I sih ra Tito ndaꞌa nín zofo da xänba yʉ ꞌyɛ̨cꞌyɛi
3
Nɛ nuꞌi gra Tito, dami bɛ̨nba ʉ yʉ cu ngue da numansu ra tsꞌʉtꞌabi, nɛꞌʉ yʉ́m fätsꞌihʉ ra tsꞌʉtꞌabi gätho da numansu. Nɛ hin da ꞌyørpa ram fɛꞌtsꞌi, pɛgue mpähä thoho da ꞌyøtꞌe ꞌbɛꞌa gätho xʉn ho. 2 Nɛ gui xifi njon ga cꞌąmanꞌʉhʉ, nɛ hin dan junthʉ, pɛ ma pähä zɛhɛhʉ da thącpahʉ. Nɛ din jajʉ ra yembʉi nangue gätho yʉ jąꞌi. 3 Guim bɛ̨mhbʉ ngue nɛjʉ dán tontohʉ mámꞌbɛtꞌo, nɛ mi jasɛ man tꞌɛ̨dihʉ, nɛjʉ dán hyäzɛhɛhʉ, nɛ gätho dán ꞌyɛ̨hɛ̨hʉ rá tsꞌoqui ra ximhäi. Nɛ dá ꞌbɛh ma pahʉ nangue man tsꞌomꞌbäihʉ dá øthʉ, nɛ dá sɛyabahʉ ma mijąꞌihʉ. Mí tsꞌanjʉ nɛ xim mí santehʉ. 4 Pɛ bi zøn ra pa bi nɛqui rá mate Oją ma yąntehʉ, ngue bi ꞌyørpa ran huɛ̨cate ʉ yʉ jąꞌi. 5 Nɛ bi yąnjʉ Oją. Pɛ hin nangue yʉn tꞌøtꞌe xʉn ho dá øthʉ, pɛ bi yąnjʉ nangue rán huɛ̨catesɛ ꞌbʉ má ømanhohʉ a. Bi ꞌdajʉ ra ꞌdaꞌyote ꞌbʉ mi mberca ma mbʉihʉ, nɛ dí ꞌbʉhmbʉ maꞌdaꞌyo nangue rá Hogandąhi. 6 Nɛ bi ꞌdajʉ xʉn ho rá Hogandąhi nꞌyoui xʉn gu rán jąpi nɛ rá tsꞌɛdi nguetho ra Jesucristo ma yąntehʉ a. 7 Ngue bi hogahʉ nangue rá mate, janangueꞌa ꞌdarbʉ dam ꞌbʉhmbʉ nangue ra temaząi, nɛ gueꞌa dí tømhbʉ a ya. 8 Nɛ gätho majuąni na im mangua. Gui hyąh ni mbʉi gui xänbi xʉn ho yʉ ꞌyɛ̨cꞌyɛi ꞌbʉpʉ, janangueꞌa da bɛ̨ni ɛ̨mmɛ da hyumbi da ꞌyøtꞌa ran ho. Nguetho xʉn ho a, nɛ da mbäx yʉ́ mijąꞌihʉ bʉya. 9 Pɛ o guidín junthʉ nangueꞌʉ yʉm hma nte ní mbatho, nɛ hinguin junthʉ nangue ꞌbɛꞌʉ yʉ́ thuhu ʉ yʉm bombøta mayaꞌbʉ. O guídín sʉhmbʉ nangue yʉn tꞌɛ̨di midí un Oją yʉ judío, nguetho säti thoho ꞌbʉ dán sʉhmbʉ ʉ. 10 Nuꞌbʉ ꞌbʉ a nꞌda nꞌdanꞌyo yʉm hma im ma ní dʉpꞌahʉ yʉn juntꞌi, dami hɛcpi. Nꞌdandį o yondį gui hɛcpi. Pɛ nuꞌbʉ hin da ꞌyøde, gui hyɛthohʉ a. 11 Nguetho nuꞌa xiꞌahʉ yʉm hma ní dʉpꞌahʉ yʉn juntꞌi, xí bøm bʉ ja rá ꞌyu Oją a, nɛ øtꞌ yʉ tsꞌoqui, nɛ da nusɛ bʉ ꞌbɛꞌa xí ꞌyør bʉya.Manꞌda i xih yʉ́ amigo ra Pablo
12 Dí ɛ̨na ga pɛnhna ra Temio o gue ra Tíquico. Nuꞌbʉ bi zøm bʉ, ꞌyørqui tsꞌʉ ra mate gua ɛ̨ꞌa nꞌdihi, dan cꞌatꞌui bʉ ra hnini Nicópolis. Nguetho dín nde dam ꞌbʉhmbʉ bʉ ꞌbʉ bin ja yʉ pa xʉn sɛ. 13 Dami fätsꞌi xʉn ho a ra Zenas, nuꞌa im pøngahyą nangue yʉn tꞌɛ̨di. Nɛꞌa ra Apolos, dami zɛdi da dįnꞌa mahyoni ngue da hyąx ꞌbʉ bi mbɛ bʉ nꞌdanni. 14 Nguetho nu yʉ cu da bądi ngue dim pɛfi xʉn ho nangue yʉ́ ꞌbɛfi zɛhɛ, nꞌdamhma da zä da mbäx ʉ miꞌda di ꞌbɛꞌa mahyoni. 15 Dami zɛngua gahe tsꞌʉ ʉ bí ꞌbʉpʉ, ngueꞌʉ ma mi ꞌyɛ̨cꞌyɛihʉ, ngue ꞌda xtán huɛ̨ctahʉ. Nɛ dí äp Oją da ꞌyɛntsꞌahʉ rán jąpi gätho ahʉ. Nɛ høntꞌa dí xi ahʉ ya, nɛ høntꞌa gam bɛ̨mhbʉ a ya.