ran zambʉi, din ja ni tsꞌɛdihʉ xʉn ho. 14 Nɛ ꞌbɛꞌa gätho guí øthʉ, pɛ dami ꞌyøthʉ nangue ran huɛ̨cate. 15 Nɛ nuya ma zi cu ahʉ, guí pąhmbʉ ngue gätho ja a yʉ́n jahʉ ra Estéfano, mbʉdi yʉ ꞌyɛ̨cꞌyɛi bʉ ra häi Acaya, nɛ ɛ̨mmɛ høntꞌa im bɛ̨ni ngue da mbäx yʉ́ miꞌyɛ̨cꞌyɛihʉ ʉ. 16 Janangueꞌa dín nde ahʉ ɛ̨mmɛ gui numansuhʉ a ra Estéfano, ngueꞌa gui ꞌyøthʉ a da man a. Pɛ nɛꞌʉ miꞌda i ꞌbʉpʉ, ngue ꞌdaꞌangu i øthʉ a ra Estéfano, ngueꞌa hin din sʉi, nɛ humbi da ꞌyøtꞌ ra ꞌbɛfi xʉn ho, nɛꞌʉ gui numansuhʉ ʉ. 17 Nɛ ɛ̨mmɛ dadí johyagä, ngue nuꞌa mí hɛ̨mbä ꞌbɛꞌa guí øthʉ, pɛ ya dí pącä ya, nguetho bi zøcua a ra Estéfano, nɛ ra Fortunato, nɛꞌa ra Acaico. 18 Janangue ɛ̨mmɛ bi xah ma mbʉi. Nɛ ahʉ bi xah ni mbʉihʉ ya, nangueꞌa ram hma gá ꞌyängahʉ gueꞌa hin gmí pąhmbʉ. Nɛ dami numanhohʉ ʉ yʉ jąꞌi tengu ʉ. 19 Nu yʉ cu i ꞌbʉcua ra häi Asia, gätho i pɛnꞌnahʉ ran zɛngua. Nu ra Aquila nɛ ra Priscila rá xisu, nɛ gätho ʉ dim pɛti bʉ ja rá ngu, nɛ gätho i pɛnꞌnahʉ ran zɛngua nangue rá thuhu ma Hmuhʉ. 20 Dami hyąnbahʉ yʉ́n zɛngua gätho yʉ cu i ꞌbʉcua. Damin zɛngua zɛhɛhʉ nꞌda ngu nꞌda ahʉ ngue ꞌda gdín huɛ̨ctahʉ. 21 Pɛ nugä dra Pablogä ga ozɛhɛgä nꞌda ran zɛngua dí pɛnꞌnahʉ nangue ma ꞌyɛsɛgä. 22 Nuꞌbʉ i ꞌbʉ a nꞌda ngue him majuąni i numanho a ma Hmuhʉ ra Jesucristo, nɛ hin te rán jaui Oją a ꞌbʉ, nɛ da zänba ran ʉnbi a. Nɛ mi tsꞌʉtho ba ɛ̨h ma Hmuhʉ da ꞌyøtꞌ ran juąnbi a. 23 Nɛ nuya da mbäx ahʉ rá mate ma Hmuhʉ ra Jesucristo. 24 Nɛ ɛ̨mmɛ dadí huɛ̨cꞌahʉ gätho ahʉ nangue ꞌdarpʉ dí ꞌbʉhmbʉ ra Cristo Jesús. Nɛ høntꞌa dí xi ahʉ ya.