4
Janangueꞌa dí xiꞌi gra Timoteo, Oją in nujʉ, nɛ ra Jesucristo, nuꞌa i jatho ba pengua da ꞌyøtꞌ ran tsꞌʉtꞌabi, di juąnbą ʉ ꞌbʉi nɛꞌʉ xʉn du. In nujʉ, janangueꞌa ɛ̨mmɛ dí xiꞌi: 2 Dami mampꞌa rám hma, ɛ̨mmɛ gan ɛ̨hya guim ma, hønbʉ go hapʉ nɛ høntꞌa go ní ora, pɛ guehma gui xifi nꞌda ngu nꞌda yʉ jąꞌi. Dami hɛcpa yʉ dąditsꞌoqui, japi da ꞌyɛꞌtsꞌ yʉ́ tsꞌoqui, nɛ gui zɛrpa yʉ́ mbʉi bʉya. Nɛ jante thoho gui xänbi nɛ hin gan xømbʉi. 3 Gui hyumbi nguetho ba ɛ̨pʉ yʉ pa njon da nde da ꞌyøꞌa ram hma di hocpa yʉ́ mbʉi, pɛgue da zonhꞌnʉ miꞌda yʉ xänbate, da man ʉ ꞌda yʉm hma manꞌda di hosɛ. 4 Da goh yʉ́ mbʉi nangueꞌa majuąni, nɛ da dɛnꞌnʉ yʉm hma him majuąni. 5 Pɛ nuꞌi thocpa thoho gan ꞌyomfɛ̨ni xʉn ho. Dami hyätꞌ yʉn ʉnbi, dami jąꞌtsꞌi xʉn ho a ni ꞌbɛfi, nangue rán ho maꞌdaꞌyo ra Jesucristo. 6 Nɛ nugä, mi tsꞌʉtho da zøn ra pa da guah ran tꞌunni nangue ma te dadí un Oją, da zøn ra ora ga pøngä ua, ngue ga tu. 7 Bi gua a ran tąha dá øtꞌä ya nangueꞌa ran tąha xʉn ho, nɛ bi gua a ra ꞌdihi dá øtꞌä. Dá jamansu ma ꞌbɛfi nangue ma tꞌɛ̨cꞌyɛi dá øtꞌe. 8 Nɛ nuya bí jabʉ a ran ho di ꞌdacä ra hoga Inspector, ngue rán thɛui a ran ho dá øtꞌä. Nɛ di ꞌdacä ꞌbʉ bi zøn ra pa. Nɛ hinga høngdä, nɛ gätho ʉ miꞌda gue i xønni ba ɛ̨h ra Hmu, nɛꞌʉ gätho din tꞌun ran ho ʉ.Bi mba ma bɛ̨nbi ra Timoteo
9 Nɛ nuꞌi, Timoteo, dami ꞌyøtꞌ ra tsꞌɛdi gua ɛ̨cua nꞌdihi. 10 Nguetho nu ra Crescente bi mba bʉ Galacia, nɛ ra Tito bi mba bʉ Damacia, nuꞌa go ra Demas bi mbasɛ bʉ ra hnini Tesalónica, ngue bi ho ra ximhäi in nu ya. 11 Høntꞌa ra Lucas dí ꞌbʉꞌbe ua. Bá si a ra Marcos ꞌbʉ guá ɛ̨hɛ, nguetho ga hongua a. 12 Nɛ dá pɛnh pʉ ja ra hnini Éfeso a ra Tíquico. 13 Pɛ nuꞌbʉ guá ɛ̨hɛ, gua cąngui tsꞌʉ ma coto dá sopʉ Troas bʉ bí ꞌbʉh ra Carpo, nɛꞌʉ ma libro gua cąngui tsꞌʉ, pɛ manꞌda jatsꞌɛdi gua cąnga yʉ søcuą hinga ntꞌoꞌtꞌi. 14 Nu ra Alejandro ra ꞌyøtꞌacobre, xʉn tsꞌo ꞌbɛꞌa bi ꞌyørque. Oją di cospi nangue yʉ́n tꞌøtꞌe. 15 Damim fädi hin da ꞌyøtꞌeꞌe tengu bi ꞌyørcä, nguetho ɛ̨mmɛ bi gorca ma nde ꞌbʉ mán yą. 16 Nuꞌbʉ rá mbʉdi bi mba ma juąngui njom bi mbäxcagui, pɛ gätho bi hyɛga thoho. Oją di punba ʉ. 17 Pɛ Oją dám ꞌbäꞌbe nɛ bi zɛrca ma mbʉi, janangueꞌa dá jąꞌtsꞌi dá manꞌa rám hman bʉ bí ꞌbʉꞌʉ hing yʉ judío. Nɛ Oją bi mbäxqui bi yąngui nangue yʉ́ nde yʉ zate. 18 Nɛ Oją da yąngui nangue gätho ꞌbɛꞌa xʉn tsꞌo, nɛ ꞌbex da zixca bʉ mahɛ̨tsꞌi bʉ di manda. Ga ɛ̨spahʉ Oją gätho yʉ pa maząi. Nɛ høntꞌa gam bɛ̨mhbʉ a ya.
Yʉn zɛngua rán zɛgui
19 Dami zɛnguagui tsꞌʉ ra Prisca, nɛꞌa rá ndø, nuꞌa ra Aquila, nɛꞌʉ ꞌbʉpʉ rá ngu ra Onesíforo. 20 Nu ra Erasto bí copʉ Corinto. Nuꞌa ra Trófimo dá sopʉ Mileto ngue xʉn ʉ. 21 Dami ꞌyøtꞌ ra tsꞌɛdi gua ɛ̨ ꞌbʉ hin ní yʉtꞌ yʉ pa xʉn sɛ. I pɛnhꞌna ran zɛngua gätho yʉ cu i ꞌbʉcua, nu ra Eubulo nɛ ra Pudente, nɛ ra Lino, nɛ ra Claudia, nɛ gätho miꞌda yʉ cu ꞌbʉcua, gätho i pɛnhꞌna ran zɛngua. 22 Nu ma Hmuhʉ ra Jesucristo da mbäxꞌa ni mbʉi, nɛ di ꞌda ahʉ rá mate Oją. Nɛ høntꞌa dá xiꞌa ya.