2 Timoteo 2

Ra hoga dofʉi nangue ra Jesucristo

Pɛ nuꞌi tenguꞌbʉ ma tsꞌʉntꞌʉ i, gra Timoteo, dami hyą ra tsꞌɛdi nangue rá mate bi ꞌdaꞌa ra Jesucristo. 2 Nu ram hma gá ꞌyøde dá mangä, nɛ xʉn nguꞌʉ i manꞌa majuąni. Nɛ nꞌdatꞌa ram hma gui thocpa ra ꞌbɛfi miꞌda yʉ hocjąꞌi, gui huanꞌndʉ toꞌo da zä da xänba ʉ miꞌda. 3 Dami hyät yʉn ʉnbi tengugä, nguetho gra hogadofʉi nangue ra Jesucristo. 4 Nu ra dofʉi hingui sä xtán hɛ̨ti rá mbʉi, ngue xʉn ngu miꞌda ꞌbɛꞌa gätho da ꞌyøtꞌe tengu miꞌda yʉ jąꞌi thoho, janangueꞌa da zä da ꞌyøtꞌa i numanho rá hmu ngue bi cʉꞌtꞌ ran dofʉi. 5 Nuꞌa toꞌo nde da dąh ran tꞌɛ̨ni, pɛ hin da dą ꞌbʉ hin da ꞌyørpa yʉ́n tꞌɛ̨di a ran tꞌɛ̨ni. 6 Nuꞌa to dim pɛpʉ ja ra häi da zi a rá mbʉdi din ja, janangueꞌa da hyumbi da ꞌyøtꞌ rá ꞌbɛfi, ngue da bądi rá mbʉdi i tąsɛ rá ꞌbɛfi nangue rá mbʉi zɛhɛ. 7 Dami pądi ꞌbɛꞌa dí xiꞌi, Oją di ꞌyomfɛ̨niꞌi ngue ꞌbɛꞌa gätho gui ꞌyøtꞌe. 8 Thocpa thoho guim bɛ̨ni i ꞌbʉꞌa ra Jesucristo ya, bi dąmbɛ̨ni ꞌbʉ mi du, nɛ nuꞌa nꞌda rám bomꞌbɛto ra David. Nɛ gueꞌa ram hma dí mangä a. 9 Janangueꞌa dí sä ran ʉnbi ya, nɛ dí ofädi, tenguꞌbʉ drá tsꞌomꞌbäigä. Pɛ nu rám hman Oją hingui ofädi a. 10 Nɛ dí hätꞌi dí thocä a ra ꞌbɛfi, madagueꞌbʉ pa ma ʉnguigä, dín ndepe nɛꞌʉ dim pø ʉ toꞌo gätho nthahni. Nɛ ga comhbʉ rá tsꞌɛdi mixte a ra Cristo, gätho yʉ pa maząi. 11 Majuąni a ram hma, ngue

Nuꞌbʉ dím bɛ̨mhbʉ tengutho ꞌbʉ ꞌdarbʉ xcamá tuhʉ ra Cristo, da zä ꞌdarbʉ dam ꞌbʉhmbʉ ꞌbʉ.

12 Nɛ nuꞌbʉ dí häthʉ yʉn ʉnbi, pɛ ꞌdarbʉ ga comhbʉ bʉ ja rá tsꞌɛdi ꞌbʉ.

Pɛ nuꞌbʉ dí cømhbʉ a ra Cristo, nɛꞌa da gønjʉ a.

13 Nuꞌbʉ hin dí ɛ̨cꞌyɛihʉ gue majuąni a, pɛ guextaꞌa majuąni a,

nɛ gätho da ꞌyøtꞌa bi ma da ꞌyøtꞌe.

Oją da numanho ra hogambɛfi

14 Dami bɛ̨nba ʉ bí ꞌbʉpʉ nanguehya yʉm hman ya, nguetho in nu Oją ʉ. Gui xifi hin din juntꞌi nangue yʉ́m hma. Nguetho säti tho ꞌbʉ din juntꞌi, ndetho di ʉꞌtꞌʉ toꞌo i øde. 15 Nɛ gan ɛ̨hya gan xädi nguetho gra hogambɛfi nangue a ram hma majuąni. Damin ꞌyomfɛ̨ni gui hyoni ꞌbɛꞌa nam bøni nꞌda ngu nꞌda ram hma, nɛ gui pądi ꞌbɛꞌa pɛ ʉ nꞌda ngu nꞌda yʉm hma, nɛ gui pɛpi xʉn ho. Janangueꞌa da numanho Oją a guí øtꞌe, nɛ hin gui pɛsꞌ ni sä. 16 Nɛ gui ꞌuegue nangue yʉm hma säti thoho, nguetho nuꞌʉ hingui ho ʉ, nɛ di japi ɛ̨mmɛ din tsꞌomꞌbäi nꞌda. 17 Nɛ nuꞌʉ yʉ́m hma, tenguꞌbʉ ra sąsi din ndoqui, nɛ da ꞌya rá jąꞌi nꞌda. Ngue tengu yʉ́m hma i manꞌa ra Himeneo nɛ ra Fileto. 18 Nuꞌʉ bi ꞌuegue nangue ram hma majuąni, nɛ sä ɛ̨nꞌʉ ya bin ja ngue ya xʉn dąmbɛ̨ni ʉ yʉ ꞌyɛ̨cꞌyɛi i ꞌbʉi. Janangueꞌa bi pärpa yʉ́ tꞌɛ̨cꞌyɛi ʉ ꞌda. 19 Pɛ nu rá ꞌbɛfi Oją i ørpa yʉ ꞌyɛ̨cꞌyɛi, hin da zä dim ꞌbɛdi, nguetho di jamansu ʉ yʉ́ tꞌʉhni Oją. Nɛ nuꞌʉ yʉ́ tꞌʉhni Oją, ngue i man rá thuhu ra Cristo, i jatho da ꞌuepʉ ja ra tsꞌoqui. 20 Nɛ nujʉ dyʉ ꞌyɛ̨cꞌyɛihʉ, dí øthʉ tenguꞌbʉ dyʉm pɛfihʉ bʉ ja rá ngu Oją. Nɛ tenguꞌbʉ xʉn ngu yʉm pɛfi bí ja bʉ. Nuꞌʉ ꞌda yʉ oro, nɛ yʉ tꞌaxi, pɛgue ra za ʉ ꞌda, nɛ ra jąhäi ʉ miꞌda. Nuꞌʉ ꞌda ɛ̨mmɛ pa nthoni, nuꞌʉ ꞌda hin ɛ mahyoni. 21 Nuꞌbʉ nꞌda ra jąꞌi da ꞌuesɛ bʉ ja ra tsꞌoqui, da gohi xʉn ho, tengu nꞌda ram pɛfi i pa nthoni, da mba ma jamansu, nɛ da zä di pɛpi xʉn ho rá hmu bʉ ja rá ngu. 22 Janangueꞌa dami ꞌuegue nangue yʉ tsꞌoqui di ho yʉ tsꞌʉntꞌʉ, pɛ gan ɛ̨hya gui ꞌyøtꞌ ran ho in nde Oją. Nɛ gui hyą ra tsꞌɛdi nangue guim bɛ̨n Oją, nɛ din ja nin huɛ̨cate, nɛ nꞌdatꞌa guim bɛ̨mhbʉ ʉ gä miꞌda i ɛ̨cꞌyɛi Oją, nangueꞌʉ mꞌbeꞌtꞌe yʉ́ mbʉi. 23 Nɛ gui ꞌuetho nangue ran juntꞌi im manꞌʉ toꞌo hin din ꞌyomfɛ̨ni, nguetho ja guepʉ da mbʉpʉ nꞌda ra sʉi. 24 Pɛ nu yʉ́ ꞌyɛ̨hɛ ra Hmu hingui sä din sʉi, pɛ din ja yʉ́ yembʉi nangue nꞌda ngu nꞌda ʉ, nɛ din ɛ̨hya din xänbate, nɛ da hyätꞌi xʉn ho ꞌbɛꞌa da tꞌørpe. 25 Nɛ nuꞌbʉ ꞌbʉꞌa nꞌda nꞌdanꞌyo im bɛ̨ni, jante thoho gui ꞌyuti, xøhma tho Oją di japi di päh rá mbʉi, da zøni da bą a majuąni. 26 Nɛ da dįn ran ꞌyomfɛ̨ni xʉn ho bʉya, nguetho da yąni nangue rá ꞌdihi ra zįthu xí bɛntꞌi, mín nde a ra zįthu xtá ꞌyørpa rá pähä.