Oją bi ꞌyurpʉ mahɛ̨tsꞌi ra Pablo
12
Nuꞌbʉ dím mansɛgä ꞌbɛꞌa dí øtꞌä, hin te di muui. Pɛ guemhma ga xi ahʉ ꞌbɛꞌa bi ꞌyurcä ra Hmu mahɛ̨tsꞌi ꞌbʉ nꞌdandį. 2 Bi bonga ꞌdɛꞌmagoho njɛya Oją bi zixcä bʉ mahɛ̨tsꞌi. Hin dí pącä ꞌbʉ nɛꞌa ma ngøcꞌyɛi o hinꞌna, pɛ Oją pądi ꞌbɛpʉ ín ja. 3 Høntꞌa dí pącä ngue dá mba mahɛ̨tsꞌi, hin dí pącä ꞌbʉ nꞌyoui ma ngøcꞌyɛ̨i o hinꞌna, høntꞌa Oją pądi ꞌbɛꞌa dá øtꞌä. 4 Nɛ nuꞌbʉ mí tsꞌixcä bʉ guepʉ mahotho, dá øcä ꞌbɛꞌa bi hmam bʉ, nɛ njongui man yʉ jąꞌi tengu a. Nɛ him bin ꞌdac ran tꞌɛ̨di gam ma ꞌbɛꞌa dá øpʉ. 5 Nɛ nuna bi tꞌørcä i sä xcá yądä a ꞌbʉ gueꞌa xcá bɛ̨ni gam ma, pɛ høntꞌa man hosɛgä gam mangä ngue dí pącä hinꞌyʉ ma tsꞌɛdi zɛhɛgä. 6 Nugä i jagä ꞌbɛꞌa xcan ꞌyɛ̨xä ꞌbʉ xcá ndegä nɛ hin dadín hyätꞌä tengu ꞌbʉ ra tonto, nguetho da zä xcá ma majuąni ꞌbɛꞌa bi tꞌurcä. Pɛ hin dín nde ngue gueꞌa dí tꞌɛ̨scä a, pɛ dín nde ngue gueꞌa in nusɛ yʉ jąꞌi a dí øtꞌä dí numansugä ʉ, nɛꞌa ꞌbɛꞌa øsɛ ngue dím mangä. 7 Nugä dá nugä ɛ̨mmɛ mahotho bʉ. Pɛ nu ra zįthu bi ꞌdacä nꞌda ran ʉnbi dí sägä. Nɛ Oją bi un ran tꞌɛ̨di da ꞌyørcä, ndeque hin dan ꞌyɛ̨zɛhɛgä nangue ꞌbɛꞌa bi ꞌyurcä Oją. 8 Nɛ hyundį dá äpä Oją ngue di ꞌuecꞌi tsꞌʉ ran ʉ i jagä. 9 Pɛ nuꞌa Oją bi xiqui hin di ꞌuecꞌa ran ʉ, pɛ di ꞌdacä rá mate nɛ rá tsꞌɛdi sä ga hätꞌä ran ʉnbi. “Nuꞌbʉ hinꞌyʉ ni tsꞌɛdizɛhɛ, manꞌda di nɛqui ma tsꞌɛdigä,” i ɛ̨ngä Oją. Janangueꞌa nuꞌbʉ hinꞌyʉ ma tsꞌɛdi zɛhɛgä, manꞌda ɛ̨mmɛ dadín johyagä, nguetho dí pącä ngueꞌa manꞌda dí nɛqui rá tsꞌɛdi ra Cristo. 10 Nuya hingui tu ma mbʉi ꞌbɛꞌa dí øtꞌä, madagueꞌa xʉn ngu yʉn ʉnbi dín nugä, ngue di cꞌąmanꞌʉg yʉ jąꞌi, uague i pa ma ʉguigä. Nɛ hingui tu ma mbʉi nangue ꞌbɛꞌa i ørca yʉ jąꞌi ꞌbʉ dí øtꞌ rá ꞌbɛfi ra Cristo. Nguetho nuꞌbʉ hinꞌyʉ ma tsꞌɛdi, pɛ manꞌda di ꞌdac rá tsꞌɛdi ra Cristo.I hąh rá mbʉi ra Pablo nangue yʉ ꞌyɛ̨cꞌyɛi bʉ Corinto
11 Nuꞌa ꞌbɛꞌa guím bɛ̨ngahʉ, jatho ga xiꞌasɛhʉ ꞌbɛꞌa dí øtꞌä, tengu ꞌbʉ drá tontogä. Manꞌda xʉn ho ꞌbʉ xquím mansɛhʉ man hogä xinda gueꞌbʉ gam mansɛgä. Nu yʉn ꞌyohʉ guí tɛnhdʉ, hinꞌyʉ ꞌbɛꞌa i ja ʉ ngue hinꞌyʉgä, madagueꞌa nte i jagä a di muui. 12 Nuꞌbʉ mám ꞌbʉcä bʉ, dá utꞌahʉ ngue majuąni ma ꞌbäigäꞌbe ra Jesucristo, hin dán xømbʉi ꞌbʉ má utꞌahʉ yʉn tꞌøtꞌe nuįxte nɛ yʉ hyonya ntꞌøtꞌe gue gá nusɛhʉ ꞌbʉ mám ꞌbʉhmbʉ bʉ. 13 Hanja guím mamhbʉ ngue hin dá øtꞌahʉ bʉ tengu dá øtꞌä bʉ ꞌbʉh miꞌda yʉ ꞌyɛ̨cꞌyɛi. Pɛ ꞌdaꞌangu dá øtꞌahʉ, pɛ høntꞌa nꞌda, ngue hin dá ä ahʉ ꞌbɛꞌa dá hongä. Ha gueꞌa gni ꞌyɛ̨njʉ hingui ho a dá øtꞌä. Pɛ dami pungahʉ ꞌbʉ. 14 Nuya ná hyundį ga mbagä bʉ. Nɛ hin te ga äꞌahʉ ꞌbɛꞌa dí hongä mahønꞌa, nguetho hin dín ndegä a ni mbɛtihʉ, pɛ dín ndegä gan jahʉ tengu ꞌbʉ ma tꞌʉhni ahʉ. Nɛ hinga gueꞌʉ yʉ tꞌʉhni i pɛꞌtsꞌi ꞌbɛꞌa i hon rá ta o rá mbe. Pɛ nu yʉ ta nɛ yʉ mbe i pɛꞌtsꞌi ꞌbɛꞌa da hyon yʉ́ tꞌʉhni. 15 Pɛ da hyu ma mbʉi ꞌbʉ da zä ga ꞌbɛdi ꞌbɛꞌa gätho dí pɛꞌtsꞌi guepʉ da zä ga honꞌna ran ho ni mbʉihʉ, nɛ guepʉ go him mi sä dam pɛfi ga zɛꞌahʉ. Pɛ masque hin gadí huɛ̨gahʉ tengu bʉ na huɛ̨cꞌahʉ. 16 Nɛ guím mamhbʉ majuąni ngue hin te dá hącä ni mbɛtihʉ, pɛ guím bɛ̨mhbʉ ꞌda ahʉ ngue dá tącä ni mbɛtihʉ ngue guí ɛ̨mhbʉ dá hä ahʉ. 17 Ha guím bɛ̨mhbʉ dá hä ahʉ ngue dá pɛnꞌnahʉ yʉm ꞌbɛhni bʉ. 18 Nugä dá ndep ra Tito da mba bʉ, in ꞌyoui manꞌda ma cuhʉ. Guí pąhmbʉ hin te bi dąha ngue dąmá ꞌyä ahʉ. Nguetho ꞌdaꞌingu dím bɛ̨ngäꞌbe ra Tito ngue dadí huɛ̨cꞌaꞌbe, nɛ ꞌdaꞌingu bʉ na øtꞌ ma ꞌbɛfiꞌbe. 19 Ma cuꞌahʉ, dadí huɛ̨cꞌahʉ, dín ꞌyohʉ ra Cristo. Nɛ Oją pądi majuąni a dím mamꞌbe ya, ngue dí homꞌbe ꞌbɛꞌa dín te ni mbʉihʉ. Janangueꞌa dí honi ga tąpä ʉ yʉm hma him majuąni, ngue im manꞌʉ yʉ hyäte di ʉgui. Nɛ hinga gueꞌa guím bɛ̨mhbʉ ꞌda ahʉ, ngue guí ɛ̨mhbʉ dí homꞌbe guin numanhojʉ. 20 Pɛ dí su ngue hin gan numanhogä ꞌbɛꞌa guí øthʉ bʉ ꞌbʉ dá mbagä bʉ. Pɛ nɛ da du ni mbʉihʉ ꞌbɛꞌa ga xi ahʉ bʉya. Dí su ngue ga tįn ahʉ gadín sʉhmbʉ nꞌda ngu nꞌda ahʉ, nɛ gadín sɛyabahʉ, nɛ gadín cuɛfʉ nꞌda ngu nꞌda ahʉ, nɛ gadín tąfʉ nꞌda ngu nꞌda ahʉ, nɛ gadín cꞌąmanꞌʉhʉ, nɛ gadín ꞌyøspatho ꞌbɛꞌa gadín xihmbʉ, nɛ gadín ꞌyɛ̨zɛhɛhʉ, nɛ dí su ga tįn ahʉ hinga gueꞌa guí øthʉ bʉ ja nim pɛtihʉ. 21 Nɛ nuꞌbʉ dá mbagä bʉ, dí su ngue ma Ojąhʉ di jaqui ga pɛꞌtsꞌ ma sä nangue ꞌbɛꞌa guí øthʉ bʉ. Nɛ din jagä ra dumbʉi nangue toꞌo bi ꞌyøtꞌ ran tsꞌo mamꞌbɛtꞌo, nɛ guextaꞌa hin ni päh yʉ́ mbʉi, him bi ꞌyäp rá punbi Oją nangue ran tsꞌo bi ꞌyøtꞌe, gueꞌʉ bi ꞌyøtꞌ ran ꞌyomtꞌɛ̨ni, nɛꞌʉ bi zinba yʉ́ xisu miꞌda yʉn ꞌyohʉ.