Thoscua thoho dan johyahʉ nangue ra Hmu
4
Ma zʉ cu ahʉ ɛ̨mmɛ dadí huɛ̨cꞌahʉ nɛ ɛ̨mmɛ dím bɛ̨n ahʉ, nguetho xcá ꞌdajʉ ran johya, nɛ nangue gá ꞌyɛ̨cꞌyɛihʉ, gueꞌa ní nɛqui xʉn ho ma ꞌbɛfigä a. Nɛ nuya ma zʉ cu ahʉ, o gadí uąnspa nin ꞌyomfɛ̨nihʉ nangue ni tꞌɛ̨cꞌyɛ̨ihʉ. 2 Nɛ nu aui man ju aui nangue ra Cristo ra Evodia nɛ ra Síntique, dami ꞌyørcaui ra mate ngue ꞌyo gadín sʉhmi, nguetho gadín cuui nangue ra Hmu mahɛ̨tsꞌi. 3 Nɛ nu i ma hogamfätsꞌiꞌi ngue gá fäxca ra ꞌbɛfi, dami fäx ʉ yʉ xisu ngue dim ꞌbʉmanho, nguetho ɛ̨mmɛ dám pɛcähe ʉ nuꞌbʉ má mamhbe bʉ rán ho maꞌdaꞌyo ra Cristo. Nɛ a ra Clemente nɛꞌʉ miꞌda bi mbäxqui, ngue gätho bi thusca ma thuhuhʉ bʉ ja ra xøcuą bʉ mahɛ̨tsꞌi nangue bin ꞌdajʉ ra temaząi. 4 Pɛ thocua thoho dan johyahʉ nangue ra Hmu, nɛ dí xi ahʉ mahønꞌa, dan johyahʉ. 5 Nɛ ga fäxhʉ ma mijąꞌihʉ, nꞌdamhma gätho yʉ jąꞌi da nu ngue dadí jamansuhʉ ꞌbɛꞌa nám ꞌbʉhmbʉ. Nɛ gam bɛ̨mhbʉ ngue mi tsꞌʉtho ba ɛ̨h ra Hmu mahɛ̨tsꞌi. 6 Nɛ hin ga hądumbʉihʉ nangue ꞌbɛꞌa gätho dí homhbʉ, pɛ gätho ga xihmbʉ Oją ꞌbɛꞌa dí homhbʉ, nɛ ga xihmbʉ ra jamadi ngue ząi ørcahʉ a xʉn ho. 7 Nɛ nu Oją da hyurca ma mbʉihʉ bʉya nangue ran johya hingui sä xtám bąsɛ nꞌda, pɛ gueꞌa ran johya ní jamansuc ma mbʉihʉ nɛ man ꞌyomfɛ̨nihʉ, nangue dín ꞌyohʉ ra Cristo Jesús.Gam bɛ̨mhbʉ ꞌbɛꞌa gähto xʉn ho
8 Nuya ma zʉ cu ahʉ, miꞌda jaua ngue dín nde ga xi ahʉ. Ngue gam bɛ̨mhbʉ gätho ꞌbɛꞌa a majuąni, nɛ gätho ꞌbɛꞌa yʉ́n thɛhʉ ngue dí hnumansujʉ, nɛ gam bɛ̨mhbʉ hin di yoho bʉ dá øthʉ ꞌbɛꞌa dí øthʉ, nɛ hin te man tsꞌo gam bɛ̨mhbʉ. Nɛ gam bɛ̨mhbʉ ga ørpahʉ ꞌbɛꞌa dí hyu yʉ́ mbʉi ʉ ma jijąꞌihʉ, nɛ gam bɛ̨mhbʉ ga øthʉ ꞌbɛꞌa mfądi ngue xʉn ho. Nɛ gam bɛ̨mhbʉ gätho ꞌbɛꞌa ɛ̨mmɛ xʉn ho, nɛ gam bɛ̨mhbʉ ngue ꞌbɛꞌa gätho da tꞌɛ̨spi xʉn ho. 9 Nɛ gui ꞌyøthʉ ꞌbɛꞌa gätho dá xänꞌnahʉ, nɛ gui tɛnhdʉ gätho ꞌbɛꞌa xtá ut ahʉ. Nɛ nuꞌbʉ ngubʉ gui ꞌyøthʉ, da zä gan ꞌyohʉ xʉn ho Oją ngue ząi i hurpa ní mbʉi nꞌda.
Bi ꞌbɛnpi tsꞌʉ ram fätsꞌi a ra Pablo
10 Nɛ nu Oją bi ꞌdacä ran johya nangue a gá bɛ̨njʉ mahønꞌa, ngue gadí zɛjʉ tsꞌʉ. Nɛ dí pącä ngue hin gá pumbɛ̨nijʉ, pɛ høntꞌa nja, him mi sä bʉ gui zɛjʉ mamꞌbɛtꞌo. 11 Pɛ hin dí ɛ̨na ngue xcán ʉnbä ꞌbʉ hin xquí fäxcahʉ, nguetho ya xtán ząi ngue i jagä ran johya madagueꞌbʉ i ja a ga honi o hinꞌyʉ. 12 Nugä dí pącä ꞌbɛꞌa nám ꞌbʉmanho nꞌda ra hyoya, nɛ dí pącä ꞌbɛꞌa nám ꞌbʉmanho nꞌda ngue i ja xʉn gu. Nɛ dadín johyagä madague a dín niyągä o gue dí tumanthuhugä. Nɛ høntꞌa go ꞌbɛꞌa dín nu, uague xʉn gu i jagä o hinꞌyʉ, pɛ i hu ma mbʉigä. 13 Nɛ høntꞌa go má tsꞌɛdi i ndec Oją, ya gätho sä ga øtꞌe, nguetho i fäxca ra Cristo. 14 Pɛ guexta a xʉn ho gá ꞌyøthʉ ngue gá zɛjʉ tsꞌʉ, ngue i pan hnumanꞌʉgä. 15 Nɛ nu ahʉ guí ꞌbʉhmbʉ bʉ Filipos, guí pąhmbʉ ngue hønsɛ ahʉ gá zɛjʉ tsꞌʉ nuꞌbʉ má pøngä bʉ ra häi Macedonia, ngue rá mbʉdi dá mangä ran ho maꞌdaꞌyo bʉ, nɛ gá pɛncahʉ ra mbɛti. 16 Nɛ nuꞌbʉ guexta a mí ꞌbʉcä bʉ ra hnini Tesalónica, yondį hyundį gá pɛncahʉ ra mbɛti, gueꞌbʉ má hongä. 17 Nɛ hinga høntho dín nde ga hąni, pɛ dín nde ngue di jąp ahʉ Oją nangue a xcá ꞌdajʉ, nangue gá zɛjʉ. 18 Nugä ya dá hąni ꞌbɛꞌa guá pɛncähʉ ꞌbʉ mi zøcua ra Epafrodito, nɛ i pongui tsꞌʉ ꞌbɛꞌa dí honi. Nɛ nangue ꞌbɛꞌa guá pɛncähʉ, nu Oją i numanho, tenguꞌbʉ nꞌda ran tꞌunni ɛ̨mmɛ di muui. 19 Nɛ nuꞌa ma Ojąhʉ di ꞌda ahʉ xʉn ho ꞌbɛꞌa gätho guí homhbʉ nangue dí ꞌbʉhmbʉ ra Cristo Jesús. Nguetho nte di ꞌbɛꞌa, nɛ ɛ̨mmɛ xʉn ho a di ꞌdajʉ. 20 Pɛ dí ɛ̨spahʉ ma Tahʉ Oją nɛ gätho yʉ pa maząi. Nɛ høntꞌa dím bɛ̨ngä a.
Rán zɛgui ran zɛngua
21 Nɛ dí pɛnꞌnahʉ ran zɛngua gätho yʉ ꞌyɛ̨cꞌyɛi ngue i ꞌbʉpʉ, nangue rá thuhu ra Jesucristo. Nɛ gätho ya yʉ cu dí ꞌbʉhmbe ua i pɛnꞌnahʉ ran zɛngua. 22 Nɛꞌʉ miꞌda yʉ ꞌyɛ̨cꞌyɛi ngue i ꞌbʉcua ja ra hnini, gätho i pɛnꞌnahʉ ran zɛngua. Nɛ nuꞌʉ yʉ ꞌyɛ̨cꞌyɛi ngue dim pɛcua ja ran gutsꞌʉtꞌabi manꞌda in nde di zɛngua ahʉ. 23 Nɛ nu ma Hmuhʉ ra Jesucristo dí äpä di ꞌdaꞌahʉ rán jąpi gätho ahʉ. Nɛ høntꞌa dí xi ahʉ a, nɛ høntꞌa gam bɛ̨mhbʉ a ya.