Nu rá Hogandąhi Oją di jajʉ nꞌdatꞌa gam bɛ̨mhbʉ
4
Nugä drá Pablogä dí ofädigä nangue dí øtꞌa rá ꞌbɛfi ra Hmu. Nɛ dí äꞌahʉ ra mate ngue gam ꞌbʉmanhohʉ tengu nin sähʉ ngue ya bi zonꞌnahʉ Oją. 2 Nɛ hin gan ꞌyɛ̨xhʉ, pɛ gui ꞌyøthʉ ngue hinꞌyʉ ni tsꞌɛdi zɛhɛhʉ, nɛ hin gan xømbʉi nꞌda ngu nꞌda ahʉ ꞌbɛꞌa i tꞌøtꞌahʉ, nɛ hin gan xuhnanyahʉ nꞌda ngu nꞌda ahʉ, pɛ gan huɛ̨jʉ. 3 Nɛ ɛ̨mmɛ gan jamansuhʉ ngue hinga ꞌdahma ꞌdanꞌyo guim bɛ̨mhbʉ. Pɛ dami thoqui gui tɛnhdʉ rá Hogandąhi Oją di ja ahʉ nꞌdatꞌa guim bɛ̨mhbʉ. 4 Nguetho tengu ꞌbʉ gätho nꞌdanjąꞌidähʉ bʉ na nujʉ Oją dyʉ ꞌyɛ̨cꞌyɛihʉ, nɛ nꞌdatꞌa rá Hogandąhi Oją dí comhbʉ. Nɛ nꞌdatꞌa dí tømhbʉ ꞌbɛꞌa da ꞌyørcahʉ Oją, ngue gätho bi zongahʉ. 5 Høntꞌa nꞌda ma Hmuhʉ i ꞌbʉi ngue di mandagahʉ. Nɛ nꞌdatꞌa ma tꞌɛ̨cꞌyɛihʉ nangue ma Ojąhʉ i ꞌbʉi, nɛ nꞌdatꞌa man xixyąhʉ dí øthʉ, ngue dí uhmbʉ yʉ́ mbɛtigahʉ Oją. 6 Nɛ nꞌdatꞌa Oją gueꞌa ma Tahʉ dí comhbʉ, ngue gätho gahʉ, nɛ gätho di mandagahʉ, nɛ gätho di ꞌyonjʉ, nɛ gätho gahʉ i ꞌbʉpʉ mbo ma mbʉihʉ a. 7 Nuꞌa ra Cristo, nangue ra mate thoho, ꞌdahmaꞌdanꞌyo yʉ tsꞌɛdi bi ꞌdajʉ nꞌda ngu nꞌdajʉ ngue sä ga øthʉ ra ꞌbɛfi ngue ndejʉ ga øthʉ. 8 Nɛ gueꞌa mán tꞌoꞌtꞌi bʉ ja rám hman Oją mayaꞌbʉ: “Pɛ gueꞌa ra Cristo bi un yʉ́ tsꞌɛdi ʉ yʉ jąꞌi ꞌbʉ mí mbeng bʉ mahɛ̨tsꞌi, ꞌbʉ mi dąmbɛ̨ni. Nɛ bi ꞌbɛrba rá tsꞌɛdi gätho nan ngu ran tsꞌo mim bɛntꞌʉ yʉ jąꞌi.” 9 Nɛ nuꞌbʉ mi mbeng bʉ mahɛ̨tsꞌi, mfądi ngue guepʉ bá nɛxpʉ, nɛ bi zøcua ja ra häi, nɛ bi mba ntꞌägui. 10 Guetꞌa bá cąi, nɛ guetꞌa bi ndex mahɛ̨tsꞌi, ngue da yuꞌtsꞌ rá tsꞌɛdi bʉ mahɛ̨tsꞌi, nɛ hønbʉ go hapʉ, nɛcua ja ra häi bi yuꞌtsꞌ rá tsꞌɛdi. 11 Nɛ ꞌdahma ꞌdanꞌyo yʉ tsꞌɛdi bin ꞌdajʉ nꞌda ngu nꞌdajʉ ngue dyʉ ꞌyɛ̨cꞌyɛihʉ. Bin ꞌdac ma tsꞌɛdihe ꞌdagähe ngue ma ꞌbäigähe ra Cristo, nɛ ꞌda ahʉ di jaꞌahʉ gam pøngahyąhʉ, nɛ miꞌda ahʉ di ja ahʉ gadí ꞌyomhbʉ a ran ho maꞌdaꞌyo, nɛ ꞌda ahʉ di ja ahʉ gam mbädihʉ, nɛ miꞌda ahʉ di ja ahʉ ngue gan xänbatehʉ nangue rám hman Oją. 12 Ngubʉ bi ꞌyøtꞌa ra Cristo, bi un yʉ́ tsꞌɛdi yʉ ꞌyɛ̨cꞌyɛi, nguepʉ da zä da ꞌyøtꞌe xʉn ho ra ꞌbɛfi bi zänbi nꞌda ngu nꞌda, nangue rá ꞌbɛfi Oją. Janangueꞌa da zä ꞌda dám fäxtahʉ. Nɛ gueꞌa dín te rá ꞌbɛfi Oją a, tengu ꞌbʉ bi zac rá jąꞌi ra Cristo. 13 Nɛ da zøni ngue gätho ꞌdatꞌa gam bɛ̨mhbʉ nangue ma tꞌɛ̨cꞌyɛihʉ, nɛ gätho nꞌdatꞌa ga pąhmbʉ xʉn ho rá Tsꞌʉntꞌʉ Oją. Nɛ gueꞌa dín te xʉn ho ma mbʉihʉ nɛ dam ꞌbʉmanhohʉ tengu ra Cristo. 14 Nɛ nuꞌbʉ gueꞌa dí homhbʉ, hin da thäjʉ tengu ꞌbʉ dyʉ tꞌʉhnihʉ, ꞌbʉ ꞌboꞌo ꞌdahma ꞌdanꞌyo da xijʉ ngue da ꞌyɛ̨na da hyäjʉ. Nguetho nuꞌʉ yʉ hyäte ɛ̨na gueꞌbʉ ɛ̨mmɛ pądi, pɛ høntꞌa in ndejʉ ga tɛnhdʉ yʉ́ fɛhni. 15-16 Pɛ ga pądi ga tɛnhdʉ a majuąni nangue ran huɛ̨cate. Nɛ gueꞌa nán te xʉn ho ma mbʉihʉ, nɛ di jajʉ tengu ꞌbʉ nꞌdanjąꞌi tho ga cohmbʉ. Tengu ꞌbʉ rá jąꞌigahʉ ra Cristo, nɛ nuꞌa ra Cristo, tengu ꞌbʉ rá yą a. Nɛ gueꞌa nín zøtꞌʉ yʉ ꞌyɛ̨cꞌyɛi. Nguetho di manda gahʉ nɛ di zɛrca ma mbʉihʉ, di jajʉ nꞌdatꞌa gam bɛ̨mhbʉ, nɛ gätho ga comhmaꞌøtꞌehʉ xʉn ho ra ꞌbɛfi bi ꞌdajʉ nꞌda ngu nꞌdajʉ, ngue ꞌda dám fäxtahʉ, nangue ran huɛ̨cate. Nɛ gueꞌa nán te xʉn ho rá ꞌbɛfi Oją, tengu ꞌbʉ bin te xʉn ho rá jąꞌi ra Cristo. Dám ꞌbʉhmbʉ maꞌdaꞌyo nangue ra Cristo
17 Nugä dra Pablogä dím pøngahyągä nangue ra Hmu ꞌbʉ dí xi ahʉ na jaua, ngue nuꞌahʉ him mam ꞌbʉhmbʉ ya tengu ʉ yʉ jąꞌi hinga na pą Oją. Nɛ him mam ꞌbʉhmbʉ tengu yʉ jąꞌi ngue di manda yʉ́ tsꞌonꞌyomfɛ̨ni zɛhɛ. 18 Nɛ nuꞌʉ i ꞌyo tengu nꞌda ra xädä nangue yʉ́n ꞌyomfɛ̨ni, nɛ hingui pądi ꞌbɛꞌa nam bønꞌa i øtꞌe nguetho hingui ꞌyo bʉ ja rán nɛqui Oją. Nɛ hinguin nde da bą Oją nguetho ɛ̨mmɛ xʉm mɛ yʉ́ mbʉi ʉ. 19 Nɛ hingui pɛꞌtsꞌ yʉ́ sä ꞌbʉ øt yʉ tsꞌoqui, nguetho ya xʉm bɛnt ran tsꞌo, nɛ ɛ̨mmɛ di ho da ꞌyøtꞌe høntꞌa go ꞌbɛꞌa man tsꞌo, nguetho hinꞌyʉ mbo yʉ́ mbʉi ꞌbɛꞌa di zɛdi ngue da ząmmi. 20 Pɛ nuꞌehʉ hinga ngubʉ bi xänꞌnahʉ ʉ bi xiꞌahʉ nangue ra Cristo. 21 Ya gá ꞌyøhmbʉ nangue ra Cristo, nɛ nuꞌbʉ majuąni gá ꞌyøhmbʉ ꞌbɛꞌa bi xi ahʉ, guí pąhmbʉ ya ngue gueꞌa majuąni a. 22 Janangueꞌa dami hyɛhmbʉ gätho ꞌbɛꞌa gnám ꞌbʉhmbʉ, ngue ni nyonꞌyomfɛ̨nisɛhʉ i hä ahʉ, ngue ꞌbɛꞌa guí ndesɛ gui ꞌyøthʉ. 23 Nɛ maꞌdaꞌyo ni mbʉihʉ nɛ nin ꞌyomfɛ̨nihʉ, ngue gätho maꞌdaꞌyo guim bɛ̨mhbʉ ya. 24 Nɛ dami hyehʉ ngue gätho maꞌdaꞌyo tengu bi zänꞌnahʉ Oją nangue rá pähä zɛhɛ. Nuya dami ꞌyuhmbʉ ram ꞌbʉi njuąntho gui ꞌyøthʉ, ngue nte man tsꞌo gui ꞌyøthʉ ya. 25 Dami ꞌyɛshʉ a ra fɛhni ngue madín xihmbʉ nꞌda ngu nꞌda ahʉ, nɛ guim mamhbʉ a majuąni. Nguetho tengu ꞌbʉ nꞌdanjąꞌitho dí comhbʉ ra Cristo. 26 Nɛ nuꞌbʉ guín cuɛhʉ nangue ran tsꞌo i tꞌøtꞌe, pɛ damím fähmbʉ, mamán dą ahʉ ran tsꞌo. Nɛ hinga nꞌdapa gan cuɛhʉ. 27 Pɛ xingui tsꞌʉ ga cʉthʉ ra zįthu bʉ ja ma mbʉihʉ. 28 Nuꞌbʉ guím pɛ̨hʉ ꞌda ahʉ, pɛ gui ꞌyɛshʉ a gnám pɛ̨hʉ. Nɛ gam pɛhmbʉ xʉn ho, nɛ gueꞌa gdí tįmhbʉ a guí homhbʉ, nɛ da zä gui fäxꞌʉ miꞌda ngue hinꞌyʉ ꞌbɛꞌa da hyoni. 29 Nɛ ꞌyo guím mamhbʉ yʉ tsꞌore, pɛ guim mamhbʉ ran ho dí zɛꞌʉ nɛ dí hyu yʉ́ mbʉi ʉ toꞌo gui xihmbʉ. 30 Nɛ ꞌyo gadí unhdʉ ra dumbʉi a rá Hogandąhi Oją nangue nꞌda ra tsꞌoqui. Nguetho nuꞌa i ꞌbʉpʉ mbo ma mbʉihʉ, nɛ gueꞌa da ꞌyudi ngue yʉ́ mbɛtigahʉ Oją ꞌbʉ rán zɛgui ra pa, tengu ꞌbʉ jajʉ ra sello. 31 Dami ꞌyɛshʉ a gní bɛ̨manꞌʉhʉ, nɛ hin gan cuɛhʉ ꞌbʉ ja ꞌbɛꞌa da si ahʉ o ja ꞌbɛꞌa da tꞌøtꞌahʉ. Nɛ ꞌyo gadí cꞌąmanꞌʉhʉ nꞌda ngu nꞌda ahʉ, nɛ o guím bɛ̨mhbʉ ran tsꞌo nangue ni mijąꞌihʉ. 32 Pɛ gan ꞌyørpahʉ ran ho nꞌda ngu nꞌda ahʉ, nɛ ꞌda xtán ja ni yembʉihʉ, nɛ gam punbahʉ nꞌda ngu nꞌda ahʉ, tengu tho í punꞌnahʉ Oją nangue ra Cristo.