Bim päh yʉ́ mbʉi yʉ ꞌyɛ̨cꞌyɛi
7
Ma amigo ahʉ dadí huɛ̨c ahʉ, ya xʉn ngu yʉn ho bi man Oją da ꞌyørcahʉ, pɛ jatho ga ꞌuehmbʉ bʉ i ja ꞌbɛꞌa gätho xʉn tsꞌo. Nɛ ga ꞌuehmbʉ ꞌbɛꞌa in nde di tsꞌon ma jąꞌihʉ, nɛ ma mbʉihʉ. Jatho ga homhbʉ manꞌda manꞌda ꞌbɛꞌa dí guaꞌa dán hojʉ, ngue gan numansuhʉ Oją. 2 Nɛ nu ahʉ guí ꞌbʉhmbʉ bʉ ja ra hnini Corinto, dami bɛ̨ncꞌbe nanguecäꞌbe, nguetho xinga nꞌda ahʉ bi nu ran ʉnbi ꞌbɛꞌa dá øtꞌahʉ, nɛ hin te dá øtꞌäꞌbe ngue di tsꞌonꞌna ni mbʉihʉ, nɛ xinga nꞌda ahʉ dá hä ahʉ ngue mꞌbɛjua ga ɛ̨nꞌahʉ gui jurcahʉ. 3 Nuya hin dín nde ngue ga dąmhyą ahʉ, nguetho ya dí xi ahʉ ngue ɛ̨mmɛ dadí huɛ̨c ahʉ, nɛ thocua thoho dím bɛ̨n ahʉ, asta gueꞌbʉ ga tugä. 4 Nugä dí ɛ̨cꞌyɛi ngue guí øthʉ ran ho, nɛ gueꞌa ní hyu ma mbʉi a. Nɛ nu ahʉ gadí ꞌdajʉ ran johya, madague xʉn ngu yʉn ʉnbi dín nugäꞌbe, pɛ ɛ̨mmɛ hu ma mbʉi ran johya. 5 Nuꞌbʉ má søngäꞌbe bʉ ja ra häi Macedonia, ɛ̨mmɛ xʉn hɛ̨i ꞌbɛꞌa dá øtꞌbe, nguetho hønbʉ go hapʉ dá thoꞌbe bi zʉcꞌbe yʉ jąꞌi, nɛ xʉn hɛ̨i ꞌbɛꞌa nám ꞌbʉꞌbe nɛ mi ja ra mbidi ma mbʉiꞌbe. 6 Pɛ nu Oją nząi i hurpa yʉ́ mbʉi ʉ toꞌo i tu yʉ́ mbʉi, nɛ bi hyurca ma mbʉiꞌbe ꞌbʉ mi zøm bʉ ra Tito. 7 Bi hyurca ma mbʉiꞌbe nangue gá hyurpa rá mbʉi ra Tito ꞌbʉ gmí ꞌbʉhmbʉ bʉ. Nu ra Tito bi xicäꞌbe ngue ɛ̨mmɛ bi du ni mbʉihʉ nangue ꞌbɛꞌa gá ꞌyøthʉ ngue hingui ho. Nɛ bi xicäꞌbe ɛ̨mmɛ gmín ndehʉ guin nujʉ. Nɛ nuꞌbʉ mi cꞌąmanꞌʉgä ꞌda, nu ahʉ bʉ gá yąnjʉ. Nɛ nangue guím bɛ̨njʉ, manꞌda i hu ma mbʉi. 8 Bi du ma mbʉigä ꞌda yʉ pa nangue rá mbʉdi søcuą dá pɛnꞌnahʉ bʉ, pɛ hinꞌna ya. Bi du ma mbʉi nangue ra dumbʉi dá ꞌda ahʉ. 9 Nuya dadí johyagä, hin nangue bi du ni mbʉihʉ, pɛ nangue gá päh nin ꞌyomfɛ̨nihʉ ꞌbʉ mi du ni mbʉihʉ. Nɛ nu Oją bi japi ngue bi bømanho ꞌbɛꞌa dá xi ahʉ. Nɛ nte man ʉnbi bi gohi ꞌbɛꞌa dá øtꞌaꞌbe. 10 Nguetho nuꞌʉ i hon Oją ꞌbʉ i tu yʉ́ mbʉi, di japi di päh yʉ́ mbʉi nangue yʉ́ tsꞌoqui, ngue da yąni, nɛ da ꞌueꞌa ra dumbʉi bʉya. Pɛ nuꞌbʉ i tu yʉ́ mbʉi ngue hingui pądi ꞌbɛꞌa da ꞌyøtꞌe nɛ im bɛ̨n ra ximhäi, hin di päh rá mbʉi ꞌbʉ, pɛ manꞌda di un ran dąte bʉya. 11 Nu ni dumbʉihʉ bi ꞌda ahʉ ran ꞌyomfɛ̨ni xʉn ho nangue gá hyomhbʉ Oją, nɛ ɛ̨mmɛ gá hyumbi gá hojʉ ꞌbɛꞌa bin ja. Nɛ ɛ̨mmɛ gá numanꞌʉhʉ a ngue bi ꞌyøtꞌ ra tsꞌoqui, nɛ ɛ̨mmɛ gá suhʉ ꞌbɛꞌa bin ja. Nɛ gá un ran ʉnbi toꞌo bi ꞌyøtꞌ ran tsꞌo, nɛ ɛ̨mmɛ gán ɛ̨hyahʉ gui ꞌyøthʉ ran ho. Ɛ̨mmɛ gmín ndehʉ xcá mbagä bʉ xcá zɛ ahʉ. Nɛ ya gá ꞌyuhmbʉ bin ho a ra tsꞌoqui gmín ꞌyohʉ. 12 Jananjabʉ gueꞌa dá otꞌahʉ ra søcuą a, ngue hinga høntꞌa ngue di hoc rá mbʉi a ran ꞌyohʉ ngue bi ꞌyøtꞌ ran tsꞌo, xínga gueꞌa bi tꞌørpa ran tsꞌo, pɛ nangue ma søcuą dá otꞌahʉ, Oją bi zä bi ꞌyutꞌahʉ ngue majuąni guí tɛngahʉ. 13 Janangueꞌa ɛ̨mmɛ hu ma mbʉiꞌbe. Nɛ manꞌda dadí johyaꞌbe nuꞌbʉ mi xicꞌbe ra Tito ngue gá hyurpa rá mbʉi a nangue ꞌbɛꞌa gá ꞌyøthʉ. 14 Nɛ dá xih ra Tito, gue da tꞌømanho a rám hma bʉ guí ꞌbʉhmbʉ. Nɛ gueꞌa gá ꞌyørpahʉ, gá ꞌyømanho a ram hma bi xi ahʉ. Janangueꞌa hin dí pɛꞌtsꞌ ma sägä nangue ꞌbɛꞌa dá xifi, pɛ ɛ̨mmɛ i hu ma mbʉi. 15 Nguetho nuꞌbʉ mí mba bʉ ra Tito, ɛ̨mmɛ gá numansuhʉ, nɛ ɛ̨mmɛ gán ɛ̨hyahʉ gá ꞌyøthʉ ꞌbɛꞌa gätho bi xi ahʉ. Janangueꞌa manꞌda bin ja rán huɛ̨cate ra Tito nangue ahʉ bʉ. 16 Nɛ ɛ̨mmɛ hu ma mbʉi nguetho sä ga ɛ̨cꞌyɛi ngue majuąni guí øthʉ ran ho.