6
Nuꞌahʉ gyʉ tꞌʉhnihʉ gyʉ ꞌyɛ̨cꞌyɛihʉ dami ꞌyøthʉ ꞌbɛꞌa man ni tahʉ ni mbehʉ, nguetho gueꞌa yʉ́n thɛhʉ a ngue gui ꞌyøthʉ. 2 Dami numansu ni tahʉ nɛ ni mbehʉ. Nɛ gueꞌa rá mbʉdi a rán tꞌɛ̨di Oją ngue ní jąp Oją nꞌda a, ngue bi ma mayaꞌbʉ. 3 Nɛ guehna ran jąpi bi ma da nu nꞌda ꞌbʉ da ꞌyøtꞌe, ngue din ja ran johya nɛ xʉn ngu yʉ pa dim ꞌbʉcua ja ra häi. 4 Nɛ nu ahʉ gyʉ́ tahʉ, nuꞌbʉ guí sʉh ni tꞌʉhnihʉ, ndeꞌbʉ hin gui jafʉ din cuɛtho. Pɛ dami temanhohʉ guepʉ dí ꞌyɛ̨cꞌyɛi ra Hmu ʉ. 5 Nɛ nu ahʉ gyʉ mbɛfihʉ nɛ gyʉ ꞌyɛ̨hɛ̨hʉ, dami ꞌyøthʉ xʉn ho ꞌbɛꞌa im man ni hmuhʉ ua ja ra häi, nɛ guin numansuhʉ ʉ, nɛ gui suhʉ. Nɛ mpähä thoho gui ꞌyøthʉ ni ꞌbɛfihʉ, tengutho bʉ gní ꞌyørpahʉ rá ꞌbɛfi ni Hmuhʉ ra Cristo. 6 Dami ꞌyøthʉ xʉn ho ni ꞌbɛfihʉ, hinga hønꞌbʉ in nu ahʉ ni hmuhʉ, pɛ dami ꞌyøthʉ tengutho bʉ gnín ꞌyɛ̨hɛhʉ ra Cristo. Nɛ gätho ni mbʉihʉ, nɛ gueꞌa rá pähä Oją a bʉya. 7 Dami ꞌyøtꞌ ni ꞌbɛfihʉ nangue ran johya, tengu bʉ gní ꞌyøthʉ rá ꞌbɛfi ni Hmuhʉ mahɛ̨tsꞌi, nɛ hinga høntꞌa dín numanho ahʉ yʉ jąꞌi. 8 Nɛ damim bɛ̨mhbʉ ya, Oją di cosꞌahʉ ran ho nangue ran ho xcá ꞌyøthʉ, madagueꞌa gyʉ ꞌyɛ̨hɛhʉ o gue gyʉ hmuhʉ. 9 Nɛ nu ahʉ gyʉ hmuhʉ, pɛ gui ꞌyørpahʉ a xʉn ho ʉ ni mbɛfihʉ, o gue ni ꞌyɛ̨hɛhʉ, tengu tho bʉ gní ndepe da ꞌyøtꞌahʉ ran ho. Nɛ hin gui xihmbʉ yʉn ʉnbi, nguetho guí pąhmbʉ ngue nꞌdatꞌa ni Hmuhʉ mahɛ̨tsꞌi. Nɛ nu a ra Hmu mahɛ̨tsꞌi hin di hyɛspʉ na nujʉ.Di zɛrca ma mbʉihʉ rá tsꞌɛdi Oją tengu rá he ra dofʉi
10 Nɛ nuya ma zʉ cu ahʉ, ga zacua ma mbʉihʉ nangue rá tsꞌɛdi Oją i jajʉ. 11 Ngue tengu nꞌda ra dofʉi i he rá he ngue ra tꞌɛgui ní täcua yʉ́n są ʉ yʉ́n sʉihʉ. Nɛ ngutho rá tsꞌɛdi Oją ꞌbʉ dí homhbʉ ngue hin da zä da hyäjʉ ra zįthu. 12 Nguetho hinga gueꞌʉ yʉ jąꞌi man sʉihʉ, pɛ gueꞌʉ yʉ́ hmu yʉ tsꞌoqui, ngue ra zįthu rá hmu ra ꞌbɛxui i ja gätho ra ximhäi. Nɛ ʉ gätho yʉ́m fätsꞌihʉ ra zįthu in ꞌyoui ran dąhi, nɛ gätho ꞌbɛꞌa má tsꞌɛdi bá nɛxpʉ ꞌbʉh rá hmu ran tsꞌo, gätho man sʉihʉ ʉ. 13 Janangueꞌa tengu ꞌbʉ ga hehʉ yʉ tꞌɛgui ya, nangue gätho rá tsꞌɛdi Oją, ngue ga häthʉ ga tąfʉ yʉ́n są ra zįthu i säc ma mbʉihʉ. Nɛ nuꞌbʉ dá tąhmbʉ ran sʉi, ya dá juahmbʉ xʉn ho, nɛ dá nuhʉ xingui tsꞌʉ dá ꞌbɛhmbʉ. 14 Nɛ nu yʉ tꞌɛgui dí xi ahʉ, nɛ gueꞌʉ nán sähʉ ʉ. Ngue nuꞌa ram hma dí tɛnhdʉ, ngue tengu ꞌbʉ ran gʉtꞌi ngue ra tꞌɛgui gam päthʉ. Nɛ nuꞌa ná hąmhbʉ ran hogui bi ꞌyørcahʉ ra Cristo, tengu ꞌbʉ ra coto ngue ra tꞌɛgui a, ngue hingui sä da dąjʉ ra zįthu. 15 Nɛ nuꞌa ná yąmanhohʉ Oją nangueꞌa ran ho maꞌdaꞌyo dá hąmhbʉ, nɛ gueꞌa ná huthʉ ran zambʉi tengu ꞌbʉ dí nɛtꞌ ma zapatohʉ ngue yʉ tꞌɛgui, nɛ dan tihmbʉ ga sʉhmbʉ ra zįthu. 16 Nɛ manꞌda, nuꞌa ná pąhmbʉ majuąni Oją, ngue tengu ꞌbʉ nꞌda ra xitꞌɛgui ní däqui gätho yʉ́n są ra zįthu, tengu ꞌbʉ tꞌɛngbahʉ nꞌda ra sibi. 17 Nɛ nuꞌa ná pąhmbʉ majuąni dám pøhmbʉ, tengu ꞌbʉ dá pantꞌ ma yąhʉ ra fʉi ngue ra tꞌɛgui, ngue hin gam bɛ̨mhbʉ a in nde di bɛ̨ngahʉ ra zįthu. Nɛ nuꞌa rám hman Oją, tengu ꞌbʉ ra espada di ꞌdajʉ rá Hogandąhi Oją, gueꞌa dám muthʉ ra zįthu a. 18 Pɛ thocua thoho dan yąhʉ Oją, ga äfʉ rá tsꞌɛdi, xíngui tsꞌʉ ga ɛshʉ nan yąhʉ Oją, tengu di bɛ̨ngahʉ rá Hogandąhi Oją. Nɛ dan ɛ̨hyahʉ hin dan xømbʉihʉ, ngue ga äfʉ Oją da mbäxꞌʉ gätho ma miꞌyɛ̨cꞌyɛihʉ. 19 Nɛ nugä drá Pablogä, dami ꞌyäfʉ Oją nanguecä, nꞌdamhma di ꞌdacä ran ꞌyomfɛ̨ni nɛ ga hutꞌanzambʉi gam mampꞌa rám hma, nɛ ga xi ʉ hing yʉ judío ꞌbɛꞌa nde Oją ngue da bąh ya. 20 Gueꞌa nán ofädigä a, ngue dí xicä yʉ jąꞌi ꞌbɛꞌa bi xicä Oją. Dami ꞌyäfʉ rá tsꞌɛdi Oją ngue hin ga su ga thoqui gam mangä rám hma.
Ran zɛngua ran zɛgui
21 Nuya dí pɛnhdä bʉ na ma cuhʉ ra Tíquico, ngue ɛ̨mmɛ mahuɛ̨qui. Nɛ nuna ɛ̨mmɛ øtꞌe xʉn ho rá ꞌbɛfi Oją. Nuꞌa da xi ahʉ ꞌbɛꞌa gätho dadí jagä, nɛ nangue gätho ꞌbɛꞌa dí øtꞌä. 22 Nuna ra Tíquico da gąx na ra søcuą dí øtꞌä, nɛ da xi ahʉ nanguecähe, nɛ da hyutꞌa ni mbʉihʉ. 23 Pɛ Oją ma Tahʉ nɛ ma Hmuhʉ ra Jesucristo da hyutꞌa ni mbʉihʉ, nɛ di ja ahʉ gui huɛ̨ c ni miꞌyɛ̨cꞌyɛihʉ, nguetho gá hyąmhbʉ rán ho mbo ni mbʉihʉ. 24 Pɛ Oją di ꞌda ahʉ rán jąpi gätho ahʉ toꞌo gätho hin gui ꞌyɛꞌtsꞌa gnín numanhohʉ a ma Hmuhʉ ra Jesucristo. Nɛ høntꞌa dá xi ahʉ ya.