1 TIMOTEO
Ná nꞌda ra søcuą bi ꞌyorba ra Timoteo a ra Pablo
Ran zɛngua
1
Nugä dra Pablogä, ma ꞌbäigäꞌbe ra Jesucristo nangue rán tꞌɛ̨di Oją ma yąntehʉ, nɛ ra Jesucristo, guesɛꞌa ran ho dí tømhbʉ a. 2 Dí pɛnhꞌna nꞌda ra søcuą gra Timoteo, tenguꞌbʉ majuąni ma tsꞌʉntꞌʉ i, ngue ya dá xänꞌna ma tꞌɛ̨cꞌyɛihʉ. Nɛ dí äp Oją ma Tahʉ di ꞌdaꞌa rá mate nɛ rán huɛ̨cate, nɛ da hyutꞌa ni mbʉi a ra Cristo Jesús ma Hmuhʉ.Da mba ma hɛcpi ʉ nꞌdanꞌyo in xänbate
3 Nɛ tengu dá xiꞌa ꞌbʉ má mba bʉ Macedonia, nɛ ngutho dí xiꞌa ya, dami copʉ Éfeso, nɛ gui hɛcpa ʉ ꞌda bí ꞌbʉpʉ, ngue hinga nꞌdanꞌyo da ma ꞌbʉ in xänbate. 4 Nɛ dami xifi hin din xäh miꞌda yʉ cuento gue ꞌbɛꞌa sä ɛ̨mbi bi ꞌyøtꞌʉ ndu ma bombøtahʉ mayaꞌbʉ nɛꞌbʉ ɛ̨mmɛ ma ꞌbɛꞌa yʉ́ thuhu ʉ, ngue manꞌda di xąntꞌʉ yʉ́m hma. Nguetho nuꞌʉ yʉm hma tengu ʉ, säti thoho ran ꞌyomfɛ̨ni di unꞌna nꞌda, pɛ hin di ꞌyomfɛ̨niba nꞌda da ꞌyɛ̨cꞌyɛi Oją. 5 Pɛ nuꞌa ma ꞌbɛfihʉ dyʉ xänbatehʉ, ga xänba yʉ jąꞌi dan huɛ̨jʉ. Nɛ gueꞌa ran huɛ̨cate di nɛqui bʉ ma mbʉihʉ ꞌbʉ mꞌbeꞌtꞌe a, nɛꞌbʉ ząi dí øthʉ a di bɛ̨ngahʉ Oją, nɛꞌbʉ høntꞌa Oją dím bɛ̨mhbʉ a. 6 Pɛ nuꞌʉ ꞌda hinga guehya yʉm hma dín huɛ̨ca nꞌda i honi, pɛ bi ꞌuepʉ ja rá ꞌyu Oją, janangue i tɛn yʉm hma säti thoho. 7 Nuꞌʉ, ɛ̨mmɛ i honi nde din xänbate nangue yʉ́n tꞌɛ̨di Oją bi man ra Moisés, pɛ hingui pądi ꞌbɛꞌa im ma. Sä i mantsꞌɛditho, pɛ nɛ hingui pądi ꞌbɛꞌa nam bønꞌʉ yʉ́m hmansɛ i ma ꞌbʉ i man yʉn tꞌɛ̨di. 8 Dí pąhmbʉ gue xʉn ho ʉ yʉn tꞌɛ̨di bi xi Oją ra Moisés. Pɛ bi tsꞌän yʉ́n tꞌɛ̨di Oją gue dí mba ma hɛcpi ʉ yʉ dąditsꞌoqui. 9 Nɛ gueꞌʉ yʉn tꞌɛ̨di dí mba ma hɛcpi ʉ toꞌo jasɛ yʉ́n tꞌɛ̨di zɛhɛ, nɛꞌʉ i fɛsta yʉ́n tꞌɛ̨di Oją, nɛꞌʉ to hingui numansu Oją, nɛ di ho da ꞌyøtꞌ yʉ tsꞌoqui. Nɛꞌʉ to hingui ɛ̨spa Oją, nɛ i tɛn ra ximhäi, nɛ i ho yʉ́ ta nɛ yʉ́ mbe, nɛ yʉ hyodu. Gueꞌʉ da sih yʉ́n tꞌɛ̨di Oją ʉ, nɛ hinga gueꞌʉ høntꞌ Oją mbɛ̨ni. 10 Nɛ bi tsꞌän yʉ́n tꞌɛ̨di Oją dí mba ma hɛcpi ʉ øtꞌ ran ꞌyomtꞌɛ̨ni, nɛꞌʉ din ꞌyąsäbi yʉ́ minꞌyohʉhʉ tenguꞌbʉ nꞌda ra xisu, nɛꞌʉ i pɛ̨ yʉ́ mijąꞌihʉ, nɛꞌʉ i man yʉ fɛhni, nɛ i xih ra fɛhni yʉ zɛꞌmi. Nɛ gätho ʉ nꞌdanꞌyo i øtꞌe xínda gue ra hoganxädi, nɛ gueꞌʉ da sih yʉ́n tꞌɛ̨di Oją ʉ, nguetho i xijʉ hin ga øthʉ yʉ tsꞌoqui. 11 Pɛ nuꞌa rán ho maꞌdaꞌyo ra Cristo dí pärca ma mbʉihʉ Oją a, nuꞌa mixte xʉn hotho a. Nɛ gueꞌa ran ho maꞌdaꞌyo bi xicä Oją gam mangä.
I xi Oją jamadi ra Pablo, nangue rá mate xʉn ngu
12 Jamadi dí xih ma Hmuhʉ ra Jesucristo, nguetho bi huangui dram ꞌbɛhnigä, nɛ i pądi ga jąꞌtsꞌi, nguetho di ꞌdac rám fätsꞌi ga øtꞌa i xiqui. 13 Pɛ nugä ɛ̨mmɛ dra nɛxmategä mamꞌbɛtꞌo, nɛ mí sangä a ra Cristo gueꞌbʉ go má ʉnba ʉ ꞌda yʉ́ ꞌyɛ̨cꞌyɛi. Nɛ xíngui tsꞌʉ mí pącä ꞌbɛꞌa nam bønꞌa mí øtꞌä, nguetho him mí ɛ̨cꞌyɛigä ra Cristo. Pɛ Oją bi ꞌdac rá mate bi pungui. 14 Pɛ ɛ̨mmɛ xʉn ngu rá mate ma Hmuhʉ ra Cristo Jesús, bi jaqui dá däpä ma mbʉi a, nɛ bi jaqui ɛ̨mmɛ dá numanhogä a Oją nɛ dá huɛ̨c ma mijąꞌiꞌbe. 15 I ja ua nꞌda ram hma da zä ga pąhmbʉ majuąni, ngue bi zøcua ja ra ximhäi a ra Jesucristo di pøꞌʉ yʉ tsꞌomꞌbäi tengugä manꞌda xʉn tsꞌo dá øtꞌä. 16 Pɛ ɛ̨mmɛ xʉn ngu rá mate bi ꞌyørcä Oją, nguetho nde gätho da ꞌyut miꞌda yʉ jąꞌi ɛ̨mmɛ ja rá yembʉi a ra Jesucristo. Nɛ tengu thohogä, ngutho da ꞌyørpa ʉ toꞌo di däp yʉ́ mbʉi a, nɛꞌʉ din ja ra te maząi. 17 Janangueꞌa ga ɛ̨spa ma Ojąhʉ gätho yʉ pa maząi. Nuꞌa, ra Hmutsꞌʉtꞌabi maząi a, nɛ njongui sä da nu, nɛ njąmꞌbʉ da guadi. Nɛ nꞌdatho Oją, njoꞌo manꞌda, nɛ gätho i pądi. Nɛ høntꞌa gam bɛ̨mhbʉ a ya. 18 Nɛ nuya gra Timoteo, tenguꞌbʉ ma tsꞌʉntꞌʉ i, i ja ua a dí xiꞌa ya. Nuꞌi gra dofʉi nangue Oją, dami ꞌyøtꞌ ra hogatuhni, tengu thoho bi xiꞌa ʉ yʉ́ pøngahyą Oją. Janangueꞌa dami hyądumbʉi gui ꞌyɛ̨cꞌyɛi rá hogamhma Oją, nɛ gui ꞌyøtꞌa ꞌbɛꞌa i xiꞌa ꞌbʉ in zopꞌa ni mbʉi. 19 Nɛ hin gui ꞌyøtꞌe tengu mi øtꞌʉ ꞌda ꞌbʉ mí zop yʉ́ mbʉi Oją, pɛ bi mbɛstaꞌa ꞌbɛꞌa bi sifi, bi tsꞌonsɛ yʉ́ mbʉi bʉya. 20 Tengu mí øtꞌa ra Himeneo nɛ ra Alejandro. Pɛ dá juąnba ʉ, nɛ dá xifi bi mba ma dä bʉ ꞌbʉh ra zįthu, di ʉnbi, da bądi hin da zan Oją.