Di pɛt yʉn tꞌunni nangue yʉ́ miꞌyɛ̨cꞌyɛihʉ
9
Nugä hingui jatho ga xi ahʉ nangue gui zɛhmbʉ ni miꞌyɛ̨cꞌyɛihʉ, nangue yʉn tꞌunni gui unhdʉ. 2 Nguetho dí pądi ngue ɛ̨mmɛ i ja ahʉ ra pähä gui zɛhmbʉ ʉ. Nɛ ya dá xih yʉ jąꞌi ngue i ꞌbʉcua ja ra häi Macedonia ꞌbɛꞌa guí øthʉ bʉ ja ra häi Acaya. Dá xihya ngue gán ɛ̨hyahʉ gá pɛt nin tꞌunnihʉ má jɛya. Nɛ yʉ cu ua nde da dɛnꞌnahʉ ꞌbɛꞌa guí øthʉ. 3 Nuya dí pɛnꞌnahʉ ya yʉ cu da mbäx ahʉ gui pɛthʉ nin tꞌunnihʉ jannangueꞌa di ja bʉ ꞌbʉ dá søngähe bʉ, nɛ din nɛqui ngue guín ɛ̨hyahʉ gui fäxhʉ yʉ hyoya, tengu dá xih yʉ cu ua ngue guí øthʉ. 4 Nɛ nuꞌbʉ ga mbähmbe bʉ ʉ ꞌda yʉ mɛngu ua ja ra häi Macedonia, nɛ hin xquín ɛ̨hyahʉ gui pɛt nin tꞌunnihʉ, ga pɛꞌtsꞌ ma sähʉ ꞌbʉ. Nguetho ɛ̨mmɛ dí ɛ̨cꞌyɛi guí øthʉ ꞌbɛꞌa guím mamhbʉ. 5 Janangueꞌa dá xihya yʉ cu dim ꞌbɛtꞌo da mba bʉ, di zɛ ahʉ, nꞌdamhma da zä gui pɛthʉ gätho nin tꞌunnihʉ, di jua a gá mamhbʉ. Nɛ nuꞌbʉ dá mbähmbe bʉ, ya xtí guadi xquí pɛtꞌʉ gätho nin tꞌunnihʉ. Nɛ nu man ꞌyohe da bądi ngue gá umhbʉ nangue ni pähä zɛhɛhʉ, nɛ hin nangue dá xi ahʉ. 6 Dami bɛ̨mhbʉ ya, toꞌo i tu zʉ yoho yʉ hmudä, zʉ yoho da xocꞌʉ, pɛ toꞌo da duhu xʉn ngu, da xoqui xʉn ngu ʉ. Janangueꞌa mpähä thoho gui unhdʉ yʉ hyoya yʉn tꞌunni, nɛ nu Oją xʉn ngu ran jąpi di ꞌda ahʉ bʉya. 7 Nꞌda ngu nꞌda di uni tengu im bɛ̨n rá mbʉi zɛhɛ di uni. O gadí umhbʉ ꞌbʉ hin guín ndesɛ ni mbʉihʉ, pɛ xinga gueꞌʉ miꞌda da xi ahʉ gui umhbʉ. Nguetho Oją di huɛ̨cꞌʉ toꞌo i ja ran johya di uni. 8 Nu Oją sä di ꞌda ahʉ xʉn ngu, janangueꞌa dí gua a gui hyonsɛhʉ, pɛ nɛꞌa thocua thoho gui unhdʉ toꞌo hinꞌyʉ ꞌbɛꞌa da hyoni. 9 Ntꞌoꞌtꞌi bʉ ja rám hman Oją toꞌo ngue di unni xʉn ho ʉ yʉ hyoya, nuꞌa rá hogantꞌøtꞌe da gohi maząi. 10 Nguetho nuꞌa Oją ngue nząi di un yʉ hmudä toꞌo i tupʉ ja ra huąhi, nɛ di japi din xąndi ngue din ja ꞌbɛꞌa da zi, guetꞌa Oją di ꞌdaꞌahʉ ra hmudä dán xąnd ni hogantꞌøtꞌehʉ, tengu bʉ nan xąnd yʉ hmudä bʉ ja ra huąhi. 11 Nu Oją di ꞌdajʉ xʉn ngu, nꞌdamhma da zä xø ga thojʉ xʉn ngu bʉya. Nɛ nuꞌbʉ dá undähe nin tꞌunnihʉ, nɛ toꞌo da hyąni da ꞌyɛ̨spa Oją nɛ di un ra jamadi Oją. 12 Yoho yʉn ho da bøni nangue nin tꞌunnihʉ, nu yʉ ꞌyɛ̨cꞌyɛi din ja ꞌbɛꞌa da hyoni, nɛ gätho ʉ di un ra jamadi Oją bʉya. 13 Nɛ gätho toꞌo da hyąn nin tꞌunnihʉ da ꞌyɛ̨spa Oją, nguetho nu nin tꞌunnihʉ ra hmɛpya a ngue majuąni guí ɛ̨cꞌyɛihʉ rán ho maꞌdaꞌyo ra Cristo, nɛ ɛ̨mmɛ di johya ngue guí pąhmbʉ ni cuhʉ ʉ, nɛꞌʉ gätho miꞌda yʉ cu. 14 Nɛ toꞌo da hyąn nin tꞌunnihʉ, da ꞌyäp Oją da mbäx ahʉ, nɛ di huɛ̨c ahʉ bʉya, nguetho i ja ahʉ xʉn ngu rá mate Oją bʉ mbo ni mbʉihʉ. 15 Pɛ jamadi Oją nangue ran tꞌunni ɛ̨mmɛ xʉn ho bi ꞌdajʉ, ngue rá Tsꞌʉntꞌʉ, nɛ hingui sä gam bɛ̨mhbʉ hangu na ngu di muui a. Janangueꞌa nuꞌbʉ dím bɛ̨mhbʉ ꞌbɛꞌa bin ꞌdajʉ, hin ga hyøjʉ ꞌbɛꞌa dí pɛshʉ ꞌbʉ.