Yʉ́n tꞌunni yʉ ꞌyɛ̨cꞌyɛi
8
Ma zʉ cuꞌahʉ, dín nde ahʉ gui pąhmbʉ ꞌbɛꞌa gätho bi ꞌyøtꞌ rá mate Oją bʉ mbo yʉ́ mbʉi yʉ ꞌyɛ̨cꞌyɛi dim pɛti bʉ ja ra häi Macedonia. 2 Nu yʉ ꞌyɛ̨cꞌyɛi bʉ bi nu ran ʉnbi nguetho yʉ hyoya thoho ʉ. Pɛ guemhma ɛ̨mmɛ i ja ran johya yʉ́ mbʉi, nɛ manꞌda manꞌda di unda yʉn tꞌunni yʉ́ miꞌyɛ̨cꞌyɛihʉ. 3 Nugä dí hąxanjuąni ngue bi unni xʉn ngu, madagueꞌa hinꞌyʉ ꞌbɛꞌa da gopʉ ja rá ngusɛ, nɛ rá pähäzɛhɛ bi uni. 4 Nɛ bi ꞌyäc ra mate ngue nɛꞌʉ da gomꞌma ram fätsꞌi din tꞌunꞌndʉ yʉ hyoya ꞌyɛ̨cꞌyɛi bʉ ja ra häi Judea. 5 Nɛ manꞌda xʉn ho bi ꞌyøtꞌe xinda gueꞌa dá bɛ̨ngä, nguetho mꞌbɛtꞌo thoho bi hyon rá pähä Oją ngue di bɛ̨nbi ꞌbɛꞌa da ꞌyøtꞌe, nɛ nubʉya bi xiqui ngue da mbäxqui ga fäx ʉ yʉ cu. 6 Nu ra Tito rá mbʉdi bi xi ahʉ nangue yʉn tꞌunni gui umhbʉ. Nɛ dá xiꞌbe ra Tito di juaꞌa di pɛti gätho nin tꞌunnihʉ gá mamhbʉ gui umhbʉ, nangue nin huɛ̨catehʉ, ngue ra mate thoho. 7 Nu ahʉ ɛ̨mmɛ xʉn ngu yʉn ho guí øthʉ, nɛ i ja ni tꞌɛ̨cꞌyɛihʉ xʉn ho, nɛ sä guím mamfʉ rám hman Oją xʉn ho, nɛ ɛ̨mmɛ guí pąhmbʉ xʉn ho, nɛ ɛ̨mmɛ guí ɛ̨hya gui ꞌyøthʉ rá ꞌbɛfi Oją, nɛ ja ahʉ nin huɛ̨catehʉ nanguecäꞌbe. Pɛ nuya xʉn ho ꞌbʉ gui umhbʉ xʉn ho nin tꞌunnihʉ, nꞌdamhma hin te gui ꞌbɛhmbʉ nangue rá ꞌbɛfi Oją guí øthʉ. 8 Nugä drá Pablogä hin dín nde ga manda ahʉ ꞌbɛꞌa guí øthʉ. Nuna ꞌbɛꞌa bi ꞌyøtꞌ yʉ cu bʉ ja ra häi Macedonia, nꞌda ra hmɛpya a. Nuꞌbʉ ngubʉ gui ꞌyøthʉ, da zä ga pącä ngue majuąni i ja ahʉ nin huɛ̨catehʉ nangue yʉ ꞌyɛ̨cꞌyɛi. 9 Nguetho guí pąhmbʉ rá mate ma Hmuhʉ ra Jesucristo. Nuꞌa tengu ꞌbʉ ra mɛmbɛti a, pɛ bin hyoya nanguejʉ ngue bi nde din jajʉ xʉn ngu. 10 Nuya i ja a ga xi ahʉ ꞌbɛꞌa dím bɛ̨ngä. Xʉn ho ꞌbʉ gui juahmbʉ ꞌbɛꞌa gá dʉmhbʉ má jɛya, nguetho ɛ̨mmɛ gán ɛ̨hyahʉ má jɛya gá un nin tꞌunnihʉ. 11 Nuya dami pɛthʉ nin tꞌunnihʉ, nɛ daman ɛ̨hyahʉ ya, tengu ꞌbʉ rá mbʉdi gá bɛ̨mhbʉ, nɛ gui umhbʉ ꞌbɛꞌa gätho sä gui umhbʉ. 12 Nuꞌbʉ ja a nde di un a nꞌda, Oją da numanho, ꞌbʉ gueꞌa rán thɛui ꞌbɛꞌa pɛꞌtsꞌa nꞌda a di uni. 13 Pɛ hin dí ɛ̨na go din dąnhyɛ̨i ʉ ꞌda o dim mɛmbɛti ʉ ꞌda nangue a gá unhdʉ, nɛ nu ahʉ bʉya hinꞌyʉ ꞌbɛꞌa gui hyomhbʉ. 14 Pɛ nuꞌa dí xi ahʉ, pɛ nuya xʉn ngu i ja ahʉ, xʉn ho ꞌbʉ gui unhdʉ tsꞌʉ ʉ ꞌda hinꞌyʉ ꞌbɛꞌa da hyoni. Nɛ nuꞌbʉ da zøn ra pa ngue hinꞌyʉ ꞌbɛꞌa gui hyomhbʉ, nuꞌʉ di zɛ ahʉ ʉ. Janangueꞌa gätho thocua thoho din ja ꞌbɛꞌa da hyoni. 15 Nɛ gueꞌa mán tꞌoꞌtꞌi bʉ ja rám hman Oją: “Toꞌo di pɛti xʉn ngu, pɛ hin da bong thoho a da hyonsɛ, pɛ nɛꞌʉ di pɛti zʉ tsꞌʉtho, hin te di ꞌbɛdi.”Ra Tito nɛꞌʉ in ꞌyohʉ
16 Dí ɛ̨mfe jamadi Oją ngue bi ꞌdac mam fätsꞌiꞌbe ra Tito, ngue nɛꞌa ɛ̨mmɛ im bɛ̨n ahʉ nɛ ɛ̨mmɛ ɛ̨hya nangue ahʉ. 17 Ngue nu ra Tito min nde da ꞌyøtꞌe ꞌbɛꞌa dá xifi, nɛꞌa mi ja rá pähä zɛhɛ da mba bʉ. 18 Nɛ da mbɛ ra Tito na manꞌda ra cu ngue dí pɛnhdä bʉ, nuꞌa im man rám hman Oją xʉn ho, nɛ gätho yʉ ꞌyɛ̨cꞌyɛi ngubʉ im ma nangueꞌa. 19 Ma miꞌyɛ̨cꞌyɛihʉ bi huanhna ran ꞌyohʉ na, ngue dan ꞌyohe ꞌbʉ dá hąxhe ra mbɛti bʉ Judea. Nɛ gueꞌa ná uh man huɛ̨catehe ngue dín nde ga fäx ma cuhʉ, nɛ dí nuįxte ra Hmu mahɛ̨tsꞌi a. 20 Nugäꞌbe dadí jamansu ꞌbɛꞌa dí øtꞌbe nangue yʉn tꞌunni xʉn ngu, nguetho hin dín nde din ja ꞌbɛꞌa dí cꞌąmanꞌʉcꞌbe. Nɛ gueꞌa í thanꞌndʉ miꞌda yʉ cu ngue ga mbähmbe ꞌbʉ dá hąxhe a ra mbɛti. 21 Nguetho dín nde ga øtꞌbe gätho xʉn ho bʉ na nu Oją nɛpʉ na nu ma mijąꞌiꞌbe. 22 Nɛ ga pɛnꞌnahʉ bʉ manꞌda ra cu mahønꞌa ngue da mbähä ra Tito. Nɛ nuna dí pąhmbe ngue ra ꞌyɛ̨cꞌyɛi xʉn ho na. Nɛhna ɛ̨mmɛ ɛ̨hya da ꞌyøtꞌe xʉn ho rá ꞌbɛfi Oją. Ɛ̨mmɛ nde da mba bʉ da nu ahʉ, nguetho ya dá xihna nangue ni hogantꞌøtꞌehʉ. 23 Nɛ nuna ra Tito, man ꞌyoꞌbe nangue ma ꞌbɛfi dadí zɛ ahʉ. Nɛ nuꞌʉ miꞌda in ꞌyohʉ ra Tito, yʉ́m ꞌbɛhni ʉ yʉ ꞌyɛ̨cꞌyɛi dim pɛti ua. Nɛ da mbäx ahʉ nangue rá ꞌbɛfi Oją, gueꞌa dín nɛqui xʉn ho rá nuįxte ra Cristo bʉ guí ꞌbʉhmbʉ. 24 Nuya dami ꞌyørcaꞌbe ra mate gui simanhohʉ yʉn ꞌyohʉ, nꞌdamhma gätho miꞌda yʉ ꞌyɛ̨cꞌyɛi da bądi ngue majuąni i ja nin huɛ̨catehʉ, tengu tho dím mangä ngue nząi i ja ahʉ ran huɛ̨cate.