Da ꞌyøtꞌe xʉn ho ʉ yʉ́ tꞌʉhni Oją
5
Ga øthʉ ꞌbɛꞌa øtꞌa Oją, nguetho yʉ́ tꞌʉhni gahʉ a ngue di huɛ̨gahʉ. 2 Ngue ga ørpahʉ ran huɛ̨cate ma mijąꞌihʉ, tengutho ra Cristo bi huɛ̨gahʉ ꞌbʉ mín däsɛ bʉ ja ra pontꞌi nanguejʉ. Nɛ nu ra Cristo bi un rá te, nꞌda ran tꞌunni ngue bi numanho Oją. 3 Nɛ yʉ́ tꞌʉhni gahʉ Oją, janangueꞌa xingui tsꞌʉ gam bɛ̨mhbʉ ran tsꞌo, hin ga øthʉ ran ꞌyomtꞌɛ̨ni, xíng ran tsꞌiyate, nɛ xínga nꞌda ran tsꞌo ga øthʉ. 4 Nɛ hin gam mamhbʉ ra tsꞌore o gue ran ꞌyąntꞌʉ, nɛ hin dan yą mangątꞌihʉ, nguetho hin rán thɛui rá ꞌyɛ̨cꞌyɛi Oją ʉ. Pɛ ga xihmbʉ Oją jamadi nangue rán ho bi ꞌdajʉ. 5 Pɛ dí pąhmbʉ hingui sä nꞌda da yʉrpʉ di manda ra Cristo nɛ Oją, nuꞌbʉ i øthoho ran ꞌyomtꞌɛ̨ni, o gue im bɛ̨n ra tsꞌonꞌyomfɛ̨ni, o gue i øtꞌ ran tsꞌiyate. Nguetho nu ra ziyate tengutho ꞌbʉ i thąnde ꞌbɛꞌa i ja. 6 Nɛ njon ga jafʉ da hyäjʉ gueꞌbʉ ꞌboꞌo da xijʉ ngue xʉn ho ꞌbʉ ga øthʉ ran tsꞌo. Nguetho toꞌo da ꞌyøtꞌ ya yʉn tsꞌo, ɛ̨mmɛ xʉn ngu da nu rá cuɛ Oją, nangue a him bi ꞌyørpa masu Oją. 7 Pɛ hin dan ꞌyohʉ toꞌo i øtꞌ ran tsꞌo, nguetho hinꞌyʉ ꞌbɛꞌa man jahʉ ʉ. 8 Pɛ nuꞌahʉ mamꞌbɛtꞌo gmí ꞌyohʉ bʉ ja ra ꞌbɛxui. Pɛ nangue guí ꞌbʉhmbʉ ra Cristo ya guí ꞌbʉhmbʉ bʉ ja rán nɛqui a. Nuya dąmam ꞌbʉhmbʉ tengu rán säui bʉ ja ran nɛqui. 9 Nɛ nuꞌa rán nɛqui Oją, gueꞌa dán jahʉ ra hogambʉi a, nɛ gueꞌa dám mamhbʉ majuąni a, nɛ gueꞌa dá øthʉ ran ho a. 10 Nɛ dami hyumbi gan xähmbʉ gui ꞌyøthʉ ꞌbɛꞌa dí hyu rá mbʉi Oją. 11 Pɛ xíngui tsꞌʉ ga øthʉ tengu øtꞌʉ i ꞌyo bʉ ja ra ꞌbɛxui. Pɛ ga uhmbʉ ngue nte ní mbatho ꞌbɛꞌa øtꞌʉ. 12 Pɛ ga pɛꞌtsꞌ ma sähʉ hin gam mamhbʉ ꞌbɛꞌa øtꞌʉ i øtꞌ mán tꞌąguitho ran tsꞌo. 13 Pɛ nuꞌa rán nɛqui Oją di yotꞌʉ toꞌo i ꞌyo bʉ ja ra ꞌbɛxui, ndepe da bądi ngue i ja yʉ́ tsꞌoqui. Nɛ hingui sä da ꞌyąn mantꞌągui thoho nꞌda ꞌbɛꞌa øtꞌe, nguetho nuꞌa rán nɛqui Oją di yotꞌʉ gätho ran tsꞌo. 14 Janangueꞌa ntꞌoꞌtꞌi: “Daman nuhmbʉ ngue guí ąhmbʉ, tengu ꞌbʉ gyʉ́ duhʉ, nguetho nuꞌa ra Cristo di ꞌda ahʉ ran nɛqui,” bi ꞌyɛ̨na. 15 Janangueꞌa dami jamansu ꞌbɛꞌa guí øthʉ, nɛ hin gam ꞌbʉhmbʉ tengu ʉ yʉ jąꞌi ngue hingui pądi ꞌbɛꞌa øtꞌe. 16 Pɛ madagueꞌa xʉn hɛ̨i yʉ pa i ja bʉ ya, dami hyumbi gam pɛhmbʉ xʉn ho. 17 ꞌYo guí coꞌyąmbʉihʉ, pɛ dami hyumbi gui hyoni gui pąhmbʉ rá pähä ra Hmu. 18 Pɛ hin dán johyahʉ a ra sɛ̨i, nguetho di tsꞌongahʉ a. Pɛ manꞌda dán johyahʉ rá Hogandąhi Oją. 19 Nɛ ꞌda dán johyabahʉ nꞌda ngu nꞌdajʉ ngue dan xihmbʉ ꞌbɛꞌa i ørcahʉ ra Hmu, ngue dan tuhmbʉ yʉ́ thuhu Oją gätho ma mbʉihʉ dá ɛ̨spahʉ Oją a. 20 Nɛ thocua thoho ga xihmbʉ jamadi Oją ra Ta, nangue ꞌbɛꞌa gätho jajʉ, nangue rá thuhu ma Hmuhʉ ra Jesucristo.Dim ꞌbʉmanho yʉ ꞌyɛ̨cꞌyɛi bʉ ja yʉ́n ngusɛ
21 Nɛ hin dan junthʉ, pɛ ꞌda xtán ꞌyɛ̨hɛ thohohʉ, nguetho gätho gahʉ dín numansuhʉ ra Cristo. 22 Nɛ nu ahʉ gyʉ́ xisuhʉ, dami ꞌyøthʉ ꞌbɛꞌa im man ni ndøhʉ, tengutho bʉ gní ꞌyøthʉ a im mam ma Hmuhʉ mahɛ̨tsꞌi. 23 Nguetho nuꞌʉ yʉn ꞌyohʉ i ꞌbɛtꞌo bʉ ja rá ngu, tengu a ra Cristo i ꞌbɛtꞌo bʉ ꞌbʉh yʉ ꞌyɛ̨cꞌyɛi, ngue tengu ꞌbʉ guesɛ a rá jąꞌi a, nɛ rám pørpate gätho ʉ. 24 Nuꞌʉ yʉ xisu da ꞌyøtꞌe ꞌbɛꞌa gätho im man yʉ́ ndø, tengu tho yʉ ꞌyɛ̨cꞌyɛi da ꞌyøtꞌe ꞌbɛꞌa gätho im man ra Cristo. 25 Nɛ nu ahʉ ma minꞌyohʉ ahʉ, dami huɛ̨c ni xisuhʉ, tengu tho a ra Cristo bi huɛ̨c yʉ ꞌyɛ̨cꞌyɛi, nɛ bi un rá te nanguejʉ. 26 Nɛ nu a ra Cristo ngubʉ bi ꞌyøtꞌe, nuꞌbʉ mi japi da bo xʉn ho gätho yʉ ꞌyɛ̨cꞌyɛi nangue rám hman Oją. Nguetho ram hma tengu ꞌbʉ ra dehe i peꞌtꞌe gätho ran tsꞌo. Nɛ nuꞌa ran xixyą, nꞌda ra hmɛpya ngue ra Cristo bi hoga ma mbʉihʉ. 27 Nꞌdamhma da zin ʉ yʉ ꞌyɛ̨cꞌyɛi, ngue ya gätho mahoqui, nɛ nte man tsꞌo din ꞌyohʉ. Nɛ hinꞌyʉ ꞌbɛꞌa da thįnbi, pɛgue gätho i jua a ran ho. 28 Nɛ gätho yʉn ꞌyohʉ, ndeꞌbʉ di huɛ̨c yʉ́ xisu, tengu bʉ ní huɛ̨c rá jąꞌizɛhɛ. Nguetho nuꞌʉ toꞌo di huɛ̨c rá xisu, din huɛ̨c zɛhɛ a. 29 Nɛ xinga nꞌda ra jąꞌi i san rá jąꞌizɛhɛ, pɛ din jamansu, nɛ i ꞌuįni xʉn ho rá jąꞌi, tengutho i øtꞌa ra Cristo nangue yʉ ꞌyɛ̨cꞌyɛi. 30 Nguetho nujʉ dyʉ ꞌyɛ̨cꞌyɛihʉ, tengu ꞌbʉ rá ngøcꞌyɛi nɛ rá doꞌyo gahʉ a rá jąꞌi ra Cristo. 31 Tengu mán tꞌoꞌtꞌi: “Nuꞌbʉ nꞌda ran ꞌyohʉ i sin rá xisu, i soh rá ta nɛ rá mbe, nꞌdamhma da zä di manda rá xisu, tengu ꞌbʉ ɛ rá jąꞌizɛhɛ,” bi ꞌyɛ̨nꞌa ra tꞌohni. 32 Nɛ xʉn hɛ̨i da bądi ꞌbɛꞌa nam bøn na, pɛ dí ɛ̨ngä drá Pablogä, ngue i udi nangue ra Cristo nɛ nangue yʉ ꞌyɛ̨cꞌyɛi. 33 Pɛ nɛ im ma, gätho ahʉ ngue gyʉn ꞌyohʉhʉ, dami huɛ̨c ni xisuhʉ tengu bʉ gní huɛ̨c zɛhɛhʉ. Nɛ nuꞌahʉ gyʉ xisuhʉ damin numansu ni ndøhʉ.