3
Pɛ gam bɛ̨mhbʉ ngue ꞌdarbʉ dá thąmbɛ̨nihʉ ra Cristo, tenguꞌbʉ ya dá sohmbʉ ra ximhäi. Janangue a ga homhbʉ ga øthʉ ngue dyʉ mɛnguhʉ bʉ mahɛ̨tsꞌi, ngue ya dí ꞌbʉhmbʉ ra Cristo, nɛ nuꞌa i ꞌbʉpʉ ja rán ꞌyɛi Oją, i conhui rá tsꞌɛdi a. 2 Gam bɛ̨mhbʉ tengu bʉ nam bɛ̨n ʉ ꞌbʉpʉ mahɛ̨tsꞌi, nɛ hin gam bɛ̨mhbʉ tengu bʉ nam bɛ̨n ʉ ꞌbʉcua ja ra ximhäi. 3 Gam bɛ̨mhbʉ ngue ꞌdarbʉ dá tuhʉ ra Cristo, nɛ nuya ꞌdarbʉ bi ꞌbɛsca ma tehʉ ra Cristo bʉ bí ja rá tsꞌɛdi Oją, bʉ nam bɛ̨n a. 4 Nu ra Cristo dá simhbʉ mbo ma mbʉihʉ, nɛ gueꞌa ma tehʉ i jajʉ a ya. Nɛ nuꞌbʉ bi hnu a rá tsꞌɛdi nuįxte ra Cristo, nɛjʉ da hnu ngue dí comhbʉ rá nuįxte a.Høntꞌa maꞌdaꞌyo gam bɛ̨mhbʉ ya
5 Janangue a nuya gätho yʉ́n tsꞌo ra ximhäi i ja bʉ mbo ma mbʉihʉ ga hɛhmbʉ, tenguꞌbʉ dán hyosɛhʉ. Hin dan ꞌyomtꞌɛ̨nihʉ, xin ga øthʉ yʉ ꞌyąsä, nɛ ga ɛshʉ ʉ yʉ tsꞌonꞌyomfɛ̨ni. Xín dan siyatehʉ, nguetho tenguꞌbʉ dí thąndehʉ ʉ yʉ oją ngue him majuąni. 6 Pɛgue guehya da nu rán tsꞌɛmbi Oją ntsꞌutho, ngue gätho ʉ hin di jamansu ꞌbɛꞌa im man Oją. 7 Nuꞌehʉ ngubʉ gmí øthʉ ꞌbʉ gmí ꞌyohʉ bʉ ja ra ꞌbɛxui. 8 Pɛ nuya dami hyɛhmbʉ ꞌbɛꞌa gmím bɛ̨nbahʉ ni mijąꞌihʉ ya, gätho ra cuɛ, nɛ dami hyɛhmbʉ a gní ꞌyɛ̨tꞌambʉihʉ ran tsꞌo. Nɛ o gadí cꞌąmanꞌʉ ni mijąꞌihʉ nangue ra tsꞌore, nɛ gui ꞌyɛshʉ nangue ra tsꞌore i pøn ni ndehʉ. 9 Nɛ o gadín xihmbʉ yʉ fɛhni nꞌda ngu nꞌda ahʉ, nguetho ya gá pähmbʉ nin ꞌyomfɛ̨nihʉ nɛ gätho ꞌbɛꞌa gmí øthʉ. 10 Nɛ nuya i ja ahʉ maꞌdaꞌyo nin ꞌyomfɛ̨nihʉ. Pɛ nu Oją manꞌda manꞌda di ꞌda ahʉ ran ꞌyomfɛ̨ni, da gohi tengu thoho rán ꞌyomfɛ̨ni ra Cristo, ngue bi ꞌdajʉ ra ꞌdaꞌyote. 11 Nu ra Cristo ꞌdaꞌangu bʉ na nu yʉ jąꞌi, madague høntꞌa go ꞌbɛꞌa má jąꞌi, yʉ griego, o gue yʉ judío o gue hing yʉ judío, o gue yʉm ꞌbʉndąpo jąꞌi, o gue yʉ ꞌyɛ̨hɛ̨, o gue hing yʉ ꞌyɛ̨hɛ̨. Nu ra Cristo in ꞌyohʉ høntꞌa toꞌo nde da ꞌyɛ̨cꞌyɛ̨i, nɛ nangue ra Cristo ga tįmhbʉ gätho dí homhbʉ. 12 Nɛ nangue rán huɛ̨cate Oją ya bi huancahʉ ngue ga ɛ̨cꞌyɛ̨ihʉ. Janangue a ndeꞌbʉ ga øthʉ ran hocjąꞌi, nɛ hin dan ꞌyɛ̨xhʉ, nɛ ga ørbahʉ ran ho ma mijąꞌihʉ, nɛ din ja ma yembʉihʉ, nɛ hin dan xømbʉihʉ ꞌbɛꞌa da tꞌørcahʉ. 13 Nɛ dam punbahʉ nꞌda ngu nꞌdajʉ nuꞌbʉ da ꞌyørcahʉ ran tsꞌo nꞌda, tengutho bʉ í pungahʉ ra Cristo. 14 Pɛ manꞌda ɛ̨mmɛ hnɛhi thoho ga øthʉ ran huɛ̨cate, hin te dadí ꞌbɛhmbʉ ꞌbʉ. 15 Nɛ ga jafʉ ra Cristo di manda gahʉ, nꞌdamhma dim ꞌbʉmanho ma mbʉihʉ. Nguetho ya bá zoncahʉ Oją ngue dam ꞌbʉhmbʉ tenguꞌbʉ nꞌdanjąꞌitho. Nɛ thocua thoho ga xihmbʉ ra jamadi ꞌbɛꞌa bi ꞌyørcahʉ Oją. 16 Nɛ gam bɛ̨mhbʉ rám hman ra Cristo, nɛ nangue rám hma din jajʉ ran ꞌyomfɛ̨ni xʉn ho. Nɛ gueꞌa dán xänbahʉ a nꞌda ngu nꞌdajʉ. Nɛ ga ɛ̨mfʉ jamadi Oją nuꞌbʉ dí tuhmbʉ yʉ thuhu, o gue dím mamhbʉ rám hman Oją. 17 Nɛ ꞌbɛꞌa gätho dí øthʉ, nɛ ꞌbɛꞌa gätho dím mamhbʉ, pɛ ga øthʉ a dí tꞌɛ̨spa ra Hmu Jesús. Nɛ ga ɛ̨mfʉ jamadi Oją ma Tahʉ, nangue a ra Jesús.
Dam ꞌbʉmanhohʉ bʉ ja ma ngumhbʉ
18 Nɛ nu ahʉ gyʉ xisuhʉ, dami ꞌyøhmbʉ ꞌbɛꞌa im man ni ndøhʉ, nguetho gueꞌa rán säui nꞌda ra ꞌyɛ̨cꞌyɛ̨i. 19 Nɛ nu ahʉ gyʉn ꞌyohʉhʉ, dami huɛ̨c ni xisuhʉ, nɛ hin gui sʉhmbʉ ʉ. 20 Nɛ nu ahʉ gyʉ tꞌʉhnihʉ, dami ꞌyøthʉ ꞌbɛꞌa gätho man ni tahʉ nɛ ni mbehʉ, nguetho gueꞌa in numanho Oją a. 21 Nɛ nu ahʉ gyʉ tahʉ, nɛ gyʉ mbehʉ, hinga thocua tho gui sʉh ni tꞌʉhnihʉ, janangue a mpähä thoho da ꞌyøtꞌa guín numanhohʉ. 22 Nɛ nu ahʉ gyʉ ꞌyɛ̨hɛ̨hʉ nɛ gyʉ mbɛfihʉ, dami ꞌyøthʉ ꞌbɛꞌa gätho nde ni hmuhʉ, yʉ jąꞌi. Pɛ hinga høntꞌʉ guim bɛ̨mhbʉ da numanho ahʉ ʉ, pɛ gueꞌa Oją guín ndehʉ da numanho ahʉ. Janangue a gui ꞌyøthʉ xʉn ho ni ꞌbɛfihʉ ngue dí numanho ahʉ Oją. 23 Nɛ nuꞌʉ ꞌbɛꞌa gätho ní ꞌbɛfi guí øthʉ, gui ꞌyøthʉ xʉn ho, nguetho hinga høntꞌa ra jąꞌi ni hmuhʉ, pɛ nɛsɛ a Oją. 24 Nguetho ya guí pąhmbʉ a ra herencia di ꞌdajʉ ra Cristo, ngue i juadi xʉn ho, nɛ gueꞌa majuąni ni Hmuhʉ a. 25 Pɛ nuꞌʉ toꞌo i øtꞌ ran tsꞌo, Oją di cospa a bi ꞌyøtꞌe, madague a høntꞌa go toꞌo ní jąꞌi.