Ra Tito din xänbate nangue ra hoganxädi
2
Pɛ nuꞌi gra Tito, dami xänbi ꞌbɛꞌa nín tꞌøtꞌe rán thɛui a ra hoganxädi. 2 Nu yʉ zí ndø, dami xifi hin din įti, nɛ da ꞌyøtꞌe ngue da hnumansu, nɛ da bɛ̨ni xʉn ho ꞌbɛꞌa da ꞌyøtꞌe, nɛ da ꞌyɛ̨cꞌyɛi xʉn ho, nɛ da ꞌyøtꞌ ran huɛ̨cate, nɛ hin din xømbʉi. 3 Nɛꞌʉ yʉ zí bømbe, dami xifi da numansu Oją hapʉ din ꞌyo, nɛ njon di cꞌąmanꞌʉ, nɛ xín dim mihni, nɛ da ꞌyuh ra hogaꞌyu. 4 Nɛ nu yʉ zí bømbe da xänba yʉ hmute di huɛ̨c yʉ́ ndø nɛ yʉ́ tꞌʉhni. 5 Nɛ da xänba nꞌda ran ꞌyomfɛ̨ni xʉn ho, hin din ꞌyomtꞌɛ̨ni, nɛ di jamansu bʉ ja yʉ́ ngusɛ, din ja ra yembʉi, nɛ da ꞌyøtꞌa da xih yʉ́ ndø, nꞌdamhma njon da zä da man ran tsꞌo nangue rám hman Oją. 6 Nɛ nuꞌʉ yʉ tsꞌʉntꞌʉ, gui xifi din ꞌyomfɛ̨nisɛ tsꞌʉ. 7 Nɛ nuꞌi Tito, dami ꞌyutꞌʉ miꞌda ꞌbɛꞌa gätho guí øtꞌe, ngue dim ꞌbʉmanho. Nɛ nꞌdatꞌa guim bɛ̨ni ngue gui xänbi ꞌbɛꞌa majuąni, nɛ gui ꞌyøtꞌe ngue da hnumanhoꞌi ꞌbʉ guín xänbate. 8 Nɛ ɛ̨mmɛ xtán ho ꞌbɛꞌa gätho guim ma, nꞌdamhma nte da thįnꞌna nim hma. Nɛ da mbɛꞌtsꞌ yʉ́ sä toꞌo nde da zʉjʉ, nɛ hin hapʉ dí mbʉꞌa ꞌbɛꞌa da ma. 9 Nɛꞌʉ yʉ ꞌyɛ̨hɛ i ꞌbʉpʉ, dami xifi da ꞌyøtꞌe gätho i xih yʉ́ hmu, nɛ hin da dąti, nɛ mpähä thoho da ꞌyøtꞌa i sifi. 10 Nɛ hin da bɛ̨pi ꞌbɛꞌa pɛꞌtsꞌ yʉ́ hmu, pɛ da ꞌyøtꞌa gätho in numanho yʉ́ hmu. Nɛ nuꞌbʉ gätho din jabʉ da ꞌyøtꞌe, gueꞌa dí nɛcmanho ram hma nangue ma yąntehʉ Oją. 11 Nguetho bi nɛqui rá mate Oją ngue in nde di pøꞌʉ gätho ꞌbʉcua ja ra ximhäi. 12 Nɛ nu rá mate Oją di bɛ̨ngahʉ ga hɛhmbʉ ran tsꞌomꞌbäi, nɛ ga hɛhmbʉ ma pähä zɛhɛhʉ. Nɛ di bɛ̨ngahʉ ga sąmzɛhɛ ma mbʉihʉ nɛ ga øthʉ ran hocjąꞌi, nɛ gan numansuhʉ Oją gätho yʉ pa dí ꞌbʉhmbʉ ua ja ra ximhäi. 13 Nɛ di bɛ̨ngahʉ ga tømhbʉ ja gueꞌbʉ bi nɛqui a ran johya dí tømhbʉ, ngue di nɛqui a ma Ojąhʉ ra Jesucristo tąte tho rá tsꞌɛdi, nɛ ma yąntehʉ a. 14 Nɛ bin däsɛ a ngue di ꞌbɛrcahʉ gätho man tsꞌomꞌbäihʉ, nɛ da mberca ma mbʉihʉ, da ꞌyøtꞌe ngue yʉ́ tꞌʉhni zɛhɛgahʉ Oją, nɛ di ɛ̨hyagahʉ nangue ran ho ya. 15 Nɛ guehna i ja ua gui xänba bʉya. Dami xänbi, gui ꞌyomfɛ̨nip yʉ cu, nɛ gui hɛcpi, nguetho bin ꞌdaꞌa ran tꞌɛ̨di xʉn ho gui ꞌyøtꞌe. Nɛ o guidí japi da mbɛstaꞌa nim hma.