Rá ꞌbɛfi ra Pablo bʉ Tesalónica
2
Nɛ nu ahʉ ma zʉ cu ahʉ guí pąhmbʉ ngue hinga säti thoho dá mbähmbe bʉ guí ꞌbʉhmbʉ. 2 Nɛ guí pąhmbʉ hangu nangu ran ʉnbi bi mba ma ʉnguigahe nuꞌbʉ mám ꞌbʉhmbe bʉ ja ra hnini Filipos. Pɛ madagueꞌa dá nuhe ran ʉnbi, nu Oją bi ꞌdaje ran zambʉi dá xi ahʉ rán ho maꞌdaꞌyo ra Cristo, madague xʉn ngu min nde da zʉje. 3 Nguetho hin dá xi ahʉ nꞌda ram hma him majuąni, nɛ hin dá xi ahʉ nangue ꞌbɛꞌa ga tąsɛhe, nɛ hin dím bɛ̨ni ngue høntho xcá hä ahʉ. 4 Pɛ nugähe nząi dí mamhbe tengu in nde Oją, nguetho Oją bi huangähe ga mamhbe rán ho maꞌdaꞌyo ra Cristo, nɛ i pą Oją ngue hin te dá cømhbe, nɛ hin dá homhbe ꞌbɛꞌa da numanho yʉ jąꞌi. Pɛ Oją di ąsca ma mbʉihe. 5 Nɛ hin dí huanhde yʉm hma mahotho guepʉ da numanhoje yʉ jąꞌi. Nɛ hin dí homhbe ngue ga tąhmbe ra mbɛti. Nuꞌa Oją i pądi ꞌbɛꞌa dí mamhbe. 6 Nɛ hin dá homhbe ꞌbɛꞌa dí numansuje yʉ jąꞌi, xínga gue ahʉ o gueꞌʉ miꞌda, madagueꞌa mi sä xcá øtꞌahe tsꞌɛdi nguetho ma ꞌbäigähe ra Cristo. 7 Pɛ ɛ̨mmɛ dá tumpꞌa ma mbʉihe tenguꞌbʉ nꞌda ra mbe di jamansu yʉ́ tꞌʉhni, nangue man huɛ̨catehe dá øtꞌahʉ. 8 Dín nde ga comhbʉ a rám hman Oją madagueꞌa jatho ga ɛm ma tehe, nguetho ɛ̨mmɛ dadí huɛ̨cꞌahʉ. 9 Ma zʉ cu ahʉ, ha hin guím bɛ̨mhbʉ ꞌbɛꞌa dá øthe ꞌbʉ mám pɛhmbe bʉ ma pa nɛ ra xui ngue dá honsɛhe ꞌbɛꞌa dá homhbe, nguetho him mi nde ga pa ahe. Pɛ ra mate thoho dá xi ahʉ rám Hman Oją. 10 Pɛ ha hin guí pąsɛhʉ, nɛ a Oją i pądi ꞌbɛꞌa mam ꞌbʉihe nuꞌbʉ mám ꞌbʉhmbe bʉ guí ꞌbʉhmbʉ gyʉ ꞌyɛ̨cꞌyɛihʉ, ngue høntꞌa Oją dín ndehe da tꞌɛ̨spi, nɛ hinꞌyʉ ꞌbɛꞌa dí mba ma yącpihe, nguetho gätho xʉn ho ꞌbɛꞌa dá øthe. 11 Nɛ guí pąhmbʉ ngue nꞌda ngu nꞌda ahʉ dá øthe tenguꞌbʉ ma tꞌʉhni ahe tengutho nꞌda ra ta di huɛ̨c yʉ́ tꞌʉhni nɛ di un ran zofo. Nɛ xtá hątꞌahʉ ra tsꞌɛdi ni mbʉihʉ. 12 Nɛ dá xiꞌahʉ ja tsꞌɛditho gui ꞌyøthʉ ram ꞌbʉi tengu i numanho Oją. Nguetho Oją bi zonhꞌnahʉ gui comhbʉ a rá tsꞌɛdi nuįxte bʉ di manda. 13 Nɛ nząi dadí unhde ra jamadi Oją nangue ahʉ, nguetho nuꞌbʉ má xi ahʉ rám Hman Oją, gá hyąmhbʉ a majuąni rám Hman Oją, nɛ hin gá ꞌyɛ̨mhbʉ gue høntho rám hman ra jąꞌi. Nɛ gueꞌa ram hma dim pɛpʉ mbo ni mbʉihʉ ya, gätho ahʉ ngue guí ɛ̨cꞌyɛihʉ. 14 Nu ahʉ ma zʉ cu ahʉ, gá nuhʉ ran ʉnbi gue bi ꞌyøtꞌa ni mɛnguhʉ, tengutho bi nu yʉ ꞌyɛ̨cꞌyɛi bʉ ra häi Judea nuꞌbʉ mi nu ran ʉnbi ngue bi ꞌyørpa yʉ́ mijudíohʉ ʉ. 15 Nu yʉ judío bi hyo a ra Hmu Jesús, tengutho bi ꞌyørpa yʉ́ pøngahyą Oją mamꞌbɛtꞌo, nɛcähe bi hyønje thi, nɛ Oją din sʉhmbʉ ʉ, nɛ njoꞌo to i numanho ʉ. 16 Nɛ nuꞌbʉ má xihmbe yʉ jąꞌi ngue hing yʉ judío ra ꞌyu dí pø Oją ʉ, pɛ bi hɛgähe ʉ yʉ judío. Janangueꞌa bin te yʉ́ tsꞌoqui ʉ, nɛ nuya bi tsꞌänni da nu rán tsꞌɛmbi Oją ntsꞌutho ʉ.Nuꞌa ra Pablo nde da mba mahønꞌa bʉ Tesalónica
17 Ma zʉ cu ahʉ, nuꞌbʉ má njoꞌogähe bʉ ꞌda yʉ pa, hin dadí pumbɛ̨ni ahʉ, pɛ dím bɛ̨n ahʉ nɛ ɛ̨mmɛ dín ndehe ga mbähmbe bʉ, gua nu ahe. 18 Nugähe mim bɛ̨ni ga mbähmbe bʉ, nɛ nugä dra Pablogä mi säpi ga mbagä bʉ xʉn ngu yʉ nidį, pɛ ꞌbex bi ząngua ra zįthu. 19 Pɛ gueꞌa zɛhɛhʉ man johya ahe. Nguetho nuꞌbʉ bá ɛ̨h mahønꞌa ma Hmuhʉ ra Jesucristo, di nɛqui xʉn ho ma ꞌbɛfihe, ngue ya gá ꞌyɛ̨cꞌyɛihʉ. 20 Majuąni guesɛ ahʉ man johya ahʉ, nguetho tenguꞌbʉ man tꞌunni ahʉ ga dä ahʉ bʉ.