SANTIAGO
Ra søcuą bi ꞌyoꞌtꞌa ra Jacobo Santiago
Ran zɛngua
1
Nugä drá Jacobogä, rá ꞌyɛ̨hɛ̨gä Oją nɛ ma Hmuhʉ ra Jesucristo. Nɛ hønbʉ go hapʉ gá mbähä nꞌda ngu nꞌda ahʉ, dí zɛngua ahʉ ma mɛni ahʉ, ngue nꞌdatꞌʉ mam bombøtahʉ ʉ ꞌdɛꞌmayoho yʉ́ tsꞌʉntꞌʉ ra Israel.Di ꞌdajʉ ran ꞌyomfɛ̨ni Oją
2 Ma zi cu ahʉ, ndeꞌbʉ dan johyahʉ ꞌbʉ dí sähʉ yʉn ʉnbi, høntꞌa go man ʉnbi dín nuhʉ. 3 Nguetho dí pąhmbʉ nuꞌbʉ da tsꞌäc ma tꞌɛ̨cꞌyɛ̨ihʉ, gueꞌa ní jajʉ ga häthʉ xʉn ho a. 4 Pɛ i jatho ga häthʉ xʉn ho nɛ hin gan suhʉ, nɛ gueꞌa dín te ma mbʉihʉ a, nɛ di hąjʉ xʉn ho ra tsꞌɛdi, nɛ nte ga ꞌbɛhmbʉ bʉya. 5 Pɛ nuꞌbʉ hin dí pąhmbʉ ndaꞌa xʉn ho ga øthʉ, ga äfʉ Oją ran ꞌyomfɛ̨ni nɛ di ꞌdajʉ a. Nguetho di unni xʉn ho toꞌo da ꞌyäpi, nɛ hin di japi da mbɛꞌtsꞌ rá sä nꞌda. 6 Pɛ jatho nꞌdatꞌa gam bɛ̨mhbʉ ꞌbʉ ja ꞌbɛꞌa dí äfʉ, nɛ hinga ꞌdahmaꞌdanꞌyo gam bɛ̨mhbʉ. Hin ga øthʉ tengu ra tꞌøthe bʉ ja ra dądądehe, hønbʉ go hapʉ ní ꞌyɛn ran dąhi. 7 Nu ra jąꞌi i øtꞌe tengu a, sä im bɛ̨ni di unꞌna i äp a Oją, pɛ nte di unni. 8 Nguetho ꞌdahmaꞌdanꞌyo im bɛ̨nsɛ, nɛ hingui sä nꞌdatꞌa da ꞌyøtꞌe. 9 Pɛ ɛ̨mmɛ di johya nꞌda zi hyoya ꞌyɛ̨cꞌyɛ̨i, nguetho i pądi ɛ̨mmɛ xʉn ngu di muui bʉ nan nu Oją. 10 Nɛꞌa ra mɛmbɛti ꞌyɛ̨cꞌyɛ̨i, ɛ̨mmɛ di johya ꞌbʉ mi bądi hinga gueꞌa rá mbɛti ní numanho Oją a, ngue nu rá mbɛti tengu yʉ́ døni ʉ yʉ paxi i høe. 11 Ngue nuꞌbʉ xpám bøx ra hyadi ɛ̨mmɛ xʉm pa, di hmang yʉ paxi nɛ i høh yʉ́ døni bʉya, nɛ him man di nɛcmanho. Din jabʉ nꞌda ra mɛmbɛti ꞌbʉ høntꞌa ra mbɛti in numanho, madagueꞌbʉ di thoqui dim pɛfi, pɛ di ꞌbɛdi ꞌbɛꞌa gätho i pɛꞌtsꞌi.
Ga häthʉ ꞌbʉ bi tsꞌäjʉ
12 Nuꞌbʉ ga häthʉ yʉn ʉnbi, dan johyahʉ bʉya. Nguetho nuꞌbʉ mi tsꞌäjʉ nɛ dá häthʉ, ya din ꞌdajʉ ra temaząi, tengu bi man Oją di ꞌdajʉ ꞌbʉ høntꞌa gam bɛ̨mhbʉ a.
Dím bɛ̨nsɛhʉ yʉ tsꞌoqui
13 Nuꞌbʉ ꞌbʉꞌa nꞌda da bɛ̨ni da ꞌyøtꞌa nꞌda ra tsꞌoqui, pɛ hin da ꞌyɛ̨na Oją bi bɛ̨nbi. Nguetho xʉn ho Oją nɛ hingui xifi da ꞌyøtꞌ ra tsꞌoqui nꞌda ra jąꞌi, nɛ xín da zä da si Oją da ꞌyøtꞌ ra tsꞌoqui. 14 Pɛ nꞌda ngu nꞌda yʉ jąꞌi ꞌbʉ im bɛ̨ni da ꞌyøtꞌ yʉ tsꞌoqui, pɛ bin ꞌyørpazɛhɛ nangue rán ꞌyomfɛ̨ni sɛ. 15 Nɛ nuꞌa ꞌbɛꞌa bi numanho sɛ, nɛ nuꞌbʉ mi bɛ̨ni da ꞌyøtꞌe, nɛ gueꞌa dí mbʉxca yʉ tsꞌoqui rá mbʉi a. Nɛ nuꞌbʉ mi ꞌyøtꞌʉ yʉ tsꞌoqui mi bɛ̨ni, nɛ manꞌda bi thoqui bi ꞌyør bʉya, nɛ gueꞌa dí nu ran ʉnbi maząi a bʉya. 16 Ma zi cu ahʉ, hin dan hyäzɛhɛhʉ ꞌbʉ dí øthʉ yʉ tsꞌoqui, gueꞌa hin gam bɛ̨mhbʉ Oją di ꞌbɛcpahʉ. 17 Nguetho xʉn hotho ꞌbɛꞌa gätho di ꞌdajʉ Oją, nɛ høntꞌʉ gätho xʉn ho bí nɛxpʉ bí ꞌbʉ Oją, ngue bi zän yʉ nyotꞌi ua ja ra häi. Nuꞌʉ jaꞌbʉ di ꞌbɛh yʉ́n nɛqui ꞌbʉ xʉ ꞌbätꞌʉ, pɛ nu Oją njąmꞌbʉ di ꞌbɛh ran ho. 18 Rá pähä zɛhɛ Oją bi xąndgahʉ ꞌbʉ má hąmhbʉ rám hma majuąni, nɛ yʉ́ tꞌʉhni gahʉ a bʉya. Janangueꞌa manꞌda xʉn hojʉ xinda gueꞌʉ miꞌda gätho bi ꞌyøtꞌe.
Dan xähmbʉ ram hma nɛ ga øthʉ yʉ́n thɛhʉ
19 Gueꞌa dí pąhmbʉ a, ma zi cu ahʉ. Janangueꞌa dan ɛ̨hya dan xähmbʉ a rám hma, xinda gueꞌbʉ go dan yąsɛhʉ, ogue ga ɛ̨mhbʉ go dí pąsɛhʉ ngue dan junthʉ. 20 Nguetho nuꞌbʉ dadín junthʉ, hingui sä ga øthʉ ꞌbɛꞌa nde Oją. 21 Pɛ ga ɛshʉ a ná øthʉ yʉ tsꞌoqui, nɛ ran tsꞌo ząi dá bɛ̨mhbʉ. Nɛ hin dan ꞌyɛ̨zɛhɛhʉ. Janangueꞌa da zä ga cʉꞌtꞌ ma mbʉihʉ a ram hma, tenguꞌbʉ nꞌda ra hmudä da thupʉ, nɛ din te bʉ. Nɛ gueꞌa dí pøcpa ma mbʉihʉ a bʉya. 22 Pɛ hinga høntho dan xäthohʉ ram hma. Nguetho dán hyäzɛhɛhʉ ꞌbʉ dím bɛ̨mhbʉ hinꞌyʉ manꞌda ga øthʉ. Pɛ i jatho thocpa thoho ga øthʉ yʉ́n thɛhʉ a ram hma dadín xähmbʉ. 23 Nguetho nuꞌbʉ dí ɛ̨mhbʉ dadín xähmbʉ ram hma, nɛ hin dí øthʉ yʉ́n thɛhʉ, dadí pumbɛ̨ni thohʉ a dán xähmbʉ ꞌbʉ. Tenguꞌbʉ dí hɛ̨thʉ ran hyɛ̨dä ma hmihʉ, nɛ hin dí ząmhbʉ bʉ. 24 Dá nuhma a ma hmihʉ, pɛ ꞌbex dá pumbɛ̨nihʉ ꞌbʉ má ꞌuehmbʉ. 25 Pɛ nuꞌbʉ dan ząmhbʉ a ra ꞌdaꞌyomhma, gueꞌa di zɛjʉ ga øthʉ yʉ́n thɛhʉ a. Nɛ nuꞌbʉ ząi dí øthʉ a, nɛ hin dí pumbɛ̨nihʉ a, di jącpahʉ Oją bʉya nangue ꞌbɛꞌa gätho dí øthʉ. 26 Nuꞌbʉ sä ɛ̨na ørpa rá ꞌbɛfi Oją nꞌda, nɛ hin di jamansu ꞌbɛꞌa ma, din hyäzɛhɛ ꞌbʉ, nɛ nte ní mbatꞌa ní ꞌyørpa rá ꞌbɛfi Oją ꞌbʉ. 27 Pɛ nuna majuąni rá ꞌbɛfi Oją ma Tahʉ da numanho ꞌbʉ ga fäxhʉ yʉ hyoya tꞌʉhni, nɛ yʉ xisu xʉn du yʉ́ ndø, ngue in nu ran ʉnbi. Nɛ ndeꞌbʉ dam fäsɛhʉ hin di tsꞌonga man ꞌyomfɛ̨nihʉ rán tꞌøtꞌe ra ximhäi.