Nu rán uįxte ra Cristo, hinꞌyʉ ran ꞌyɛ̨tsꞌi
2
Nuꞌbʉ gueꞌa ra Cristo di zɛ ahʉ, nɛ guí pąhmbʉ rán huɛ̨cate a, nɛ nuꞌbʉ guín ꞌyohʉ rá Hogandąhi Oją, nɛ guí pąhmbʉ gui ꞌyøthʉ ra yembʉi nɛ ra mate, dan johyagä ꞌbʉ. 2 Pɛ dami yusca ma mbʉi ran johya nangue ꞌbɛꞌa guí øthʉ ya, ngue nꞌdatꞌa guim bɛ̨mhbʉ, nɛ ꞌda xctín huɛ̨ctahʉ, nɛ ꞌdaꞌangu nin ꞌyomfɛ̨nihʉ guim bɛ̨mhbʉ, hinga ꞌdahma ꞌdanꞌyo guim bɛ̨mhbʉ. 3 Nɛ hin ga øthʉ ran ꞌyʉya, nɛ hin dan ꞌyɛ̨xhʉ, nɛ hin gam bɛ̨mhbʉ ngue dan uįxtehʉ, pɛ manꞌda da bɛ̨nse nꞌda hingui hosɛ xinda gueꞌʉ gä miꞌda. 4 Nɛ hinga høntꞌa ga honsɛhʉ gam bɛ̨mhbʉ, pɛ nɛꞌa i hon ʉ miꞌda ga fäxhʉ. 5 Pɛ nꞌda nguꞌnꞌda dam bɛ̨mhbʉ tengu tho bʉ í bɛ̨njʉ ra Cristo. 6 Nu ra Cristo ꞌdaꞌangudui Oją a, pɛ him bin ꞌyɛ̨zɛhɛ ngue Oją a, nguetho bi bɛ̨njʉ. 7 Ngue bá sogui gätho rá tsꞌɛdi mahɛ̨tsí, nɛ bin ꞌyɛ̨hɛ ꞌbʉ mín jąꞌi ua ja ra ximhäi, nɛ bi mbäx yʉ jąꞌi. 8 Nɛ nuꞌbʉ mín jąꞌi xingui tsꞌʉ bin ꞌyɛ̨tsꞌi, pɛ bi ꞌyøtꞌe gätho ꞌbɛꞌa min nde Oją, nɛ bi du bʉ ja ra pontꞌi tengu nꞌda ra tsꞌomꞌbäi. 9 Nɛ nangue a bi ꞌyøtꞌ ra Cristo, Oją bi ꞌyɛ̨spa a, nɛ bi un ra tsꞌɛdi manꞌda xʉn gu, nɛ gueꞌa ra thuhu bi unni ɛ̨mmɛ manꞌda di muui. 10 Janangue a nuꞌa ra Jesús gueꞌa rán säui din thąnde a, gätho ꞌbʉpʉ mahɛ̨tsꞌi nɛcua ja ra häi nɛꞌʉ gätho xʉn du, yʉ jąꞌi nɛ yʉ́m ꞌbɛhni Oją nɛ yʉ zįthu, gätho da ꞌyɛ̨spa ra Jesucristo ra Hmu. 11 Nɛ gätho nán gu da bądi nɛ da ma ngue gueꞌa ra Jesucristo a ra Hmu nangue gätho ꞌbɛꞌa i ja, nꞌdamhma gätho da ꞌyɛ̨spa Oją ra Ta.Nu yʉ ꞌyɛ̨cꞌyɛ̨i guesɛ ʉ yʉn yotꞌi ua ja ra ꞌbɛxui
12 Janangue a ma zʉ cu ahʉ ngue dadí huɛ̨cꞌahʉ, ząi gá ꞌyøthʉ ꞌbɛꞌa dá xi ahʉ nuꞌbʉ ꞌdarbʉ mám ꞌbʉhmbʉ, pɛ̨ madagueꞌa yaua dí ꞌbʉcä ya, manꞌda hnɛhi thoho gui ꞌyøthʉ a nin sähʉ ngue i ꞌbʉh ma pørpatehʉ, nɛ hin gan ꞌyɛ̨xhʉ, pɛ guin numansuhʉ Oją. 13 Nguetho gueꞌa Oją dim pɛpʉ mbo ma mbʉihʉ nɛ gueꞌa di ꞌdajʉ rá pähä nɛ rá tsꞌɛdi ngue ga ørbahʉ rá pähä Oją. 14 Nɛ o gadí yąni thohʉ, xín gan junthʉ, pɛ dami ꞌyøthʉ gätho in nde Oją. 15 Nꞌdamhma njon da dingahʉ nꞌda ran tsꞌo ngue da ma i ja ma tsꞌoquihʉ. Pɛ dam ꞌbʉhmbʉ tengu man sähʉ ngue yʉ́ hogatꞌʉhni gahʉ Oją, guepʉ ꞌbʉ ʉ yʉ jąꞌi ngue i øtꞌ ram fɛꞌtsꞌi. Janangue a ga øthʉ bʉya tengu nꞌda ran yotꞌi bʉ ja ra ꞌbɛxui, ngue ga xihmbʉ rám hman Oją di un ra te. 16 Nɛ nuꞌbʉ gui xihmbʉ rám hman ra temaząi, nugä dan jhyagä ꞌbʉ bi zøn ra pa ngue ba ɛ̨h ra Cristo, ngue hinꞌyʉ ꞌbɛꞌa dá pɛꞌtsꞌ ma sä nangue ra ꞌbɛfi xtá øtꞌä bʉ guí ꞌbʉhmbʉ. 17 Nguetho dadí hocꞌa ni tꞌɛ̨cꞌyɛihʉ, tenguꞌbʉ dadí hocä nꞌda ra ꞌbøtsꞌe, xʉn ho ꞌbʉ dá undä Oją. Nɛ nugä ꞌbʉ hin dí gua ʉ yʉn ʉngi dá sä ꞌbʉ gmí ꞌyɛ̨cꞌyɛ̨ihʉ, pɛ manꞌda xʉn ho ꞌbʉ ga un ma te nɛ ga fäm ma ji, ngue dí gua a ra ꞌbøtsꞌe ga undä Oją nangue gätho ahʉ. Guexta a dadín johyagä, nɛ da zä gui hyąmhbʉ man johyagä. 18 Janangue a ga comhbʉ man johyagä ꞌbʉ bi zøn ra pa da tꞌɛ̨na da thogä.
Ra Timoteo nɛ ra Epafrodito
19 Nɛ nuꞌbʉ rá pähä Oją ꞌbex ga pɛnꞌnahʉ bʉ ra Timoteo da nu ahʉ. Nɛ nuꞌbʉ dá pądi ꞌbɛꞌa gadí jahʉ bʉ dan johyagä bʉya. 20 Nguetho njohgui ꞌbʉcua manꞌda ngue im bɛ̨ni tengu dím bɛ̨mꞌbe ra Timoteo nangue ahʉ. 21 Nguetho gätho miꞌda i ꞌbʉcua im bɛ̨nsɛ nangue yʉ́ ꞌbɛfi zɛhɛ, nɛ him majuąni rá ꞌbɛfi ra Cristo Jesús im bɛ̨m bʉya. 22 Pɛ ya guí pąhmbʉ ngue ɛ̨mmɛ di muui nangue ꞌbɛꞌa i øtꞌ na ra Timoteo, ngue dí comꞌbe rá ꞌbɛfi Oją, tengu nꞌda ra tsꞌʉntꞌʉ i conhui rá ꞌbɛfi rá ta. 23 Pɛ dí tøꞌmi hasta gueꞌbʉ ga pącä ꞌbɛꞌa din jacä ua. Nɛ mꞌbɛjua ga pɛnhdä bʉ na ra Timoteo. 24 Pɛ xømhma da nde ra Hmu mahɛ̨tsꞌi ngue da zä ga mba bʉ nꞌdihi, gan nu ahʉ. 25 Pɛ dím bɛ̨ni ngue mꞌbɛtꞌo ga pɛnꞌnahʉ bʉ mahønꞌa na ra Epafrodito, ma cuhʉ, nɛ dí comꞌbe rá ꞌbɛfi ra Cristo dín yąnbaꞌbe a rán ho maꞌdaꞌyo. Guehna guá pɛncäꞌbe ua nangue da mbäxcaꞌbe. 26 Pɛ nuya ɛ̨mmɛ nde da mba bʉ gam ꞌbʉhmbʉ mahønꞌa, nɛ ɛ̨mmɛ tu rá mbʉi ngue ya rá ꞌyøhmbʉ ngue mí ʉ a. 27 Nɛ majuąni ɛ̨mmɛ mi ʉ nɛ mi tsꞌʉtho xtán du. Pɛ nangue rá mate Oją ngue him bi du. Nɛ nuꞌbʉ xtán du, manꞌda ɛ̨mmɛ xʉn gu ra dumbʉi xcá nugä ꞌbʉ. 28 Pɛ janangue a dí humbi ga pɛnhdä nꞌdihi na, nꞌdamhma gan johyahʉ ꞌbʉ guin nuhʉ mahønꞌa, nɛcä da hyu ma mbʉigä ua. 29 Nɛ nuꞌbʉ bi zøm bʉ dami simhbʉ xʉn ho, nɛ gui ꞌyäfʉ ra jamadi Oją ngue bi xox a. Nɛ gätho yʉ jąꞌi guin numansuhʉ ngue øtꞌe tengu i øtꞌ na ra Epafrodito. 30 Nɛ nuna mi tsꞌʉtho xtán du nangue rá ꞌbɛfi Oją, nguetho bi ꞌyɛn rá te nangue bi zɛqui, ngue bi ꞌyøtꞌ ra ꞌbɛfi tengu thoꞌbʉ gue ahʉ xzuí zɛjʉ.