4
Nɛ nu ahʉ gyʉ hmuhʉ, dami ꞌyørpahʉ ran ho ni ꞌyɛ̨hɛ̨hʉ o gue ni mbɛfihʉ, nguetho guí pąhmbʉ i ꞌbʉpʉ mahɛ̨tsꞌi ni Hmuhʉ.Manꞌda ran zofo
2 Nɛ gätho gahʉ hin dan xømbʉihʉ nangue dan yąhʉ Oją, nɛ thocua thoho ga xihmbʉ jamadi Oją ꞌbɛꞌa gätho di ꞌdajʉ. 3 Nɛ nu ahʉ damin yąhʉ Oją nanguecähe, ngue di jaje ga thoje gam mamhbe rám hma, nɛ ga xih yʉ jąꞌi ꞌbɛꞌa bi ꞌyurcahʉ, ram hma ngue him mam fądi, ngue dim ꞌbʉpʉ mbo ma mbʉihʉ ra Cristo. Nɛ nugä dí ofädigä nguetho dím mangä na ram hma. 4 Dami ꞌyäfʉ rá tsꞌɛdi Oją ngue da bømanho ꞌbɛꞌa dím mangä, ngue ꞌbɛꞌa bi ꞌyurcahʉ, nguetho jatho gam mangä xʉn ho a. 5 Nɛ dami jamansu ni mbʉihʉ, janangue a nu yʉ jąꞌi hing yʉ ꞌyɛ̨cꞌyɛ̨i da nu ngue majuąni guín ꞌyohʉ ra Cristo. Nɛ dąman ɛ̨hyahʉ gui xihmbʉ nangue ra Cristo. 6 Dami zomanhohʉ yʉ jąꞌi, nɛ hin gui ꞌyʉthʉ ʉ, pɛ dąmi hyurpahʉ yʉ́ mbʉi. Pɛ ga pąhmbʉ ꞌbɛꞌa dá thąhmbʉ nꞌda ngu nꞌda, nangue a ran ho di bɛ̨ngahʉ Oją ngue ga xihmbʉ.
Ran zɛngua ran zɛgui
7 Nuna ma zʉ cuhʉ ra Tíquico, ɛ̨mmɛ dadí huɛ̨cä na, nɛ bi mbäxqui xʉn ho ngue dá øtꞌbe rá ꞌbɛfi Oją. Nuꞌbʉ bi zøm bʉ, da xi ahʉ gätho ꞌbɛꞌa dadí jagä. 8 Janangue a dí pɛhndä bʉ ya, ngue gui pąhmbʉ ꞌbɛꞌa dí jagähe ua. Nɛ nuꞌa da hyut a ni mbʉihʉ nangue ra Cristo. 9 Nɛ da mbɛ ra Tíquico ma cuhʉ ra Onésimo, nuna i ɛ̨cꞌyɛ̨i xʉn ho na, nɛhna dadí huɛ̨cä na. Nuna nꞌda ra mɛngu bʉ guí ꞌbʉhmbʉ, nɛ da xi ahʉ ꞌbɛꞌa gätho bin ja ua. 10 Nɛhna ma mi ofädiꞌbe ra Aristarco, i pɛnꞌnahʉ ran zɛngua, nɛ ra Marcos rá mɛni ra Bernabé i pɛnꞌnahʉ ran zɛngua. Nɛ ya dá xi ahʉ nangue ra Marcos, nɛ nuꞌbʉ da zøm bʉ, dami simhbʉ xʉn ho. 11 Nɛhna ra Jesús í Justo i pɛnꞌnahʉ ran zɛngua. Pɛ høndi hyutho ya ma mijudíohe ngue yʉ ꞌyɛ̨cꞌyɛ̨i dadím pɛhmbe ua nangue rá ꞌbɛfi Oją, nɛ guehya hyu ɛ̨mmɛ i hurca ma mbʉi. 12 Nɛ nuna i pɛnꞌnahʉ ran zɛngua na ra Epafras, nꞌda ra mɛngu bʉ guí ꞌbʉhmbʉ, nɛ rá ꞌyɛ̨hɛ̨ ra Cristo na. Nɛ ząi i äp rá tsꞌɛdi Oją nangue ahʉ, ngue hin gui päh nin ꞌyomfɛ̨nihʉ nangue ra Cristo, pɛ njuąntho gui ꞌyøthʉ rá pähä Oją. 13 Nɛ majuąni dím mangä nangue ra Epafras, ngue ɛ̨mmɛ xʉ hyądumbʉi in yąui Oją nangue ahʉ, pɛ hinga hønꞌa thohʉ, pɛ nɛꞌʉ yʉ ꞌyɛ̨cꞌyɛi i ꞌbʉpʉ ja ra hnini Laodicea, nɛꞌʉ ꞌbʉpʉ ja ra hnini Hierápolis. 14 Nuꞌa ra Lucas, ra médico, ɛ̨mmɛ dadí huɛ̨jʉ a, nɛꞌa i pɛnꞌnahʉ ran zɛngua. 15 Nɛcä dra Pablogä dí pɛnpa ran zɛngua yʉ ꞌyɛ̨cꞌyɛ̨i ngue i ꞌbʉpʉ ja ra hnini Laodicea, nɛꞌa man juhʉ nangue ra Cristo ra Ninfas, nɛ gätho ʉ yʉ ꞌyɛ̨cꞌyɛ̨i ngue dim pɛti bʉ rán gu. 16 Nɛ nu ahʉ, nuꞌbʉ gá jua a gá mamhbʉ na ra søcuą dí pɛnꞌnahʉ ya, dami thocpahʉ ʉ yʉ ꞌyɛ̨cꞌyɛ̨i bí ꞌbʉpʉ ja ra hnini Laodicea. Nɛꞌa manꞌda ra søcuą dá pɛhndä bʉ Laodicea, dami nuhʉ bʉ. 17 Nɛ nuꞌi gra Arquipo, pɛ i jaua a dí xi aꞌi. Dami ꞌyøtꞌe xʉn ho ra ꞌbɛfi ngue bi ꞌda aꞌi ra Hmu, nɛ hingui tsꞌʉtho gui ꞌyøtꞌe. 18 Nugä dra Pablogä, dá oꞌtꞌä ua na man zɛngua nangue ma ꞌyɛsɛ. Pɛ damim bɛ̨mhbʉ ngue dí ofädigä. Oją di jamansu ahʉ nɛ da mbäx ahʉ. Nɛ høntꞌa dí xiꞌahʉ ya.