5
Nɛ dí pąhmbʉ ngue ma jąꞌihʉ tengu nꞌda ra ngu ua ja ra ximhäi, hinga yaꞌa da hyätꞌi. Nɛ nuꞌbʉ da yøtꞌ ma ngu ua din ja bʉ a manꞌda ma ngumhbʉ bʉ mahɛ̨tsꞌi ngue bi hyø Oją. Nɛ njąmꞌbʉ da gua a, nguetho him bi hyøh yʉ jąꞌi. 2 Nɛ nujʉ dadín xømbʉihʉ nangue ma ngøcꞌyɛ̨ihʉ i jajʉ ya, nɛ dín dømdahʉ di pärca ma jąꞌihʉ, da gohi maꞌdaꞌyo, ngue rán säui bʉ mahɛ̨tsꞌi a. 3 Nu Oją di japi ngue din ja ma ngøcꞌyɛ̨ihʉ bʉ. 4 Pɛ nuya ngue dí ꞌbʉhmbʉ ua, nɛ in nu ran ʉnbi ma ngøcꞌyɛihʉ nɛ dín xømbʉihʉ. Pɛ hin nangue a dín nde ga tuhʉ nꞌdihi, pɛ manꞌda dín ndehʉ a ma jąꞌihʉ maꞌdaꞌyo, ngue dím pärcahʉ ma ngøcꞌyɛ̨ihʉ i ja ya. 5 Nu Oją bi zänni ngue di pärca ma jąꞌihʉ, nɛ bi ꞌdajʉ rá Hogandąhi ngue ra hmɛpya majuąni din ja. 6 Nɛ dín døꞌmate thohʉ yʉ pa dí ꞌbʉhmbʉ ua. Nguetho dí pąhmbʉ nu yʉ pa dí ꞌbʉhmbʉ ma jąꞌihʉ i jajʉ ya, hin dí ꞌbʉhmbʉ ma Hmuhʉ ra Jesús bʉ ja rá ngu bʉ mahɛ̨tsꞌi. 7 Dí pąhmbʉ majuąni din ja ma ngumhbʉ bʉ, nguetho dí ɛ̨cꞌyɛigähʉ Oją, madagueꞌbʉ hin dín nuhʉ. 8 Nɛ dín døꞌmate thohʉ ua, pɛ dí ɛ̨mhbʉ ngue manꞌda xʉn ho ga sohmbʉ ua ma ngøcꞌyɛ̨ihʉ, nɛ ga mbähä bʉ bí ꞌbʉ a ma Hmuhʉ mahɛ̨tsꞌi. 9 Pɛ manꞌda hnɛhi thoho dín nde ga øthʉ ꞌbɛꞌa in nde ma Hmuhʉ, madagueꞌa dí ꞌbʉhmbʉ ua ja ra häi, uague dí ꞌbʉhmbʉ bʉ guepʉ bí ꞌbʉi. 10 Nguetho da zøn ra pa ngue gätho dyʉ ꞌyɛ̨cꞌyɛihʉ jatho dam ꞌbähmbʉ bʉ ja rá hmi ra Cristo, nꞌda ngu nꞌdajʉ. ꞌDahmi ꞌdatho ga hąmhbʉ ꞌbɛꞌa yʉ́n thɛhʉ dá øthʉ ua ja ra häi. Ga tąhmbʉ ꞌbʉ xʉn ho, ga ꞌbɛhmbʉ ꞌbʉ hin ɛ ho.Bi hogahʉ ꞌbɛꞌa nán sʉhmbʉ Oją ꞌbʉ mí du ra Cristo
11 Nɛ dí su ga øtꞌä a hin da numanho Oją, janangueꞌa dí humbi dí xifi ꞌbɛꞌa dí ꞌyɛ̨cꞌyɛi Oją ʉ yʉ jąꞌi. Nugäꞌbe Oją i pącꞌbe xʉn ho ꞌbɛꞌa majuąni dí øtꞌbe, nɛ nu ahʉ dín nde ngue gui pącꞌbe xʉn ho. 12 Hin dín nde aꞌbe guim bɛ̨mhbʉ ngue dím ma nangue man hosɛꞌbe. Pɛ dín nde ngue guin numanhocꞌbe, guepʉ da zä gui hɛcuahʉ yʉ jąꞌi ngue i tɛnꞌndʉ yʉn ꞌyohʉ din ꞌyɛ̨zɛhɛ, pɛ nuꞌʉ yʉ́ mbʉi ʉ him majuąni ʉ. 13 Pɛ dí øtꞌbe ꞌbɛꞌa gätho da numanho Oją, nguetho dín numanhoꞌbe Oją, madagueꞌa im man yʉ jąꞌi dí tontogäꞌbe. Pɛ nuꞌa ꞌbɛꞌa dí øtꞌäꞌbe da bømanho nangue ahʉ. 14 Nangue rán huɛ̨cate ra Cristo ná øtꞌbe ꞌbɛꞌa gätho dí øtꞌbe, nguetho dí pąhmbʉ ngue bi du bi nu ran ʉnbi nangue gätho yʉ jąꞌi. Nɛ gueꞌa ní zä dim pomhbʉ ran ʉnbi ʉ, tengu ꞌbʉ xtán dusɛ ngue xtán guzɛhɛ yʉ́ tsꞌoqui. 15 Nɛ bi du nɛ bi ndantsꞌ mahønꞌa ngue nde di un ra ꞌdaꞌyote ʉ gätho yʉ jąꞌi. Janangueꞌa da ꞌyɛꞌtsꞌa ní ꞌyøtꞌ yʉ́ pähä zɛhɛ ʉ to da hyąn ra ꞌdaꞌyote, nɛ da ꞌyøtꞌe ꞌbɛꞌa in numanho a. 16 Janangueꞌa nuya dá päh man ꞌyomfɛ̨nihʉ, nɛ nuya hin ná numanhohʉ ma mijąꞌihʉ ꞌbɛꞌa di ja, tengu mi øthʉ nuꞌbʉ him mi ɛ̨cꞌyɛihʉ. Pɛ gam bɛ̨mhbʉ tengu bʉ nam bɛ̨n Oją ʉ. Nɛ nuꞌbʉ him mi ɛ̨cꞌyɛigä, dím bɛ̨ni ngue nu ra Cristo nꞌda ran ꞌyohʉ thoho tengugä, pɛ nuya hinguin ja bʉ dím bɛ̨ngä ya. 17 Nguetho gätho toꞌo in ꞌyohʉ ra Cristo tengu ꞌbʉ maꞌdaꞌyo ʉ, nu yʉ́n yon ꞌyomfɛ̨ni zɛhɛ bi ꞌbɛꞌʉ, pɛ nuya gätho bi gohi maꞌdaꞌyo. 18 Pɛ gätho bi ꞌyøzɛhɛ Oją dám ꞌbʉhmbʉ maꞌdaꞌyo. Nguetho bi hogahʉ ꞌbɛꞌa madín sʉhmbʉ Oją ꞌbʉ mi du ra Cristo. Nɛ nuya bi ꞌdajʉ ra ꞌbɛfi ngue ga xihmbʉ yʉ jąꞌi ꞌbɛꞌa dí zin a Oją ʉ, nɛ da mba ma punbi yʉ́ tsꞌoqui ʉ gätho i ɛ̨cꞌyɛi. 19 Nguetho nuꞌa Oją min ꞌyoui ra Cristo nuꞌbʉ mi ꞌyøtꞌe ꞌbɛꞌa dí hocpa yʉ́ mbʉi yʉ jąꞌi ja ra ximhäi. Nuya hin da gʉcpa a rá muui ʉ yʉ́ tsꞌoqui gätho toꞌo da ꞌyɛ̨cꞌyɛi a. Nɛ bi ꞌdajʉ ra ꞌbɛfi ngue ga xihmbʉ yʉ jąꞌi ꞌbɛpʉ dín yąmanhohʉ Oją ʉ. 20 Nujʉ ma ꞌbäigähʉ ra Cristo, ɛ̨mmɛ dí hąh ma mbʉi dí xihmbʉ yʉ jąꞌi tengu tho ꞌbʉ xtá xisɛ Oją ʉ, ngue da ꞌyäpi di hocpa yʉ́ mbʉi, nɛ din ꞌyohʉ xʉn ho Oją. 21 Nuꞌa ra Cristo hinꞌyʉ rá tsꞌoqui, pɛ bi nu ran ʉnbi nangue ma tsꞌoquihʉ tengu ꞌbʉ yʉ́ tsꞌoqui zɛhɛ. Janangueꞌa da ꞌyɛ̨mbi rán ho a rán hosɛ ra Cristo toꞌo gätho da ꞌyɛ̨cꞌyɛi ꞌbɛꞌa í du a.