Rán hoqui Oją maꞌdaꞌyo
3
Ha guí ɛ̨mhbʉ dí ozɛhɛ ma certificadoꞌbe ꞌbʉ dí xi ahʉ ꞌbɛꞌa dí øtꞌbe. Ha jatho din ja ma certificadoꞌbe ngue da xi ahʉ xʉn ho dí øtꞌbe tengu i cą yʉ hyäte xänbate guí ꞌbʉhmbʉ bʉ. O ha guí ɛ̨mhbʉ jatho gui ꞌyørcaꞌbe nꞌda tengu guí ørpa ʉ ꞌda. 2 Pɛ go guesɛ ahʉ ma certificado ahʉ nguetho nuꞌbʉ ꞌboꞌo ngue bi bąꞌa gním ꞌbʉhmbʉ, da bądi ꞌbɛꞌa ma hogaꞌbɛfi dá øtꞌä bʉ ꞌbʉ mám ꞌbʉhmbʉ bʉ. 3 Nɛ nu ʉ yʉ jąꞌi ngue hingui ɛ̨cꞌyɛi da nu ahʉ, tengu ꞌbʉ bi nu nꞌda ra søcuą nangue rám hman Oją. Pɛ hinga gue ra søcuą ntꞌoꞌtꞌi ra tinta o gue ntꞌoꞌtꞌi bʉ ja ra do ngue da nu ʉ, pɛ gueꞌa bi ꞌyoꞌtꞌa ra Cristo bʉ ni mbʉihʉ nangue rá Hogandąhi Oją ꞌbʉ má xänꞌnahʉ. 4 Da zä ngubʉ ga xi ahʉ ngue xʉn ho ra ꞌbɛfi dí øtꞌaꞌbe, nguetho i fäxcaꞌbe Oją nangue dín ꞌyohʉ ra Cristo. 5 Nɛ hin nangue man hosɛꞌbe da zä ga øtꞌbe ran ho, pɛ hønsɛ Oją di ꞌdacꞌbe ra tsꞌɛdi ga øtꞌbe ꞌbɛꞌa dí øtꞌbe. 6 Nu Oją bi ꞌdacꞌbe ꞌbɛꞌa ga homꞌbe ngue i juadi xʉn ho, ngue da zä ga xiꞌbe yʉ jąꞌi rán hoqui Oją maꞌdaꞌyo. Nu ran hoqui hinga ꞌdaꞌanguui i mammi yʉn tꞌɛ̨di ntꞌoꞌtꞌi mayaꞌbʉ. Nguetho nuꞌa ran ho maꞌdaꞌyo i xijʉ di ꞌdajʉ ra temaząi a rá Hogandąhi Oją. Pɛ nu yʉn tꞌɛ̨di i xijʉ tengu ꞌbʉ ma yąpatehʉ, ngueꞌa hin dí hätꞌi ga øzɛhɛhʉ a ran ho im mam bʉ. 7 Pɛ nuꞌbʉ rá mbʉdi bin tꞌun yʉn tꞌɛ̨di, pɛ min ꞌyoui a rá nuįxte Oją, nguetho ɛ̨mmɛ madi yoxni rá hmi ra Moisés ꞌbʉ madín tꞌun yʉ do ntꞌoꞌtꞌi yʉn tꞌɛ̨di, janangueꞌa hingui sä ʉ yʉ jąꞌi da hyɛ̨rpa rá hmi. Mꞌbɛjua bʉya bim ꞌbɛ a rá nuįxte mi ja bʉ rá hmi. Pɛ madagueꞌa in ꞌyoui ra nuįxte ʉ yʉn tꞌɛ̨di ꞌbʉ ja min tꞌuni, pɛ din yąpate nɛ ran ʉnbi. 8 Nu yʉn tꞌɛ̨di min ꞌyoui rá nuįxte Oją nɛ bi man a ran dąte. Pɛ ɛ̨mmɛ xʉn ngu manꞌda rá nuįxte Oją in ꞌyoui rá ꞌbɛfi rá Hogandąhi Oją. 9 Nꞌyoui rá nuįxte Oją yʉ́n tꞌɛ̨di ngue din yąpate, pɛ ɛ̨mmɛ manꞌda xʉn ngu rá nuįxte Oją din ꞌyoui ran ho maꞌdaꞌyo ngue im man Oją di hogahʉ. 10 Nuya bim ꞌbɛh rá tsꞌɛdi ʉ yʉn tꞌɛ̨di, nguetho ɛ̨mmɛ manꞌda i ja rá tsꞌɛdi ran ho maꞌdaꞌyo. 11 Nu yʉn tꞌɛ̨di min ꞌyoui ra nuįxte, pɛ ntsꞌänni ꞌda yʉ patho da hyätꞌi, nɛ bi thogui. Pɛ nuya ɛ̨mmɛ xʉn ngu ra nuįxte in ꞌyoui a ran ho maꞌdaꞌyo, nɛ njąmꞌbʉ da guadi. 12 Dí pąhmbʉ ngue njąmꞌbʉ dim ꞌbɛh rá tsꞌɛdi a ran hoqui maꞌdaꞌyo ngue bi ꞌyøtꞌ Oją. Janangueꞌa sä ga huthʉ nząmbʉi gam mamhbʉ ran ho maꞌdaꞌyo. 13 Nɛ nuꞌbʉ dím mamhbʉ ran ho maꞌdaꞌyo, hin dí øthʉ tengu mi øtꞌ ra Moisés mayaꞌbʉ, ngue bi gop rá hmi ra ꞌbøꞌtꞌe, ndepe hin da nu yʉ jąꞌi israel gueꞌbʉ xtím ꞌbɛ a rá nuįxte. 14 Pɛ nu yʉ jąꞌi him mi pą ʉ ngue dim ꞌbɛ ʉ yʉ́ nuįxte yʉn tꞌɛ̨di nɛ guextaꞌa yʉ pa ya, nuꞌbʉ in nu ra søcuą guepʉ ntꞌoꞌtꞌi yʉn tꞌɛ̨di rán hoqui Oją mayaꞌbʉ, hingui sä da bądi. Nguetho tengu ꞌbʉ i ja nꞌda ra ꞌbøꞌtꞌe bʉ ja rá hmi da gop rá dä. Nɛ høntꞌa ra Cristo sä di ꞌuecpa a. 15 Guextaꞌa yʉ́ mbʉi ʉ ꞌda i ꞌbʉhya, nuꞌbʉ in nde da dɛn yʉ́n tꞌɛ̨di ra Moisés nɛ nuꞌbʉ im ma, hingui sä da bądi ꞌbɛꞌa nam bøn ʉ, nguetho njotꞌi tho yʉ́ mbʉi. 16 Pɛ nuꞌbʉ di päh rán ꞌyomfɛ̨ni nꞌda nangue a ra Cristo nɛ di däp rá mbʉi a, din ja ran nɛqui rá mbʉi ꞌbʉ. 17 Nuꞌa ra Cristo, ꞌda anguui rá Hogandąhi. Nɛ nuꞌbʉ i ꞌbʉpʉ mbo ma mbʉihʉ, nɛ gueꞌa í thøgahʉ bʉ ja ra ꞌbɛxui nɛ ran ʉnbi. 18 Nɛ hingan joꞌmi ma mbʉihʉ tengu ꞌbʉ dí hanthʉ xʉn ho a rá nuįxte ra Cristo. Nɛ tengu nꞌda ra hyɛ̨dä di nɛqui bʉ toꞌo da hyandi, nɛ ngutho gahʉ manꞌda manꞌda di nɛqui gahʉ rá nuįxte ra Cristo dí hanthʉ, nɛ gueꞌa ní ꞌyørcahʉ a ngue ga cohmbʉ tengu a.