6
Nɛsɛ a Oją dí comhbe rá ꞌbɛfi, nɛ janangueꞌa gätho ma mbʉiꞌbe dí xi ahʉ ngue gui jamansuhʉ rá mate Oją. 2 Nguetho Oją bi mam bʉ ja rá tꞌohni: “Dá øcä ni ndehʉ a ra pa gá zojʉ, nɛ dá øtꞌahʉ ra mate. Nɛ dá zɛ ahʉ ra pa dá yąn ahʉ,” ɛ̨nꞌa Oją. Nuya yʉ pa ja bʉya Oją sä da ꞌyøtꞌahʉ ran ho, nuya nám pa ya Oją i sä di pøꞌahʉ. 3 Nɛ dí honi xʉn ho ꞌbɛꞌa gätho ga øtꞌbe, ngue hin di ʉꞌtꞌ yʉ́ mbʉi ꞌda ꞌbɛꞌa dí øtꞌbe, nꞌdamhma njon di cꞌąmanꞌʉ rá ꞌbɛfi Oją dí øtꞌbe. 4 Nɛ nangue ꞌbɛꞌa dí øtꞌbe dín nde ga ut yʉ jąꞌi ngue majuąni yʉ́m ꞌbɛhnigaꞌbe ra Cristo ua ja ra häi. Nɛ gätho dí øtꞌbe xʉn ho nɛ hin dín xømbʉiꞌbe, madagueꞌbʉ xʉn ngu ran ʉnbi dín nuꞌbe. Nɛ xʉn hɛ̨i ꞌbɛꞌa nám ꞌbʉꞌbe, nɛ jaꞌbʉ hin dí pąꞌbe ꞌbɛꞌa ga øtꞌbe. 5 Nɛ xʉn ngu yʉ nidi i ꞌbɛnzagaꞌbe, nɛ dí ofädiꞌbe, nɛ dín nuꞌbe ꞌda yʉn ꞌyoꞌtsꞌi ꞌbʉ in cuɛ yʉ jąꞌi. Nɛ ꞌda yʉ pa ɛ̨mmɛ dí yäꞌbe nangue ra ꞌbɛfi xʉn hɛ̨i dí øtꞌbe. Nɛ dí äthąꞌbe ꞌda ʉ yʉ xui, hin dí ąꞌbe, pɛ dí tømdaꞌbe ꞌbɛꞌa din ja. Nɛ ꞌda yʉ pa hinꞌyʉ ga siꞌbe. 6 Pɛ nꞌdatho ma mbʉiꞌbe tengu rán säui a majuąni, nɛ dá øtꞌbe ran ho nguetho dín ꞌyoꞌbe rá Hogandąhi Oją. Nɛ hin dadí xømbʉiꞌbe nangue ma ꞌbɛfiꞌbe, pɛ dí utäꞌbe yʉ jąꞌi ma yembʉiꞌbe nɛ man huɛ̨cateꞌbe. 7 Nɛ dím mamꞌbe a ram hma majuąni, nguetho di zɛcꞌbe Oją ga øtꞌbe rá ꞌbɛfi. Nɛ nangue ma hocjąꞌi dí øtꞌäꞌbe, hingui sä di yącpaꞌbe yʉ jąꞌi. 8 Jaꞌbʉ i hnumansucꞌbe, jaꞌbʉ hinꞌna, nuꞌʉ ꞌda di cꞌąmanꞌʉcꞌbe, nuꞌʉ miꞌda im ma xʉn ho dí øtꞌbe, nuꞌʉ ꞌda im ma dí fɛhnigäꞌbe. Pɛ madagueꞌa xʉn ngu ꞌbɛꞌa man ʉ yʉ jąꞌi, dím mamꞌbe ꞌbɛꞌa ngue majuąni. 9 ꞌBʉ i ꞌda ngue im ma ngue hingui pądi ꞌbɛꞌa dí øtꞌbe, pɛ ꞌbʉ i ꞌda i pącꞌbe xʉn ho. Nɛ nꞌdapa ngu nꞌdapa i husca man dąteꞌbe, pɛ guextaꞌa dí ꞌbʉꞌbe. Nɛ xʉn ngu yʉn ʉnbi dín nuꞌbe, pɛ hin dí tuꞌbe. 10 Nɛ nuꞌbʉ dín nuꞌbe ra dumbʉi, ꞌbex di ꞌdacꞌbe ran johya ra Hmu mahɛ̨tsꞌi. Nugäꞌbe dí hyoyaꞌbe, pɛ xʉn ngu ʉ dí japꞌbe da dįn a ran ho, nguetho dí xicäꞌbe ꞌbɛꞌa di unꞌna Oją. Nɛ hinꞌyʉ ꞌbɛꞌa da zä gam mamꞌbe ngue ma mbɛti zɛhɛꞌbe, pɛ hinꞌyʉ ꞌbɛꞌa dadí ꞌbɛꞌbe, nguetho Oją di ꞌdacꞌbe gätho dí homꞌbe. 11 Nu ahʉ ma amigo ahʉ guí ꞌbʉhmbʉ bʉ ja ra hnini Corinto, ya dá xi ahʉ gätho ꞌbɛꞌa dím bɛ̨ni, nguetho dadí huɛ̨cꞌahʉ ngue gätho ma mbʉi. 12 Nugäꞌbe majuąni dadí huɛ̨c ahʉ, pɛ nu ahʉ hin ɛ ja nin huɛ̨cate nanguecäꞌbe. 13 Pɛ dí xi ahʉ tengu tho ꞌbʉ ma tꞌʉhni ahʉ, dami xoc ni mbʉihʉ nɛ din ja ahʉ ran huɛ̨cate nanguecäꞌbe, tengu tho dí øtꞌbe nangue ahʉ.Oją i ꞌbʉpʉ mbo ma mbʉihʉ
14 O guín ꞌyohʉ ʉ ꞌda ngue hingui ɛ̨cꞌyɛi Oją, nguetho nte yʉ́n jahʉ nꞌda ʉ øtꞌ ran tsꞌo ꞌbʉ øtꞌ ran ho nꞌda. Nɛ nte rán jaui ra ꞌbɛxui a ran nɛqui. 15 Nɛ hin te rán jaui ra Cristo a ra Satanás ngue ra zįthu, nɛ hinga ꞌdatꞌa im bɛ̨mmi nꞌda ra ꞌyɛ̨cꞌyɛi a hingui ɛ̨cꞌyɛi. 16 Nɛ hin te rán jaui rá ngu Oją ʉ yʉ hmite, nguetho ni mbʉihʉ rá ngu Oją ngue i ꞌbʉi maząi. Nɛ gueꞌa bi man Oją mayaꞌbʉ: “Nugä dam ꞌbʉpʉ mbo yʉ́ mbʉi, nɛ dan ꞌyohʉ, nɛ nugä ga øtꞌe yʉ́ Ojągä ʉ, nɛ nuꞌʉ ga øtꞌe ngue ma tꞌʉhnigä ʉ,” bi ꞌyɛ̨n Oją. 17 Janangueꞌa bi ꞌyɛ̨n Oją: “Damí ꞌuehmbʉ bʉ, o guí tɛnhdʉ ngueꞌʉ hingui ɛ̨cꞌyɛi, nɛ ꞌyo guí sähʉ ꞌbɛꞌa xʉn tsꞌo. Nɛ ga øtꞌe ngue ni Ojąjʉ, nɛ ga sin ahʉ bʉya. 18 Nɛ ga øtꞌe ni Tajʉ nɛ nu ahʉ ga øtꞌe ma tsꞌʉntꞌʉ ahʉ nɛ ma tꞌįxu ahʉ.” Gueꞌa bi man Oją ngue nuįxte rá tsꞌɛdi.