I ja rán tꞌɛ̨di ra Pablo ꞌbɛꞌa da xih yʉ ꞌyɛ̨cꞌyɛi
10
Nugä drá Pablogä, ɛ̨mmɛ dín nde ahʉ gui ꞌyøhmbʉ a ga xi ahʉ, pɛ janate tho ga xi ahʉ, tengu thoho ꞌbʉ da xiꞌazɛhɛhʉ ra Cristo. Nguetho guí ꞌbʉhmbʉ bʉ ꞌda ʉ sä ɛ̨na mbɛ dín su ꞌbʉ dí ꞌbʉhmbʉ bʉ, ngueꞌa janate tho dím mangä, pɛ nuꞌbʉ dí pɛnꞌnahʉ ma søcuą, ɛ̨mmɛ ntsꞌɛdi dím mam bʉya, sä ɛ̨n ʉ ꞌda. 2 Nuꞌbʉ dá mbagä bʉ, hin dín nde ga utꞌahʉ hangu rá tsꞌɛdi man zambʉi, pɛ sä ga dąmhyągä tsꞌʉ toꞌo im ma ngue dím bɛ̨nsɛgäꞌbe ꞌbɛꞌa dí øtꞌbe. 3 Majuąni dyʉ jąꞌi thohogaꞌbe ua ja ra ximhäi, pɛ hin dí tįmꞌbe ua a ra tsꞌɛdi ná tąfʉ ra ximhäi. 4 Nujʉ hinga gueꞌa ma tsꞌɛdizɛhɛ nán sʉhmbʉ, pɛ rá tsꞌɛdisɛ Oją a ná tąfʉ rá tsꞌɛdi ran tsꞌo. 5 Nangue rá tsꞌɛdi Oją dí hɛcuahʉ yʉ́n ꞌyɛ̨tsꞌi yʉ jąꞌi nangue ꞌbɛꞌa pąsɛ, nɛꞌʉ hinguin nde da bą Oją. Nɛ nu rá tsꞌɛdi Oją da zä di pärpa yʉ́n ꞌyomfɛ̨ni yʉ jąꞌi ngue ꞌdaꞌanguui da bɛ̨mhbʉ ra Cristo. 6 Nɛ nuꞌbʉ ya dá pąꞌbe ngue majuąni guí øthʉ ꞌbɛꞌa in nde Oją, nugä ga hutꞌanzambʉi ngue ga ꞌuecꞌʉ ꞌda guí ꞌbʉhmbʉ bʉ, ngue hingui nde da ꞌyøtꞌa in nde Oją. 7 Dami bɛ̨mhbʉ ya ꞌbɛꞌa i tꞌøtꞌahʉ. ꞌBʉ i ꞌda ahʉ ngue im bɛ̨ni ngue majuąni in ꞌyohʉ ra Cristo, xʉn ho ꞌbʉ, pɛ jatho da bądi ngue nɛcäꞌbe dín ꞌyoꞌbe ra Cristo. 8 Hin dí pɛꞌtsꞌ ma sä xʉn ngu yʉ nidi ga xi ahʉ, ngue bi ꞌdac man tꞌɛ̨diꞌbe Oją. Nu Oją bi ꞌdacꞌbe ra tsꞌɛdi ga zɛ ahʉ manꞌda gui pąhmbʉ Oją, pɛ hin nangue ga tsꞌongäꞌbe ra ꞌbɛfi bʉ. 9 Nugä hin dín nde gui suhʉ nangue ꞌbɛꞌa dí otꞌahʉ. 10 Nguetho ꞌbʉpʉ ꞌda di cꞌąmanꞌʉgä, nɛ ɛ̨nꞌʉ: “Ɛ̨mmɛ ja rá tsꞌɛdi rá søcuą ra Pablo, pɛ nuꞌbʉ i ꞌbʉcua hinꞌyʉ rá tsꞌɛdi, nɛ hingui sä din yą xʉn ho,” ɛ̨n ʉ ꞌda. 11 Pɛ jatho guim bɛ̨mhbʉ ꞌda ahʉ ngue tengu bʉ nan ja rá tsꞌɛdi ʉ ma søcuągä, nɛ ngutho ꞌbʉ dá xi a zɛhɛhʉ. 12 Nugäꞌbe hinga ꞌdaꞌígu dím bɛ̨mhbe yʉ jąꞌi i ꞌbʉpʉ, ngue i ja ran ꞌyɛ̨tsꞌi nangue ꞌbɛꞌa ɛ̨na pąsɛ ʉ. Pɛ nuꞌʉ toꞌo im bɛ̨ni manꞌda i pąsɛ xinda gueꞌʉ miꞌda, pɛ hingui pą a majuąni. Nguetho sä i nuįspa yʉ́ mijąꞌihʉ nangue ꞌbɛꞌa im bɛ̨nsɛ. 13 Pɛ nugäꞌbe hin dím mamꞌbe manꞌda ja man tꞌɛ̨diꞌbe xinda gueꞌa bi zängaꞌbe Oją, pɛ høntꞌa dí øtꞌbe ꞌbɛꞌa i xicꞌbe Oją. Nɛ bi xicꞌbe Oją dam pɛꞌbe bʉ guí ꞌbʉhmbʉ. 14 Nɛ njon da zä da ꞌyɛ̨na manꞌda bi thoꞌa dá øtꞌbe, xinda gueꞌa bi xicꞌbe Oją ꞌbʉ mbʉdi thoho dá sømꞌbe bʉ guí ꞌbʉhmbʉ dá xi ahʉ rán ho maꞌdaꞌyo ra Cristo. 15 Nɛ hin dín nde ga ɛ̨mꞌbe ngue ma ꞌbɛfiꞌbe ꞌbɛꞌa bi ꞌyøtꞌʉ miꞌda bʉ guí ꞌbʉhmbʉ, høntꞌa ma ꞌbɛfiꞌbe ga ja ahʉ guim bɛnthʉ ni tꞌɛ̨cꞌyɛihʉ xʉn ho, nɛ gueꞌa dí zä ga øtꞌbe manꞌda ra ꞌbɛfi bʉ, ꞌbʉ da xicꞌbe Oją. 16 Nɛ sä ga mbɛꞌbe bʉ miꞌda yʉ hnini bʉya ngue manꞌda yatho guepʉ njom bi xih yʉ jąꞌi rán ho maꞌdaꞌyo ra Cristo. Nɛ njon da zä da ma ngue nꞌdanꞌyo dá thocpa rá ꞌbɛfi bʉ. 17 Hingui ho ꞌbʉ din ꞌyɛ̨zɛhɛ nꞌda, pɛ manꞌda da hyądumbʉi da ꞌyɛ̨spa ra Hmu mahɛ̨tsꞌi. 18 Nguetho hin te di muui ꞌbʉ din ꞌyɛ̨zɛhɛ nꞌda, pɛ nuꞌbʉ i øtꞌe ꞌbɛꞌa da numanho Oją, gueꞌa di muui.