Dam ꞌbʉhmbʉ a dí numanhojʉ Oją
4
Nuya ma zʉ cu ahʉ, dí xi ahʉ nangue rá thuhu ma Hmuhʉ ra Jesús gue gui thojʉ gui ꞌyøthʉ ꞌbɛꞌa dá xänꞌnahʉ. Nɛ gam ꞌbʉhmbʉ a dí numanho ahʉ Oją, nɛ manꞌda gui thojʉ xʉn ho. 2 Nɛ guim bɛ̨mhbʉ ya ꞌbɛꞌa gätho dá xänꞌnahʉ nangue rá thuhu ma Hmuhʉ ra Jesús gue gui ꞌyøthʉ. 3 Nɛ gueꞌa nde Oją gue gui däfʉ gätho ni mbʉihʉ, nɛ hin gui ꞌyøthʉ ran ꞌyomtꞌɛ̨ni. 4 Nɛ nꞌda ngu nꞌda ahʉ ndeꞌbʉ gui pąhmbʉ guin numansu ni xisu zɛhɛhʉ, janangueꞌa hin gui ꞌyøthʉ ran ꞌyomtꞌɛ̨ni miꞌda yʉ xisu. 5 Nɛ hin gui ꞌyørpahʉ ran tsꞌo tengu i øtꞌʉ yʉ jąꞌi ngue hingui pą Oją. 6 Ndeꞌbʉ xínga nꞌda ahʉ gui ꞌyøthʉ gui ʉnba ni minꞌyohʉhʉ ngue gui nutontofʉ rá xisu. Nguetho Oją di cosꞌahʉ ran ʉnbi ꞌbʉ gueꞌa gui ꞌyøthʉ, tengu dá xi ahʉ. 7 Nguetho Oją bi zongahʉ ga øthʉ ran ho nɛ him bi zongahʉ ga øthʉ ran tsꞌo. 8 Nuꞌa toꞌo fɛsthoho ʉ yʉn zofo im mangua, pɛ hin rám hmansɛ nꞌda ran ꞌyohʉ i fɛsthoho pɛ rán tꞌɛ̨di Oją, ngue bi ꞌdajʉ rá Hogandąhi. 9 Nu Oją ya bi xänꞌnahʉ ngue gan huɛ̨jʉ nꞌda ngu nꞌda ahʉ, janangueꞌa hinꞌyʉ manꞌda ga xi ahʉ. 10 Nɛ ya gá ꞌyuthʉ nin huɛ̨catehʉ gätho yʉ cu i ꞌbʉpʉ ra häi Macedonia. Pɛ dí xi ahʉ ma zʉ cu ahʉ nɛ manꞌda gui ꞌyuthʉ nin huɛ̨catehʉ. 11 Nɛ nu ahʉ o gadím pate thohohʉ pɛ gui ꞌyøzɛhɛ ni ꞌbɛfi zɛhɛhʉ nɛ gui hyądumbʉi gui hyomhbʉ ꞌbɛꞌa gdám ꞌbʉhmbʉ, tengu xtá xi ahʉ. 12 Nuꞌbʉ ngubʉ gui ꞌyøthʉ, da numanho ahʉ ʉ hingui ɛ̨cꞌyɛi, nguetho hin guí äthʉ ꞌbɛꞌa guí homhbʉ. Ba ɛ̨h mahønꞌa ma Hmuhʉ ra Jesucristo
13 Nuya ma zʉ cu ahʉ dín nde ahʉ gui pąhmbʉ ꞌbɛꞌa din ja ʉ yʉ ꞌyɛ̨cꞌyɛi xʉn du, janangueꞌa hin da du ni mbʉihʉ tengu ʉ yʉ jąꞌi nte mán ho i tøꞌmi, ngue hingui pą Oją. 14 Nɛ tengu bʉ na ɛ̨cꞌyɛihʉ ngue bi du ra Jesús nɛ bi dąmbɛ̨ni a, nɛ ngutho bʉ dá ɛ̨cꞌyɛihʉ da dąmbɛ̨ni ʉ yʉ ꞌyɛ̨cꞌyɛi xʉn du, nɛ di jap Oją gätho din ꞌyohʉ ra Jesús nuꞌbʉ bá ɛ̨h mahønꞌa. 15 Guehna rám hman ra Hmu dí xi ahʉ ya, nujʉ dyʉ ꞌyɛ̨cꞌyɛihʉ gue dí ꞌbʉthohʉ ꞌbʉ bá ɛ̨h mahønꞌa ra Hmu, hin dam ꞌbɛtꞌohʉ ga texhʉ mahɛ̨tsꞌi, pɛ nuꞌʉ yʉ ꞌyɛ̨cꞌyɛi xʉn du dim ꞌbɛtꞌo ʉ. 16 Nguetho guesɛ ra Hmu ba cąh mahønꞌa mahɛ̨tsꞌi, nɛ ɛ̨mmɛ tsꞌɛdi da ma nangue rá tsꞌɛdi nuꞌbʉ bi zøn ra pa da man Oją. Nɛ rá ngʉrpa mꞌbɛhni mahɛ̨tsꞌi ɛ̨mmɛ ntsꞌɛdi da ma. Nɛ gätho na ngʉni ra ximhäi da tꞌø a rá thʉxi Oją. Nɛ gätho ʉ toꞌo xí ꞌyɛ̨cꞌyɛi, ngue xʉn du, da dąmbɛ̨ni, nɛ gueꞌʉ rá mbʉdi da ndexpʉ mahɛ̨tsꞌi. 17 Nɛ dim ꞌbɛjua ʉ yʉ ꞌyɛ̨cꞌyɛi ngue i ꞌbʉtho, ꞌdatꞌa da zixcahʉ, nɛ dan cꞌathʉ ra Hmu bʉ i ja yʉ güi nɛ dam ꞌbʉhmbʉ ra Hmu gätho yʉ pa maząi. 18 Nɛ guehna dá xi ahʉ gnín hyurpa ni mbʉihʉ nꞌda ngu nꞌda ahʉ.