Gui ꞌyäfʉ Oją nanguecähe, ɛ̨nꞌa ra Pablo
3
Høntꞌa dí xi ahʉ ya ma zʉ cu ahʉ, dami ꞌyäfʉ rá tsꞌɛdi Oją nanguecähe nꞌdahma din ja rá tsꞌɛdi rám hman ra Hmu, nɛ da bømanho hønbʉ go hapʉ ga ꞌyomhbe. Nɛ gätho toꞌo da ꞌyøde da hyąni nangue ran johya, tengutho bin ja bʉ guí ꞌbʉhmbʉ. 2 Nɛ gui ꞌyäfʉ rá tsꞌɛdi Oją ngue da yąnje bʉ ꞌbʉh yʉ tsꞌomꞌbäi jąꞌi, nguetho hinga gätho in nde da hyąn rám hman Oją. 3 Nguetho nuꞌa ra Hmu njąmꞌbʉ da hyɛgahʉ pɛ nząi da mbäjʉ, nɛ i ja rá tsꞌɛdi ngue hin di japi di ʉnꞌnahʉ ra dąmantsꞌo. 4 Nɛ nuꞌa ra Hmu di jaje dí pąhmbe ngue gadí thoctahʉ guí øthʉ ꞌbɛꞌa gätho dí xi ahe. 5 Nɛ nuꞌa ra Hmu di ja ahʉ manꞌda manꞌda gui pąhmbʉ rán huɛ̨cate Oją, nɛ di ja ahʉ gui hyäthʉ ꞌbɛꞌa gätho guí thohmbʉ tengutho bi ꞌyøtꞌa ra Cristo.Jatho gui ꞌyøtꞌ ni ꞌbɛfi zɛhɛhʉ
6 Ma zʉ cu ahʉ dí xi ahʉ nangue rá thuhu ma Hmuhʉ ra Jesucristo, dami ꞌuehmbʉ tsꞌʉ bʉ ꞌbʉ ʉ ni cuhʉ i dąnhyɛ̨i, ngue hingui nde dim pɛfi, gueꞌʉ hingui tɛnꞌna ꞌbɛꞌa dá xänꞌnahe. 7 Nɛ nuꞌahʉ guí pąhmbʉ ꞌbɛꞌa gdám ꞌbʉhmbʉ, tengu dá utꞌahe ꞌbʉ mám ꞌbʉcähe bʉ, ngue hin dám ꞌbʉndąnhyɛ̨i thohogähe. 8 Nɛ xíngui tsꞌʉ gá ꞌdaje ꞌbɛꞌa dá homhbe. Pɛ dám pɛhmbe ra pa nɛ ra xui nꞌdahma bin ja ꞌbɛꞌa dá homhbe, nɛ xíngui tsꞌʉ dá pa ahe. 9 Madague mí sä xcá ähmbe ngue xquí zɛje. Pɛ dá ndehe ga utꞌahe ra hmɛpya gui ꞌyøthʉ. 10 Nɛ nuꞌbʉ mám ꞌbʉhmbʉ bʉ, dá xi ahʉ, ngueꞌbʉ ꞌbʉ a nꞌda hingui nde dim pɛfi, hin din sihmɛ ꞌbʉ, pɛ da zä ra thuhu ꞌbʉ. 11 Nguetho dí øhmbe gue ꞌbʉ i ꞌda ahʉ hingui nde dim pɛfi, pɛ di hødąnhyɛ̨i thoho nɛ ndetho din thįnt pʉ hin yʉ́ ꞌbɛfi. 12 Nuya nangue rá tsꞌɛdi ma Hmuhʉ ra Jesucristo, dí xi ʉ toꞌo hingui nde dim pɛfi, ngue da hyąnya zɛhɛ rá ꞌbɛfi da ꞌyøtꞌe, nɛ da hyonsɛ ꞌbɛꞌa dám ꞌbʉi. 13 Pɛ nuꞌahʉ ma zʉ cu ahʉ, o gadín xømbʉihʉ gui ꞌyøthʉ ran ho. 14 Nuꞌbʉ ꞌbʉ a nꞌda ahʉ hingui nde da ꞌyøtꞌa ꞌbɛꞌa dí xi ahʉ, dami hyɛthʉ ꞌbʉ, janangueꞌa da mbɛꞌtsꞌ yʉ́ sä. 15 Pɛ o gadín sʉhmbʉ, pɛ gui unhdʉ ran zofo tenguꞌbʉ ni cuhʉ.
Ran zɛgui ran zofo
16 Nɛ guesɛ ra Hmu, høntꞌa sä da hyutꞌa ni mbʉihʉ, høntꞌa go ꞌbɛꞌa guí thohmbʉ gätho yʉ pa. Nɛ nuꞌa ra Hmu gam ꞌbʉhmbʉ gätho ahʉ. 17 Nugä dra Pablo dí oꞌtꞌä na ran zɛngua i ja ua ya nangue ma ꞌyɛsɛgä. Tenguꞌbʉ ma firmagä na, ngue gätho ya ma søcuą. 18 Nuya nuꞌa ma Hmuhʉ ra Jesucristo di jąpꞌahʉ, gätho ahʉ. Nɛ høntꞌa dí xi ahʉ a ya.