Ra Pablo bi ma nangue yʉ hyäte
11
O gadín xømbʉihʉ ꞌbɛꞌa dí xi ahʉ ya, madagueꞌa dí yątontogä tsꞌʉ. 2 Pɛ nugä ɛ̨mmɛ dí hąh ma mbʉi nangue ahʉ, nguetho i ja bʉ mbo ma mbʉi rán huɛ̨cate Oją. Nɛ ɛ̨mmɛ dín nde ahʉ hønsɛ ra Cristo guin numanhohʉ, tengu nꞌda ra hmute ngue hin di tsꞌon rá mbʉi, høntꞌa in numanho a toꞌo dim ꞌbʉhmi. 3 Pɛ dín su ngue di tsꞌon nin ꞌyomfɛ̨nihʉ nangue ra fɛhni im man ra zįthu, tengu thoho bi ꞌyørpa ra zįthu ra Eva rá mbʉdi thoho, nɛ tsꞌʉrpʉ thoho di ja ahʉ ngue hinga gätho ni mbʉihʉ guin numanhohʉ ra Cristo. 4 Pɛ ɛ̨mmɛ guí øhmbʉ ꞌbɛꞌa gätho i xi ahʉ ꞌda yʉ jąꞌi ngue i søm bʉ guí ꞌbʉhmbʉ, madagueꞌa i xi ahʉ nꞌdanꞌyo ra Jesús ngueꞌa hin din thɛui a dá xi ahʉ, nɛ nꞌdanꞌyo nꞌda ran ꞌyomfɛ̨ni in nde di ꞌda ahʉ, nɛ i xi ahʉ nꞌdanꞌyo thoho nangue ran ho maꞌdaꞌyo, xinda gueꞌa dá xi ahʉ. 5 Pɛ nugä hingui coh ma tsꞌɛdigä xinda gue ʉ ꞌda guí tɛnhdʉ, ngue im mansɛ ngue manꞌda yʉ́ ꞌbäihʉ ra Jesucristo. 6 Pɛ dí pącä a majuąni ran ꞌyomfɛ̨ni nangue Oją, nɛ gueꞌa dá utꞌahʉ xʉn ngu yʉ nidi, madagueꞌa hingui sä dan høtꞌahyą tenguꞌʉ yʉn ꞌyohʉ. 7 Uague guí ɛ̨mhbʉ hingui ho dá øtꞌä nguetho nte dá hącꞌahʉ ꞌbʉ má mangä rán ho maꞌdaꞌyo ra Cristo bʉ. Pɛ dá øtꞌ ra ꞌbɛfi dá honsɛ man tsꞌihmɛ, nguetho min nde ga zɛ ahʉ. 8 Nɛ nuꞌbʉ má xänꞌnahʉ bʉ, nuꞌʉ yʉ ꞌyɛ̨cꞌyɛi i ꞌbʉpʉ miꞌda yʉm pɛti, gueꞌʉ bi ꞌdacä ꞌbɛꞌa dá hongä bʉ, janangueꞌa bi zä dá xi ahʉ ran ho maꞌdaꞌyo nɛ nte dá ä ahʉ. 9 Nɛ nuꞌbʉ mám ꞌbʉhmbʉ bʉ, him mi ja ꞌbɛꞌa dá hongä, nɛ hin te dá ä ahʉ. Pɛ nuꞌbʉ mí zøm bʉ ma cuhʉ yʉ mɛngu macedonia, bi ꞌdacä ꞌbɛꞌa madi ꞌbɛcä. Nɛ ngubʉ ga øtꞌahʉ mahønꞌa bʉ, hin te ga ä ahʉ. 10 Nɛ dím ma majuąni bʉ ja rá hmi ra Cristo, ngue hin te ga hącua yʉ cu ꞌbʉpʉ ja ni häihʉ Acaya, nangue rá ꞌbɛfi Oją dí øtꞌä bʉ, nɛ njon da zä da xiqui ga äh ra mbɛti. 11 Ha gueꞌa dí øtꞌä gní ꞌyɛ̨mhbʉ hin dadí huɛ̨cꞌahʉ, pɛ Oją i pądi ngue dadí huɛ̨cꞌahʉ. 12 Nɛ ga thoqui tengu dá øtꞌä, nꞌdamhma di nɛqui ngue hinga ꞌdaꞌigu dí øthe yʉ hyäte madagueꞌbʉ ná yątꞌa ɛ̨na i øtꞌe xʉn ho rá ꞌbɛfi Oją. 13 Nu ʉ im mansɛ ʉ ɛ̨na yʉ́ ꞌbäihʉ ra Cristo, pɛ him majuąni im man ʉ, yʉ hyäte thoho, nɛ hin yʉ́ ꞌbäihʉ ra Cristo ʉ. 14 Pɛ ndeꞌbʉ hin gui hyonya thohohʉ ꞌbɛꞌa i øtꞌʉ, nguetho nɛsɛ a ra zįthu da zä da hyä ahʉ, da zä da ꞌyøtꞌe tengu ꞌbʉ nꞌda ra hogamꞌbɛhni mahɛ̨tsꞌi bá pɛnꞌna Oją. 15 Janangueꞌa ꞌdaꞌigu øthʉ ʉ yʉ́ ꞌyɛ̨hɛ ra zįthu, nɛ im bɛ̨n yʉ jąꞌi yʉ hogamꞌbɛhni ʉ. Pɛ da zøn ra pa da nu ran ʉnbi din thɛhʉ ꞌbɛꞌa bi ꞌyøtꞌe.Ran ʉnbi bi nu ra Pablo nguetho rá ꞌbäiui ra Cristo a
16 Pɛ ɛ̨mmɛ dí nde ahʉ gui ꞌyøhmbʉ ꞌbɛꞌa dí xi ahʉ, madagueꞌbʉ guím bɛ̨mhbʉ ngue dí tontogä tsꞌʉ ꞌbʉ dí mansɛ ꞌbɛꞌa dí øtꞌä. 17 Nuꞌbʉ dím mansɛ ꞌbɛꞌa dí øtꞌä, ɛ̨na gueꞌbʉ hinga gueꞌa bi xicä Oją ngue gam ma, pɛ ɛ̨na gueꞌbʉ dí tontogä tsꞌʉ ꞌbʉ dím mangä tengu na. 18 Pɛ nu yʉn ꞌyohʉ bʉ i xi ahʉ nangue yʉ́n hosɛ, nuya nɛcä ga xi ahʉ tsꞌʉ nangue man hosɛ. 19 Nu ahʉ ɛ̨mmɛ xʉn ho nin ꞌyomfɛ̨nihʉ, pɛ ɛ̨mmɛ guí ɛ̨hyahʉ guí øhmbʉ ꞌbɛꞌa i xi ahʉ yʉ tonto. 20 Nɛ ɛ̨mmɛ gadí hohʉ gan ꞌyɛ̨hɛhʉ toꞌo in nde di manda ahʉ, madagueꞌbʉ i hä ahʉ o gue i ä ahʉ ꞌbɛꞌa gätho i ja ahʉ. Nɛ guín numansuhʉ ʉ ɛ̨mmɛ din ꞌyɛ̨zɛhɛ, madague da mbɛpꞌa ni hmihʉ, pɛ guextaꞌa guí tɛnhdʉ ʉ. 21 Nugäꞌbe hingui sä ga øtꞌbe tengu ʉ, pɛ gueꞌa gním mamhbʉ hinꞌyʉ ma tsꞌɛdigäꞌbe. Nuꞌʉ yʉn ꞌyohʉ guí ꞌbʉhmbʉ bʉ im man yʉ́n hosɛ. Nɛcä ga hutꞌanzambʉi gam mangä tsꞌʉ nangue man hosɛ, tengu nꞌda ra tonto. 22 Ná yątꞌʉ ngue yʉ hebreo ʉ, pɛ nɛcä drá hebreogä. Nɛ ná yątꞌʉ gue yʉ israel ʉ, pɛ nɛcä drá israelgä. Nɛ ná yątꞌʉ gue yʉ́m bomꞌbɛto ra Abraham ʉ, pɛ nɛcä drám bomꞌbɛtogä ra Abraham. 23 Nɛ ná yątꞌʉ ngue yʉ́ ꞌyɛ̨hɛ ra Cristo ʉ, pɛ nugä manꞌda drá ꞌyɛ̨hɛgä a ra Cristo xinda gueꞌʉ. Nuya dím mangä tengu nꞌda ra tonto.Nugä manꞌda xʉn ngu ra ꞌbɛfi dí øtꞌä xinda gueꞌʉ ꞌda yʉn ꞌyohʉ, nɛ manꞌda xʉn ngu yʉ nidį dán ofädigä, nɛ xʉn ngu yʉ nidį dá nu ran ʉnbi nangue yʉm fɛi, nɛ xʉn ngu yʉ nidį mi ɛ̨na xtá thogä. 24 Nɛ cʉtꞌa nidį bi ꞌyørcä ꞌdäte ma ꞌdɛꞌmagʉto yʉm fɛi ʉ ma mɛnguhe yʉ judío. 25 Nɛ nhyundį bi ꞌbɛnzagä, nɛ nꞌdandį yʉ jąꞌi bi batꞌadogä. Nɛ nhyundį án xɛnꞌa ra barco mi hugä bʉya, bi zo bʉ ja ra dehe, nɛ ꞌdäte ma goho ora dá o bʉ ja ra dehe bʉya. 26 Pɛ xʉn ngu yʉ nidį dán ꞌyogä nɛ xʉn ngu yʉ nidį má guepʉ xcá tugä bʉ ja yʉ dąthe, nɛpʉ ꞌbʉh yʉ bɛ̨. Nɛ bi gorcä ra ꞌyu ma mɛnguhe yʉ judío, nɛꞌʉ hing yʉ judío. Nɛ mi ɛ̨na xtá thogä bʉ ja yʉ hnini nɛpʉ ja yʉ dąpo. Nɛ dá hu yʉ barco bʉ ɛ̨mmɛ ɛn ra dehe ran dąhi ɛ̨mmɛ ntsꞌutho. Nɛ mi ɛ̨na xtá hyogä ʉ yʉ hyäte ꞌyɛ̨cꞌyɛi. 27 Nɛ jaꞌbʉ ɛ̨mmɛ dá yäcä nangue ma ꞌbɛfi, nɛ bin ʉnba ma jąꞌi, nɛ jaꞌbʉ nyaꞌa thoho hin dán ącä. Nɛ jaꞌbʉ nyaꞌa thoho hin dán sihmɛgä, xinga gue ra dehe dá sigä. Nɛ jaꞌbʉ xʉn sɛ nguetho hinga xøtꞌa ma pahnigä. 28 Ɛ̨mmɛ xʉn hɛ̨i ꞌbɛꞌa dí øtꞌä, nɛꞌʉ yʉ ꞌyɛ̨cꞌyɛi gätho hønbʉ go hapʉ dim pɛti ɛ̨mmɛ dí hądumbʉi ga jamansugä ʉ. 29 Nɛꞌa dí øtꞌä ꞌdaꞌangu dí sägähe ʉ ꞌbɛꞌa gätho i sä ʉ, nuꞌbʉ ꞌbʉ a nꞌda ra ꞌyɛ̨cꞌyɛi xʉn güentꞌi, dí comꞌbe rán güentꞌi a. Nɛ nuꞌbʉ nꞌda ra ꞌyɛ̨cꞌyɛi i øtꞌ ran tsꞌo, nugä ɛ̨mmɛ dí cuɛgä nangue a to bi ꞌbɛpi da ꞌyøtꞌe. 30 Pɛ nuꞌbʉ i ja a dín nde dá yądä, pɛ høntꞌa dán güentꞌigä dá yądä. 31 Nu Oją rá Ta ma Hmuhʉ ra Jesucristo mająpi maząi a, i pądi ngue hing ra fɛhni dím mangä. 32 Tengu dá øtꞌä nꞌdandį nuꞌbʉ mám ꞌbʉcä bʉ ja ra hnini Damasco, nuꞌbʉ min tsꞌʉtꞌabi ra Aretas, nɛ nuꞌa ra tsꞌʉtꞌabi bi xi ʉ yʉ dofʉi da gorca ra ꞌyu bʉ ja ra goxthi rá mbäꞌtꞌi ra hnini, mim bɛ̨ni ngue da bɛndgä bʉ. 33 Pɛ nugä dá pøngä bʉ ja nꞌda ra ventana nɛ dá hugä bʉ ja nꞌda ra dąꞌbøtsꞌe, nɛ nuꞌʉ ma amigo bi cąꞌma ra ꞌbøtsꞌe ngue ra xąhi bʉ thi rá mbäꞌtꞌi ra hnini. Nɛ him bi bɛndgä ʉ yʉ cotꞌyu. Mahotho dá øtꞌä ꞌbʉ má pøngä bʉ ja ra hnini Damasco.