Nu ra Cristo ꞌbʉ dí ɛ̨cꞌyɛihʉ, gueꞌa ní bo ma mbʉihʉ a
3
Nuya ma zʉ cu ahʉ, dí xi ahʉ, daman johyahʉ nangue ra Hmu mahɛ̨tsꞌi. Nugä hin dadín xømbʉi ngue ga xi ahʉ mahønꞌa, gan johyahʉ, nguetho nin hosꞌɛhʉ ngue dí xi ahʉ. 2 Daman jamansuhʉ nangue ʉ yʉ tsꞌonꞌyomfɛ̨ni jąꞌi, nguetho nuꞌʉ tengu thoꞌbʉ yʉ satexąꞌyo, nɛ i xi ahʉ jatho da hmɛpya ni jąꞌihʉ ngue da mba nthɛqui ahʉ. 3 Pɛ nujʉ majuąni am hmɛpya gahʉ bʉ na nujʉ Oją, nguetho dí thąndehʉ Oją nangue rá Hogandąhi, nɛ dadín johyahʉ nangue a ra Cristo Jesús, nɛ dí pąhmbʉ hinga gueꞌa man hosɛgahʉ ní ꞌyɛ̨njʉ yʉ́ tꞌʉnigahʉ Oją. 4 Pɛ nuꞌbʉ ꞌboꞌo sä ɛ̨na yʉ́ tꞌʉhni Oją nangue xʉn hosɛ, pɛ manꞌda sä xcá ɛ̨ngä ꞌbʉ, nguetho manꞌda mi pømanho man tꞌøtꞌegä. 5 Nguetho dám ꞌbʉi nangue yʉ judío, nɛ ná hyątopa xtám ꞌbʉcä ꞌbʉ mi thɛgä ma xifani, nɛ gätho dá comhbe a bi xije Oją dyʉ́ hebreohe dyʉ́ judíohe, nguetho nuꞌa ma ta ra hebreo a gue a bi xąnd mam bombøta ra Benjamín mi ꞌbʉh mayaꞌbʉ. Nɛ dá tɛndä ꞌbɛꞌa im man yʉ fariseo, ngue ɛ̨mmɛ dá humbi dá øtꞌä ʉ yʉ́n tꞌɛ̨di yʉ judío. 6 Nɛ nugä ɛ̨mmɛ dá yąngä a ma tꞌɛ̨cꞌyɛ̨ihe dyʉ́ judíohe, janangue a madí ʉnba yʉ́ ꞌyɛ̨cꞌyɛ̨i ra Cristo. Nɛ mi øtꞌä ʉ gätho yʉn ho im man ʉ yʉ́n tꞌɛ̨di yʉ judío, janangueꞌa njoꞌo toꞌo mi sä da manꞌa nꞌda rán tꞌɛ̨di Oją ngue dá fɛsthoho. 7 Nɛ mím bɛ̨ngä ní zingä Oją a man hosɛ. Pɛ nuya dí pądi ndetho di ꞌbɛrpa nín ꞌyomfɛ̨ni nꞌda a. Nɛ dá ɛꞌtsꞌä a ná bɛ̨ngä xʉn ho sɛgä janangue bi zä dá tįngä ran ho nangue ra Cristo. 8 Nɛ madagueꞌa hangu nan gu xtá øzɛhɛgä, pɛ ndetho manꞌda dí ꞌbɛdi, nguetho manꞌda di muui ngue dí pącä ra Cristo Jesús ma Hmu. Janangue a gätho man hosɛ dá ꞌbɛdi, ya him mín numanho, nꞌdamhma bi zä dán ꞌyoꞌbe ra Cristo. 9 Nɛ nuya sä dam ꞌbʉꞌbe ra Cristo, nɛ ntemanho i jagä ꞌbɛꞌa dí øzɛhɛgä nangue yʉn tꞌɛ̨di, pɛ nangue a dí ɛ̨cꞌyɛi ꞌbɛꞌa bi ꞌyørca ra Cristo, nɛ gueꞌa í bo ma mbʉi a nɛ in numanhogä Oją. Nguetho Oją in numanho ʉ i hąntho rá mate ra Cristo. 10 Nɛ nuya høntꞌa manꞌda ɛ̨mmɛ dín nde ga pądi xʉn ho a ra Crsito. Ngue ga comꞌbe xʉn ho a rá tsꞌɛdi bin tꞌum ꞌbʉ mi dámbɛ̨ni, nguepʉ da zä dam ꞌbʉi xʉn ho ꞌbʉ dí ꞌbʉtua ja ra ximhäi, nɛ da zä dan ʉnbä tengu yʉn ʉnbi bi nu a, nɛ da zä ga comꞌbe rán dąte, ngue nde da ma di ꞌbɛrqui xʉn ho a man yombʉi zɛhɛ. 11 Nɛ nubʉya xømhma thoho da zä ga comꞌbe xʉn ho a rá tsꞌɛdi ra Cristo bin tꞌum ꞌbʉ mí dąmbɛ̨ni, ngue dam ꞌbʉi xʉn ho a ra ꞌdaꞌyote.Gan uɛ̨nthohʉ ga tąhmbʉ ra ꞌdihi bʉya
12 Pɛ nugä hingui sä gam mangä ngue gätho dí comꞌbe rá tsꞌɛdi ra Cristo, nguetho hin daná søni ngue gätho xtán hotho ga øtꞌe. Pɛ guexta a dadí thoqui dí honi ngue ga pądi gätho ꞌbɛꞌa bi bɛ̨ngä ra Cristo Jesús ꞌbʉ mi bɛndgä. 13 Pɛ ma zʉ cu ahʉ dí xi ahʉ ya, ngue hinga gätho dí øtꞌä xʉn ho, pɛ hin dín nde gam bɛ̨ngä mahønꞌa ꞌbɛꞌa xtá øtꞌä mamꞌbɛtꞌo. Pɛ guexta a ɛ̨mmɛ dadí thoqui dí nde manꞌda ga øtꞌä ran ho, ngue ga tąhą xʉn ho. 14 Nɛ dín nde gan uɛ̨ntho xʉn ho, ngue ga tąhą ga hąn a í zoncahʉ Oją bʉ mahɛ̨tsꞌi ga hąmhbʉ, nangue dí ɛ̨cꞌyɛihʉ ra Cristo. 15 Nɛ gätho ahʉ ngue xʉn te nin ꞌyomfɛ̨nihʉ nangue ni tꞌɛ̨cꞌyɛihʉ, ndeꞌbʉ ꞌdaꞌangu guim bɛ̨mhbʉ tengu dím bɛ̨ngä. Nɛ nuꞌbʉ bʉ a nꞌda ahʉ nꞌdanꞌyo guím bɛ̨mhbʉ, nu a Oją di ja ahʉ ngue gui pąhmbʉ ꞌbɛꞌa nde Oją. 16 Pɛ ndeꞌbʉ ga thohmbʉ tengu ząi dí øthʉ, nangue rá ꞌbɛfi Oją. 17 Ma zʉ cu ahʉ, dami tɛnhdʉ a ꞌbɛꞌa dí øtꞌä, nɛꞌʉ miꞌda ꞌbʉ i øtꞌa tengu dí øtꞌä, dami tɛnhdʉ ʉ. 18 Nugä drá Pablogä, ga xi ahʉ mahønꞌa, ɛ̨mmɛ xʉn gu yʉ nidį ya xtá xi ahʉ, nguetho ɛ̨mmɛ tu ma mbʉi nangue ꞌbɛꞌa i øtꞌʉ ꞌda xʉn gu, i ɛ̨na i ꞌyo bʉ rá ꞌyu Oją, pɛgue din sʉhmbʉ ra Cristo ngue hingui ɛ̨cꞌyɛ̨i ꞌbɛꞌa í du bʉ ja ra pontꞌi. 19 Nɛ da zøn ra pa ngue da guadi nɛ di ꞌbɛh yʉ́ te, nguetho høntꞌa ꞌbɛꞌa i si nɛ ꞌbɛꞌa ndesɛ rá jąꞌi i hądumbʉi. Pɛ ɛ̨mmɛ din ꞌyɛ̨x ʉ nangue ꞌbɛꞌa i øtꞌʉ nɛ hinꞌyʉ yʉ́ ꞌyąsä. Nɛ høntꞌa im bɛ̨ni nangue a ꞌbɛꞌa jaua ja ra ximhäi. 20 Pɛ nujʉ dyʉ́ ꞌyɛ̨cꞌyɛihʉ, dyʉ́ mɛnguhʉ bʉ mahɛ̨tsꞌi, nɛ dadí thoqui dí tømdahʉ ngue ba ɛ̨h mahɛ̨tsꞌi a mam pørpatehʉ, ngue gueꞌa ma Hmuhʉ ra Jesucristo. 21 Nɛ nuꞌa ra Cristo di pärca ma ngøcꞌyɛ̨ihʉ tengu rá jąꞌizɛhɛ ngue nuįxte thoho, rá rsꞌɛdi i ja. Nɛ nꞌdatꞌa rá tsꞌɛdi ngue di manda ꞌbɛꞌa gätho i jaua.