4
Nu rá mate zɛhɛ Oją ngue bi ꞌdacꞌbe ra ꞌbɛfi, janangueꞌa hingui cuent ma mbʉiꞌbe nangue ra ꞌbɛfi dí øtꞌbe. 2 Ząi hin di thoc man ꞌyomfɛ̨nisɛꞌbe nangue rá ꞌbɛfi Oją, nɛ hin dí häteꞌbe ꞌbʉ dím mamꞌbe rám hman Oją tengu i øtꞌʉ ꞌda. Pɛ dím mamꞌbe ngue majuąni a rám hman Oją, nɛ gätho yʉ jąꞌi sä da bądi ngue dí ꞌyoꞌbe xʉn ho bʉ ja rá hmi Oją. 3 Høntꞌʉ ngue ní mba bʉ ja ran ʉnbi hingui pądi ꞌbɛꞌa nam bøn a dím mamꞌbe ngue ran ho maꞌdaꞌyo. 4 Nguetho nu ra zįthu tꞌɛ̨mbi oją ua ja ra ximhäi i ja ya di xädäba yʉ́ mbʉi ʉ i tɛnni, hin di japi ngue da nu nuįxte a rán ho maꞌdaꞌyo ra Cristo, ngue xtí yorpʉ ꞌbʉi. Pɛ nuꞌa ra Cristo gueꞌa ní fą Oją a, nɛ ꞌda anguui rá tsꞌɛdi. 5 Pɛ nugäꞌbe hin dím mamꞌbe a dí hnumanhocꞌbe, pɛ dím mamꞌbe ngue gueꞌa ra Cristo Jesús ra Hmu a. Nɛ dí øtꞌbe ni ꞌyɛ̨hɛ gaꞌbe, nguetho ɛ̨mmɛ dín numanhoꞌbe ra Jesús. 6 Nu Oją rá mbʉdi bi manda din ja ran nɛqui bʉ mi ja ra ꞌbɛxui, guetꞌa Oją bi yorbʉ ja ma mbʉihʉ. Nɛ nangue ran nɛqui i jajʉ bʉ ma mbʉihʉ, sä ga pąhmbʉ rá nuįxte Oją. Nguetho ra Jesucristo bi jajʉ dá pąhmbʉ rá nuįxte Oją.Nám ꞌbʉhmbʉ a ngue dí pąhmbʉ a majuąni
7 Oją bi ꞌdajʉ rá tsꞌɛdi mbo ma mbʉihʉ, tengu nꞌda ra jąhäi bi järpʉ a xʉn ngu di muui. Tengu ꞌbʉ dyʉ tsꞌøehʉ din xɛnꞌa nꞌdihi. Pɛ guepʉ na fądi him ma tsꞌɛdi zɛhɛhʉ a ná ørpahʉ rá ꞌbɛfi Oją, pɛ guesɛ rá tsꞌɛdi a bi ꞌdajʉ. 8 Nguetho thocua thoho dín nuꞌbe yʉn ʉnbi, pɛ hingui tu ma mbʉiꞌbe nangue rá tsꞌɛdi Oją dín ꞌyohe. Nɛ jaꞌbʉ hin dí pąꞌbe ꞌbɛꞌa dán go a dí øtꞌbe, pɛ hin dím mamꞌbe ngue ga hɛh ma ꞌbɛfiꞌbe. 9 I ꞌbʉh man sʉiꞌbe pɛ hin dí ꞌyosɛꞌbe nguetho ꞌbʉh mam fätsꞌihe ra Cristo, jaꞌbʉ in nu ran ʉ ma jąꞌiꞌbe, pɛ hin dí tuꞌbe. 10 Hønbʉ go hapʉ ga mbɛꞌbe, dín nuꞌbe ran ʉnbi, nɛ sä xcá tuꞌbe nangue rá ꞌbɛfi ra Jesús dí øtꞌbe, tengu tho ꞌbʉ mi du ra Jesús. Pɛ nangue dí hätꞌbe yʉn ʉnbi di nɛqui dí ꞌbʉhmbe ra Jesús, nɛ di jamansucꞌbe. 11 Nɛ thocua thoho ɛ̨na da thogꞌbe nangue dí øtꞌbe rá ꞌbɛfi ra Jesús, pɛ gueꞌa ní nɛqui rá tsꞌɛdi ra Jesús dín ꞌyoꞌbe a, ngue i fäxcaꞌbe, nɛ hinꞌyʉ ma tsꞌɛdi zɛhɛꞌbe. 12 Janangueꞌa thocua thoho i thusca man dątehʉ, pɛ gueꞌa manꞌda gním ꞌbʉhmbʉ Oją xʉn ho a. 13 Nuꞌa nꞌda ran ꞌyohʉ bi ma mayaꞌbʉ bʉ ja rá tꞌohni Oją: “Nugä dí ɛ̨cꞌyɛigä, janangueꞌa dím mangä na,” bi ꞌyɛ̨na. Ngutho dí øtꞌäꞌbe ya, dí ɛ̨cꞌyɛiꞌbe, janangueꞌa dí mamꞌbe a dí ɛ̨cꞌyɛiꞌbe. 14 Nɛ hin dí suꞌbe, nguetho dí pąꞌbe madá thogꞌbe, pɛ guetꞌa Oją ngue bi xoxꞌa ma Hmuhʉ ra Jesús ꞌbʉ mi du, da xoxcäꞌbe tengu bʉ í xoxꞌa ra Jesús. Nɛ ahʉ dan ꞌyohʉ ꞌbʉ dá sømhbʉ bʉ ꞌbʉ a Oją. 15 Pɛ nuꞌʉ ꞌbɛꞌa gätho dín nuꞌbe nangue ahʉ, nꞌdamhma manꞌda xtán ngu ahʉ guin nuhʉ rá mate Oją, nɛ manꞌda xtán ngu ahʉ gui ꞌyɛ̨mfʉ Oją, jamadi ni mate. Nɛ gueꞌa manꞌda dí tꞌɛ̨spa Oją a bʉya. 16 Janangueꞌa hingui cuent ma mbʉiꞌbe nangue a ma ꞌbɛfiꞌbe, madagueꞌbʉ manꞌda manꞌda in theh rá tsꞌɛdi ma jąꞌiꞌbe. Pɛ Oją di un ra tsꞌɛdi ma mbʉiꞌbe gätho yʉ pa. 17 Nuꞌʉ yʉn ʉnbi dín nuhʉ ua ja ra häi hingan yaꞌa ʉ, pɛ gueꞌa manꞌda dá tįmhbʉ ran ho bʉ mahɛ̨tsꞌi. Ɛ̨mmɛ manꞌda xʉn ngu ra nuįxte gan nuhʉ bʉ, xinda gue ran ʉnbi dá nuhʉ ua ja ra häi. 18 Hin dím bɛ̨mhbʉ gätho yʉn ʉnbi dín nuhʉ ua ja ra ximhäi, nguetho da tho ʉ. Pɛ manꞌda dím bɛ̨mhbʉ ꞌbɛꞌa gätho hin dín nuhʉ ya, nguetho nuꞌa din jagähʉ bʉ mahɛ̨tsꞌi hin da tho a.