Nu ra Pablo rá ꞌbɛfi i xih ran ho maꞌdaꞌyo ʉ hing yʉ judío
3
Janangueꞌa dí äpä rá tsꞌɛdi Oją nangue ahʉ, drá Pablogä. Pɛ dí ofädigä nangue dí xi ahʉ ran ho maꞌdaꞌyo, gue ahʉ ngue hing yʉ judíoꞌahʉ. 2 Masque ya gá ꞌyøhmbʉ ngue Oją bi ꞌdacä ra ꞌbɛfi ngue dí xi ahʉ rám hma, nangue rá mate thoho. 3 Nugä ya dá otꞌahʉ tsꞌʉ ꞌbɛꞌa bi ꞌyurcäzɛhɛ Oją, ngue njom mi pądi, ngue nɛ ʉ hing yʉ judío da zin Oją nangue ra Cristo. 4 Nɛ nuꞌbʉ gá nuhʉ ra søcuą, sä gui pąhmbʉ a bi xicä Oją ngue njom mi pądi nangue ra Cristo. 5 Nɛ xʉn ngu yʉ jɛya bi thogui ngue him mi xi Oją yʉ jąꞌi ꞌbɛꞌa mim bɛ̨ni da ꞌyøtꞌe. Pɛ nuya bi ꞌuega ma mbʉihe gueje ma ꞌbäigähe ra Cristo nɛ ʉ yʉ́ pøngahyą, nɛ bi jaje rá Hogandąhi ga pąhmbe ꞌbɛꞌa him mam fądi, ngue i fąh ya. 6 Pɛ nuna him mam fądi, guehna ngue ran ho maꞌdaꞌyo sä gui pąhmbʉ ya ꞌbɛꞌa i ja ua ya, ngue nɛꞌʉ yʉ jąꞌi hing yʉ judío sä dim ꞌbʉhmbʉ Oją tengutho yʉ judío. Nɛ nꞌdatꞌa gui comhbʉ yʉ judío ran hogui bi ꞌyøtꞌ Oją nangue ra Cristo Jesús. Nɛ nꞌdanjąꞌitho gui comhbʉ nangue rá jąꞌi ra Cristo, nguetho ya gá ꞌyɛ̨cꞌyɛihʉ rán ho maꞌdaꞌyo ra Cristo. 7 Pɛ nangue rá mate zɛhɛ nɛ rá tsꞌɛdi Oją sä gam mangä rán ho maꞌdaꞌyo ra Cristo, madagueꞌa him man ꞌyɛnigäꞌbe. 8 Nugä hin te tsꞌʉ dadí muꞌbe, nɛ him man ꞌyɛniꞌbe ngue ga xih yʉ jąꞌi ngue hing yʉ judío rán ho maꞌdaꞌyo ra Cristo. Pɛ guehma bi ꞌdacä Oją ra mate ngue gam mangä a, nɛ ga xih yʉ jąꞌi njon da hyätꞌi da mbede hangu nan ngu yʉn ho in nde di ꞌdajʉ ra Cristo. 9 Nɛ bi ꞌdac rá ꞌbɛfi ga japi gätho yʉ jąꞌi da bądi ꞌbɛꞌa him mam fądi, ngue ꞌbɛꞌa mím bɛ̨n Oją da ꞌyøtꞌe ꞌbʉ rá mbʉdi thoho, ngue nɛꞌʉ hing yʉ judío da zin Oją ꞌbʉ da hyąn rá mate ra Cristo. Nɛ gueꞌa mi sänni da ꞌyøtꞌ Oją, nꞌdatꞌa Oją bi ꞌyøtꞌe ꞌbɛꞌa gätho ja ua ja ra ximhäi, nɛpʉ mahɛ̨tsꞌi. 10 Gueꞌa mím bɛ̨n Oją da ꞌyørpa yʉ ꞌyɛ̨cꞌyɛi, guepʉ da fądi xʉn ho gätho rá hoganꞌyomfɛ̨ni, da bą ʉ i ꞌbʉpʉ mahɛ̨tsꞌi ngue i ja yʉ́ tsꞌɛdi. 11 Nɛ gueꞌa i øtꞌ Oją ya, tengu mim bɛ̨m ꞌbʉ ra mbʉdi thoho da ꞌyøtꞌe, nangue ma Hmuhʉ ra Jesucristo, nɛ da ꞌyøtꞌe gätho yʉ pa maząi. 12 Nɛ nangue dí ɛ̨cꞌyɛihʉ ra Cristo, hin dí su ga sømhbʉ bʉ nangue ma mbʉihʉ ngue dan yąhʉ Oją. Nɛ dí pąhmbʉ da ꞌyøde. 13 Janangueꞌa dí äꞌahʉ ra mate hin da du ni mbʉihʉ ꞌbʉ dín nugä ran ʉnbi, nangueꞌa dá xi ahʉ ran ho maꞌdaꞌyo. Xingui tsꞌʉ guim bɛ̨mhbʉ ngueꞌa dín nugä ran ʉnbi, pɛ ꞌda dán johya thohohʉ ngue bin ꞌdac ra tsꞌɛdi ga hätꞌ yʉn ʉnbi.Rán huɛ̨cate ra Cristo
14 Nuꞌbʉ dím bɛ̨ngä ngue nɛ ahʉ gyʉ mɛnguhʉ bʉ bí ꞌbʉ Oją, dín dąnyahmu dí äpꞌahʉ ra jamadi Oją rá Ta ma Hmuhʉ ra Jesucristo. 15 Nɛ rá Ta ʉ gätho yʉ ꞌyɛ̨cꞌyɛi, nɛꞌʉ bi zøm bʉ mahɛ̨tsꞌi, nɛꞌʉ ꞌbʉtua ja ra ximhäi. 16 Nɛ dí äp Oją ma Tahʉ nuįxte thoho di muui rá tsꞌɛdi, ngue di zac ni mbʉihʉ nangue rá tsꞌɛdi rá Hogandąhi Oją. 17 Nɛ dí äp Oją ngue din ząm bʉ mbo ni mbʉihʉ a ra Cristo, nguetho guí ɛ̨cꞌyɛihʉ a. Nɛ dí äp Oją ngue manꞌda din te nin huɛ̨catehʉ, nɛ nangue nin huɛ̨catehʉ dí zac ni mbʉihʉ. 18 Janangueꞌa nɛ ahʉ nɛ gätho miꞌda yʉ ꞌyɛ̨cꞌyɛi da zä gui pąhmbʉ hangu nan uantꞌi, nɛ hangu na mba, nɛ hangu nan hɛ̨, nɛ hangu nan hɛ̨tsꞌi a rán huɛ̨cate ra Cristo. 19 Nɛ madagueꞌbʉ hingui sä gätho ga pąhmbʉ rán huɛ̨cate ra Cristo nguetho ɛ̨mmɛ xʉn ngu, pɛ dí äp Oją ngue manꞌda manꞌda gui pąhmbʉ a, janangueꞌa da zä gätho da yuh ni mbʉihʉ a rá tsꞌɛdi zɛhɛ Oją. 20 Pɛ xʉn ho ga ɛ̨spahʉ Oją gätho yʉ pa maząi, nguetho i ja rá tsꞌɛdi da ꞌyøtꞌe xʉn ngu manꞌda, xinda gueꞌa ꞌbɛꞌa dí ähmbʉ o ꞌbɛꞌa dím bɛ̨mhbʉ. Ngue nꞌdatꞌa ra tsꞌɛdi dim pɛpʉ mbo ma mbʉihʉ. 21 Nɛ gätho gahʉ dyʉ ꞌyɛ̨cꞌyɛihʉ, xʉn ho dan johyahʉ ga ɛ̨spahʉ Oją, nangueꞌa ra Cristo Jesús dí pąhmbʉ, hønꞌbʉ go njąmꞌbʉ maząi. Nɛ høntꞌa gam bɛ̨mhbʉ a ya.