Rán zofo ra Pablo, nɛ yʉn zɛngua
13
Na hyundį ya ga mbagä bʉ gan nu ahʉ. Nɛ nuꞌbʉ dá mbagä bʉ, ga juąnbä ʉ i ꞌbähmbʉ ʉ yoho o gue hyu yʉ testigo. 2 Nuꞌbʉ mám ꞌbʉcä bʉ mamꞌbɛtꞌo dá dąmhyą ʉ toꞌo ząi i øtꞌ yʉn tsꞌo. Nuya ga xiꞌʉ mahønꞌa nɛ gätho miꞌda ahʉ, nuꞌbʉ dá mbagä bʉ mahønꞌa, toꞌo gätho i øtꞌ ran tsꞌo hin ga huɛ̨cthoho ʉ. 3 Nɛ nuꞌahʉ da zä gui pąhmbʉ xʉn ho ngue majuąni rá tsꞌɛdi ra Cristo ꞌbʉ ja a dím mangä bʉya, nɛ him ma tsꞌɛdi zɛhɛgä. Nɛ nuꞌa ra Cristo hingui ꞌbɛh rá tsꞌɛdi nɛ guí pąhmbʉ nguetho dim pɛpʉ mbo ni mbʉihʉ rá tsꞌɛdi. 4 Nu ra Cristo him mi ja rá tsꞌɛdi ꞌbʉ mi du bʉ ja ra pontꞌi, pɛ nuya i ꞌbʉi nangue rá tsꞌɛdi Oją. Nɛcäꞌbe hinꞌyʉ ma tsꞌɛdi zɛhɛꞌbe tengu tho a ra Cristo ꞌbʉ mi du, pɛ nuya dín ꞌyohe ra Cristo nangue rá tsꞌɛdi Oją, nꞌdamhma da zä ga hocꞌahʉ bʉ. 5 Nuya nꞌda ngu nꞌda ahʉ dami bɛ̨mhbʉ xʉn ho mbo ni mbʉizɛhɛhʉ, janangueꞌa gui pąhmbʉ majuąni guí ɛ̨cꞌyɛihʉ o hinꞌna. Nuꞌbʉ hin gán hyäzɛhɛhʉ, sä gui pąhmbʉ majuąni i ꞌbʉpʉ mbo ni mbʉihʉ ra Cristo. 6 Nɛcäꞌbe dín nde ahʉ gui pąhmbʉ ngue majuąni dí ɛ̨cꞌyɛiꞌbe ra Cristo. 7 Dí äpꞌbe rá tsꞌɛdi Oją ngue gui ꞌyøthʉ ran ho, nɛ hin nangue da bømanho ma ꞌbɛfi bʉ, nguetho manꞌda dín nde ahʉ gam ꞌbʉmanhohʉ ra Cristo, xinda gueꞌbʉ guin numansucꞌbe. 8 Nugäꞌbe hin dín ndehma ngue ga hɛ̨mꞌbe toꞌo i øtꞌa majuąni pɛ høntꞌa dín nde ga øtꞌbe ꞌbɛꞌa di zɛ ʉ. 9 Da hyu ma mbʉiꞌbe ꞌbʉ di zac ni mbʉihʉ nangue Oją, madagueꞌa guím bɛ̨mhbʉ ngue hinꞌyʉ ma tsꞌɛdiꞌbe. Pɛ høntꞌa dí äpꞌbe Oją ngue din te ni mbʉihʉ nangue Oją. 10 Dí oꞌtꞌahʉ ngue gui hoc ni mbʉihʉ, nguetho hin dín nde ntsꞌɛdi ga dąmhyą ahʉ ꞌbʉ dá mbagä bʉ. Nu Oją bi ꞌdacä ran tꞌɛ̨di ngue ga tetꞌa ni mbʉihʉ, pɛ him bi ꞌdac ran tꞌɛ̨di ga ʉꞌtꞌa ni mbʉihʉ. 11 Nuya høntꞌa dí xiꞌahʉ ya, ma zʉ cuꞌahʉ, Oją gui cohmbʉ bʉ guí ꞌbʉhmbʉ. Pɛ manꞌda din te xʉn ho ni mbʉihʉ. Nɛ dami bɛ̨mhbʉ ꞌbɛꞌa gätho dá xiꞌahʉ, ndeꞌbʉ nꞌdatꞌa guim bɛ̨mhbʉ nꞌda ngu nꞌda ahʉ, nɛ gam ꞌbʉmanhohʉ, nɛ hin gan sʉhmbʉ bʉ. Nɛ Oją da zä manꞌda di huɛ̨c ahʉ nɛ da hyu ni mbʉihʉ. 12 Nꞌda ngu nꞌda dami zomanhothʉ nangue ran huɛ̨cate, nguetho nꞌdatꞌa ra Hmu dí tɛnhdʉ. 13 Nɛ gätho yʉ ꞌyɛ̨cꞌyɛi ꞌbʉcua i pɛnꞌnahʉ ran zɛngua. 14 Nu rá mate ma Hmuhʉ ra Jesucristo, nɛ rán huɛ̨cate Oją, nɛ rám fätsꞌi rá Hogandąhi Oją dí comhbʉ gätho ahʉ. Nɛ høntꞌa dí xi ahʉ ya.