1 TESALONICENSES
Ná nꞌda ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Tesalónica
Ran zɛngua
1
Nugä dra Pablogä nɛ ra Silvano nɛ ra Timoteo dí otꞌähe na ra søcuą, nɛ dí pɛnhꞌnahe ran zɛngua gätho ʉ yʉ ꞌyɛ̨cꞌyɛi gue dim pɛti bʉ ja ra hnini Tesalónica, gätho yʉ jąꞌi ngue in ꞌyohʉ Oją ma Tahʉ nɛ ra Jesucristo ma Hmuhʉ. Nɛ nu ahʉ nɛ dín ndehe din ja ahʉ rán jąpi Oją, nɛ da hyutꞌa ni mbʉihʉ Oją ma Tahʉ nɛ ma Hmuhʉ ra Jesucristo.Bi tꞌutꞌʉ ꞌbɛpʉ dí ꞌyɛ̨cꞌyɛi ʉ ꞌbʉpʉ miꞌda yʉ häi
2 Nɛ ząi dí xihmbe jamadi Oją nangue ahʉ. Nɛ ząi dím bɛ̨n ahʉ ꞌbʉ dí yąhe Oją. 3 Nɛ dím bɛ̨n ahʉ ꞌbʉ dí yąhe Oją ma Tahʉ, nangue ni tꞌɛ̨cꞌyɛihʉ gníꞌyøthʉ rá ꞌbɛfi Oją nɛ nangue nin huɛ̨catehʉ ɛ̨mmɛ guí humbi gam pɛhmbʉ, nɛ nangue a guí tømdahʉ ngue ba ɛ̨h mahønꞌa ra Jesucristo, nɛ gueꞌa gní hyätꞌi gní sɛthʉ ꞌbɛꞌa gätho guín nuhʉ. 4 Ma zʉ cu ahʉ dí pąhmbe ngue ɛ̨mmɛ di huɛ̨cꞌahʉ Oją, nɛ bi huanꞌnahʉ ngue gyʉ mbɛti ahʉ a. 5 Nɛ nuꞌbʉ rá mbʉdi dá mangähe bʉ a rán ho maꞌdaꞌyo ra Cristo, gá pąhmbʉ him mam hmansɛgä, pɛ nangue rá tsꞌɛdi a rá Hogandąhi Oją guí hyąmhbʉ a ram hma bi bɛ̨nꞌnahʉ gue majuąni a. Nɛ guí pąhmbʉ mam ꞌbʉihe nuꞌbʉ mám ꞌbʉcähe bʉ, nguetho dá utꞌahʉ ꞌbɛꞌa dám ꞌbʉ a nꞌda. 6 Nɛ nu ahʉ gá tɛnhdʉ a ram ꞌbʉi dá utꞌahe ngue tengu bi ꞌyøtꞌ ra Hmu mahɛ̨tsꞌi. Nɛ madagueꞌa xʉn ngu ran ʉnbi gá nuhʉ, pɛ guehma gá hyąmhbʉ a ram hma nɛ gán johyahʉ nangue rá Hogandąhi Oją. 7 Pɛ nangue mpähä thoho gá hyąmhbʉ ram hma nɛ gám ꞌbʉmanhohʉ, gätho gá ꞌyuthʉ ꞌbɛpʉ dí ꞌyɛ̨cꞌyɛi ʉ ꞌbʉpʉ ra häi Macedonia nɛpʉ ra häi Acaya. 8 Nɛ nangue ahʉ gá jafʉ bi fą a rán ho maꞌdaꞌyo ra Cristo, janangueꞌa hinga hønbʉ ra häi Macedonia nɛ ra häi Acaya, pɛ hønbʉ go hapʉ i fądi gue ɛ̨mmɛ i ja ni tꞌɛ̨cꞌyɛihʉ nangue Oją. Nɛ him mahyoni ga xihmbe a ram hman ya. 9 Nɛ nuꞌʉ gätho yʉ jąꞌi i ma ngue ɛ̨mmɛ gá simanhoje ꞌbʉ má mbähmbe bʉ ni hninihʉ. Nɛ i ma nangue gá sohmbʉ ni nyoguihʉ, nɛ nuya guí thąndehʉ Oją i ꞌbʉi ngue majuąni a. 10 Nɛ i ma gue guí tøhmbʉ ba ɛ̨h mahønꞌa mahɛ̨tsꞌi ra Jesús, rá Tsꞌʉntꞌʉ Oją. Gueꞌa bá xoxꞌa Oją bʉ ꞌbʉ ʉ xʉn du, nɛ gueꞌa ra Jesús da yąnjʉ nangue rán tsꞌɛmbi Oją xʉn ʉ tho ngue ba ɛ̨hɛ.