I jatho dam fähmbʉ nangueꞌʉ yʉ tsꞌomꞌbäi
3
Nuꞌi Timoteo, dami pądi ꞌbɛꞌa din ja. Ba ɛ̨pʉ yʉ pa xʉn hɛ̨i, nguetho dim ꞌbʉh yʉ tsꞌomꞌbäi. 2 Nguetho din huɛ̨c zɛhɛ, nɛ høntꞌa ra mbɛti da nde. Nɛ ná yątꞌa, nɛ din ꞌyɛ̨zɛhɛ, nɛ din sante, da mbɛstaꞌa ꞌbɛꞌa i xih rá ta nɛ rá mbe, nɛ hinguim bɛ̨n ra mate bi tꞌørpe, nɛ hingui numansu Oją. 3 Nɛ hin din ja yʉ́n huɛ̨cate, nɛ njąmꞌbʉ din hoh yʉ́ mbʉi, nɛ høntꞌa go ꞌbɛꞌa da xih yʉ́ mijąꞌihʉ, nɛ øzɛhɛ yʉ́ pähä zɛhɛ, nɛ njoꞌo to i su, nɛ i sanꞌʉ i øtꞌ ran ho. 4 Nɛ yʉ ząndatetho, nɛ hingam ꞌbɛ din ꞌyomfɛ̨ni ꞌbɛꞌa da ꞌyøtꞌe. Nɛ mbɛ̨ni ma guesɛ, nɛ di ho rán johya ra ximhäi xinda gue rá pähä Oją. 5 I ja yʉ́n tꞌøtꞌe tengu yʉ́ tꞌɛ̨cꞌyɛi, pɛ hingui nde da hyąn rá tsꞌɛdi Oją ʉ. Pɛ gui ꞌuegue nangueꞌʉ. 6 Nɛ i pa bʉ ja yʉ ngu, i hätꞌ yʉ xisu, i xifi ꞌdaꞌangu da ꞌyøthʉ ngueꞌʉ yʉ xisu hinguin zaqui yʉ́ mbʉi, ngueꞌa xʉn ngu yʉ́ tsꞌoqui i tu. Nɛ manꞌda ní tsꞌixpʉ ja ra tsꞌoqui. 7 Nɛ da ꞌyømanho ꞌbɛꞌa gä ním hma da sifi nɛ thocpa tho din xädi pɛ njąmꞌbʉ da bą a majuąni. 8 Tengu mi øtꞌʉ ra Janes nɛ ra Jambres, ngueꞌa mim bądi ʉ, nɛ midín sʉhmbʉ ra Moisés, ngue rá pøngahyą Oją. Nɛ ngutho i øtꞌ yʉn ꞌyohʉ ya, din sʉhmbʉ a ram hma majuąni. Nɛ bi tsꞌon yʉ́n ꞌyomfɛ̨ni, nɛ bim ꞌbɛdi nangueꞌa ra ꞌyu majuąni. 9 Pɛ hingui ngu yʉ pa da hyätꞌi, nguetho gätho da tꞌuti nte ní mbatꞌʉ yʉ́m hma, tengu bin japꞌʉ yʉ bądi ngue ra Janes nɛ ra Jambres.Rán zɛgui ran zofo
10 Pɛ nuꞌi Timoteo, gá tɛnni ꞌbɛꞌa dá xänꞌnaꞌi. Nɛ guí pądi ꞌbɛꞌa dám ꞌbʉcä, nɛ guí pądi hanja dá øtꞌä a. Guí pądi ꞌbɛꞌa dí ɛ̨cꞌyɛigä, nɛ gán nu njąmꞌbʉ dán xømbʉigä. Nɛ guí pądi ja man huɛ̨cate. 11 Nɛ guí pądi ɛ̨mmɛ bi mba ma ʉgui, nɛ gán nu ꞌbɛꞌa mán ʉnbi dá hätꞌä. Nɛ guí pądi ꞌbɛꞌa gätho dá thocä bʉ Antioquía, nɛpʉ Iconio, nɛpʉ Listra, ngue nu yʉn ʉcpi dá nugä. Pɛ Oją bi yąngui nangue gätho ʉ. 12 Nɛ majuąni dí xiꞌi, toꞌo gätho da nde nꞌdatꞌa ra Cristo da dɛnni, da mba ma ʉcpi ʉ. 13 Nu yʉ tsꞌomꞌbäi nɛ yʉ hyäte, manꞌda manꞌda xʉn tsꞌo ꞌbɛꞌa da ꞌyøtꞌe. Nɛ ꞌda xtín hyäthoho. 14 Pɛ nuꞌi, dami thoqui ꞌbɛꞌa gán xädi, guí pądi gue majuąni a, gue guí pądi toꞌo bi xänꞌnaꞌi. 15 Nɛ gueꞌbʉ go gmín tꞌʉhni, gá pąh rá tꞌohni Oją, i ja rá tsꞌɛdi bi bɛ̨nꞌniꞌi gá däp ni mbʉi ra Jesucristo, nɛ gán yąni. 16 Gätho rá tꞌohni Oją bi bɛ̨nba Oją nangue rá mbʉi toꞌo bi ꞌyoꞌtꞌi. Nɛ mahyoni di jajʉ ga pąhmbʉ ꞌbɛꞌa rán ꞌyomfɛ̨ni Oją, nɛ da xijʉ ꞌbʉ hinga gueꞌa dí øthʉ, nɛ gueꞌa dí pärca ma mbʉihʉ a, nɛ da xängahʉ ran ho ga øthʉ. 17 Janangueꞌa nte di ꞌbɛ a rá mbɛfi Oją, da zä bʉ da ꞌyøtꞌe ꞌbɛꞌa gätho xʉn ho.