Ran ꞌyohʉ ngue ra ngʉrpa ꞌyøtꞌatsꞌoqui
2
Nuya ma zʉ cu ahʉ, dí xi ahʉ ya ꞌbɛꞌa din ja nuꞌbʉ bá ɛ̨h mahønꞌa ma Hmuhʉ ra Jesucristo, ngue di pɛrcahʉ ꞌdarbʉ dam ꞌbʉhmbʉ. 2 ꞌYo gadí päh nin ꞌyomfɛ̨nihʉ ꞌbʉ ꞌboꞌo da xi ahʉ, ya bi zøn ra pa ba ɛ̨h ra Hmu. ꞌYo gadí ꞌyon ni mbʉihʉ ꞌbʉ ꞌboꞌo da xi ahʉ bi bɛ̨nba Oją ngue ya ba ɛ̨h ra hmu ya. Nɛ ꞌyo guí ɛ̨cꞌyɛihʉ ꞌbʉ ꞌboꞌo da hyä ahʉ ngue da ꞌyɛ̨n ahʉ dá oꞌtꞌähe ra søcuą dá mamhbe ya bi zøh ra Hmu mahɛ̨tsꞌi. 3 Nɛ ꞌyo guí ɛ̨cꞌyɛihʉ ꞌbɛꞌa gätho i man yʉ jąꞌi. Nguetho him ba ɛ̨h ra Hmu asta gueꞌbʉ go gätho yʉ jąꞌi i ꞌbʉcua ja ra häi ngue hingui ɛ̨cꞌyɛi din sʉhmbʉ Oją. Nɛ him ba ɛ̨h ra Cristo asta gueꞌbʉ din ꞌyo a nꞌda ran ꞌyohʉ ngue ra ngʉrpa ꞌyøtꞌatsꞌoqui, ngue mꞌbɛjua da tꞌɛ̨rpʉ ja ran ʉnbi maząi. 4 Nɛ nuꞌa ra ngʉrpa ꞌyøtꞌatsꞌoqui da zʉi gätho yʉ ꞌyɛ̨cꞌyɛi gue i thąnde Oją, nɛ da zʉ ʉ miꞌda i thąnde høntꞌa go ꞌbɛꞌa i thąnde, nguetho in nde a dí mba nthąnde zɛhɛ. Nɛ da yʉrpʉ ja nꞌda ra niją nɛ da hyupʉ, tenguꞌbʉ gueꞌa Oją a. 5 Ha hin guím bɛ̨mhbʉ guehna dá xi ahʉ nuꞌbʉ mám ꞌbʉhmbʉ bʉ. 6 Pɛ nuya guí pąhmbʉ ꞌbɛꞌa i sąmmi ngue ba ɛ̨hɛ, nguetho hinga na søn ra pa da man Oją gue ba ɛ̨hɛ. 7 Pɛ nuya ɛ̨mmɛ xʉn ngu dim pɛpʉ yʉ́ mbʉi yʉ jąꞌi a rá tsꞌɛdi ra zįthu, ngue hin di nɛqui. Pɛ i pa ntsꞌąmbi thoho rá tsꞌɛdi asta gueꞌbʉ go bi zøn ra pa ngue Oją di ꞌuecꞌa toꞌo i sąmmi. 8 Nɛ gätho da nu ran ꞌyohʉ ngue ra ngʉrpa ꞌyøtꞌatsꞌoqui. Pɛ nuꞌbʉ bá ɛ̨h mahønꞌa ra Hmu Jesús nuįxtetho rá tsꞌɛdi, da hyo a ran ꞌyohʉ, ngue da huic thoho. 9 Nɛ nuꞌbʉ bá ɛ̨h ran ꞌyohʉ ngue xʉn ngu rá tsꞌɛdi ra zįthu in ꞌyoui, nɛ da ꞌyøtꞌe xʉn ngu yʉ hmɛpya, nɛ yʉn tꞌøtꞌe nuįxte ngue dí hyätꞌ yʉ jąꞌi. 10 Nɛ gätho ꞌbɛꞌa mán thäte da ꞌyøtꞌe, ngue da hyätꞌ yʉ jąꞌi i ꞌyo rá ꞌyu ram ꞌbɛdi, gueꞌʉ him mín nde da ꞌyɛ̨cꞌyɛi a majuąni guepʉ mí sä xtím pøhø. 11 Nɛ nuꞌʉ gätho him bi nde da ꞌyɛ̨cꞌyɛi a majuąni Oją, di japi da ꞌyɛ̨cꞌyɛi yʉ fɛhni nɛ da dɛnꞌna ran ꞌyohʉ ngue ra ngʉrpa ꞌyøtꞌatsꞌoqui. 12 Janangueꞌa gätho ʉ him bi ꞌyɛ̨cꞌyɛi a majuąni pɛ manꞌda di ho ran tsꞌo, ꞌdarbʉ da nu rán tsꞌɛmbi Oją ʉ.Nthahni dim pøhø
13 Pɛ nząi ga xihmbe jamadi Oją nangue ahʉ ꞌbɛꞌa gätho bi ꞌyøtꞌahʉ ma zʉ cu ahʉ, ngue di huɛ̨cꞌahʉ ra Hmu. Nguetho Oją bi huahnꞌnahʉ rá mbʉdi thoho ngue di pø ahʉ. Nɛ nangue gá ꞌyɛ̨cꞌyɛihʉ a majuąni, nuꞌa rá ꞌbɛfi rá Hogandąhi Oją í bo ni mbʉihʉ. 14 Nɛ bi huahnꞌnahʉ Oją ngue gá ꞌyɛ̨cꞌyɛihʉ ꞌbʉ má xi ahe rán ho maꞌdaꞌyo ra Cristo. Nɛ bi zänꞌnahʉ Oją gui comhbʉ rá nuįxte ma Hmuhʉ ra Jesucristo. 15 Nuya ma zʉ cu ahʉ dami thoctahʉ ni tꞌɛ̨cꞌyɛihʉ, nɛ ꞌyo gadí uąnsꞌhʉ ꞌbɛꞌa guím bɛ̨mhbʉ, nɛ ꞌyo gadí pumbɛ̨nihʉ ꞌbɛꞌa dá xänꞌnahʉ nuꞌbʉ ꞌdarbʉ mám ꞌbʉhmbʉ, nɛꞌa ꞌbɛꞌa dá xi ahʉ nuꞌbʉ má oꞌtꞌahe ʉ yʉ søcuą. 16 Nuya gue ma Hmuhʉ ra Jesucristo, guesɛ a, nɛ Oją ma Tahʉ, da hyutꞌa ni mbʉihʉ maząi nangue rán hosɛ Oją. Nuꞌa Oją di huɛ̨cꞌahʉ, nɛ nangue rá mate bi jajʉ ga tøhmbʉ ꞌbɛꞌa di ꞌdajʉ. 17 Nɛ nuꞌa Oją da hyu ni mbʉihʉ, nɛ di zɛtꞌa ni mbʉihʉ ngue gui mamhbʉ nɛ gui ꞌyøthʉ ꞌbɛꞌa gätho xʉn ho.