Dám pøhmbʉ nangue rán huɛ̨cate Oją
2
Nɛ mamꞌbɛtꞌo tengutho ꞌbʉ xtá tuhʉ nangue ma tsꞌoquihʉ, nguetho him mi ørpahʉ masu a ran ho mi sijʉ. Pɛ nuya nu Oją bi ꞌdajʉ ra temaząi nangue ra Cristo. 2 Nɛ nuꞌahʉ nuꞌbʉ hin gmí ꞌyɛ̨cꞌyɛihʉ, gmí tɛnhdʉ yʉ́n tꞌøtꞌe ra ximhäi, nɛ madí manda ahʉ rá hmu yʉ zįthu, tengutho yʉ pa ja bʉ ya, gätho toꞌo hingui ørpa masu Oją, nɛ hingui øtꞌe ꞌbɛꞌa nde Oją. 3 Nɛ gätho gähe ꞌdaꞌangu tho mi øthʉ ꞌbʉ mamꞌbɛtꞌo, nɛ mi tɛnhdʉ ꞌbɛꞌa min nde ma jąꞌi zɛhɛhʉ. Nɛ dá øtꞌ ma pähä zɛhɛhʉ. Nɛ nuꞌbʉ xcá thoqui xcá tɛnhdʉ, ɛ̨mmɛ xcá nuhʉ rá cuɛ Oją ꞌbʉ, tengu tho ʉ miꞌda. 4 Pɛ nuꞌa Oją ɛ̨mmɛ xʉn ngu rá yembʉi i ja, nɛ ɛ̨mmɛ i ja rán huɛ̨cate nanguejʉ. 5 Janangueꞌa bi ꞌdajʉ ra ꞌdaꞌyote, tengu ꞌbʉ ꞌdarbʉ bi xoxgahʉ ra Cristo, madagueꞌbʉ tengu ꞌbʉ ya xí du ma tehʉ nangue ma tsꞌoquihʉ. Pɛ nangue rá mate thoho Oją xtám pøhmbʉ. 6 Nɛ nuꞌa Oją nꞌdatꞌa bi xoxgahʉ ra Cristo Jesús, nɛ bi jajʉ ꞌdarbʉ dá huhmbʉ a ra Cristo bʉ mahɛ̨tsꞌi bʉ nam bɛ̨n Oją. 7 Guehna bi ꞌyøtꞌe, ngue gätho yʉ pa maząi da ꞌyuh rán huɛ̨cate, nɛ da fądi hin hapʉ sɛ a rá mate bi ꞌyørcahʉ ꞌbʉ mí yąnjʉ ra Cristo Jesús. 8 Bi pøjʉ Oją ꞌbʉ má hąmhbʉ rá mate thoho Oją, nɛ hin nangue yʉ hogantꞌøtꞌe dá øthʉ. Pɛ nangue a rán tꞌunni zɛhɛ Oją xtám pøhmbʉ. 9 Nɛ hin nangue ra ꞌbɛfi xʉn ho xtá øthʉ, janangueꞌa njon da zä din ꞌyɛ̨tsꞌi. 10 Nguetho bi ꞌyørca zɛhɛhʉ Oją ngue dám ꞌbʉhmbʉ maꞌdaꞌyo nangue ra Cristo Jesús, guepʉ da zä ga øthʉ xʉn ho rá ꞌbɛfi bi zän Oją mayaꞌbʉ.Nu ra Cristo bi jajʉ dán yąmanhohʉ dyʉ judíohe nɛꞌahʉ
11 Nɛ nu ahʉ ngue hin gyʉ́ judíoꞌahʉ, o gadín ꞌyɛ̨xhʉ nangue rá mate Oją, pɛ damim bɛ̨mhbʉ ngue yatho gnán hyajʉ Oją mamꞌbɛtꞌo. Nɛ nte má hmɛpya gmí øthʉ tengu mí øtꞌähe ngue dá hɛc ma xifanihe dyʉ́ judíohe. Nɛ gueꞌa ná hutꞌa thohohe gyʉ ꞌyąnthɛquihʉ. 12 Nɛ nuꞌʉ yʉ pa ʉ, hin te nin jahʉ ra Cristo, xín te nin jahʉ ʉ yʉ judío. Nɛ hin gní pąhmbʉ ran hogui ngue mi man Oją da ꞌyøtꞌe. Pɛ gám ꞌbʉhmbʉ ua ja ra ximhäi nɛ nte gmí tømhbʉ ꞌbɛꞌa da ꞌyøtꞌ Oją, nguetho hin gní pąhmbʉ Oją. 13 Nɛ gmí ꞌyo man hɛ̨thʉ nangue a Oją, pɛ nuya bá jʉnꞌnahʉ, nɛ sä guin ꞌyohʉ ra Cristo ngue bi du nanguejʉ. 14 Pɛ nuꞌa ra Cristo bi jajʉ dán yąmanhohʉ, dyʉ judíohe nɛ ahʉ ngue hin gyʉ́ judíohʉ. Nɛ bi jajʉ ngue ꞌdaꞌangu bʉ na nujʉ Oją yʉ judío nɛꞌʉ hing yʉ judío. Nuꞌa ra Cristo bi hogahʉ ꞌbɛꞌa madín hyajʉ. 15 Nguetho bi du ra Cristo, nɛ gueꞌa í jua ʉ yʉ́n tꞌɛ̨di yʉ judío bi xi Oją, ngue yʉn tꞌuti mi øtꞌʉ. Nɛ bi japi ngue ꞌdaꞌangu ga comhbʉ ra temaząi yʉ judío nɛꞌʉ hing yʉ judío, nangue maꞌdaꞌyo dí ꞌbʉhmbʉ ra Cristo ya, nɛ hinga ꞌdahma ꞌdanꞌyo bʉ dán nujʉ Oją. Janangueꞌa hin dadín sʉhmbʉ ya. 16 Nɛ nuꞌbʉ mi du bʉ ja ra pontꞌi ra Cristo, bi japi da numanho Oją ʉ høntꞌa go toꞌo ma jąꞌi da ꞌyɛ̨cꞌyɛi a, madagueꞌa yʉ judío, uague hing yʉ judío. Nɛ him man sʉhmbʉ ʉ. 17 Nuꞌa ra Cristo bi zøcua ja ra häi nɛ bi xijʉ ran ho maꞌdaꞌyo, ngueꞌa dá ɛshʉ ran sʉi mi øthʉ a Oją, guecähe dyʉ judíohe ngue mi hänthe rá ꞌyu Oją, nɛ ahʉ ngue hing yʉ judíoꞌahʉ ngue gmin ꞌyomanhɛ̨tho nangue rá ꞌyu Oją. 18 Nɛ gueꞌa ra Cristo bi zä dán yąmanhohʉ Oją rá Ta, nguetho nꞌdatꞌa rá Hogandąhi bi ꞌdajʉ, madagueꞌbʉ dyʉ judíohʉ o gue hin dyʉ judíohʉ. 19 Pɛ nuya hin guí ꞌbʉhmbʉ tengu ꞌbʉ gyʉ́ ꞌdamhninihʉ ya, pɛ ꞌdaꞌangugdahʉ ngue dyʉ ꞌyɛ̨cꞌyɛihʉ. Nguetho nuya gätho gahʉ dyʉ mɛnguhʉ bʉ bí ꞌbʉ Oją, nɛ gätho gahʉ yʉ́ tꞌʉhni gahʉ Oją. 20 Nɛ nujʉ dyʉ ꞌyɛ̨cꞌyɛihʉ, tengu ꞌbʉ nꞌda ra ngu bi thøe nguepʉ dim ꞌbʉ Oją. Nɛ bi dʉꞌmi bi hyøh yʉ pøngahyą mayaꞌbʉ, nɛꞌʉ yʉ́ ꞌbäihʉ ra Cristo nuꞌbʉ mi ma nangue ra Cristo. Nɛ bi dʉꞌmi tengu ꞌbʉ i pa mꞌbäꞌmi yʉ́ guangujądo nꞌda ra ngu, nɛ guesɛ a ra Jesucristo a ra do mahyoni bim pɛpʉ. Nɛ guenjʉ tengu ꞌbʉ dyʉ føꞌtꞌehʉ bʉya. 21 Nɛ nuꞌa ra Cristo tengu ꞌbʉ ra cemento nín zøtꞌʉ yʉ do bʉ pa nthøtsꞌe a ra ngu, ngue da gomanho, asta gueꞌbʉ go bi guadi xʉn ho, guepʉ ja rá ngu Oją, tengu ndesɛ Oją. 22 Nɛ nangue dín ꞌyohʉ ra Cristo, nɛjʉ tengu ꞌbʉ dyʉ dohʉ ngue dim pɛpʉ ja a rá ngu Oją, guepʉ i ꞌbʉh rá Hogandąhi.