3
1-2 Pɛ nugä him mí hätꞌi ga tøꞌmi miꞌda yʉ pa ngue da ꞌbäx ahʉ. Janangueꞌa dá pɛnꞌnahʉ na ma zʉ cuhʉ ra Timoteo ba fäx ahʉ nɛ di zɛ ahʉ nangue ni tꞌɛ̨cꞌyɛihʉ, nɛ dá coꞌbe ua ja ra hnini Atenas. Nɛ nu ra Timoteo nꞌda rá ꞌyɛ̨hɛ Oją ngue dadím pɛhmbe ngue dí mamhbe rán ho maꞌdaꞌyo ra Cristo. 3 Nuna ra Timoteo di zɛ ahʉ ngue hin gui ꞌuehmbʉ bʉ ja rá ꞌyu Oją nangue ran ʉnbi guín nuhʉ. Nguetho ya guí pąhmbʉ gue rá pähä Oją ga nuhʉ ran ʉnbi nangueꞌa ga tɛnhdʉ ra Cristo. 4 Guí pąhmbʉ ꞌbɛꞌa dá xi ahʉ nuꞌbʉ mám ꞌbʉhmbʉ, ngue jatho guin nuhʉ ran ʉnbi tengu guín nuhʉ ya. 5 Nɛ nuꞌbʉ him mi sä manꞌda nyaꞌa ga tøꞌmi, dá pɛhndä nꞌdihi bʉ ra Timoteo, nguetho dín nde ga pądi ꞌbɛꞌa guí øthʉ nangue ni tꞌɛ̨cꞌyɛihʉ. Nguetho nugä dí su da dą ahʉ ra zįthu, nɛ säti thoho ra ꞌbɛfi dá øtꞌahe bʉ ꞌbʉ. 6 Pɛ nuna ra Timoteo ya bí ꞌbärpʉ guepʉ guí ꞌbʉhmbʉ nɛ dá hąmhbe ra nde nangue ni tꞌɛ̨cꞌyɛihʉ nɛ nangue nin huɛ̨catehʉ. Nɛ bi xije ngue nząi ɛ̨mmɛ guím bɛ̨nje nɛ guín nde guin nuje, tengutho bʉ na ndegähe gan nu ahe. 7 Janangueꞌa ma zʉ cu ahʉ, madagueꞌa dín nuhe ran ʉnbi ua, pɛ nuꞌbʉ má øhmbe ngueꞌa gadí zacuatho ni tꞌɛ̨cꞌyɛihʉ, ꞌbex bi hyu ma mbʉihe. 8 Nɛ nugähe sä ga häthe ʉ yʉn ʉnbi dín nuhe ua, nguetho dí pąhmbe gue ya gadí thotꞌa ni tꞌɛ̨cꞌyɛihʉ nangueꞌa ra Hmu. 9 Thocua thoho dí xihmbe jamadi Oją nangueꞌa ran johya gadí ꞌdaje. 10 Nɛ nu ra pa nɛ ra xui dí yąhe Oją nangue ahʉ, nɛ dí äpꞌahe rá tsꞌɛdi Oją ngue gan nu ahʉ mahønꞌa. Nguetho dín nde ga xänꞌnahʉ ꞌbɛꞌa gadí ꞌbɛhmbʉ nangue ni tꞌɛ̨cꞌyɛihʉ. 11 Nɛ dí äcähe Oją ma Tahʉ nɛꞌa ma Hmuhʉ ra Jesucristo gue di jaje ga mbähmbe bʉ gua nu ahʉ. 12 Nɛ ma Hmuhʉ di ja ahʉ ngue ꞌda gdán huɛ̨ctahʉ nꞌda ngu nꞌda ahʉ, nɛ gui huɛ̨jʉ gätho miꞌda, tengugähe ngue dadí huɛ̨cꞌahʉ. 13 Gue nuꞌa ran huɛ̨cate i ja ahʉ dí zacꞌa ni mbʉihʉ nɛ di ja ahʉ nꞌdatꞌa Oją guim bɛ̨mhbʉ, nɛ gätho ma hoqui bʉ dán nu Oją ma Tahʉ nuꞌbʉ bá ɛ̨h mahønꞌa ma Hmuhʉ ra Jesús din ꞌyohʉ gätho xʉm pøhø.